Kwaterera koruhafo moyiruwo yomaudigu — BIBILIYOTEKA ZOKOINTANETA

Kwaterera koruhafo moyiruwo yomaudigu

‘Navenye ava va ku huguvara Jehova, ngava hafa, tava lilikida narunye-narunye.’—EPIS. 5:11.

1, 2. (a) Yininke musinke yimwe yina kureta kukora kokunene naina? (b) Kugusa ko maudigu aga ava ligwanekere nago vantu navenye, yisinke va hepa kulididimikira Vakriste wousili?

NOMBANGI DAJEHOVA kuligwanekera nomaudigu aga ava ligwanekere nago vantu navenye. Sinzi sovantu vaKarunga kuhepa morwa ukorokotji noyita ntani nayimwe youhahungami. Yimpagwa noruhepo nomauvera ntani nonomfa kuretera vantu kukora kokunene. Mupositoli Paurusa kwa tjenge asi: “Twa diva asi unsitwe mudima kukema dogoro nantaantani ngesi, awo kuzuvha kukora ngwendi mukadi goporuzega.” (Rom. 8:22) Nose kuhepa hena morwa kudira kusikilira mo kwetu. Ngwendi hompa Ndafita gomosiruwo sanare, nose kuvhura tu tante asi: “Ame na pwire mo mononzo dange, mukumo gwado gomudigu guna ganda nge.”—Epis. 38:4.

² Kugusa ko maudigu aga ava ligwanekere nago vantu navenye, Vakriste wousili kusimba nomudigo davene. (Ruk. 14:27) Ngwendi Jesus varongwa vendi kwa va nyenga ntani kuvahepeka. (Mat. 10:22, 23; Joh. 15:20; 16:2) Yipo nye, kukwama Kristusa kwa hepa elituromo lyenene ntani nelididimikiro ngomu tuna kundindira matungiko gomouzuni woupe.—Mat. 7:13, 14; Ruk. 13:24.

3. Ngapi omu tuna yi diva asi Karunga kapi ana tu harere tu paruke eparu lyoruguwo noruhepo?

³ Eyi kutanta nye asi Vakriste wousili kukondjera eparu lyokudira ruhafo ndi? Eparu lyetu ngali kara tupu ngorooro lyoruguwo dogoro uhura ngau wize ndi? Yosili, Jehova kuna tu harere tu hafe ngomu tuna kundindira esikiliromo lyomatumbwidiro gendi. Bibeli kusingonona vakareli wousili asi vantu woruhafo. (Resa Jesaya 65:13, 14.) Episarome 5:11 kutanta asi: ‘Navenye ava va ku huguvara Jehova, ngava hafa, tava lilikida narunye-narunye.’ Yimo, ose kuvhura kugwana ruhafo nombili zomomagazaro nampili ngomu tuna kuligwanekera nomaudigu. Tu zeni tu ka tarurure omu Bibeli nazi tu vatera mokulididimikira maudigu nye simpe tu kare noruhafo.

Jehova, Karunga gehafo

4. Ngapi omu ali zuvhu Karunga nsene ta va nyoka upangeli wendi?

⁴ Pasihonena, tarurura kuhamena Jehova. NgaKarunga goMunankondo nadinye, yininke nayinye kwa kara konhi zepangero lyendi. Age kapi ga hepa yuma ndi muntu gongandi. Nampili ngomu ga kara nononkondo dononene unene, Jehova ga lizuvhire ruguwo apa munwendi gumwe gopampepo ga mu rwanesere nokuyakara Satana. Ntani ya ya mu kundamene hena apa vaengeli vamwe va lipakererere kumwe naSatana mokumurwanesa. Gazadara ko hena kukora oku ga lizuvhire Karunga apa oAdamu naEva, yisitwa yendi yepevhu yokulikarera ya mu nyokere. Kutundilira pena, mamiliyona govana vawo kwa nyoka upangeli waJehova.—Rom. 3:23.

5. Yininke musinke ya guvisa unene Jehova?

⁵ Erwaneso eli ga retesa po Satana simpe kuna kutwikira. Monomvhura 6 000, Jehova kwa mona yirugana youkarelikarunga woyimpempa yonyanya yomadipago ntani yoruhonda. (Gen. 6:5, 6, 11, 12) Mokugwederera ko, age kwa zuvhu yimpempa nomaswauro gomanene. Nampili vakareli vaKarunga wousili poyiruwo yimwe kurugana yininke yokumukoresa. Bibeli kusingonona ukaro umwe wangoso nononkango edi asi: “Yikando yoyinzi ngava mu vyuka momburundu; rorunzi ngava mu pakesa mutjima gomudona. Awo ngava hetaike-hetaike Karunga, va handukise Mupongoki gwaIsraeli.” (Epis. 78:40, 41) Jehova kulizuvha sili kukora kokunene nsene vantu vendi va mu zumba. (Jer. 3:1-10) Age kulizuvha ruhodi rorunene apa ayi horoka yininke yoyidona.—Resa Jesaya 63:9, 10.

6. Ngapi omu Karunga a tara maukaro gokuguvisa?

⁶ Nye, kukora noruguwo oru a ligwanekere naro Jehova kapi ayi mu ninkisa a dire kurugana ko yuma. Apa maudigu aga horoka, Jehova kurugana ko yuma mokusesupika yitundwamo yoyidona kweyi ayi horoka. Age hena ga pulisira siruwo sosire si pite yipo sitambo sendi ngasi ka sikilire mo. Mokutura megano yirugana eyi yoyiwa, Jehova kuna kundindira nononkondo mokukahungameka upangeli wendi wanayinye ntani nokukatungika vakareli vendi wovalimburukwi. (Epis. 104:31) Yosili, yi kare asi ngapi omu va mu swaura, Jehova nga kara ngorooro Karunga gehafo.—Epis. 16:11.

7, 8. Nsene yininke yina tu yipire, ngapi omu natu vhura kuhonena Jehova?

⁷ Yosili kapi tatu vhuru kulihetakanesa nyamwetu naJehova kombinga zevhuliko lyetu lyokukohonona po maudigu. Simpe kuvhura tu honene Jehova nampili ngomu tuna kuligwanekera nomaudigu. Ayo yimo ya kara ngorooro mokulizuvha ruguwo nsene yininke yina tu yipire, nye kapisi hepero tu kare moukaro wangoso siruwo sosire. Morwa kwa tu unga mosihwi saJehova, twa kara nevhuliko lyokugazara nokuruganesa unongo, eyi kutuvatera tu konakone maudigu getu ntani nokurugana ko yuma nsene kuvhura.

⁸ Sininke simwe somulyo esi nasi tu vatera mokulididimikira maudigu geparu kuna kara pokunongonona asi yininke yimwe kwato eyi natu vhura kurugana ko. Nsene tu demenena komaudigu getu ayo kuvhura kutunyegenyesa ntani kutugusa ruhafo oru rwa likwatakana noukareli wousili. Nsene tuna rugana ko yuma mokukohonona po udigu, ayo ya wapa mokuhageka kuugazara unene ntani twa hepa kudemenena koyininke yoyiwa po. Yihorokwa yina kukwama ko yomoBibeli ya likida sitwa esi.

Kukara nehetakano mulyo

9. Ngapi omu Hana ga likidire ehetakano?

⁹ Tarurura sihonena saHana, ogu ga ya kere ozina womuporofete Samwere. Age kwa kere noruguwo morwa kupira vana. Hana ngava mu swaura morwa nganze ga kere. Poyiruwo yimwe, Hana nga dompo mutjima dogoro ngayi mu ninkisa a lire nokudira kulya nondya. (1 Sam. 1:2-7) Ezuva limwe apa va ka dingwire ntembeli zaJehova, Hana kwa “kandererere neguwo lyenene oku ta lili unene.” (1 Sam. 1:9-10) Apa ga mene Hana kutantera maudigu gendi Jehova, Eli mupristeli gomunene kwa mu hederere nokumutantera asi: “Zende nombili. Karunga gwaIsraeli ngano ta ku pe eyi ono mu hundire.” (1 Sam. 1:17) Posiruwo sina, Hana ga ya yi nongwenene asi ana rugana ko yuma moomu ga vhulira. Kwato eyi ga vhulire kurugana ko kuhamena unganze wendi. Hana kwa likidire ehetakano. Hana makura “ta zi ta ka lya, makura sipara sendi tasi runduruka.”—1 Sam. 1:18.

10. Nkareso musinke zongwa ga likidire Paurusa apa ga ligwanekerere noudigu ou ga dilire kuvhura kukohonona po?

¹⁰ Mupositoli Paurusa nage ga likidire nkareso zokulifana apa ga ligwanekerere noudigu. Age ga kere nouvera ou ngau mu retere sinka sosinene. Age kwau tumbwire asi “nsonga morutu.” (2 Kol. 12:7) Yi kare asi uvera musinke owo, Paurusa ga rugene ko yuma mokuugusa po, age ga kandererere kwaJehova a mu pe rufuwo. Yikando yokuhura kupi Paurusa ga likwamberere kwaJehova kuhamena yuma oyo? Yikando yitatu. Konyima zoyo yikando, Karunga ga limbwilire Paurusa asi kapi nga zi gusa po pasitetu ozo “nsonga morutu.” Paurusa ga tambwire usili owo ntani ga demenenene mokukarera Jehova momunene.—Resa 2 Vakolinte 12:8-10.

11. Yisinke aga rugana makanderero nsene tatu lididimikire yinka?

¹¹ Yihonena oyo kapi yina kutanta asi twa hepa kuhageka kukanderera kwaJehova kuhamena yinka yetu. (Epis. 86:7) Nye, Nonkango daKarunga kututumangeda asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu.” Ngapi omu Jehova a limburura makanderero gangoso? Bibeli kugwederera ko asi: “Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Fil. 4:6, 7) Yimo, Jehova kapi ta gusa po udigu wetu, nye kuvhura a limburure makanderero getu pokukunga magazaro getu. Konyima zokukanderera koudigu, kuvhura tu nongonone siponga sokulitura mo unene moyinka.

Gwana ruhafo mokurugana mpango zaKarunga

12. Morwasinke ya karera siponga unene mokutwikida kukara moruguwo?

¹² Yisewe 24:10 kutanta asi: “Nsene ove o munkundi momahepeko, o munkundi hena moyirugana.” Ano sisewe simwe kwa uyunga asi: ‘Vantu nsene vana guwu, kusuva yipara.’ (Yis. 15:13) Vakriste vamwe nsene vana dompo nomutjima kuvaninkisa dogoro va hageke ereso lyanyamwawo lyoBibeli ndi kuteda ko koNonkango daKarunga. Makanderero gawo ta ga ya kara gokurugurura-rugura tupu ntani awo kuligora ko kovakareli vakwawo. Ayo siponga unene mokutwikida kukara moruguwo rwangoso.—Yis. 18:1, 14.

13. Yirugana musinke yimwe nayi vhura kutuvatera mokugusa po edompo mutjima ntani nokuturetera ruhafo?

¹³ Nye kukara nomutaro gomuwa ngayi tu vatera tu demenene komaruha gamwe meparu lyetu omu natu vhura kugwana ruhafo. Ndafita kwa tjenge asi: “Ame kuna tokomene po yokurugana eharo lyoge Karunga gwange!” (Epis. 40:8) Nsene yininke yina tu yipire meparu, kapisi tu hageke elikwamo lyetu lyewa lyoukareli. Nkedi zongwa zokugusa po ruguwo kuna kara pokulihameka moyirugana eyi ayi reta ruhafo. Jehova kuna kututantera asi kuvhura tu gwane ruhafo pokuresa moNonkango dendi ntani nokutara mo nkenye apa. (Epis. 1:1, 2; Jak. 1:25) MoMatjangwa nagenye goKupongoka ntani nomomapongo goSikriste, ose kugwana mo “nonkango dombili” edi adi tu korangeda nokuhafesa nomutjima detu.—Yis. 12:25; 16:24.

14. Etumbwidiro musinke lyaJehova ali tu retere ngesi ruhafo?

¹⁴ Karunga kutupa nokonda dononzi deyi natu karera noruhafo. Etumbwidiro lyendi lyokutuparura yosili kuturetera ruhafo rorunene. (Epis. 13:5) Yi kare asi yininke musinke yina kuhoroka ngesi, ose twa yi diva asi moruhura Karunga nga ka futa ava ava mu papara. (Resa Muudisi 8:12.) Muporofete Habakuku kwa likidire epuro lyangoso monaruwa, apa ga tjenge asi: ‘Nampili ngomu ga pira maukuzu enyango, yindjembere kutupu mandjembere, nampili ngomu guna pili muzangu gononzwe momapya mutupu mahangu, nampili ngomu dina fu nonzwi nadinye nohambo donongombe mawoko-woko, yimo ngorooro ngani hafa tani pembura, morwa HOMPA Karunga yige muparuli gwange.’—Hab. 3:17, 18.

‘Gehafo muhoko ogu gwa kara naKarunga Jehova!’

15, 16. Tumbura ko mauhwi gamwe gokutunda kwaKarunga natu hafera siruwo esi tuna kundindira matungiko gokomeho.

¹⁵ Ngomu tuna kundindira meho zongwa ezi va tu wapaikire, Jehova kuna hara asi tu hafere yininke yoyiwa eyi ga tu pa. Bibeli kutanta asi: “Makura tani dimburura asi, nayinye eyi natu vhura kurugana kooko kuhafa nokurugana yiwa po paapa twa hulira siruwo esi tuna kara nomwenyo. Natuvenye twa fira kulya oku tatu nu, tu bodjane eyi twa ruganena.” “Ayo uhwi wokutunda kwaKarunga.” (Muud. 3:12, 13; 5:19) ‘Kurugana yoyiwa po’ kwa kwatera mo kuruganena vakwetu yininke yoyiwa. Jesus kwa uyungire asi kugava kwa kara nerago kwa pitakana kutambura. Kuruganena yirugana yoyiwa kovalikwali nokovana nokovakurona ntani nekekoro lyetu kureta ruhafo rorunene. (Yis. 3:27) Ntani kukara hena nonkenda nokulitambura-tambura momambo getu nokugusira po vanavazinyetu wopampepo nayo kureta ruhafo rorunene ntani ayo kuhafesa Jehova. (Gar. 6:10; Koros. 3:12-14; 1 Pet. 4:8, 9) Ano kurugana yirugana yetu yokuzuvhisa nonkareso zokulizambera nayo kureta uwa.

¹⁶ Nonkango domoMuudisi tuna temwinine nare ado kwa tumbura tupu malihafeso geparu goureru ngwendi kulya nokunwa. Yosili, nampili kuna kuligwanekera nomaheteko, kuvhura tu gwane ruhafo mwankenye mahwi gopanyama aga twa gwana kwaJehova. Nsene o tara omu lina kukatoka ezuva nomu saza sirongo nomu yina kudana yikoramagona ntani noyininke yimwe younsitwe yokutetukisa ayo kapi ayi koso yuma, nye kuvhura yi tu tetukise nokuturetera ruhafo. Ngomu tuna kugazara kuhamena yininke oyo, eharo lyetu lyokuhara Jehova kukura, morwa yige Mugavi goyininke nayinye yoyiwa.

17. Yisinke ngayi tu retera rufuwo rwene-rwene komaudigu, ntani posiruwo esi, yisinke ayi tu hengagwida?

¹⁷ Eharo lyetu lyokuhara Karunga nokulimburukwa yipango yendi ntani nokulikida epuro monzambo zosizoweseso, ayo ngayi tu retera rufuwo rwene-rwene komaudigu geparu lyokudira kusikilira mo ntani nokututwaredesa koruhafo rokukarerera. (1 Joh. 5:3) Posiruwo esi, ose kugwana ehengagwido pokudiva asi Jehova ga diva nawa-nawa yininke nayinye eyi ayi tu retere kukora. Ndafita kwa tjenge asi: “Ame ngani hafa, tani pembura, morweharo lyoge lyenene. Ove kumona runyando rwange, yiyo wa diva udigu wange.” (Epis. 31:7) Morwa Jehova ga tu hara, age ngatu popera komaudigu.—Epis. 34:19.

18. Morwasinke vantu vaKarunga nava karera noruhafo?

¹⁸ Siruwo esi tuna kundindira esikiliromo lyomatumbwidiro gendi, ngano tu honene Jehova, Karunga gehafo. Twa ha pulisira malizuvho gomadona ga tu kondere mokutwikira kukarera Karunga. Nsene pa horoka maudigu, ngano li tu gamene evhuliko lyetu lyokugazara ntani nounongo. Jehova ngatu vatera tu pangere malizuvho getu ntani nokurugana ko yuma mokusesupika yitundwamo yoyidona eyi aga reta maudigu. Ngano tu gwanene mo ruhafo moyininke yoyiwa eyi ayi tundu kwendi, yi kare asi yopanyama ndi yopampepo. Nsene tu hedera Karunga pepi, ngatu hafa morwa ‘gehafo muhoko ogu gwa kara naKarunga Jehova!’—Epis. 144:15, hetakanesa NW.

Yisinke ono lirongere ko?

• Nsene kuna kulididimikira maudigu, ngapi omu natu vhura kuhonena Jehova?

• Ngapi omu kukara nehetakano nayi tu vatere mokulididimikira maudigu?

• Mosiruwo somaudigu, ngapi omu natu vhura kugwana ruhafo mokurugana mpango zaKarunga?

[Mafano pepenuno 16]

Jehova kulizuvha ruhodi rorunene apa ayi horoka yininke yoyidona

[Edina lyomufaneki]

[Mafano pepenuno 18]

Jehova ga tu pa mawapaiko yipo tu kwaterere koruhafo