Mesiyasa, mogu a gavere eparu Karunga
“Ano moomu ava fu vantu navenye morwa yiwo ruvharo rwaAdamu, yimo ngorooro hena ngava va tura navenye mwenyo morwa yeeyi awo kwa likwatakana naKristusa.”—1 KOL. 15:22.
1, 2. (a) Yisinke va uyungire oAndiliyasa naFilipusa apa va mwene Jesus? (b) Morwasinke natu tantera asi twa kara nomaumbangi gomanzi kuhamena Jesus ngaMesiyasa kupitakana aga va kere nago Vakriste womouye wokuhova?
ANDILIYASA kwa tanterere mukurwendi Peturusa asi “ose tuna gwana Mesiyasa,” age ga pulire asi Jesus goMunasareta kwa kere Mugwavekwa gwaKarunga. Filipusa ga yi pulire makura ta ka papara kaume kendi Natanayera, nokumutantera asi: “Ose tuna mono ogu ga tjanga Mosesa moVeta, nogu va tjanga vaporofete nawo. Edina lyendi yige Jesus gomoNasareta, munwaJosefa.”—Joh. 1:40, 41, 45.
2 Ove wa yi pura nawa-nawa asi Jesus yige Mesiyasa getumbwidiro, ogu ga tura po Jehova ‘mokututwara keparu’ ndi? (Heb. 2:10) Naina twa kara nomaumbangi gomanzi kupitakana aga va kere nago vasikuli vendi womouye wokuhova asi age kwa mu horowora Karunga. Kutundilira kehampuruko dogoro kevhumbuko lyendi, Nonkango daKarunga kwa gava umbangi wokuzulilira asi age yige Kristusa. (Resa Johanesa 20:30, 31.) Bibeli kwa likida hena asi Jesus nga twikira ngorooro kusikisa mo sirugana sendi kutundilira meguru ngaMesiyasa. (1 Kol. 15:22; Joh. 6:40) Kuliza neyi wa lironga moBibeli, nove naina kuvhura o tante asi ono “gwana Mesiyasa.” Nye pomuhowo tu zeni tu konakone omu varongwa wokuhova va ya yi divire asi vana gwana Mesiyasa.
“Sihoramo” saMesiyasa kwa si horwere kanunu-kanunu
3, 4. (a) Ngapi omu varongwa womouye wokuhova va ‘gwene Mesiyasa’? (b) Morwasinke no tantera asi Jesus gelike ga vhulire kusikisa mo mauporofete nagenye goUmesiyasa?
3 Ngapi omu vasikuli vaJesus womouye wokuhova va divire asi age yige Mesiyasa? Kupitira movaporofete, Jehova kwa horwere kanunu-kanunu omu ngano va ya dimbwilire Mesiyasa getumbwidiro. Mulirongi gumwe goBibeli kwa yi fanekesere kokutungurura sihongwa esi va tetagura. Yi fanekesa asi vagara wokulisiga-siga ava va dira kulimona tava reta maruha gosihongwa kumwe. Nsene tava tura maruha kumwe ga ligwanekere nawa-nawa, to yi diva asi pweli ogu ana tetagura sihongwa sina yiyo ana tumu maruha kovagara vena. Ngwendi nkenye ruha rosihongwa, nkenye uporofete woUmesiya tau gava mbudi zomulyo kuhamena Mesiyasa.
4 Ayo kuvhura yi kare nye asi muntu gumwe a sikise mo mauporofete nagenye goUmesiyasa pwamwene tupu ndi? Mulirongi gumwe goBibeli kwa tente asi ayo nampo nokuvhura si kuyipura asi muntu ga sikisire mo mauporofete goUmesiyasa nagenye pwamwene. Nye mulirongi ogo ga hungikire pokuhulisa asi: “Mohistoli nazinye Jesus gelike ga vhulire kuyisikisa mo oyo.”
5, 6. (a) Ngapi omu za vhulire kukara mpanguro zaSatana? (b) Ngapi omu Karunga ga horwere kanunu-kanunu ezimo ‘lyoruvharo’ rwetumbwidiro?
5 Edi lyomauporofete goUmesiyasa kuna kara “sihoramo” esi sa kara nomaruha gomanzi gomulyo unene. (Koros. 1:26, 27; Gen. 3:15) Mosihoramo oso kwa kwatera mo mpanguro zokupangura Satana Muzonaguli “ezoka lyanare,” eli lya ninkisire vantu va gwire mononzo ntani nomonomfa. (Ehor. 12:9) Ngapi za vhulire kukara mpanguro ozo? Jehova kwa pumbire asi ‘ruvharo’ oru ngaru tunda ‘momukadi’ ngaru myona mutwe gwaSatana. ‘Ruvharo’ oro va pumbire aro ngaru myona mutwe gwezoka, pokuhanangura po eyi ayi retesa po urwanesi nouvera ntani nonomfa. Nampili ngoso, Karunga ga pulisilire Satana a hume kosinsinsina ‘soruvharo’ romukadi pasifanekeso.
6 Jehova kanunu-kanunu ga horwere ogu ga ya kere ‘ruvharo’ rwetumbwidiro. Karunga kwa tumbwidilire Abirahamu asi: “Moruvharo roge yimo ngava tungikira nombunga nadinye domouzuni.” (Gen. 22:18) Mosesa kwa pumbire asi ruvharo oro ngaru kara ‘muporofete’ gomunene ga pitakana Mosesa. (Deut. 18:18, 19) Ndafita kwa mu tumbwidilire asi Mesiyasa nga tundilira moruvharo rwendi ntani nga pinga sipundi souhompa waNdafita dogoro narunye, ano konyima va ya yi pamekere vaporofete.—2 Sam. 7:12, 16; Jer. 23:5, 6.
Maumbangi aga aga likida asi Jesus, Mesiyasa
7. Monkedi musinke Jesus ga tundilire ‘momukadi’ gwaKarunga?
7 Karunga kwa tumine Munwendi, sisitwa sokuhova, a ya kare ‘ruvharo’ rwetumbwidiro, age kwa tundilire mombunga zoyisitwa yendi yopampepo yemeguru eyi ya fanekesa mukadendi. Eyi ya ninkisire MunwaKarunga a huru a ‘linunupike’ pokusiga eparu lyendi lyemeguru nokuyamuhampuruka ngomuntu gokusikilira mo. (Fil. 2:5-7; Joh. 1:14) Mariya ‘pokumukudumika’ mpepo zokupongoka kwa geve ehuguvaro asi munona ogu nga hampuruka ngava mu ‘tumbura asi Mupongoki, MunwaKarunga.’—Ruk. 1:35.
8. Ngapi omu Jesus ga sikisilire mo uporofete woUmesiyasa apa ga ligeve mwene va mu kuhwe momema?
8 Mauporofete goUmesiyasa kwa likidire asi kupi ntani nosiruwoke nga moneka Jesus. Ngamoomu va yi pumbire, Jesus kwa mu hampurukilire moBeterehema. (Mika 5:2) Mouye wokuhova, Vajuda kwa kere nomandindiro gomanene. Pokundindira emoneko lyaMesiyasa, vamwe kwa gazarere asi Johanesa Mukuhwi: “Nampo yige Mesiyasa?” Nye Johanesa kwava limbwilire asi: “Ogu ana kuwiza ga pitakana nge mononkondo.” (Ruk. 3:15, 16) Apa Jesus ga kere nonomvhura 30 kwa wizire kwaJohanesa va ka mu kuhwe mo-29 S.N., age kwa ligeve mwene ngaMesiyasa posiruwo sokuwapera. (Ndan. 9:25) Age kwa tamekere nosirugana sendi sokuzuvhisa, pokutanta asi: “Ruveze rwene-rwene runa sikilire mo nye, untungi waKarunga una tu hedere.”—Mar. 1:14, 15.
9. Nampili ngomu va dilire kukara nomaumbangi gokuzulilira, epuro musinke lyokupama va kere nalyo varongwa vaJesus?
9 Nampili ngomu vantu va tenge Jesus asi Hompa, posiruwo sina awo kapi va kwete nawa-nawa egano asi upangeli wendi ngau kara komeho ntani kutundilira meguru. (Joh. 12:12-16; 16:12, 13; Yirug. 2:32-36) Nampili ngoso, apa Jesus ga pulire asi: “Omu omu gazara nge asi nyamelye?” Ga hana kulikata-kata, Peturusa kwa limbwilire asi: “Nyove sa Mesiyasa, MunwaKarunga goMunamwenyo.” (Mat. 16:13-16) Peturusa ga geve elimbururo lyokulifana apa wovanzi va sigire Jesus morwa kudira kukwata egano marongo gendi.—Resa Johanesa 6:68, 69.
Omu mu zuvhe Mesiyasa
10. Morwasinke Jehova ga nkondopekere hepero zokuzuvha Munwendi?
10 MunwaKarunga a huru kwa kere muntu gopampepo gononkondo meguru. Ano pevhu, age kwa ya “karerere po Guhwe.” (Joh. 16:27, 28, NW) Age kwa tente asi: “Erongo lyange kapisi lyanyamwange, nye lyogu ga tuma nge.” (Joh. 7:16) Mokupameka asi Jesus yige Mesiyasa pelisintunuko, Jehova kwa tente asi: “Omu mu zuvhe!” (Ruk. 9:35) Yimo, twa hepa kumuzuvha ndi kumulimburukwa ogu va horowora. Twa hepa kukara nepuro ntani nokurugana yirugana yoyiwa, morwa yininke eyi mulyo mokuhafesa Karunga nokukagwana mwenyo gwanarunye.—Joh. 3:16, 35, 36.
11, 12. (a) Nokonda musinke eyi Vajuda womouye wokuhova va nyokerere Jesus ngaMesiyasa? (b) Wolye va tulire epuro mwaJesus?
11 Nampili ngomu Jesus ga kere nomaumbangi gomanzi asi yige Mesiyasa, sinzi soVajuda womouye wokuhova kwa mu nyokere. Morwasinke? Morwa awo kwa kere nomagano gavene gepuko kuhamena Mesiyasa, awo kwa gazarere asi nga ya kara mupitisili goupolitika ogu ngava mangurura mo mehepeko lyoVaroma. (Resa Johanesa 12:34.) Awo kapi va tambwire Mesiyasa ogu ga ya sikisire mo mauporofete aga ga tente asi vantu ngava mu swaura, tava mu zumbu, mugara gorunyando ogu ga yova ntani moruhura ngava mu dipaga. (Jes. 53:3, 5) Nampili varongwa vamwe vaJesus wovalimburukwi kwa va dompesere mokudira kwendi kugava ezoworo lyopaupolitika. Nye va kere ngorooro noulimburukwi, ano konyima va ya gwene ediwo lyene-lyene.—Ruk. 24:21.
12 Konda zimwe eyi vantu va mu nyokerere Jesus ngaMesiyasa getumbwidiro kwa kere marongo gendi, aga ga digopererere wovanzi mokugatambura. Ano mokuhwilira moUhompa kwa hepere ko komuntu ‘mokulidina mwene’ ‘nokulya’ nyama nohonde zaJesus, ‘nokumuhampurukurura’ ntani ‘nokudira kukara gouzuni.’ (Mar. 8:34; Joh. 3:3; 6:53; 17:14, 16) Wokulinenepeka nonongawo ntani novayilipaki kwa tere yihepwa oyo asi udigu kuyisikisa mo. Nye, Vajuda wokulinunupika kwa tambwire Jesus ngaMesiyasa, ngwendi Vasamaliya vamwe ava va tente asi mugara ogu “nani yige sili Muzowoli gouzuni.”—Joh. 4:25, 26, 41, 42; 7:31.
13. Ngapi omu Jesus va mu humine kosinsinsina pasifanekeso?
13 Jesus kwa pumbire asi vapristeli wovanene ngava mu tokwera konomfa ntani ngava mu gava kovapagani va mu pampare, nye mezuva lyautatu nga vhumbuka koufe. (Mat. 20:17-19) Apa ga uyungire komeho zosigongi somasimbi asi yige “Mesiyasa, MunwaKarunga” awo kwa mu pangwire asi ana swaura Karunga. (Mat. 26:63-66) Piratusa kwato eyi ga gwene mo “yokumutwaredesesa konomfa,” nye morwa ndjorongani zoVajuda, makura Piratusa “ta mu va pe moomu va yi harerere.” (Ruk. 23:13-15, 25) Awo kwa ‘patanene’ ntani nokusininika mokudipaga “Muzowoli,” nampili ngomu ga kere po maumbangi gomanzi asi age Karunga ga mu tumine. (Yirug. 3:13-15; 5:31) Ngamoomu va yi pumbire, Mesiyasa kwa mu ‘dipagere’ pokumupampara kositji mezuva lyoPaska 33 S.N. (Ndan. 9:26, 27; Yirug. 2:22, 23) Pokufa nomfa edi donyanya, age kwa mu humine ‘kosinsinsina’ moomu va yi pumbire mwaGenesis 3:15.
Morwasinke ga heperere kufa Mesiyasa?
14, 15. (a) Nokonda musinke mbali Jehova ga pulisilire Jesus a fe? (b) Yisinke ga rugene Jesus konyima zevhumbuko lyendi?
14 Jehova kwa pulisilire Jesus a fe morwa nokonda mbali domulyo. Zokuhova, ulimburukwi waJesus dogoro konomfa kwa horwere ruha romulyo ‘royihorekwa.’ Age kwa yi likidire dogoro konomfa asi muntu gokusikilira mo kuvhura kukwaterera “ketjiroKarunga,” ntani nokoupangeli waKarunga wanayinye nampili Satana a retesa po maheteko gomanzi. (1 Tim. 3:16, NW) Zauvali, ngomu ga yi tente Jesus asi: ‘MunwaMuntu kwa wizira a ya gave mwenyo gwendi, gu kare sizoweseso sovanzi.’ (Mat. 20:28) “Sizoweseso” esi sokuhetakana kwa futire yitundwamo yononzo edi va pinga vana vaAdamu ntani nokugava mpito zokukagwana mwenyo gwanarunye kwanavenye ava va tambura Jesus mogu a gavere eparu Karunga.—1 Tim. 2:5, 6.
15 Konyima zokukara mazuva gatatu montoko, Kristusa kwa mu vhumbwire, ano mazuva 40 ga monekererere varongwa vendi, pokuvalikida asi age muzuni ntani nokuvapa mavyukiso gamwe hena. (Yirug. 1:3-5) Makura ga rondere meguru mokukagava kwaJehova mulyo gonzambo zendi zokulikarera ntani ga ka ndindilire siruwo sokuwapera dogoro ekaropo lyendi ngaHompa goUmesiyasa lya tamekere. Mosiruwo oso, yinzi ga hepere kurugana.
Jesus ta sikisa mo sirugana sendi ngaMesiyasa
16, 17. Faturura sirugana saJesus ngaMesiyasa konyima zapa ga rondere meguru.
16 Nomvhura nadinye kutundilira pevhumbuko lyendi, Jesus kwa pitisira noulimburukwi yirugana yomombungakriste ngomu ana kupangera ngaHompa. (Koros. 1:13) Posiruwo esi va horowora, age ga tamekere kuruganesa nonkondo dendi ngaHompa goUhompa waKarunga. Mauporofete goBibeli ntani noyihorokwa yomouzuni kwa pameka asi ekaropo lyendi ngaHompa kwa tamekere momvhura 1914, ngosidiviso “souhura wouzuni.” (Mat. 24:3; Ehor. 11:15) Konyima tupu zoyo, age kwa pitisilire vaengeli wokupongoka mokuzuguma mo Satana novaengeli vendi meguru.—Ehor. 12:7-10.
17 Sirugana sokuzuvhisa nesi sokuronga esi ga tamekere Jesus momvhura 29 S.N. ngesi kuna kuyasika nye popanene-nene. Ntaantani tupu nga ka pangure yinamwenyo nayinye. Makura nga tantera wokulinunupika ngwendi nonzwi ava va mu tambura asi mogu a gevere eparu Jehova ‘mokukatura moUntungi ou ga va wapaikira kutunda ketameko lyouzuni!’ (Mat. 25:31-34, 41) Ano ava va nyoka Jesus ngaHompa ngava va zonagura po apa nga pitisira vakwayita vemeguru mokuyahanagura po udinikarunga naunye. Makura Jesus nga manga Satana ntani novaengeli vendi nokuvazugumina “mosirongo sokonhi.”—Ehor. 19:11-14; 20:1-3.
18, 19. Yisinke nga ka sikisa mo Jesus mosirugana sendi ngaMesiyasa, ntani yitundwamo musinke nga ka retera vantu wovalimburukwi?
18 MEpangero lyendi lyoNomumvho Eyovi, Jesus nga ka sikisa mo nontumbwisiso dendi, edi asi “‘Mutetuli, Mupukuruli,’ ‘Karunga Munankondo,’ ‘Guhya Gwanarunye,’ ‘Hompa gombili.’” (Jes. 9:6, 7) Mepangero lyendi vantu ngava ka sikilira mo, kukwatera mo ava ngava ka vhumbura koufe. (Joh. 5:26-29) Mesiyasa nga twara vantu “komarunone gomema gomwenyo,” yipo vantu wovalimburukwi ngava vhure kukahafera elikwatakano lyewa naJehova. (Resa Ehororo 7:16, 17.) Konyima zeheteko lyokuhulilira, varwanesi navenye, kukwatera mo Satana novaengeli vendi, ngava va ‘zugumina mekurudiva lyomundiro,’ alyo ngali kara emyono lyomutwe ‘gwezoka.’—Ehor. 20:10.
19 Ee, omu tupu ya wapa ntani ya sikilira mo kwaJesus mokusikisa mo sirugana sendi ngaMesiyasa! Pevhu moparadisa ngamu zura vantu ava va zowora, ava ngava ka paruka narunye moukanguki wouwa noruhafo. Edina lyaJehova lyokupongoka ngava ka lizeresa keswau nalinye, ntani uhunga wendi wokupangera yininke nayinye ngava ka u hungameka. Ee, upingwa musi wounene una kundindira navenye ava ava limburukwa Mugwavekwa gwaKarunga!
Ove wa gwana Mesiyasa ndi?
20, 21. Nokonda musinke wa kara nado deyi no tanterera ko vapeke kuhamena Mesiyasa?
20 Kutundilira mo-1914 ose kuna kuparuka mosiruwo sekaropo lyaKristusa. Nampili ngomu ekaropo lyendi ngaHompa goUhompa waKarunga kapi ali moneka, alyo kulimonenena kesikiliromo lyomauporofete. (Ehor. 6:2-8) Ngwendi moomu ya horokerere Vajuda womouye wokuhova, sinzi sovantu naina kuna kuncenuna umbangi wekaropo lyaMesiyasa. Awo kuna hara mupitisili goupolitika ndi ogu na vhura kupitakana vapangeli woupolitika. Nampili ngoso, ove wa ya diva asi Jesus ngesi kuna kupangera ngaHompa goUhompa waKarunga. Kapi ya kuhafesere apa wa yi divire oyo ndi? Ngwendi varongwa womouye wokuhova, ove ya ku tumangedere mokutanta asi: “Ose tuna gwana Mesiyasa.”
21 Apa o uyunga naina novantu kuhamena usili, ove kudemenena kosirugana saJesus ngaMesiyasa ndi? Mokuyirugana ngoso, ngo pameka rupandu rwoge kweyi ga ku ruganena, neyi ana ku kuruganena ngesi, ntani neyi nga ka sikisa mo komeho. Ngwendi Andiliyasa naFilipusa, yosili nove wa tantere ko vekoro novakaume woge kuhamena Mesiyasa. Morwasinke nye no dilira kuvahedera noupampi wounene ntani nokuvalikida asi Jesus Kristusa yosili yige Mesiyasa getumbwidiro, mogu a gavere eparu Karunga?
Kuvhura o faturure ndi?
• Ngapi omu varongwa womouye wokuhova va gwene Mesiyasa?
• Nokonda musinke mbali domulyo deyi ga fililire Jesus?
• Yisinke Jesus nga ka rugana komeho mokusikisa mo sirugana sendi ngaMesiyasa?