Zi tu pitisire mpepo zaKarunga tu sikise mo eligawo lyetu
‘Omu sige mpepo zaKarunga zi mu pitisire, mu dire kusikisa mo madowo gopaunsitwe.’—GAR. 5:16.
1. Ekuho musinke lya horokere mezuva lyoPentekoste?
VASIKULI vaJesus kwa uyungire momaraka mezuva lyoPentekoste 33 S.N., konyima zapa vava kuhwire nompepo zokupongoka. Makura tava likida uhwi wopasitetu wompepo. (1 Kol. 12:4-10) Morwa uhwi owo ntani nosiuyungwa esi ga geve Peturusa, yitundwamo musinke ya kere? Wovanzi kwa va ‘twire komutjima.’ Ngetumangedo lyaPeturusa, awo kwa litezwilire makura tava va kuhu. Etjangwa kutanta asi: “Ava va tambwire nonkango dendi nehafo, tava va kuhu. Ezuva olyo vantu wokusika ngwendi pomayovi gatatu kwa va gwedererere kombunga zawo.” (Yirug. 2:22, 36-41) Ngamoomu ga yi uyungire Jesus, awo kwa va kuhwire medina lyaGuhwe neli lyoMuna neli lyompepo zokupongoka.—Mat. 28:19.
2, 3. (a) Faturura malisigo ga kara po pokatji kokukuhwira nompepo zokupongoka ntani kokukuhwira medina lyompepo zokupongoka. (b) Morwasinke navenye ava vana kukara naina Vakriste wousili vana kuvandindira va gwane ekuho lyomomema?
2 Pwa kara malisigo pokatji kokukuhwira nompepo zokupongoka ntani kokukuhwira medina lyompepo zokupongoka ndi? Nhi. Owo ava kuhu nompepo zokupongoka awo kuvahampurukurura hena ngovana vaKarunga wopampepo. (Joh. 3:3) Awo kuvagwaveka mokukakara vahompa novapristeli moUhompa waKarunga wemeguru ntani awo kuna kara ruha rorutu rwaKristusa ropampepo. (1 Kol. 12:13; Gar. 3:27; Ehor. 20:6) Yipo nye ekuho eli lyokukuhwa nompepo zokupongoka kuna kara ekuho eli ga rugene Jehova mezuva lyoPentekoste, ano konyima ta horowora owo ngava ka pangera kumwe naKristusa. (Rom. 8:15-17) Nye ngapi kuhamena ekuho lyomomema lyokukuhwira medina lyompepo zokupongoka, silika esi asi horoka nkenye apa poyigongi yanaina yovantu vaJehova?
3 Vakriste wousili kuvakuhwa momema ngelikido lyeligawo lyawo kwaJehova Karunga. Ya lifana hena nowo va gwana ezigido lyemeguru. Nye ekuho lyomomema nazo kuna kara ntambo zomulyo komamiliyona govagara novakadi womosiruwo setu ava vana kara nehuguvaro lyokukaparukira narunye pontunda zevhu. Li kare asi ehuguvaro musinke ga kara nalyo muntu, ntambo zomulyo ezi ga hepa kugusa yipo Karunga a mu tambure kuna kara pokugwana ekuho lyomomema medina lyaGuhwe neli lyoMuna neli lyoMpepo zoKupongoka. Yipo nye Vakriste navenye ava ava gwana ekuho kuna kuvandindira ‘mpepo zaKarunga zi va pitisire.’ (Resa Vagarata 5:16.) Ove kuna kukupitisira mpepo zaKarunga nokusikisa mo eligawo lyoge ndi?
Yisinke ayi tanta ‘kukupitisira mpepo zaKarunga’?
4. Yisinke ayi tanta ‘kukupitisira mpepo zaKarunga’?
4 ‘Kukupitisira mpepo zaKarunga’ kwa kwatera mo kutambura sirugana sompepo zokupongoka, nokuzipulisira zi ku gendese. Kuvhura kutanta hena asi kukugendesa mpepo zokupongoka moyirugana yoge yankenye ezuva. Vagarata egaununo 5 kulikida malisigo ga kara po pokatji kokukugendesa mpepo zokupongoka ntani nomadowo gorutu.—Resa Vagarata 5:17, 18.
5. Yirugana musinke eyi no nyokera po nsene ta zi ku pitisire mpepo zokupongoka?
5 Nsene kuna kukupitisira mpepo zokupongoka, ngo nyokera po yirugana yorutu. Ayo kwa kwatera mo “ruhonda norukehe rozanyi nokudira kukuhuka nokudira kukuruka, nokukerera vakarunga woyimpempa noumpure nounkore nonomutangu nesupa noumbudi nomaligaunuko motumbunga nomonombunga, nomfudu nounkorwe nomadipago noyipito yomakurulya.” (Gar. 5:19-21) Kutanta asi ‘kudipagesa kompepo zaKarunga yirugana yopasintu.’ (Rom. 8:5, 13) Ayo ngayi kuvatera o demenene magano goge koyininke yompepo ntani nokuruganena kumwe negendeso lyazo, mevango lyokulisigilira nyamoge ga ku pangere madowo goparutu.
6. Fanekesa eyi ya hepa po yipo o vhure kuyima yiyimwa yompepo.
6 Nsene mpepo zokupongoka zi rugana moge, ove ngo likida yikara yoSikriste, “yiyimwa yoMpepo.” (Gar. 5:22, 23) Diworoka asi pwa hepa elituromo lyoge. Mokuyifanekesa: Munandima kuwapaika epya. Pwa hana site sezuva nomema age kapi ta ndindire mokuzangura yuma. Mpepo zokupongoka kwa lifana nosite sezuva. Azo twa zi hepa yipo tu yime yiyimwa yompepo. Nye, muzangu musinke nagu tunda mo nsene munandima kapi ana kurugana unene? (Yis. 10:4) Yosili, monkedi omu o wapeke mutjima goge ayo kulikida asi yiyimwa musinke yompepo zokupongoka nayi yima moge. Lipura nyamoge asi: ‘Ame kuna kupulisira mpepo zokupongoka mokuyima yiyimwa yazo pokuruganena kumwe nazo ndi?’
7. Nsene ono hara kuyima yiyimwa yompepo zokupongoka, morwasinke ya karera nomulyo mokulironga nomokuteda?
7 Mokugwana mo muzangu gomuwa, vanandima va hepa hena kutekera nombuto dawo. Mokuninka asi o yime yiyimwa yompepo, wa hepa mema gousili aga ga kara moBibeli ntani kupitira mombungakriste naina. (Jes. 55:1) Nampo wa tantera ko vantu wovanzi asi Bibeli kwa zi retesa po mpepo zokupongoka. (2 Tim. 3:16) Ntani hena, mbunga zomukareli gokulimburukwa gonondunge kwa gava ediwo lyenzi lyomema gomawa gousili womoBibeli. (Mat. 24:45-47) Ayo yina zere. Mokuninka asi zi tu pitisire mpepo zokupongoka, twa hepa kuresa nokuteda ko koNonkango daKarunga. Nsene kuna kuyirugana oyo, ove kuna kutemwinina yihonena yoyiwa yovaporofete ava ‘va paparere nokukona-kona,’ nombudi edi va gwene. Ayo kutetukisa mokudiva asi nampili vaengeli nawo kwa hara kudiva mausili gopampepo kuhamena Ruvharo rwetumbwidiro ntani mbungakriste zovagwavekwa.—Resa 1 Peturusa 1:10-12.
Ngapi omu nazi ku gendesa mpepo?
8. Morwasinke ya karera nomulyo koge o hundire Jehova mpepo zendi?
8 Kapi tupu ya gwanena po yokulironga nokuteda ko koMatjangwa. Wa hepa kutwikira kuhundira Jehova a ku vatere nokukuvyukisa. Age “kuvhura kurugana yoyinzi-yoyinzi, kupita nayinye eyi atu hundire neyi atu gazara.” (Efe. 3:20; Ruk. 11:13) Nye, ngapi omu no vhura kulimburura nsene gumwe a kupura asi: “Morwasinke nani twikilira kuhundira nsene Karunga ga diva nare ‘eyi na hepa, ame na hana kuyimuhundira’?” (Mat. 6:8) Morwa nsene o hundira mpepo zokupongoka, ove kuna kulikida ehuguvaro lyoge mwaJehova. Pasihonena, nsene muntu a ku hundira evatero, ove ngo rugana eyi no vhura kurugana mokumuvatera, morwa eyi ana kukuhundilira o mu vatere kuna kulikida asi age kwa ku huguvara. (Hetakanesa Yisewe 3:27.) Mokulifana, Jehova kuyihafera nsene o mu hundira mpepo zendi ntani age nga zi ku pa.—Yis. 15:8.
9. Ngapi omu kuza komapongo goSikriste nayi ku vatera zi ku pitisire mpepo zaKarunga?
9 No yi hafera kudiva asi nkedi zimwe omu na zi kupitisira mpepo zaKarunga kwa kwatera mo mapongo noyigongi yetu. Ayo mulyo unene mokulitura mo unene pokuza komapongo ogo nokukapurakena komalikwamo. Pokurugana ngoso ngayi kuvatera o kwate egano yininke ‘yaKarunga yokonhiinhi.’ (1 Kol. 2:10) Mwa kara hena mauwa gokugava nkenye apa malimbururo komapongo. Gazadara ko komapongo aga ko zire yivike yine yina ka pita. Rungapi wa likire kuwoko koge o gave elimbururo pokulikida epuro lyoge? Ono mono hepero zokutura po marunduruko moruha oru ndi? Nsene yimo, tokora eyi ngo rugana moyivike yokomeho. Jehova nga nongonona eharo lyoge lyokulihameka mo momapongo ntani nga ku pa mpepo zendi, ezi ngazi kuvatera o gwanene mo yoyinzi momapongo.
10. Pokutupitisira mpepo, ezigido musinke lya hamena mo eli twa hepa kugava kovantu?
10 Kukupitisira mpepo kwa hamena mo kutambura ezigido eli lya kara mEhororo 22:17 asi: “Mpepo nomufuko tava tanta asi: ‘Wiza!’ Ogu ana kuzuvha eyi, nage a tante asi: ‘Wiza!’ Ogu ana fu enota, a wize; ogu ana hara, a wize a ya guse mema gomwenyo mawoko-woko.” Mpepo kuna kurugana mombunga zomufuko zovagwavekwa, mokugava ezigido eli lyomema gomwenyo. Nsene ove wa tambura ezigido eli asi: “Wiza!” ono tokomene mokutanta asi: “Wiza!” ndi? Ee, mfumwa musi mokulihameka mosirugana esi sokugava mwenyo!
11, 12. Ngapi omu mpepo zokupongoka za lihameka mo mosirugana sokuzuvhisa?
11 Sirugana esi somulyo kuna kusirugana megendeso lyompepo zokupongoka. Ose kuresa omu mpepo zokupongoka za lihamekere mo mouye wokuhova mokutulisa po nomukunda donompe dokuzuvhisira. Mupositoli Paurusa novakwawo ‘mpepo zokupongoka kwa va silikire asi va ha ka udisa moAsiya,’ ntani kapi za va pulisilire va ze moBitiniya. Kapi tuna yi diva nawa-nawa omu mpepo za va silikire va dire kuza komavango ogo, nye yina zere asi mpepo kwa pitisilire Paurusa a zuvhisire moEuropa nazinye. Age kwa gwene emoneko lyomugara gomoMakedoniya ana kumuhundira evatero.—Yirug. 16:6-10.
12 Mokulifana, naina mpepo zaJehova kuna kugendesa sirugana sezuvhiso souzuni mudima. Kapi pana kara mamoneko gopasitetu mokugava egendeso, nye Jehova kugendesa vagwavekwa kupitira mompepo zokupongoka. Ano mpepo kutumangeda vanavazinyetu va rugane paapa va hulira mokuzuvhisa nomokuronga. Yosili nove kuna kulihameka mo mosirugana esi somulyo. Kuvhura o gwederere ko koruhafo roge mosirugana esi sokuhafesa ndi?
13. Ngapi omu no tambura egendeso lyompepo zokupongoka? Yifanekesa.
13 Kuvhura o tambure egendeso lyompepo zokupongoka pokuruganesa nombudi edi va pa vantu vaKarunga. Koneka sihonena somudinkantukadi Mihoko ga tunga moYapani. Ngomupioniri gomupe, age kwa lizuvhire asi kapi ana wapere kutulisa po matengwiropo ndi kapi ga diva nkedi ezi na uyunga mokukoka eharo lyamwenya embo. Posiruwo oso, magano goparugano omu no vhura kurugana matengwiropo gomasupi kwa ga geve mosimbapira soYirugana yetu yoUhompa. Ntani hena sifo A Satisfying Life—How to Attain It kwa si ndurukire. Aso kwa kere siruganeso somulyo unene koVayapani. Mihoko kwa ruganesere magano aga va geve omu no ruganesa sifo oso, unene po omu no rugana matengwiropo gomasupi. Karuwogona tupu ta tameke nomalirongo goBibeli novantu ava va nyokere kulironga pomuhowo. Age kwa tente asi: “Ame kwa kere novalirongi wovanzi wokusika po-12 posikando simwe, ano na hepere kuhundira vamwe va ndindire tanko komeho ni ya tameke kuyalironga nawo!” Yosili, nsene zi ku pitisira mpepo, nokuruganesa mavyukiso aga va pa vakareli vaJehova, ngo zangura yoyinzi.
Huguvara mompepo zaKarunga
14, 15. (a) Ngapi omu nayi vhulika kovantu wokudira kusikilira mo mokusikisa mo eligawo lyawo? (b) Ngapi omu no vhura kugwana vakaume wovawa po?
14 Ngomuzuvhisi ogu va kuhwa, ove wa kara nosirugana esi wa hepa kusikisa mo. (Rom. 10:14) Kuvhura o lizuvhe asi kapi ono wapere mokusikisa mo situmbukira sangoso. Nye, ngwendi vagwavekwa, Karunga yige a ku ninki o kare ono wapere. (Resa 2 Vakolinte 3:5.) Kuvhura o sikise mo eligawo lyoge pokurugana paapa wa hulira ntani nokuhuguvara mompepo zaKarunga.
15 Kapisi ureru kwetu vantu wokudira kusikilira mo mokusikisa mo eligawo lyetu kwaKarunga gwetu gokusikilira mo, Jehova. Udigu umwe kuna kara asi vamwe ava ngo likwatakana nawo kuvhura zi va tetukise mparukiso zoge zompe ntani kuvhura ‘va ku swaure.’ (1 Pet. 4:4) Nye yomulyo po wa ha divara asi ove wa tulisa po vakaume wovape, oJehova naJesus Kristusa. (Resa Jakopo 2:21-23.) Ayo mulyo hena mokudiva vanavanyoko womombungakriste zeni, awo ruha ‘rovapuli vakweneni’ uzuni mudima. (1 Pet. 2:17; Yis. 17:17) Kupitira mompepo zendi Jehova nga ku vatera o gwane vakaume ava ngava twikira kukukundama monaruwa.
16. Ngwendi Paurusa, morwasinke ‘no haferera upirankondo’?
16 Nampili pa kare vakaume wovawa mombungakriste, kuvhura yi ku digopere simpe mokulididimikira maudigu gankenye ezuva. Maudigu aga wa hepa kulididimikira poyiruwo yimwe kuvhura ga ku ninkise o lizuvhe eroroko, ngwendi googu gana vhukire maudigu gomanzi. Oso yiso siruwo sosiwa mokuvyuka kwaJehova, mokumuhundira mpepo zendi zokupongoka. Mupositoli Paurusa kwa tjenge asi: “Apa na kupira nonkondo, makura tani nkondopara.” (Resa 2 Vakolinte 4:7-10; 12:10.) Paurusa ga yi divire asi mpepo zaKarunga kuvhura kugusa po nkenye upirankondo wovantu. Yipo nye, nonkondo daKarunga kuvhura kukupameka nkenye apa no lizuvha upirankondo ndi nsene ono hepa evatero. Mupositoli Paurusa kwa tjenge asi “na hafera upirankondo.” Apa ga pilire nonkondo yipo ga lizuvhire asi mpepo zokupongoka kuna kurugana mwendi. Nove kuvhura o kare nomalizuvho gokulifana!—Rom. 15:13.
17. Ngapi omu mpepo zokupongoka nazi vhura kukuvyukisa monzira zouhunga?
17 Twa hepa mpepo zaKarunga yipo tu sikise mo eligawo lyetu kwendi. Ligazadara nyamoge ngwendi mudugi gowato. Sitambo soge kuna kara mokukarera Jehova narunye. Mpepo zokupongoka kwa fana ngwendi mpepo ezi ono hara kufunda yipo o ka sike wa ndjewa-ndjewa kevango eli ono tamba. Kapi ono hara zi ku yeragure mpepo zouzuni waSatana. (1 Kol. 2:12) Ove wa hepa kunongonona mpepo zongwa, azo kuna kara mpepo zokupongoka. Kupitira moNonkango daKarunga nomombunga ezi azi gendesa mpepo zendi, mpepo zokupongoka ngazi ku vyukisa monzira zouhunga.
18. Yisinke ono tokomene mokurugana ngesi, ntani morwasinke?
18 Nsene ove kuna kulironga noNombangi daJehova nokuhafera malikwatakano gopampepo kumwe nawo, nye simpe kapi wa gusa nontambo domulyo dokuligava nokugwana ekuho, lipura nyamoge asi: ‘Morwasinke nina kulikata-katera?’ Nsene o nongonona sirugana sompepo zokupongoka mesikisomo lyompango zaJehova naina ntani nokulikida rupandu kegendeso lyazo, gusa nye nontambo edi wa lironga asi douhunga. Jehova nga ku tungika momunene. Neharo, age nga ku pa mpepo zendi zokupongoka. Nsene ove kwa gwene ekuho nomvhura dononzi da ka pita, yosili wa limonena egendeso lyompepo zokupongoka. Ove wa limonena nokulizuvha omu Karunga a vhuru kukunkondopeka nompepo zendi. Yimo ngayi ku horokera ngorooro dogoro nokomeho. Yipo nye, tokomena mokutwikira kukupitisira mpepo zokupongoka.
Kuvhura o diworoke ndi?
• Yisinke ayi tanta ‘kukupitisira mpepo zaKarunga’?
• Yisinke ngayi kuvatera ‘zi ku pitisire mpepo zaKarunga’?
• Ngapi omu no vhura kusikisa mo eligawo lyoge?
[Efano lyepepenuno 17]
Pwa hepa elituromo mokuwapaika mutjima goge
[Mafano gepepenuno 19]
Ove kuna kukugendesa mpepo zaKarunga ndi?