Eyi ga rongere Jesus yokumuhamena

“Yosili Jesus ga divire asi yige yilye noku ga tundililire neyi ga wizilire mouzuni ntani nomeho ezi za mu ndindililire.”—MUTJANGI HERBERT LOCKYER.

KOMEHO tu tambure nokutura epuro momarongo gaJesus, twa hepa kudiva yininke yimwe yokumuhamena. Yilye sili ga kere Jesus? Kupi ntundiliro zendi? Sitambo musinke ga kere naso meparu? Tatu gwana malimbururo pokuresa mEvangeli lyaMateusa lyaMarukusa lyaRukasa ntani neli lyaJohanesa.

Age kwa parukire komeho va ya mu hampuruke pevhu Sikando simwe Jesus kwa tente asi: ‘Abirahamu age simpe nokumureta si, ame ponili.’ (Johanesa 8:58) Abirahamu kwa parukire nomvhura 2 000 komeho zehampuruko lyaJesus. Nye, Jesus age kwa parukire nare komeho a ya paruke Abirahamu gomulimburukwi. Kupi oku ga kere Jesus? Age kwa tente asi: ‘Ame kwa tunda meguru.’—Johanesa 6:38.

MunwaKarunga Jehova kwa kara novana wovanzi wovaengeli. Nye, Jesus kwa likarera. Age kwa litumbwire mwene asi “Munwa gelike a huru gwaKarunga.” (Johanesa 3:18) Ntanto ozo kutanta asi Jesus kwa mu sitire Karunga pwagelike. Kupitira mwaMunwa gelike a huru yimo ga sitilire Karunga yininke nayinye yapeke.—Vakorosi 1:16.

“MunwaMuntu” Jesus kwa ruganesere ntumbwisiso ezi yikando yoyinzi mokulitumbura mwene. (Mateusa 8:20) Jesus kwa yi likidire asi age kapisi muengeli ogu ga gusire rutu ropanyama. Nye age kwa kere nawa-nawa muntu. Kupitira mompepo zendi zokupongoka, Karunga ga rundwilire eparu lyaMunwendi kutunda meguru ali ture momukoga gwaMariya, mukadona ogu ga dilire kulikundama rumwe nomugara. Morwa oyo, Jesus kwa kere muntu gokusikilira mo.—Mateusa 1:18; Rukasa 1:35; Johanesa 8:46.

Mesiyasa getumbwidiro Mukadi goMusamaliya kwa tanterere Jesus asi: ‘Na yi diva asi, Mesiyasa, nga wiza.’ Jesus ta limburura asi: “Ani nyame ogu nina kuuyunga neni.” (Johanesa 4:25, 26) Nkango “Mesiyasa” ntani “Kristusa” kutanta asi “Mugwavekwa.” Jesus kwa mu gwavekere ndi kwa mu horowere Karunga yipo a rugane sirugana sokulikarera mokusikisa mo matumbwidiro gaKarunga.

Konda zomulyo zeyi ga wizilire pevhu Sikando simwe Jesus kwa tente asi: ‘Ame nyame tupu kuudisa Mbudi zoNgwa zoUhompa waKarunga, yeeyi yiyo va tumina nge.’ (Rukasa 4:43) Nampili ngomu ga ruganenene vantu woruhepo yirugana yoyinzi yoyiwa, sininke somulyo po meparu lyendi kwa kere sokuzuvhisa Uhompa waKarunga. Eyi ga rongere kuhamena Uhompa natu ka yi zogera komeho.

Yosili, Jesus kapi ga kere muntuuntu tupu.a Ngamoomu natu ka yi mona, eparu lyendi lyemeguru kwa pameka mulyo gononkango edi ga ya uyungire apa pevhu. Kapisi yi tu tetukise asi mbudi ezi ga zuvhisire kuna kurundurura maparu gomamiliyona govantu mouzuni mudima.

[Nondanda dokonhi]