Kuruganesa nawa ‘rufuro ropampepo’
‘Tambureni nonkango daKarunga edi azi mu pe Mpepo, di kare rufuro rweni.’—EFE. 6:17.
1, 2. Ngapi omu natu tara hepero zonene zovazuvhisi wombudi zoUhompa?
APA Jesus ga nongwenene yihepwa yopampepo yombunga zovantu, makura ta tantere varongwa vendi asi: “Muzangu gwene munzi, nye varugani vasesu. Yipo nye nomu hundilira mwenyamuzangu, asi a tume komuzangu gwendi varugani.” Jesus kapi tupu ga hagerere poopo. Apa ga mene kuuyunga nonkango odo, makura Jesus ta zigida varongwa vendi murongo navavali tava tumu va ka zuvhise ndi va ka ‘zangure.’ (Mat. 9:35-38; 10:1, 5) Konyima, Jesus ‘ta horowora hena nomurongo ntano-nambali, tava tumu vavali-vavali,’ va ka rugane sirugana sokulifana.—Ruk. 10:1, 2.
2 Nanaina pana kara hepero zonene zovazuvhisi wombudi zoUhompa. Sivaro sovakalimo poMurarero uzuni mudima momvhura 2009 kwa kere 18 168 323. Aso kwa pitakanene sivaro soNombangi daJehova nomamiliyona 10. Yosili mapya gana wapere muzangu. (Joh. 4:34, 35) Yipo nye, twa hepa kukanderera tu hundire varugani wovanzi. Nye ngapi omu natu vhura kurugana kuliza nehundiro lyangoso? Kuvhura tu yi rugane pokukara tuna wapere nawa ngovazuvhisi ngomu tuna kulihameka nomupampi moyirugana yoUhompa yokuzuvhisa ntani nokutulisa po varongwa.—Mat. 28:19, 20; Mar. 13:10.
3. Ngapi omu mpepo zaKarunga azi tu vatere tu kare vazuvhisi wokuwapera?
3 Sirongwa sa ka pita kwa zogerere omu mpepo zaKarunga azi tu vatere tu ‘udise nonkango daKarunga nomupampi.’ (Yirug. 4:31) Mpepo ozo kuvhura hena nose kutuvatera tu kara vazuvhisi wokuwapera. Nkedi zimwe omu natu vhura kuwapukurura sirugana setu sokuzuvhisa kuna kara pokuruganesa nawa siruganeso esi ga tu pa Jehova Karunga, Nonkango dendi, Bibeli. Azo kwa zi retesa po mpepo zokupongoka. (2 Tim. 3:16) Azo kuna kara mbudi zokutunda kwaKarunga. Apa atu ruganesa monaruwa Bibeli merongo lyetu, ose ngoso kuna kutugendesa mpepo zokupongoka. Komeho tu ka zogere omu natu vhura kuyirugana oyo, tu zeni tanko tu tarurure omu Nonkango odo da kara nononkondo.
‘Nonkango daKarunga kwa kara nononkondo’
4. Marunduruko musinke Bibeli a zi reta komuntu?
4 Ee, nonkondo musi da kara nado nonkango ndi mbudi zaKarunga! (Heb. 4:12) Pasifanekeso, mbudi ezi za kara moBibeli kwa twepa kwa pitakana rufuro ronomemo mbali, morwa azo kuhwilira tazi hangura yisupa nonongongo domuhoko-hoko. Mausili goPatjangwa kuhwilira momutjima gomuntu ntani ago hena kupangura matedo noyigazo yokomutjima, pokuhorora eyi ya kara monda zomuntu. Usili womoBibeli kwa kara nononkondo, ano kuvhura sili kurundurura muntu. (Resa Vakorosi 3:10.) Yosili, Nonkango daKarunga kuvhura kurundurura eparu lyomuntu!
5. Monkedi musinke nazi vhura kutupitisira Bibeli ntani noyitundwamo musinke?
5 Mokugwederera ko, Bibeli azo buke za zura unongo wounzi. Amo kwa kara mo nombudi dokuvatera vantu omu nava vhura kuparuka mouzuni ou woudona womaudigu. Nonkango daKarunga kapi tupu adi tu pitisire ngesi nye hena kupitisira nomeho zetu. (Epis. 119:105) Bibeli kugava evatero lyenene kuhamena kukohonona po maudigu ndi kutura po matokoro kuhamena vakaume noyilihafeso noyirugana nondwareso ntani nayimwe hena. (Epis. 37:25; Yis. 13:20; Joh. 15:14; 1 Tim. 2:9) Nsene tu ruganesa nompango edi da kara moNonkango daKarunga ayo ngayi tu rerupira mokutekura nawa vakwetu. (Mat. 7:12; Fil. 2:3, 4) Apa atu pulisire nonkango daKarunga di tu pitisire monzira zetu, ngayi tu vhulika tu nongonone omu matokoro getu aga kundama meho zetu. (1 Tim. 6:9) Matjangwa kwa pumba hena sitambo saKarunga sokomeho, mokutuvatera tu kondjere mparukiso ezi azi lizi nositambo oso. (Mat. 6:33; 1 Joh. 2:17, 18) Ee, eparu musi lyewa na vhura kuhafera muntu nsene a pulisira nompango daKarunga di pitisire eparu lyendi!
6. Nonkondo musinke da kara nazo Bibeli moyita yetu yopampepo?
6 Gazara hena omu Bibeli za kara nononkondo moyita yetu yopampepo. Paurusa kwa tumbura Nonkango daKarunga asi ‘rufuro ropampepo.’ (Resa Vaefeso 6:12, 17.) Nsene mbudi zomoBibeli kuna kuzigavera monaruwa, azo kuvhura kumangurura vantu mepangero lyaSatana. Bibeli azo rufuro oru aru parura vantu nye kapisi rokuzonagura. Twa hepa kukondja mokuziruganesa nawa.
Toona nawa nonkango daKarunga
7. Morwasinke ya karera nomulyo mokulironga kuruganesa nawa ‘rufuro ropampepo’?
7 Mukwayita kuvhura a ruganese nawa yirwiso yendi moyita nsene age ga liyomberesa nokuyilironga kuyiruganesa. Ya lifana hena neruganeso ‘lyorufuro ropampepo’ moyita yetu yopampepo. Paurusa kwa tjenge asi: “Kondja o moneke kwaKarunga asi ove murugani gokulimburukwa, ogu a dili kufa nomuga sirugana sendi, ogu a toona nawa nonkango daKarunga dousili.”—2 Tim. 2:15.
8, 9. Yisinke nayi vhura kutuvatera tu kwate nawa egano eyi azi rongo Bibeli? Gava sihonena.
8 Yisinke nayi tu vatera tu ‘toone nawa nonkango daKarunga’ moyirugana yetu yokuzuvhisa? Komeho tu ka tantere ko vapeke eyi azi rongo Bibeli, pomuhowo nyamwetu twa hepa kuzikwata nawa-nawa egano. Eyi kwa kwatera mo kutarurura etwaromo lyovelise ndi lyetjangwa.
9 Mokukwata nawa egano ntanto zemEtjangwa, pomuhowo twa hepa kutarurura etwaromo. Nonkango daPaurusa da kara moVagarata 5:13, kugava sihonena soyo. Age kwa tjenge asi: “Vakwetu, one kwa mu zigidira emanguruko, nye kapisi emanguruko lyokusigilira madowo geni ga mu pangere, nani nye omu likwafa-kwafe meharo.” Emanguruko musinke ga uyungire Paurusa? Age kwa tembe kemanguruko lyononzo nonomfa, ndi lyokomarongo goyimpempa ndi koyininke yapeke? Etwaromo kulikida asi Paurusa kwa uyungire kuhamena emanguruko eli ali tundu ‘mokuzowoka mefingiliro eli azi reta Veta.’ (Gar. 3:13, 19-24; 4:1-5) Age kwa tembe kemanguruko lyoVakriste. Owo va tambwire emanguruko olyo ngava liruganene vene navene kutundilira meharo. Ano owo va dilire kukara neharo kwa lihamekere mokulihumagura nomokulilyaalya.—Gar. 5:15.
10. Mokuninka asi tu kwate nawa-nawa egano Matjangwa, nombudi musinke twa hepa kukoneka ntani ngapi omu natu vhura kugwana nombudi odo?
10 Mokukwata nawa-nawa egano ntanto zetjangwa, twa hepa kutarurura ntundiliro zombudi, ngwendi yilye ga tjenge buke zoBibeli ozo nosiruwo musinke va zi tjenge ntani nomoukaro musinke va zi tjangerere. Ayo kuvhura hena kuvatera mokudiva sitambo seyi va zi tjangerere buke ozo ntani nonompo dovantu owo nonkareso zawo ntani noukarelikarunga wawo.a
11. Yisinke twa hepa kutakamesa nsene kuna kufatwilira matjangwa muntu?
11 Yinzi ya hamena mo ‘mokutoona nawa nonkango daKarunga dousili’ kupitakana tupu kufaturura nawa mausili goPatjangwa. Twa hepa kutakamesa asi kapisi tu ruganese Bibeli mokutjilisa vantu. Nampili ngomu atu ruganesa Matjangwa mokupopera usili, ngamoomu ga yi rugene Jesus apa ga mu hetekere Muzonaguli, kapisi tu ruganese Bibeli mokutjilisa ndi kufisa nomuga vakwetu ndi kuvasininika va pure mapuliro getu. (Deut. 6:16; 8:3; 10:20; Mat. 4:4, 7, 10) Twa hepa kutambura epukururo lyomupositoli Peturusa asi: “Pongoreni Hompa Kristusa monomutjima deni, mu mu ninke a kare Hompa gweni. Omu liwapaikire nkenye apa kulimburura nkenye ogu ana kumupura yokumusingonwena ehugavaro eli lya kara mweni. Omu yi rugane nombili nefumadeko.”—1 Pet. 3:15, 16.
12, 13. “Nohotepopero dovantu” musinke Nonkango daKarunga nadi vhura kuhanagura po? Gava sihonena.
12 Yisinke nayi vhura kuhoroka nsene usili womoNonkango daKarunga kuna kuuruganesa monaruwa? (Resa 2 Vakolinte 10:4, 5.) Mausili gomoMatjangwa kuvhura kuhanagura po “nohotepopero dovantu” kutanta asi kutura poruzera marongo goyimpempa nomaruganeso gomadona ntani nomarongo aga aga likida unongo wovantu wokudira kusikilira mo. Kuvhura tu ruganese Bibeli mokugusa po nkenye magano aga aga ‘likondjesa nediwo lyaKarunga.’ Marongo gomoBibeli kuvhura kugaruganesa mokuvatera vapeke va rundurure magazaro gawo kuliza nousili.
13 Pasihonena, tara sihorokwa somukadi gonomvhura 93 ogu ga tunga moIndiya. Kutundilira unona wendi age kwa mu rongere a pure mehampurukururo. Apa ga tamekere kulironga Bibeli kupitira mokulitjangera namunwendi gomugara ogu ga tungire mosirongo sapeke, age ga tambwire eyi ga lirongere kuhamena Jehova ntani neyi ga tumbwidira. Nampili ngoso, erongo lyehampurukururo kwa kakaterere momagano gendi, dogoro ya mu ninkisire a patanese apa munwendi ga mu tjangerere kuhamena ukaro wovafe. Mukadi kwa tente asi: “Ame kapi nina kukwata egano usili womoMatjangwa geni. Maukarelikarunga nagenye kuronga asi twa kara nomwenyo gwa ha fu. Ame narunye kwa pura asi rutu kufa ano ruha rumwe rwamo oru aru dili kumoneka kukaruhampurukurura momarutu gapeke yikando yokusika po-8 400 000. Ngapi omu nayi dira kukara asi kapisi usili? Ngoso maukarelikarunga gomanzi mepuko ga kara ndi?” Kuvhura ‘rufuro ropampepo’ ru vhure kuhanagura po nohotepopero domapuliro govantu ndi? Konyima zononzogera dapeke doPatjangwa kuhamena sirongwa oso, mukadi kwa tjenge konyima zoyivike yongandi asi: “Ngesi kuna kutameka kukwata egano usili wene-wene kuhamena nomfa. Ayo kuhafesa nge unene pokudiva asi pevhumbuko, ngatu ka vhura kukamona vahali vetu ava va fa. Kuna kundindira ngano asi Uhompa waKarunga u wize usimbu.”
Ruganesa nawa Bibeli pokusingonona
14. Yisinke ayi tanta kusingonwena vapurakeni vetu?
14 Yinzi ya hamena mo mokuruganesa nawa Bibeli moyirugana yokuzuvhisa kupitakana tupu yokutumbagura matjangwa. Paurusa kwa ‘singwenene,’ nose twa hepa kuyirugana. (Resa Yirugana 19:8, 9; 28:23.) ‘Kusingonona’ kutanta asi ‘kukongwera po.’ Ogu vana kusingonwena “ga hepa kulikida epuro mweyi vana kumutantera.” Apa atu singonwene muntu a tambure marongo gomoBibeli, ose kuna kumukongwera po a ture ehuguvaro merongo olyo. Mokuyisikisa mo eyi, twa hepa kuninka vapurakeni va pure mousili weyi tuna kuuyunga. Kuvhura tu yi rugana eyi mononkedi edi dina kukwama ko.
15. Ngapi omu no tumbura Bibeli monkedi ezi azi likida efumadeko kwazo?
15 Tumbura Nonkango daKarunga monkedi ezi azi likida efumadeko. Nsene to tumbura etjangwa, demenena komulyo gokudiva eyi a gazara ko Karunga kosirongwa oso. Konyima zokupura epuro nokuzuvha elimbururo lyamwenya embo, kuvhura o tante ngesi asi: ‘Tu zeni tu tare omu a gazara ko Karunga kuhamena koyuma oyo.’ Ndi kuvhura o pure asi: ‘Yisinke na vhura kutanta ko Karunga kuhamena ukaro ou?’ Kutumbura etjangwa monkedi zangesi kunkondopeka asi Bibeli kwa tunda kwaKarunga ntani kuvatera vapurakeni va tunge po rupandu kwazo. Ayo mulyo kuyirugana ngoso, unene po nsene kuna kuudisira komuntu ogu ga pura mwaKarunga nye kapi ga diva eyi azi rongo Bibeli.—Epis. 19:7-10.
16. Yisinke na yi vhura kukuvatera yipo o faturure nawa matjangwa?
16 Wa ha resa tupu matjangwa, nye ga faturura. Azo kwa kere nkareso zaPaurusa ‘zokufatwilira oku ta likida’ oku yina tundu eyi ana kuronga. (Yirug. 17:3) Etjangwa kwa kara noyitwa yoyinzi, ano wa hepa kudemenena kononkango edi dina lizi neyi ono kuzogera. Kuvhura o yi rugane eyi pokurugurura ndi kutumbura nonkango edi dina kara noyitwa yomulyo ndi pokupura mapuro aga naga vatera mwenya embo a nongonone yitwa yomulyo po. Konyima, faturura eyi runa kutanta ruha rovelise ozo. Nsene ono mana kuyirugana oyo, vatera ogu ana kukupurakena omu lina mu fire etjangwa olyo.
17. Ngapi omu no teda moMatjangwa monkedi ezi nazi tumangeda muntu a pure mwago?
17 Teda moMatjangwa monkedi ezi nazi tumangeda muntu a pure mwago. Pokuruganesa mapuro gomawa ntani nomatedo, Paurusa nga ‘uyunga nava wopeke yomomatjangwa.’ (Yirug. 17:2, 4) Ngwendi Paurusa, kondjera mokuguma nomutjima dovapurakeni woge. ‘Vheta’ ndi diva eyi yina kara monomutjima dawo pokuruganesa mapuro gomawa aga naga likida asi ono litura mo mwawo. (Yis. 20:5) Nyokera po kutamangera. Nzogera zoge za hepa kuzera ntani zokuvyukilira. Pwa hepa kukara maumbangi gana kukwatesa ko eyi ono kuuyunga. Nonkango doge da hepa kutundilira moNonkango daKarunga. Mevango lyokuresa mongenderera matjangwa gavali ndi gatatu, ayo ya wapa mokuruganesa etjangwa limwe pokufaturura nawa nokufanekesa sitwa. Pokuruganesa maumbangi gapeke kuvhura ‘kuyihuguvara eyi ono kuuyunga.’ (Yis. 16:23) Poyiruwo yimwe ya kara hepero mokurugana mapaparo ntani nokugava nombudi dimwe hena dokugwederera ko. Mukadi gonomvhura 93 ogu tuna tumbura nare ga hepere kudiva eyi lya lihanena erongo lyomwenyo gwa ha fu (ndi mpepo). Pokukwata egano oku lya tundilira erongo olyo ntani nomu lya ya hwilira momaukarelikarunga gomanzi mouzuni ya gwanenene po mokutumangeda mukadi gwina a tambure eyi azi rongo Bibeli kuhamena sirongwa oso.b
Twikira kuruganesa nawa Nonkango daKarunga
18, 19. Morwasinke natu twikilira kuruganesa nawa ‘rufuro ropampepo’?
18 Bibeli kutanta asi: “Uzuni ou neyi nayinye yamo mokuhaga yina kerere.” Vadinikarunga udona wawo kuna kuvhuka unene. (1 Kol. 7:31; 2 Tim. 3:13) Yipo nye ayo mulyo asi tu twikire kuhanagura po “nohotepopero dovantu,” pokuruganesa ‘nonkango daKarunga edi azi tu pe mpepo, di kare rufuro rwetu.’
19 Ee, ruhafo musi twa kara naro pokukara noNonkango daKarunga, Bibeli ntani nokuruganesa mbudi zamo zononkondo mokuhanagura po marongo goyimpempa ntani nokuguma nomutjima dovantu wovawa! Kwato hotepopero za kara nononkondo kupitakana mbudi ozo. Yipo nye, tu zeni tu liture mo unene mokuruganesa nawa ‘rufuro ropampepo’ mosirugana esi ga tu pa Karunga sokuudisa Uhompa.
[Nondanda dokonhi]
a Yiruganeso yoyiwa mokudiva ntundiliro zonombudi kuhamena nobuke domoBibeli kuna kara yimbapiratjangwa eyi “Nkenye etjangwa kwa vyuka ntani mulyo,” Insight on the Scriptures ntani noyirongwa ya kara moRuhungu asi “Nonkango daKarunga kwa kara nomwenyo.”
b Tara egaununo 6 lyobuke Yinke azi rongo Bibeli sili?
Yisinke ono lirongere ko?
• Nonkondo musinke da kara nado Nonkango daKarunga?
• Ngapi omu natu “toona nawa nonkango daKarunga dousili”?
• Yisinke nazi vhura kurugana mbudi ezi za kara moBibeli ‘konohotepopero dovantu’?
• Ngapi omu no wapukurura kusingonona koge moyirugana yokuzuvhisa?
[Kakende/Efano lyepepenuno 21]
Omu no ruganesa nawa Nonkango daKarunga
▪ Likida rupandu koBibeli
▪ Faturura Matjangwa
▪ Teda moMatjangwa yipo ga gume mutjima gomuntu
[Efano lyepepenuno 20]
Lironga kuruganesa nawa ‘rufuro ropampepo’