Kugava etwaromo lyewa lyomatjangwa

MATJANGWA kugava etateko lyomapukururo aga atu gwana komapongo gomombungakriste. Matjangwa gomoBibeli kuna kara hena etateko lyeyi atu uyunga moyirugana yokuzuvhisa. Nampili ngoso, omu eyi ayi gwederere konzogera zetu ayo kwa korera omu atu gava etwaromo lyewa.

Yinzi ya hepa po kupitakana tupu kutumbura etjangwa ntani nokutantera muntu a li rese kumwe nove. Pokutumbura etjangwa, kondjera mokusikisa mo yitambo yivali: (1) Pindura elituromo, ntani (2) demenena kokonda zeyi ono kuruganesera etjangwa olyo. Yitambo eyi kuvhura kuyisikisa mo mononkedi dokulisiga-siga.

Pura epuro. Ezi kuna kara nkedi zongwa nsene asi vapurakeni woge kapi vana diva elimbururo. Kondja mokupura epuro monkedi omu nayi ninkisa vantu va gazare. Eyi yiyo ga rugene Jesus. Apa Vafalisayi va mu wizilire montembeli nokuheteka ediwo lyendi lyoMatjangwa, Jesus ta va pura asi: “Ngapi omu omu gazara one Kristusa, asi munwalye?” Awo tava mu limburura asi: “MunwaNdafita sa.” Age ta va pura asi: “Ndafita ngapi nye za mu tumbwisisire Mpepo zaKarunga asi ‘Hompa’?” Makura yipo ga temwinine Episarome 110:1. Vafalisayi kwa mwenene. Nampili ngoso, mbunga kwa purakenene kwaJesus nelituromo.—Matt. 22:41-46.

Moyirugana yokuzuvhisa, kuvhura o ruganese mapuro getwaromo ngagaaga gana kukwama ko: “Nove name twa kara nomadina getu. Karunga nage ga kara nedina lyendi ndi? Kuvhura tu gwane elimbururo mEpisarome 83:18, NW.” “Ngapa kara epangero limwe eli ngali pangera vantu navenye ndi? Koneka elimbururo kepuro eli mwaNdaniyera 2:44.” “Yosili Bibeli za uyunga ko kuhamena maukaro aga gana kuhorauka momazuva getu ndi? Hetakanesa eyi va uyunga mwa-2 Timoteusa 3:1-5 kumwe nomaukaro aga gana kuhorauka momazuva getu.” “Ruhepo nonomfa ngayi haga po ndi? Elimbururo lyomoBibeli kuvhura kuligwana mEhororo 21:4, 5.”

Mosiuyungwa, kuruganesa nawa mapuro pokugava etwaromo lyomatjangwa kuvhura kukorangeda vapurakeni va hafere matjangwa, nampili aga va diva. Nye kuvhura ngava ga hafere sili ndi? Eyi kwa korera komapuro aga ono kupura nsene asi ga va kundama unene ndi hawe. Nampili si kare asi sirongwa oso siwa kovapurakeni, kuvhura va gazare yapeke apa no resa Matjangwa aga va zuvha yikando yoyinzi. Mokuyikandana po, wa hepa kugazadara ko unene konkedi omu no koka elituromo lyawo.

Tumbura udigu wongandi. Kuvhura o tumbure udigu ntani nokugava etjangwa eli ali uyunga kuhamena ekohononopo lyoudigu owo. Wa ha ninkisa vapurakeni va ndindire yoyinzi kupitakana eyi nava zuvha. Etjangwa kuvhura kugava tupu ruha rwekohononopo. Nampili ngoso, ngomu ono kuresa etjangwa, kuvhura o pure vapurakeni va tarurure asi evyukiso musinke lina kugava etjangwa mokulididimikira udigu owo.

Mokulifana, kuvhura o tumbure mpango ezi za likida nkareso zoSikriste ntani ruganesa sihorokwa somoBibeli mokulikida uwa wokusikisa mo mpango ozo. Nsene etjangwa kwa kara noyitwa yivali (ndi nampo kupitakana opo) yokuhamena kweyi ono kuzogera, vauyungi vamwe kupukurura vapurakeni vawo va didilike eyi. Nsene udigu u moneka asi una digopere vapurakeni vamwe, kuvhura nampo o rete mo magano gokulisiga-siga ntani nokupulisira etjangwa nesingonono lyalyo mokugava elimbururo.

Tumbura Bibeli ngoNonkango daKarunga. Nsene ono pindura nare elituromo mosirongwa soge ntani nokutumbura ko omu ava yi tara vantu, kuvhura o tumbure etjangwa pokuuyunga asi: “Didilika eyi adi uyunga ko Nonkango daKarunga kositwa esi.” Ayo kulikida eyi no ka resa asi kuna kutunda kwaKarunga.

Jehova kwa ruganesere vagara ngwendi Johanesa naPaurusa ntani Peturusa va tjange maruha gamwe goBibeli. Nye awo kwa kere tupu vatjangi; ano Jehova yige Muretesipo gononkango edi va tjenge. Unene po nsene kuna kuuyunga novantu ava va dira kudiva Matjangwa gokupongoka, kutumbura etjangwa pokutanta asi: “Peturusa kwa tjanga” ndi “Paurusa kwa uyungire asi” kuvhura yi dire kukara netumangedo lyokulifana ngeli nayi vhura kureta pokutumbura asi edi nonkango daKarunga. Moyihorokwa yimwe, Jehova kwa tanterere Jeremiya a gave erondoro pokuuyunga asi: “Purakeneni kononkango daJehova.” (Jer. 7:2; 17:20, NW; 19:3; 22:2) Yi kare asi kuna kuruganesa edina lyaJehova pokugava etwaromo lyomatjangwa ndi hawe, komeho zokukahagekesa nzogera zetu, twa hepa kukondjera mokulikida asi eyi ya kara moBibeli kuna kara nonkango dendi.

Koneka eyi yina kara mosireswa. Wa hepa kudiva eyi yina kara mosireswa pokutokora nkedi omu no gava etwaromo lyetjangwa. Moyihorokwa yimwe kuvhura o vyukilire kutumbura sireswa; nampili ngoso, sireswa kuvhura kukundama eyi no uyunga mononkedi dapeke. Pasihonena, kuvhura o gave etwaromo lyononkango daJoba gomulimburukwi monkedi zokulifana kumwe nedi dovahengagwidi vendi woyimpempa ndi? Buke zoYirugana kwa zi tjenge Rukasa, nye age kwa temwinina mo vapeke ngwendi Jakopo naPeturusa naPaurusa naFilipusa naSitefanesa novaengeli, yimo tupu hena naGamaliyeli ntani noVajuda ava va dilire kukara asi Vakriste. Ono diva ogu ga uyunga nonkango metjangwa eli ono kutemwinina ndi? Pasihonena, diworoka asi, kapisi Ndafita ga tjenge mapisarome nagenye ntani Saromo kapisi yige ga tjanga buke nazinye zoYisewe. Ya kara hena nomulyo kudiva asi kwalye ga tjangerere mutjangi goBibeli ntani sirongwa musinke ga zogerere.

Ruganesa etwaromo lyomauzera gosihorokwa. Eyi kutompoka unene po nsene kuvhura o likide asi maukaro aga ga horokere posiruwo soBibeli ga lifana naga ono kuzogera. Moyihorokwa yimwe, etwaromo lyomauzera gosihorokwa mulyo mokukwata egano etjangwa lyongandi. Pasihonena, nsene kuna kuruganesa Vahebeli 9:12, 24 mosiuyungwa kuhamena sizoweseso, kuvhura yi kare hepero mokutameka nefatururo lyesupi kuhamena nzugo zoKupongokerera zomonkongoronzugo komeho zokuresa etjangwa, evango eli aga likida matjangwa asi ga hwilira Jesus apa ga zire meguru. Nye wa ha reta mo mauzera gomanzi ga donganese etjangwa eli ono kugava petwaromo.

Mokuwapukurura omu o gava etwaromo lyomatjangwa, konakona eyi ava rugana vauyungi ava va kara noudivi. Koneka nonkedi dokulisiga-siga edi ava ruganesa. Konakona uwa wononkedi odo. Mokuliwapaikira siuyungwa soge, dimburura matjangwa gokukwatesa ko, ntani koneka eyi lina kusikisa mo nkenye etjangwa. Wapaika nawa etwaromo lyankenye etjangwa yipo li kundame nawa vapurakeni woge. Konyima zosiruwo, heteka kugava etwaromo lyewa kwankenye etjangwa. Ngomu no wapukurura moruha oru, ngo demenena unene koNonkango daKarunga.