Yisinke va hepa kulironga vanona?
“Nkenye etjangwa, eli za retesa po Mpepo zaKarunga, kwa kara nomulyo gokuronga usili. Alyo kukorangeda nokupukurura nokurongesa uhungami.”—2 TIMOTEUSA 3:16.
VANONA va hepa kuvaronga usili kuhamena Karunga. Kupi oku nava lironga usili? Mobuke ezi va fumadeka unene momaukarelikarunga uzuni mudima, Bibeli.
Bibeli azo ngwendi mbilive zokutunda kwaKarunga. Mombilive ozo, Karunga kututantera kuhamena yikara yendi nonompango dendi dokukuhuka kovana vendi navenye, vanona novakurona. Konekeni marongo gamwe ga kara moBibeli neyi nava vhura kulirongera ko nampili vanona.
Ngwendi moomu yina yi likida eyi yihonena, yirongwa yomoBibeli kuvhura kuvatera vanona va kare norupandu nefumadeko nonkenda. Nye wolye nava ronga vanona yirongwa oyo?
Yisinke ana tu harere Karunga tu dive kumuhamena?
◼ Eyi azi rongo Bibeli: “Yipo vantu ngava dive asi nyove, gedina Jehova, nyovelike Mupangeli gomunene gouzuni mudima.”—Episarome 83:18, NW.
Sirongwa: Karunga muntu mwene-mwene ntani ga kara nedina.
◼ Eyi azi rongo Bibeli: “Age ga diva magazaro getu nomaharo getu nagenye. Nsene o za kwendi, age ta ku tambura; nye nsene o mu zumba, nage ta ku zumbu dogoro narunye.”—1 Histoli 28:9.
Sirongwa: Jehova Karunga kutupakera mbili natuvenye, kukwatera mo vanona. (Episarome 10:14; 146:9) Ana tu harere tu mu lironge.
◼ Eyi azi rongo Bibeli: ‘Walye o hepeke nsigwe. Nsene o mu hepeka, makura a zigide nge, ame ngani mu zuvha usimbu.’—Exodus 22:22-24.
Sirongwa: Jehova kupurakena nampili komakanderero govanonagona. Ose kuvhura tu uyunge naKarunga nkenye apa nokumupwagesera magazaro nomalizuvho getu gokonhi.
◼ Eyi azi rongo Bibeli: ‘Nye awo ngava mu rwisa, va mu zuvhise ruhodi rorunene.’—Jesaya 63:10.
Sirongwa: Mbuuyungiso noyirugana yetu kukundama malizuvho gaJehova, yipo nye twa hepera kugazara komeho zokuuyunga ndi zokurugana yuma.
Ngapi natu tekura ava va lisiga nose?
◼ Eyi azi rongo Bibeli: “Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.”—Yirugana 10:34, 35.
Sirongwa: Nsene Karunga kutambura vantu wokonontundiliro nadinye, nose twa ha tondorora wopeke morwa sipapa sawo ndi ava va lisiga nose kosipa.
◼ Eyi azi rongo Bibeli: “Omu liwapaikire nkenye apa kulimburura nkenye ogu ana kumupura yokumusingonwena ehuguvaro eli lya kara mweni. Omu yi rugane nombili nefumadeko.”—1 Peturusa 3:15, 16.
Sirongwa: Nsene tatu zogere kuhamena epuliro lyetu, twa hepa kuuyunga nomukumo nye monkedi zombili. Twa hepa hena kulikida efumadeko kowo epuliro lyawo lya lisiga neli lyetu.
Ngapi natu tekura vemepata?
◼ Eyi azi rongo Bibeli: “Vanona, omu limburukwe kovakurona veni mwankenye eyi, yeeyi yimo ga hara Karunga.”—Vakorosi 3:20.
Sirongwa: Vanona wovalimburukwi kapi tupu ava likida asi va hara vakurona vawo nye hena va hara kuhafesa Karunga.
◼ Eyi azi rongo Bibeli: “Omu lididimike-didimikire, tomu ligusa-gusire po, nsene muna lizono namukweni. Omu dongwenene po vakweneni moomu ga mu dongwenena po Hompa.”—Vakorosi 3:13.
Sirongwa: Vantu navenye, kukwatera mo vemepata lyetu, ngava tu handukisa poyiruwo yimwe. Nye, nsene tuna hara Karunga a tu dongwenene po, nose twa hepa kulironga kudongwenena po vakwetu.—Mateusa 6:14, 15.
Morwasinke nohungikira nokukara nonkenda?
◼ Eyi azi rongo Bibeli: “Zumbeni yimpempa! Nkenye ogu a uyunge namukwawo yosili.”—Vaefeso 4:25.
Sirongwa: Apa atu uyunga usili, ose kuhonena Karunga nokumuhafesa. Nye nsene tu kara nonkareso zokutanta yimpempa, tatu fana nkore zaKarunga, Muzonaguli age ‘guhya yimpempa.’—Johanesa 8:44; Titusa 1:2.
◼ Eyi azi rongo Bibeli: “Nkenye eyi mwa harera vantu asi ava yi mu ninke, none omu yi va ninke.”—Mateusa 7:12.
Sirongwa: Twa hepa kufira sinka malizuvho nomagazaro noyihepwa yepata lyetu novakwetu womonkarapamwe. Nsene tatu va likida ‘nkenda,’ vakwetu nawo ngava tu tekura monkedi zongwa.—1 Peturusa 3:8; Rukasa 6:38.