Awo kwa ndindilire Mesiyasa

“Endindiro lyenene tali tameke kupinduka movantu. Awo tava tameke kulimbilirwa kombinga zaJohanesa, tava gazara asi nampo yige Mesiyasa.”—RUK. 3:15.

1. Mbudi musinke zoruhafo muengeli ga tanterere vasita?

AGO kwa kere masiku, ano vasita kwa kungire nonzwi dawo mezana. Va liharuka ko, muengeli gwaJehova ana sikama pwawo, ano uyerere waKarunga awo kuna kupaima pwawo. Makura muengeli ta va tantere asi: “Mwa ha tjira! Yeeyi tareni, ame kuna mu retere Mbudi zoNgwa ezi ngazi reta ruhafo rorunene kovantu navenye. Gaaga masiku ngesi aga vana mu hampurukire Muzowoli, yige Kristusa,” ogu nga kara Mesiyasa. Ano vasita va vhulire kukagwana munona ogu va rangekere mekungu lyokulira yimuna. Va liharuka ko, “mbunga zovakwayita vemeguru” tazi dimbire Jehova pokutanta asi: “Efumano kwaKarunga meguru-guru! Mpora pevhu kovantu ava ga hara!”—Ruk. 2:8-14.

2. Yisinke azi tanta nkango “Mesiyasa,” ntani ngapi omu ngava mu dimburura?

² Vasita woVajuda va yi divire asi “Mesiyasa” ndi “Kristusa” kwa tamba “koMugwavekwa” gwaKarunga. (Ex. 29:5-7) Nye ngapi omu va divire asi mukeke ogu ga tumbwire muengeli yige Mesiyasa, mugwavekwa gwaJehova? Pokukonakona mauporofete gomoMatjangwa goRuhebeli nokuhetakanesa yirugana neparu lyomukeke ogo.

Morwasinke vantu va karere nendindiro lyaMesiyasa?

3, 4. Ngapi omu tuna kwata egano Ndaniyera 9:24, 25?

³ Apa Johanesa Mukuhwi ga tamekere sirugana sendi sokuzuvhisa, eyi nga uyunga neyi nga rugana kwa ninkisire vantu vamwe va gazare asi nampo yige Mesiyasa. (Resa Rukasa 3:15.) Morwa moBibeli kwa kara mo uporofete wokuhamena yivike 70 ou wa vaterere vantu va dive siruwo esi ga ya monekere Mesiyasa. Awo kutanta asi: “Kutunda posiruwo esi va tantere asi va tungurure Jerusarema dogoro paapa nga horoka Mesiyasa, ngapa pita yivike ntambali ntani noyivike nomurongo ntazimwe nambali.” (Ndan. 9:24, 25, NW) Valirongi va yi kwatesa ko asi nkenye ezuva mosivike kufanekesa mvhura.

⁴ Naina, Nombangi daJehova va kwata egano asi yivike 69, ndi nomvhura 483, va tumbura mwaNdaniyera 9:25 kwa tamekere momvhura 455 komeho zosiruwo saKristusa apa hompa Aretaserekesesi goVaperesia ga tanterere Nehemiya a ka wapukurure nokutungurura Jerusarema. (Neh. 2:1-8) Nomvhura odo 483 kwa hege momvhura 29 apa ga gwene Jesus ekuho. Ntani hena yipo ga mu gwavekere Jehova nompepo zokupongoka a kare Mesiyasa.—Mat. 3:13-17.a

5. Mauporofete gamwe musinke aga natu ka konakona?

⁵ Tu zeni tu ka konakone mauporofete gamwe hena kuhamena Mesiyasa aga ga ya sikilire mo pehampuruko nopounona nepezuvhiso lyendi. Yangesi ngayi nkondopeka epuro lyetu mononkango daKarunga douporofete. Ngayi gava hena umbangi wokuzera asi Jesus sili kwa kere Mesiyasa ogu va ndindilire.

Mauporofete geparu lyendi lyounona

6. Faturura omu uporofete waGenesis 49:10 wa ya sikilire mo.

⁶ Mesiyasa kwa tundilire moVaisraeli mezimo lyaJuda. Komeho tupu Jakopo a fe, age kwa tungikire vana vendi, ano kwa pumbire asi: “Mpango zouhompa kapi ngazi mu tunda Juda, mpango zoMupanguli kapi ngazi tunda po pokatji komaguru gendi dogoro noku nga wiza ogu za hamena. Ano nomuhoko nadinye ngadi zuvha mwendi.” (Gen. 49:10) Varongi woVajuda va yi pulire asi nonkango daJakopo kwaJuda kwa hamenene kwaMesiyasa. Uporofete ou kulikida asi ogu za hamena mpango zouhompa nga tunda mezimo lyaJuda. Hompa gokuhova gezimo lyaJuda kwa kere Ndafita. Komeho va ka mu hampuruke Jesus, muengeli Ngabiliyera kwa tanterere Mariya asi: “Hompa Karunga nga mu pa uhompa wazinakuru Ndafita. Age nga pangera rudi rwaJakopo dogoro narunye, ano uhompa wendi kapi ngau paka uhura.” (Ruk. 1:32, 33) Jesus kwa tundilire mezimo lyaJuda mepata lyaNdafita. Yipo nye, Jesus Kristusa yige va tumbura mwaGenesis 49:10.—Mat. 1:1-3, 6; Ruk. 3:23, 31-34.

7. Kupi oku va hampurukilire Mesiyasa, ntani morwasinke eyi ya karera nomulyo?

⁷ Mesiyasa ngava mu hampurukira moBeterehema. Muporofete Mika kwa tjenge asi: “Ove Beterehema Efurata, ove nyove sitata simwe sosinunu–nunu moJuda, nye moge yimo ngani gusa mupangeli gwaIsraeli, gemezimo lyokutunda kwanare.” (Mika 5:2) Kwa pumbire asi Mesiyasa ngava mu hampurukira mositata saJudeya Beterehema, esi ngava tumbura nare asi Efurata. Nampili ngomu ozina vaJesus, Mariya noguhwe wositumbwena Josefa va tungire moNasareta, veta zoVaroma zokulitjangesa za va ninkisire va ze koBeterehema oku va ka hampurukilire Jesus. (Mat. 2:1, 5, 6) Alyo kwa kere esikiliromo lyokutetukisa!

8, 9. Yisinke va pumbire kuhamena ehampuruko lyaMesiyasa noyihorokwa eyi ya kweme ko?

⁸ Mesiyasa nga mu hampuruka mukadona (Resa Jesaya 7:14.) Velise ezi kwa pumbire asi “mukadona” nga hampuruka mumati. Megendeso lyompepo zokupongoka, Mateusa kwa tjenge asi uporofete ou kwa ya sikilire mo pehampuruko lyaJesus. Evangeli lyaMateusa neli lyaRukasa kwa tanta asi Mariya kwa kere mukadona ogu ga dira kukundama rumwe mugara ogu ga ya kere nomarutu gavali kupitira mompepo zokupongoka.—Mat. 1:18-25; Ruk. 1:26-35.

⁹ Konyima zehampuruko lyaMesiyasa, vakeke ngava va dipaga. Sihorokwa sokulifana sa horokere mosiruwo sanare, apa hompa gwaEgipite Farao ga geve mpangera asi nkenye mukeke gomugara goMuhebeli va hepa kumuzugumina moMukuro gwaNili. (Ex. 1:22) Nye uporofete waJeremiya 31:15, 16, kwa uyunga Rakera ana kulira vana vendi ava va twere “kosirongo sovanankore.” Ezwi lyendi lyokulira kwa zuvhikire moRama nomomukunda gwaMbenyameni korwamuzogo gwaJerusarema. Mateusa kwa likida asi nonkango daJeremiya kwa ya sikilire mo apa hompa Herodesa ga geve mpangera zokudipaga vanona wovagara womoBeterehema nonomukunda daso. (Resa Mateusa 2:16-18.) Gazadara ruguwo oru va kere naro vantu!

10. Faturura omu uporofete waHoseya 11:1 wa ya sikilire mo mwaJesus.

¹⁰ Mesiyasa ngava mu zigida mo moEgipite. (Hos. 11:1) Komeho Herodesa a gave mpangera zokudipaga vakeke, muengeli kwa tanterere Josefa naMariya va tware Jesus koEgipite. Oko yiko va ka kere “dogoro noku ga fire Herodesa, asi di sike mo nonkango daHompa, edi ga uyungisire muporofete Hoseya asi: ‘Ame kwa zigida Munwange, a tunde mo moEgipite.’” (Mat. 2:13-15) Jesus kapi ga vhulire kupangera yininke eyi ya horokere pehampuruko nepeparu lyendi lyounona.

Mesiyasa ta tameke kuzuvhisa!

11. Yilye ga wapaikilire Mesiyasa nzira?

¹¹ Ntumi ngazi wapaikira nzira Mesiyasa. Marakiya kwa pumbire asi “muporofete Eliya” nga rugana sirugana esi, mokuwapaikira nomutjima dovantu kewizo lyaMesiyasa. (Resa Marakiya 4: 5, 6.) Jesus mwene kwa tente asi Johanesa Mukuhwi kwa kere ngwendi “Eliya.” (Mat. 11:12-14) Ano Marukusa kwa uyungire asi sirugana sokuzuvhisa saJohanesa kwa sikisire mo uporofete waJesaya. (Jes. 40:3; Mar. 1:1-4) Kapisi Jesus yige ga tanterere Johanesa a mu wapaikire nzira, nye Karunga yige ga horowere Johanesa a rugane sirugana ngwendi saEliya mokuwapaika vantu va ya tambure Mesiyasa.

12. Sirugana musinke sokulikarera va pere Mesiyasa?

¹² Karunga nga gava kwaMesiyasa sirugana sokulikarera. Apa ga kere Jesus Mosinagoge zomoNasareta modoropa omu ga kulilire, Jesus kwa resere mobukegango zaJesaya nonkango edi da mu hamenene asi: “Mpepo zaHompa pozili pwange, yeeyi age kwa gwaveka nge asi ani udisire vahepwe Mbudi zoNgwa. Age kwa tuma nge asi ani zuvhisire nonkwate emanguruko, ano vatwiku emahuko, ni ya hepurure ava va kara moruhepo, oku tani divisa mumvho ogu nga parura Hompa vantu vendi!” Morwa Jesus age sili kwa kere Mesiyasa, eyi yiyo ga uyungilire asi: “Naina etjangwa eli lina siki mo, nanyamweni muna lizuvhire ko.”—Ruk. 4:16-21.

13. Yisinke ga uyunga ko Jesaya kuhamena sirugana sezuvhiso saJesus moGalireya?

¹³ Sirugana sokuzuvhisa saMesiyasa moGalireya kwa si pumbire. Jesaya kwa pumbire kuhamena ‘sirongo somazimo gaSeburoni naNafitali . . . naGalireya mwene, oku va kara vanayirongo.’ Age kwa tjenge asi: “Mbunga ezi azi gendagura momundema, ngazi mona uzera wounene. Ava va kara mosirongo somundundumba gonomfa, yiwo ngau minikira uzera.” (Jes. 9:1, 2) Jesus kwa tamekere kuzuvhisira moGalireya, modoropa zaKaperenaumu nomonomukunda daSeburoni naNafitali mokuronga vantu usili ou wa va temenene ngwendi uzera. (Mat. 4:12-16) MoGalireya yimo Jesus ga geve Eudiso lyopoNdundu nokuhorowora vapositoli vendi nokurugana sitetu sendi sokuhova ntani yimo hena ga monekerere varongwa vamwe wokupitakana po-500 konyima zevhumbuko lyendi. (Mat. 5:1–7:27; 28:16-20; Mar. 3:13, 14; Joh. 2:8-11; 1 Kol. 15:6) Yipo ga sikisire mo uporofete waJesaya pokuzuvhisira ‘mosirongo somazimo gaSeburoni naNafitali.’ Yosili, Jesus kwa zuvhisire mbudi zoUhompa nkenye oku moIsraeli.

Mauporofete gamwe kuhamena Mesiyasa

14. Monkedi musinke Episarome 78:2 ga li sikisire mo Jesus?

¹⁴ Mesiyasa nga ruganesa yifanekeso. Muepisarome Asafa kwa dimbire asi: “Ame kuna hara ni mu tantere moyifanekeso ni mu sansekere yisewe yanare.” (Epis. 78:2) Ngapi omu natu yi diva asi uporofete ou kwa tamba Jesus? Mateusa ta tu tantere omu wa ya sikilire mo uporofete owo. Konyima zokutjanga yifanekeso yaJesus yokuhamena mbuto nohingo ngoyifanekeso mokuronga vantu Uhompa waKarunga ga gwederere ko asi: ‘Nayimwe si ga va tanterere pa pire sifanekeso, asi di sike mo nonkango edi ga uyungire muporofete pokuuyunga asi: “Ame ngani zahura kana kange moyifanekeso, ngani uyunga yininke eyi ya horama kutunda petameko lyouzuni.”’ (Mat. 13:31-35) Jesus nga ruganesa yifanekeso mokuvatera vantu va kwate egano usili kuhamena Jehova.

15. Ngapi omu uporofete waJesaya 53:4 wa ya sikilire mo?

¹⁵ Mesiyasa nga verura vantu. Jesaya kwa pumbire asi: “Age ta litwike mauvera getu, marunyando getu ga simba.” (Jes. 53:4) Mateusa kwa uyungire hena asi konyima zokuverura ngumweyi zaPeturusa, Jesus kwa verwire hena vapeke yipo asi “yi sike mo eyi ga uyungire muporofete Jesaya asi: ‘Age kwa likambeka upiranonkondo wetu, yiyo ga simba mauvera getu.’” (Mat. 8:14-17) Ntani hena ga rugene yitetu yimwe yoyinzi mokuverura vantu.

16. Ngapi omu mupositoli Johanesa ga likidire asi uporofete waJesaya 53:1 kwa sikilire mo mwaJesus?

¹⁶ Nampili ngomu Mesiyasa nga rugana yoyiwa, wovanzi kapi ngava mu pura. (Resa Jesaya 53:1.) Mokulikida asi uporofete ou wa sika mo, mupositoli Johanesa kwa tjenge asi: “Nampili ngomu ga rugene yitetu yoyinzi moyitarameho yawo, awo nokumupura si, di sike mo nonkango domuporofete Jesaya edi ga tantere asi: ‘Hompa, yilye ogu ga pura eraka lyetu, nonkondo daHompa yilye va di horwera?’” (Joh. 12:37, 38) Nampili posiruwo sezuvhiso lyomupositoli Paurusa, wovanzi kapi va pulire asi Jesus yige Mesiyasa.—Rom. 10:16, 17.

17. Ngapi omu uporofete wemEpisarome 69:4 wa ya sikilire mo?

¹⁷ Mesiyasa ngava mu nyenga mawoko-woko. (Epis. 69:4) Jesus kwa tente asi: “Ngano kapi na rugana mokatji kawo yirugana eyi ga dira kurugana muntu rumwe, ngano awo kutupu nzo. Nye opo va yi mona nye, walye eyi va tu nyengera ame naTate. Asi nye nonkango di sike mo, edi va tjanga moVeta zawo asi, ‘Awo kwa nyenga nge tupu mawoko-woko.’” (Joh. 15:24, 25) “Veta” vana tumbura apa kwa tamba koMatjangwa nagenye. (Joh. 10:34; 12:34) Yihorokwa yomoMavangeli kulikida asi Jesus kwa mu nyengere, unene po vampitisili womaukarelikarunga woVajuda. Ntani hena, Kristusa kwa tente asi: “One uzuni nokuwapa si kumunyenga, nye ame kwa nyenga nge, yeeyi ame kuupa undipo asi, yirugana yawo yidona.”—Joh. 7:7.

18. Yisinke ngatu ka konakona mosirongwa sokukwama ko?

¹⁸ Vasikuli vaJesus wokuhova va yi divire asi Jesus yige Mesiyasa, morwa eyi ga rugene kwa sikisire mo mauporofete goUmesiyasa gomoMatjangwa goRuhebeli. (Mat. 16:16) Ngomu tuna yi lirongo mosirongwa esi, mauporofete gamwe ogo kwa sikilire mo posiruwo separu lyaJesus lyounona nomosirugana sendi. Mauporofete goUmesiyasa gamwe hena ngatu ka ga konakona mosirongwa sokukwama ko. Nsene tu gazadara ko unene komauporofete ogo, ago ngaga nkondopeka epuro lyetu asi Jesus Kristusa sili yige Mesiyasa mugwavekwa gwaGuhyetu gemeguru, Jehova.

[Nondanda dokonhi]

Ngapi omu no vhura kulimburura?

• Mauporofete musinke ga sikilira mo kuhamena ehampuruko lyaJesus?

• Yilye ga wapaikilire Mesiyasa nzira?

• Nonkango musinke douporofete waJesaya egaununo 53 da ya sikilire mo mwaJesus?