Popera nkareso zongwa zomombungakriste

“Ufenkenda waHompa Jesus Kristusa u kare monkareso ezi omu likida!”—FIL. 4:23, NW.

NGAPI OMU NATU KORANGEDA VAKWETU MOMBUNGAKRISTE VA KARE NONKARESO ZONGWA . . . 

pokulikwatakana novanavazinyetu?

pokukara noupampi moyirugana yokuzuvhisa?

pokudivisa nonzo donene?

1. Morwasinke Paurusa ga pandadekerere mbungakriste zomoFilipi nezi zomoTiyatira?

VAKRISTE womoFilipi womomazuva gaPaurusa kwa kere nohepwe. Nye awo kwa kere nougavi nokulikida eharo lyenene kovapuli vakwaawo. (Fil. 1:3-5, 9; 4:15, 16) Eyi yiyo mupositoli Paurusa ga va tjangerere asi: “Ufenkenda waHompa Jesus Kristusa u kare monkareso ezi omu likida!” (Fil. 4:23, NW) Morwa Vakriste womoTiyatira kwa kere nonkareso zokulifana, Jesus Kristusa kwa va tanterere asi: “Yirugana yoge na yi diva neharo lyoge nepuro lyoge noukereli woge nedidimiko lyoge noyirugana yoge yomoruhura asi ya pitakana yomuhowo.”—Ehor. 2:19.

2. Ngapi nkareso zetu azi kundama nkareso zomombungakriste?

² Naina, nkenye mbungakriste zoNombangi daJehova kuna kulikida nkareso zongwa. Nombungakriste dimwe kwa di divira unene konkareso zongwa zombili. Ano dimwe kulikida upampi wounene wokukwatesa ko sirugana sokuzuvhisa nesi souzuvhisi wokukarerera. Apa atu tungu po nkareso zongwa, ose kugwederera kouumwe nezokomeho lyopampepo lyomombungakriste. (1 Kol. 1:10) Nye nsene vamwe va kara nonkareso zondona, ayo kukundama womombungakriste va dire kurugana nawa mosirugana saKarunga nokuzumbanesa upampi wosirugana sokuzuvhisa ntani nokusigilira nonzo dononene. (1 Kol. 5:1; Ehor. 3:15, 16) Nkareso musinke azi likida mbungakriste zeni? Ngapi omu no vhura kukwatesa ko nkareso zongwa mombungakriste?

KWATESA KO NKARESO ZONGWA

3, 4. Ngapi omu natu vhura kupandura Jehova “mosigongi sosinene”?

³ Ndafita kwa dimbilire Jehova asi: “Ame ngani ku pandwire mosigongi sosinene, tani ku fumadekere pombunga zonene.” (Epis. 35:18) Age kwa hambererere Jehova apa nga kara kumwe novakareli vakwawo. Mapongo gomombungakriste, kukwatera mo Elirongo lyoRuhungu, kutupa nompito dokulikida nkareso zoupampi nepuro kupitira momalimbururo getu. Natuvenye twa hepa kulipura asi: ‘Ame kulihameka mo unene mokugava malimbururo komapongo ndi? Ame kuliwapaikira nawa yipo ni ka gave malimbururo gomawa ndi? Nganturagumbo, ame kuvatera vana vange va liwapaikire malimbururo gekepongo komeho zosiruwo nokuvaronga va limburure mononkango davene ndi?’

⁴ Ose kuvhura kuwapaika mutjima gwetu monkedi omu atu dimbi komapongo. Ndafita kwa tente asi: “Nina liwapaike Karunga; nina liwapaike nuunu! Kuna hara ni dimbe, ni ku pandure.” (Epis. 57:7) Nonsumo edi atu ruganesa komapongo kutupa mpito zongwa ‘zokudimba nokupandura’ Jehova nomutjima gokuliwapaikira. Nsene kapi twa diva nawa nonsumo dimwe, kuvhura kudiliyomberesa posiruwo soukareli wetu wepata. Ngano tu tokomene ‘kudimbira HOMPA moukaro wetu naunye ntani nokumupanda siruwo esi tuna kara nomwenyo.’—Epis. 104:33.

5, 6. Ngapi omu natu tambura vakwetu momambo getu nokukara nougavi, ntani yisinke ayi korangeda eyi mombungakriste?

⁵ Apa atu tambura vanavazinyetu momambo getu, ose ngoso kuna kukorangeda eharo mombungakriste. Megaununo lyokuhulilira lyombilive zendi koVahebeli, Paurusa kwa tjenge asi: “Omu hare vakweneni mwaKristusa. Walye omu divara kutambura vagenda momambo geni.” (Heb. 13:1, 2) Nkedi zongwa zokutambura vagenda kuna kara zokuzigida mutareli gokudingura namukadendi ndi vazuvhisi wosiruwo nasinye mombungakriste mokuyalya nawo. Poyiruwo yimwe kuvhura tu zigide ko vafisavaya vawo nomapata govareti wovadike ndi vapeke tu ya lipakerere nawo moukareli wetu wepata ndi tu ya lye nawo.

⁶ Paurusa kwa tanterere Timoteusa a korangede vakwawo va “rugane yoyiwa, va gawope moyirugana yoyiwa, va kare ugavi wokupa ko vakwaawo. Omu mwangesi tava lipungwire emonazuni, li kare etateko lyewa lyeyi yokomeho, nkumwe ngava gwane po mwenyo gwanarunye gosili.” (1 Tim. 6:17-19) Paurusa kwa korangedere vapuli vakwawo va tunge po nkareso zougavi. Nampili moudigu woyikweparu, simpe kuvhura tu kare nougavi. Pasihonena, nsene netuwa twa kara kuvhura tu piture ko vakwetetu oku tuna kukazuvhisira ndi komapongo. Ngapi omu vanavazinyetu ava ava gwana evatero eli nava likida rupandu rwawo? Kuvhura va gave ko yuma mokuvatera mukoso gomaholi. Nkedi zimwe omu natu likida eharo kovanavazinyetu kuna kara pokulitulira po siruwo sokukavadingura. Apa atu ruganene uwa “vapuli vakwetetu” nokuliwapaikira kuruganesa siruwo noyiweka yetu mokuvavatera, eharo lyetu kwawo kunkondopara ntani kutumangeda vamwe womombungakriste va kare nawo nonkareso zongwa.—Gar. 6:10.

7. Ngapi omu kudira kuhorora mahoramo ayi vatere mbungakriste zi kare nonkareso zongwa?

⁷ Ukaume nokudira kuhorora mahoramo nayo kunkondopeka eharo mokatji kovanavazinyetu. (Resa Yisewe 18:24.) Vakaume wousili kapi ava horora mahoramo. Apa vanavazinyetu ava tu tantere magazaro nomalizuvho gawo, awo kutuhuguvara asi kapi tatu yi tantere wopeke, ano eharo lyetu kwawo kunkondopara unene. Tu kareni vakaume ava ava dili kuhorora mahoramo ntani nokuvatera mbungakriste zi kare epata lyewa.—Yis. 20:19.

KARA NOUPAMPI MOYIRUGANA YOKUZUVHISA

8. Yisinke ga tanterere Jesus Varawodikeya, ntani morwasinke?

⁸ Jesus kwa uyungire kuhamena mbunga zaRawodikeya asi: “Ame na diva yirugana yoge, asi kapisi o mutenda ndi o mupyu. Ani, ngano kwa kere tupu o mutenda ndi o mupyuee! Ano moomu wa kara nongenyena, wa ha si asi o mutenda ndi o mupyu, yiyo nye nani ku fizira mo mokana kange.” (Ehor. 3:15, 16) Varawodikeya kapi va kere noupampi moyirugana yokuzuvhisa. Nkareso zangoso kwa kundamene hena malikwatakano gawo. Jesus kwa va pukwilire asi: “Navenye ava na hara, kuvatugumukira, tani va rungurura. Kara nye muradi, o litezurure.”—Ehor. 3:19.

9. Ngapi omu upampi wetu womoyirugana yokuzuvhisa au kundama nkareso zomombungakriste?

⁹ Nsene tuna hara mbungakriste zi kare nonkareso zongwa, twa hepa kukara noupampi moyirugana yokuzuvhisa. Sitambo sombungakriste kuna kara sokupapara vantu wovawa moyirugana yokuzuvhisa nokuvaronga usili. Yipo nye twa hepera kulihameka mosirugana sokutura po varongwa noupampi ngwendi Jesus. (Mat. 28:19, 20; Ruk. 4:43) Moomu tuna kukara noupampi moyirugana yokuzuvhisa, yimo hena tuna kukara nouumwe ‘ngovarugani kumwe naKarunga.’ (1 Kol. 3:9) Apa atu rugana novakwetetu moyirugana yokuzuvhisa nokumona omu vana kupopera epuro lyawo nokulikida eharo lyawo kwaJehova nokousili, ose kuvalikida eharo nokuvafumadeka unene. Ntani hena, kuruganena kumwe ‘nomutjima gumwe’ moyirugana yokuzuvhisa kureta nkareso zouumwe mombungakriste.—Resa Vafilipi 1:27.

10. Ngapi nkareso zetu zomupampi azi kundama wopeke mombungakriste?

¹⁰ Elituromo lyetu lyokuwapukurura yirugana yetu yokuzuvhisa kukundama vakwetetu monaruwa. Nsene tu likida eharo kovantu ava atu ligwana nawo moyirugana yokuzuvhisa nokulitura mo unene mokuguma nomutjima dawo, upampi wetu ngau ligwederera. (Mat. 9:36, 37) Nsene tu kara noupampi, vakwetetu nawo tava kara noupampi. Jesus kwa tumine varongwa vendi vavali-vavali moyirugana yokuzuvhisa. (Ruk. 10:1) Eyi kapi tupu ya va korangedere nokuvadeura nye hena kwa nkondopekere upampi wawo womoyirugana yokuzuvhisa. Yosili, ose kuhafera kurugana kumwe novazuvhisi womupampi. Nkareso zawo zoupampi kutukorangeda nokutuvatera tu twikire mokuzuvhisa.—Rom. 1:12.

WA HA SIVANA NDI O HOREKE NZO ZONENE

11. Nkareso musinke va kere nazo Vaisraeli vamwe momazuva gaMosesa, ntani yitundwamo musinke ya kere?

¹¹ Konyima tupu zoyivike yongandi apa Jehova ga tulire Vaisraeli gu kare muhoko gomupe, awo kwa tamekere kusivana ndi kuvhunguta. Eyi kwa twaredesere kokurwanesa Jehova novakarelipo vendi. (Ex. 16:1, 2) Vaisraeli ava va tundire moEgipite wovasesu tupu va zire moSirongo sEtumbwidiro. Nampili Mosesa googu kapi ga zire moSirongo sEtumbwidiro morwa nkareso zondona zoVaisraeli. (Deut. 32:48-52) Yisinke natu vhura kurugana naina yipo tu nyokere po nkareso zondona?

12. Yisinke nayi tu vatera tu dire kukara nonkareso zokusivana?

¹² Twa ha tunga po nkareso zokusivana. Kukara nelinunupiko nefumadeko koupangeli ngayi tu vatera tu nyokere po nkareso ozo, yipo tu horowore vakaume wovawa. Nsene tu horowora yilihafeso yoyidona ndi kukara siruwo sosire koyirugana ndi kosure novantu ava ava dili kulimburukwa Jehova, ngayi tu kundama momudona. Ayo ya wapa mokusesupika siruwo esi atu kara novantu ava va kara nonkareso zokusivana ndi zoumanguruki.—Yis. 13:20.

13. Maudigu musinke azi reta nkareso zokusivana mombungakriste?

¹³ Nkareso zokusivana kuvhura kureta maudigu mombungakriste. Pasihonena, kusivana kuvhura kuzonagura po mbili nouumwe womombungakriste. Ntani hena, kuvhura kukoresa vapuli vakwetetu nokutwaredesa kokuswaura. (Lev. 19:16; 1 Kol. 5:11) Ava va sivanene mombungakriste zanare kwa ‘swawire epangero lyaKarunga.’ (Juda 8, 16) Esivano lyawo kovakuronambunga kapi lya hafesere Karunga.

14, 15. (a) Yisinke nayi horoka nsene va pulisira nzo zonene zi twikire mombungakriste? (b) Yisinke twa hepa kurugana nsene tuna diva gumwe ogu ana tura nzo zonene mokahore-hore?

¹⁴ Ngapi nsene o dimburura asi gumwe kuna horeke nzo zonene, ngwendi unkorwe nokutarera mafano goruhonda ndi kuna kara nomparukiso zokunyata? (Efe. 5:11, 12) Nsene tu ncenuna nzo zonene, Jehova nga gusa mo mpepo zendi zokupongoka mombungakriste ntani kapi ngamu kara mbili. (Gar. 5:19-23) Ngwendi moomu Vakriste womoKolinte va hepere kuzumba nkareso zondona, nose twa hepa kugusa mo nkareso zondona mombungakriste yipo tu popere nkareso zongwa. Yisinke twa hepa kurugana mokugwederera kombili zomombungakriste?

¹⁵ Ngomu vana yi tumbura nare, ayo ya kara nomulyo mokudira kuhorora mahoramo, unene po nsene vapeke tava tu tantere malizuvho nomagazaro gawo. Ayo kapi ya wapa kuhorora mahoramo gomuntu. Nye nampili ngoso, nsene gumwe ana tura nzo zonene, vakuronambunga va hepa kuvadivisa morwa yiwo va kara nositumbukira sokukonakona udigu wangoso. (Resa Levitikus 5:1.) Nsene tuna diva munazinyetu ogu ana tura nzo zonene, twa hepa kumukorangeda a hedere vakuronambunga yipo va mu vatere. (Jak. 5:13-15) Nsene siruwo kuna kupita nye kapi ana yi divisa kovakuronambunga, ose twa hepa kukayidivisa.

16. Ngapi omu atu popere mbungakriste pokudivisa kovakuronambunga nsene tuna diva nzo zonene?

¹⁶ Mbungakriste kuna kara evango lyepopero pampepo, yipo nye twa hepera kuzipopera pokudivisa vakuronambunga nsene gumwe ana tura nzo zonene. Nsene vakuronambunga va vatera munzoni a kwate egano nzo zendi, makura a litezurure nokutambura mavyukiso, nkareso zomombungakriste kapi ngazi kara mosiponga. Nye ngapi nsene munzoni kapi ana litezurura ntani kapi ana kutambura evatero lyovakuronambunga? Tava mu gusa mo mombungakriste. Monkedi zangesi, tava popere mbungakriste konkareso zondona. (Resa 1 Vakolinte 5:5.) Mokupopera nkareso zomombungakriste, natuvenye twa hepa kurugana ko yuma pokuruganena kumwe nombunga zovakuronambunga, ano eyi ngayi popera ukalinawa wovapuli vakwetetu.

KONDJERA ‘UUMWE OU ZA TU PA MPEPO’

17, 18. Yisinke nayi tu vatera tu kondjere ‘uumwe ou za tu pa mpepo’?

¹⁷ ‘Pokuligava merongo lyovapositoli,’ vasikuli vaJesus kwa vaterere mbungakriste zi kare mouumwe. (Yirug. 2:42) Awo kwa tambwire mapukururo nomavyukiso goPatjangwa aga va gwene kovakuronambunga. Morwa vakuronambunga kuruganena kumwe nombunga zomukareli gokulimburukwa gonondunge, navenye womombungakriste kuvakorangeda nokuvavatera va kare mouumwe. (1 Kol. 1:10) Pokulimburukwa komapukururo gomoBibeli gokutunda kombunga zaJehova nokukwama mavyukiso govakuronambunga, ose kulikida asi kuna ‘kukondjera uumwe ou za tu pa mpepo tu kare nombili novakwetetu.’—Efe. 4:3.

¹⁸ Tu kondjeni tu rugane nkenye eyi tu vatere mbungakriste zi kare nonkareso zongwa. Nsene tu yi rugana oyo, ngatu kara nehuguvaro asi ‘ufenkenda waHompa Jesus Kristusa ngau kara monkareso ezi atu likida!’—Fil. 4:23, NW.

[Efano lyepepenuno 19]

Ove kugwederera konkareso zongwa pokuliwapaikira malimbururo gomawa ndi?

[Efano lyepepenuno 20]

Gwederera konkareso zongwa pokudiva nawa nonsumo detu