Morwasinke no kwamena “Kristusa”?

‘Ogu ga hara kukwama nge, a lidine ntani, a kwame nge nkenye ezuva.’—RUK. 9:23.

1, 2. Morwasinke ya karera nomulyo kwetu mokukonakona eyi natu kwamena “Kristusa”?

OMU tupu ayi mu hafesa Jehova pokumona wovape novanonagona mombunga zovakareli vendi vepevhu! Ngomu ono kutwikira kulironga Bibeli nokuza nkenye apa komapongo goSikriste nemekuro lyoge lyousili ou atu gwana moNonkango daKarunga, wa hepa kugazadara ko unene kezigido lyaJesus: ‘Ogu ga hara kukwama nge, a lidine ntani, ta damuna mudigo gwendi nkenye ezuva, ta kwama nge.’ (Ruk. 9:23, hetakanesa NW.) Jesus kuna kutanta asi kulidina nyamoge ntani nokukara musikuli gwendi kuna kara sininke esi wa hepa kurugana. Ayo ya kara nomulyo kwetu, mokukonakona eyi natu hepera kukwama “Mesiyasa” ndi Kristusa.—Mat. 16:13-16.

² Ngapi kuhamena vamwe vetu ava va tameka kukwama nare sihonena saJesus Kristusa? Kuna kututumangeda asi tu yi rugane ‘kupitakanena.’ (1 Tes. 4:1, 2) Yi kare asi ntaantani tupu tuna kutambura usili ndi nare, kukoneka nokonda edi natu kwamena Kristusa ngayi tu vatera mokusikisa mo etumangedo lyaPaurusa ntani nokukwama Jesus kupitakanena nkenye ezuva. Tu zeni tu konakone nokonda ntano edi natu harera kukwama Kristusa.

Mokudiva nawa-nawa Jehova

3. Mononkedi musinke mbali natu vhura kudiva Jehova?

³ Apa mupositoli Paurusa ga uyungisire Vaatena “ta ka sikama komeho zosigongi soAreyopagi”, ta tanta asi: ‘Karunga ga panga nare yiruwo nonomururani domauhingiro gawo. Kwa yi ruganena asi va papare Karunga, mpamwe ngava mu gwana va mu gume, mpili ngomu ga dira kukara ure nose natuvenye.’ (Yirug. 17:22, 26, 27) Ose kuvhura kupapara Karunga ntani nokuyamudiva nawa-nawa. Pasihonena, apa atu tara kounsitwe nokuteda ko ose kulirongera ko yoyinzi kuhamena yikara nononkondo daKarunga. (Rom. 1:20) Jehova hena kwa lihorora mwene kupitira moNonkango dendi, Bibeli. (2 Tim. 3:16, 17) Moomu tuna ‘kugazadara nokuteda ko kwanayinye eyi ga rugana,’ yimo ngatu diva nawa-nawa Jehova.—Epis. 77:12.

4. Ngapi omu kukwama Kristusa nayi tu vatera mokudiva nawa-nawa Jehova?

⁴ Nkedi zimwe zongwa mokudiva nawa-nawa Jehova kuna kara mokukwama Kristusa. Gazadara ko tupu kouyerere ou ga kere nawo Jesus kumwe noGuhwe “awo uzuni simpe patupu.” (Joh. 17:5) Age yige “ntundiliro zoyisitwa nayinye yaKarunga.” (Ehor. 3:14) Jesus, “mbeli muhoverera goyisitwa nayinye,” kwa parukire siruwo sosire meguru kumwe noGuhwe, Jehova. Komeho zokuwiza apa pevhu, Jesus kwa rugene yoyinzi kupitakana tupu kukara kumwe noGuhwe. Jesus kwa kere kaume kaKarunga, nga rugana kumwe noMunankondo nadinye moruhafo, nokutulisa po malikwatakano gomanene geharo ganarunye. Jesus kapi tupu ga nomenenene nkedi zoGuhwe zokurugana yininke, nokukoneka malizuvho noyikara yawo, nye age kwa nomenenene nokutambura nayinye eyi ga lirongere kuhamena oGuhwe. Ngoyitundwamo Munwa ogu gomulimburukwi kwa ya fene ngwendi oGuhwe, yiyo Bibeli a zi mu tumbwire asi ‘sihwi saKarunga ogu a dili kumoneka.’ (Koros. 1:15) Pokukwama nawa Kristusa, nose kuvhura kudiva nawa-nawa Jehova.

Mokuhonena Jehova kupitakanena

5. Yisinke ngayi tu vatera mokuhonena Jehova kupitakanena, ntani morwasinke?

⁵ Ose kwa tu ‘unga mosihwi saKarunga, tu kare ngwendi yige,’ yipo nye twa kara nevhuliko lyokulikida yikara yaKarunga. (Gen. 1:26) Mupositoli Paurusa kwa tumangedere Vakriste asi ‘Karunga kwa mu hara. Omu heteke nye kukara moomu ga kara age.’ (Efe. 5:1, 2) Kukwama Kristusa kutuvatera mokuhonena Guhyetu gemeguru. Kwato gumwe ga vhulire kulikida nokufaturura nawa-nawa magano nomalizuvho noyikara yaKarunga kupitakana Jesus. Apa ga kere pevhu, Jesus kapi tupu ga divisire edina lyaJehova. Nye yige gelike hena ga vhulire kutulikida asi muntu musinke Jehova. (Resa Mateusa. 11:27.) Jesus kwa yi likidire eyi kupitira mononkango nomoyirugana nemerongo nomosihonena sendi.

6. Yisinke aga horora marongo gaJesus kuhamena Jehova?

⁶ Kupitira momarongo gendi, Jesus kwa likidire eyi ga hepa ko Karunga kwetu ntani nomu a lizuvhu kuhamena vakareli vendi. (Mat. 22:36-40; Ruk. 12:6, 7; 15:4-7) Pasihonena, konyima zokutemwinina simwe soYipango Murongo asi: “Walye o hondere,” Jesus kwa fatwilire mutaro gwaKarunga kweyi ayi horoka momutjima gomuntu komeho a ka hondere. Age kwa tente asi: “Nkenyogu a tara mukadi, nye a mu dovaukire, nare ana mu honderere momutjima.” (Ex. 20:14; Mat. 5:27, 28) Vafalisayi kwa pirwire veta zaKarunga nokutanta asi: “O hare mukweni, to nyenge gonkore zoge,” nye Jesus kwa horwere magazaro gaJehova pokutanta asi: ‘Omu hare wonkore zeni, one tomu kandererere mo ava ava mu hepeke.’ (Mat. 5:43, 44; Ex. 23:4; Lev. 19:18) Mokukwata egano magazaro nomalizuvho gaKarunga ntani neyi ga hepa ko kwetu kutuvatera mokumuhonena kupitakanena.

7, 8. Kupitira mosihonena saJesus, yisinke tuna lirongere ko kuhamena Jehova?

⁷ Kupitira mosihonena, Jesus hena ga horwere omu ga kara Guhwe. Apa atu resa moMavangeli omu Jesus ga fililire nkenda vahepwe nokunyokera varongwa vendi ava va tugumukilire vanonagona, ose kuvhura tu dive omu ava lizuvhu oGuhwe, ndi ngapi? (Mar. 1:40-42; 10:13, 14; Joh. 11:32-35) Gazara tupu omu yirugana yaJesus ayi tu vatere mokunongonona yikara yokulikarera yaKarunga! Yitetu eyi ga rugene Kristusa kulikida nonkondo dononene edi ga kere nado. Nye, narumwe si ga ruganesere nonkondo edi mokugwanena mo uwa wamwene ndi mokukoresa vapeke. (Ruk. 4:1-4) Monkedi omu ga tjidire mo varandesi montembeli kulikida unongo wendi kuhamena uhunga. (Mar. 11:15-17; Joh. 2:13-16) Marongo gendi nononkango donongwa edi nga ruganesa mokuguma nomutjima dovantu kwa likidire asi age “ga pita Saromo” moukonentu. (Mat. 12:42) Eharo eli ga likidire Jesus pokufira vapeke kwa li singonona nawa apa Bibeli azi tanta asi “nagumwe si ga kara neharo lyokupita lyogu.”—Joh. 15:13.

⁸ MunwaKarunga kwa fene nawa-nawa Jehova mwanayinye eyi nga uyunga neyi nga rugana, ano eyi ya mu ninkisire a tante asi: “Ogu ga mona nge, ga mona hena Tate.” (Resa Johanesa 14:9-11.) Yipo nye, nsene tu honena Jesus ose kuna kuhonena hena Jehova.

Jesus Mugwavekwa gwaJehova

9. Siruwoke ntani nangapi ga kere Jesus Mugwavekwa gwaKarunga?

⁹ Konakona eyi ya horokere momvhura 29 S.N. apa Jesus ga wizire kwaJohanesa Mukuhwi, age nomvhura dendi 30. “Jesus kwa pwa tupu kumukuhwa, makura ta zauka mo momema. Va tara ko, eguru lina mu zegurukire, makura ta mono Mpepo zaKarunga tazi mu hegumukire peguru lyendi.” Posiruwo sooso, age ta kara Kristusa ndi Mesiyasa. Posiruwo sooso hena, Jehova mwene ga divisire asi Jesus kwa kere Mugwavekwa gwendi, pokutanta asi: “Ogu yige Munwange ogu na hara, ga za nge komutjima.” (Mat. 3:13-17) Ee, konda musi kouwa eyi natu harera kukwama Kristusa!

10, 11. (a) Mononkedi musinke ntumbwisiso “Kristusa” va zi ruganesa mokutamba kwaJesus? (b) Morwasinke eyi natu divilisira asi ose kuna kukwama Jesus Kristusa?

¹⁰ Momaraka gokuhova aga va tjenge Bibeli, ntanto “Kristusa” kwa zi ruganesa mokutumbura Jesus mononkedi dokulisiga, ngwendi Jesus Kristusa, Kristusa Jesus ntani Kristusa. Jesus mwene ga hovere kuruganesa ntanto ezi asi “Jesus Kristusa. Apa ga kanderere koGuhwe age kwa tente asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Joh. 17:3) Ntanto ezi zedina lyaJesus kutanta asi Mugwavekwa gwaKarunga. Ano nsene kuna kara asi “Kristusa Jesus,” ntumbwisiso ezi kudemenena kosirugana sendi nye kapisi komuntu ko mwene. (2 Kol. 4:5, NW) Apa atu ruganesa ntumbwiso “Kristusa” pwazelike, ose kuna kudemenena kosirugana saJesus ngaMesiyasa getumbwidiro.—Yirug. 5:42.

¹¹ Yi kare asi monkedi musinke vana zi ruganesa ntumbwisiso “Kristusa” mokutamba kwaJesus, azo kudidilika usili ou womulyo: Nampili ngomu MunwaKarunga ga wizire pevhu ngomuntu nokuyadivisa mpango zoGuhwe, age kapi tupu ga kere muntuuntu tupu ndi muporofete; age kwa wizire a ya kare Mugwavekwa gwaJehova. Twa hepa kudivilisa asi ose kuna kukwama Mugwavekwa gwaJehova.

Jesus yige nzira zokutwara keparu

12. Nonkango musinke domulyo ga tanterere Jesus mupositoli Tomasa komeho tupu zonomfa dendi?

¹² Konda zimwe hena zomulyo zeyi natu kwamena Mesiyasa kwa zi tumbura mononkango daJesus edi ga tanterere vapositoli vendi wovalimburukwi, edi ga uyungire komeho tupu zonomfa dendi. Mokulimburura epuro lyaTomasa kuhamena eyi ga uyungire Jesus yokuza nokukavawapaikira mauturo, Jesus kwa tente asi: “Nyame nzira nousili nomwenyo. Nagumwe si a wiza kwaTate, age ga hana kupitira pwange.” (Joh. 14:1-6) Apa Jesus kwa uyungisire vapositoli vendi 11 wovalimburukwi. Age kwa va tumbwidilire uturo meguru, nye nonkango dendi simpe mulyo kwava va kara nehuguvaro lyomwenyo gwanarunye apa pevhu. (Ehor. 7:9, 10; 21:1-4) Morwasinke natu uyungira ngoso?

13. Mononkedi musinke ga kara Jesus “nzira”?

¹³ Jesus Kristusa yige “nzira.” Kutanta asi mwendi mwelike natu vhura kupitira mokuhedera Karunga. Eyi usili, morwa apa atu kanderere kupitira medina lyaJesus yipo atu vhuru kukara nehuguvaro asi Guhwe ngatu pa nayinye eyi ngatu mu hundira kuliza nompango zendi. (Joh. 15:16) Nampili ngoso, Jesus yige “nzira” hena mononkedi dapeke. Nonzo kwa gusa vantu kwaKarunga. (Jes. 59:2) Jesus kwa geve “mwenyo gwendi, gu kare sizoweseso sovanzi.” (Mat. 20:28) Ngoyitundwamo Bibeli kutanta asi: ‘Honde zaJesus Kristusa tazi tu kuhura kononzo nadinye.’ (1 Joh. 1:7) Yipo nye Munwa kwa gwanekedesesa vantu naKarunga. (Rom. 5:8-10) Ntudi tu ture epuro mwaJesus nokumulimburukwa ntani natu kara nelikwatakano lyewa naKarunga.—Joh. 3:36.

14. Monkedi musinke ga kara Jesus ‘usili’?

¹⁴ Jesus yige ‘usili’ kapisi morwa nga uyunga nokuparuka kuliza nousili nye morwa mauporofete gomanzi va tjanga kuhamena Mesiyasa kwa ya sikilire mo mwendi. Mupositioli Paurusa kwa tente asi: “Nkenye apa ga hulira matumbwidiro gaKarunga, Jesus yige esikiliro mo lyago nagenye.” (2 Kol. 1:20) Nampili ‘mundundumba goyininke yoyiwa yokomeho,’ ya kara moVeta zaMosesa kwa ya sikilire mo mwaJesus Kristusa. (Heb. 10:1; Koros. 2:17) MwaJesus yimo ga korera mauporofete nagenye, ntani ago kutuvatera tu kwate egano sirugana sendi, esi sa kara nomulyo mesikisomo lyositambo saJehova. (Ehor. 19:10) Mokugwanena mo uwa mesikiliromo lyositambo saKarunga kuhamena vantu, twa hepa kukwama Mesiyasa.

15. Monkedi musinke ga kara Jesus ‘mwenyo’?

¹⁵ Jesus yige ‘mwenyo’ morwa ga randa vantu nohonde zendi ntani mwenyo gwanarunye yiwo uhwi a gava Karunga kupitira “mwaJesus Kristusa, Hompa gwetu.” (Rom. 6:23) Jesus kuna kara hena ‘mwenyo’ kwava va fa. (Joh. 5:28, 29) Mokugwederera ko, gazara ko hena kuhamena eyi nga ka rugana ngoMupristeli goMunene mEpangero lyendi lyoNomumvho Eyovi. Age nga ka reta ezoworo lyanarunye kononzo nonomfa kovapangerwa vendi vepevhu.—Heb. 9:11, 12, 28.

16. Konda musinke twa kara nazo eyi natu kwamena Jesus?

¹⁶ Elimbururo eli ga pere Jesus Tomasa, kwa kara nomulyo gomunene kwetu. Jesus yige nzira nousili nomwenyo. Age yige ga tumine Karunga mouzuni yipo u ya parukire mwendi. (Joh. 3:17) Ntani nagumwesi gokuwiza koGuhwe ga hana kupitira mwendi. Bibeli za yi zeresa nawa-nawa asi: “Eparu kuligwana mwendi mwelike, yeeyi kutupu hena nampili muntu gumwe gwapeke mouzuni mudima, ogu ga pa Karunga edina lyokutuparura.” (Yirug. 4:12) Yipo nye, yi kare asi mosinke twa pulire, ayo ya wapa kwetu mokupura mwaJesus nokumukwama yipo tu ka gwane mwenyo.—Joh. 20:31.

Kwa tu pangera mokupurakena kwaKristusa

17. Morwasinke ya karera nomulyo kwetu mokupurakena kwaMunwaKarunga?

¹⁷ Peturusa naJohanesa naJakopo kwa mwene emoneko lyokulikarera. Posiruwo sooso, awo kwa zuvhire ezwi lina kutunda meguru asi: “Ogu Munwange ogu ga za nge komutjima, omu mu zuvhe!” (Ruk. 9:28, 29, 35) Ayo ya kara nomulyo asi tu limburukwe kompango zokupurakena kwaMesiyasa.—Resa Yirugana 3:22, 23.

18. Ngapi omu natu vhura kupurakena kwaJesus Kristusa?

¹⁸ Kupurakena kwaJesus kuna kwatere mo ‘kunwika meho getu kwendi nokumugazara.’ (Heb 2:1; 12:2, 3, hetakanesa NW.) Twa hepa ‘kupurakena nawa kwayeeyi’ a tu resa moBibeli nomoyimbapiratjangwa ‘yomukareli gokulimburukwa gonondunge’ ntani hena neyi atu zuvhu komapongo goSikriste kuhamena Jesus. (Heb. 2:1; Mat. 24:45) Ngononzwi dendi, tu tokomeneni mokupurakena kwaJesus nokumukwama.—Joh. 10:27.

19. Yisinke ngayi tu vatera mokukwama Kristusa nkenye apa?

¹⁹ Kuvhura yi tu tompoke mokukwama Kristusa nkenye apa nampili momaudigu ndi? Kuvhura tu yi rugane, nsene tu ‘kwama sihonena sononkango donongwa’ pokusikisa mo eyi atu lirongo ‘nepuro nekeharo eli twa kara nalyo momalikwatakano naJesus Kristusa.’—2 Tim. 1:13.

Yisinke ono lirongere ko?

• Morwasinke kukwama “Kristusa” ngayi tu vatera mokudiva nawa-nawa Jehova?

• Morwasinke kuhonena Jesus ya karera asi ose kuna kuhonena hena Jehova?

• Ngapi omu Jesus ga kara “nzira nousili nomwenyo”?

• Morwasinke natu purakenena koMugwavekwa gwaJehova?

[Efano pepenuno 28]

Marongo gaJesus kwa likidire magazaro gaJehova gokuzeruka

[Efano pepenuno 29]

Twa hepa kukwama noulimburukwi Mugwavekwa gwaJehova

[Mafano pepenuno 31]

Jehova kwa divisire asi: “Ogu Munwange . . . omu mu zuvhe”

[Edina lyomufaneki]

Globe: NASA photo