Wolye va hepa kuronga vanona kuhamena Karunga?
“Murongwa kapi a pitakana murongi gwendi; nye nsene ana pu kumuronga, ntani nye ana kufana murongi gwendi.”—RUKASA 6:40.
VAKURONA vamwe kulizuvha asi kapi va wapera kuronga vana vawo kuhamena Karunga. Awo kulizuvha asi kapi va lironga ndi kapi va kara nediwo lyenzi kuhamena ukarelikarunga mokukara varongi wovawa. Morwa oyo, awo kugava situmbukira somulyo oso kovanekoro ndi kovampitisili womaukarelikarunga.
Nye, wolye va wapera nawa kuronga vanona mausili goukarelikarunga nonompango dokukuhuka? Tarurura eyi za uyunga ko Bibeli, ntani o hetakanese nonkango odo neyi va gwana vakonakoni.
Yisinke situmbukira saguhya?
Eyi azi rongo Bibeli: “Anone oguhya ko, walye omu pakere vana veni nyanya, hawe, omu va tekure oku tomu va pukurura nokuliza neyi ga hara Hompa.”—Vaefeso 6:4.
Eyi va gwana vakonakoni: Ngapi omu vaguhya ava gwanene mo uwa nsene va tunga po epuliro lyokupama lyoukarelikarunga? Sirongwa simwe va pwagesere mo-2009 kwa tente asi: “Kulihameka momapuliro goukarelikarunga kuvhura kuvatera vagara va kare vaguhya wovawa. Ukarelikarunga kukundama nkareso zomuntu ntani kumupa marongo nomavyukiso omu nava vhura kuparuka.”—Fathers’ Religious Involvement and Early Childhood Behavior.
Bibeli kwa nkondopeka mulyo gositumbikira saguhya merero nemedeuro lyovanona. (Yisewe 4:1; Vakorosi 3:21; Vahebeli 12:9) Nye mapukururo ogo gomoBibeli simpe mulyo ndi? Mo-2009 Univesiti zomoFlorida kwa pwagesere sirongwa esi sa uyungire omu vaguhya va kundama vana vawo. Vakonakoni kwa gwene asi vanona ava va kara novaguhya ava va lihamekere mo unene merero lyawo awo kwa kara vanona wonkenda noyikara yoyiwa. Vamati kwa kara nononkedi donongwa ano vakadona kukara nonondunge. Yosili, mapukururo gomoBibeli simpe mulyo.
Mulyo gositumbikira sazinya
Eyi azi rongo Bibeli: ‘O purakene eyi vana kukutantera onyoko.’—Yisewe 1:8.
Eyi va gwana vakonakoni: Mo-2006 buke zimwe kwa tumbura asi vazinya yiwo ava kara nosiruwo sosire mokuuyunga nokukara nankenye munona kupitakana vaguhya, ayo ya lifana moyirongo yoyinzi yokulisiga-siga. Morwa oyo, mbuuyungiso noyirugana nonkareso zazinya kukundama unene ekuro lyomunona.—Handbook of Child Psychology.
Vakurona ava ava ruganene kumwe mokuronga vana vawo usili kuhamena Karunga, awo kupa vana vawo mauhwi gavali gomulyo. Wokuhova, vanona kugwana mpito zokutulisa po elikwatakano naGuhyawo gemeguru, elikwatakano eli ngali va retera mauwa meparu lyawo nalinye. Wauvali, vanona kulironga kupitira mosihonena omu mugara nomukadi va hepa kuruganena kumwe mokusikisa mo yitambo yomulyo. (Vakorosi 3:18-20) Nampili ngomu vantu vapeke nava vhura kuvatera guhya nazinya, vakurona yiwo va kara nositumbukira sokuronga vana vawo kuhamena Karunga nomu ana harere epata likare.
Nye, ngapi omu vakurona nava ronga vana vawo? Nondongeseso musinke donongwa po?