Nzogera nomuntu ogu ono kuzuvhisira Jesus Karunga ndi?

NOMBANGI DAJEHOVA kuhafera kuzogera kuhamena Bibeli novantu. Wa kara nepuro lyomoBibeli eli wa lipura rumwe ndi? Pwa kara mapuliro nomarongo gamwe goNombangi daJehova wa hara kudiva ndi? Nsene yimo, ngo pure Nombangi daJehova apa ngo ligwanekera nawo. Awo ngava yi hafera mokuzogera nove.

Kuna kukwama ko nzogera pokatji koMbangi nomuntu ogu ana kuzuvhisira. Tu tante asi Victoria gumwe goNombangi daJehova kuna zi membo lyomukadi gedina Martha.

Yosili one Nombangi daJehova kapi mwa pura mwaJesus ndi?

Victoria: Morokeni, ame nyame Victoria. One edina lyeni?

Martha: Ame nyame Martha. Nina mu tambura.

Victoria: Ame gumwe goNombangi daJehova.

Martha: Pastore gwetu kuuyunga asi one Nombangi daJehova kapi mwa pura mwaJesus. Usili ndi?

Victoria: Ose twa pura mwaJesus. Ntani twa pura asi kukara nepuro mwaJesus kutwara komwenyo.

Martha: Name na yi pura oyo.

Victoria: Oyo yiyo twa pura nove name. ‘Nye kuvhura o pure asi nsene asi ose Nombangi twa pura mwaJesus, morwasinke vantu ava uyungire asi kapi twa pura mwendi?’

Martha: Nina hara kuyidiva.

Victoria: Ose twa kara nepuro lyenene mwaJesus, nye kapi twa pura nayinye eyi ava uyunga vantu kuhamena Jesus.

Martha: Ngwendi yininke musinke?

Victoria: Vantu vamwe kuuyunga asi Jesus kwa kere tupu muntu gomuwa. Nye ose kapi atu kwatesa ko egano olyo.

Martha: Name ngosikwawo.

Victoria: Oyo yiyo twa pura none name. Ntani ose Nombangi daJehova kapi atu kwatesa ko marongo aga aga lilimbi neyi ga uyungire Jesus kuhamena omu va li kara noGuhwe.

Martha: Yisinke muna tamba?

Victoria: Nongereka dononzi kuronga asi Jesus Karunga. Nampo none yiyo va mu ronga.

Martha: Nhi, pastore gwetu kuuyunga asi Karunga naJesus kwa hetakana.

Victoria: None nomu yi kwatesa ko asi nkedi zongwa zokudiva usili kuhamena Jesus kuna kara pokukonakona eyi ga uyungire mwene ndi?

Martha: Nhi, name tani yi kwatesa ko.

Yisinke ga uyungire Jesus?

Victoria: Tu zeni tu konakone velise zoBibeli ezi nazi tu vatera tu yi kwate egano oyo. Konekeni etjangwa eli natu resa mwaJohanesa 6:38. Jesus kwa tente asi: “Ame kapi na tundira meguru asi, ni ya rugane eharo lyanyamwange, nye asi ni ya rugane eharo lyogu ga tuma nge.” Nonkango odo kapi nadi liza nsene asi Jesus Karunga.

Martha: Yisinke muna tamba?

Victoria: Konekeni asi, Jesus kwa uyungire asi kapi ga tundire meguru asi a ya rugane eharo lyanyamwendi.

Martha: Yimo, age kwa uyungire asi kwa wizire a ya rugane eharo lyogu ga mu tumine.

Victoria: Nsene asi Jesus Karunga, yilye ga mu tumine a tunde meguru? Ntani morwasinke Jesus ga limburukwilire kurugana eharo lyogu ga mu tumine?

Martha: Tani hara kukwata egano eyi muna kuuyunga. Nye velise zimwe kapi tazi pameke asi Jesus kapisi Karunga.

Victoria: Konekeni eyi ga uyingire Jesus sikando simwe. Age ga uyungire nonkango dokulifana megaununo lyokukwama ko lyaJohanesa. Kuvhura mu rese mwaJohanesa 7:16 ndi?

Martha: Hawe, kwato udigu. “Jesus ta va limburura asi: ‘Erongo lyange kapisi lyanyamwange, nye lyogu ga tuma nge.’”

Victoria: Mpandu Martha kweyi muna resa. Kuliza novelise ezi, Jesus kwa rongere magano gamwene ndi?

Martha: Hawe, age kwa uyungire asi erongo lyendi kwa tundire kogu ga mu tumine.

Victoria: Yimo. Nye simpe kuvhura tu lipure asi: ‘Yilye ga tumine Jesus? Yilye ga mu pere usili ou ga ya rongere? Ogu ga tumine Jesus ga hepa kumupita.

Martha: Egano lyewa sili. Kapi na resa rumwe velise ozo.

Victoria: Konekeni nonkango daJesus mwaJohanesa 14:28 asi: “One muna zuvhu sa eyi nina mu tantere asi, ‘Ame tani zi, nye ngani ka tengura hena kweni.’ One nganosi kwa hara nge, ngano tomu hafere eyi nina kuza kwaTate, yeeyi Tate kwa pita nge.” Kuliza novelise ozo, ngapi muna kugazara omu Jesus ga li kara noGuhwe?

Martha: Jesus kwa tente asi oGuhwe va mu pita. Age kwa tere Karunga asi ga mu pita.

Victoria: Mouhunga. Sihonena simwe hena, konekeni eyi Jesus ga tanterere varongwa vendi eyi va tjanga mwaMateusa 28:18. Velise kutanta asi: “Nonkondo nadinye demeguru, nedi depevhu nyame va di pa.” Jesus ga tente asi age nare kwa kere nononkondo nadinye ndi?

Martha: Hawe, age kwa tente asi kwa ya di mu pere.

Victoria: Nsene asi Jesus Karunga, ngapi omu hena nava mu pa nonkondo dononene? Ntani yilye ga di mu pere?

Martha: Na hepa kugazadara ko.

Yilye ogu ga uyungisire?

Victoria: Poyili yimwe yina dili kuliza nsene asi Jesus Karunga.

Martha: Yininke musinke?

Victoria: Eyi va tumbura kuhamena ekuho lyaJesus. Konekeni nonkango da kara mwaRukasa 3:21, 22. Kuvhura mu rese novelise odo ndi?

Martha: “Eyi va pwa vantu navenye kuvakuhwa, naJesus nage vana mu kuhu, a hokwe kukanderera, makura eguru tali zeguruka. Mpepo zoKupongoka zokufana ngwendi nkutji tazi mu tembere. Ano ezwi tali tundu meguru, tali tanta asi: ‘Ove Munwange ogu na hara, wa za nge komutjima.’”

Victoria: Muna koneke eyi ga rugene Jesus apa va mu kuhwire ndi?

Martha: Kwa kandererere.

Victoria: Yimo. Nye kuvhura tu lipure asi: ‘Nsene Jesus Karunga, kwalye nye ga kandererere?’

Martha: Olyo epuro lyewa. Ngani ka pura pastore gwetu.

Victoria: Poyili yimwe twa hepa kugazadara ko, apa Jesus ga zaukire momema, ezwi lya tundire meguru. Muna koneke eyi lya uyungire ezwi olyo ndi?

Martha: Kwa uyungire asi Jesus Munwange ogu na hara ga za nge komutjima.

Victoria: Mouhunga. Nsene asi Jesus Karunga, ezwi lyalye lya tundire meguru?

Martha: Kapi nayi gazadara rumwe oyo.

Morwasinke Karunga naJesus ava va tumbwire asi “Guhya noMunwa”?

Victoria: Pana kara hena yininke natu gazadara ko: Tuna resa asi Jesus kwa tumbwire Karunga asi oGuhwe vemeguru. Ntani Jesus apa va mu kuhwire, ezwi kwa tundire meguru nokumutumbura asi Munwange. Jesus ga litumbwire asi MunwaKarunga. Nsene ono hara kufatwilira nge asi vantu vavali va hetakana, sifanekeso musinke no ruganesa?

Martha: Kuvhura ni ruganese sihonena sovantu namumbyendi.

Victoria: Yimo, nampo sovamapange. Jesus kwa tumbwire Karunga asi Guhwe ntani kwa litumbwire mwene asi Munwa. Omu muna kugazara, yinke ga tembe Jesus?

Martha: Nina kwata egano eyi muna hara kuuyunga. Jesus kwa singwenene asi gumwe mukondi ntani ga kara nononkondo kupita mukwawo.

Victoria: Yimo. Gazadareni ko kweyi: One muna gazadara sihonena sosiwa sovantu namumbyendi ndi sovamapange. Nsene asi Jesus Karunga, ngano kapi ga gazadarere ko sihonena sokulifana ndi?

Martha: Yimo.

Victoria: Nye age kwa ruganesere nonkango “Guhya” ntani “Munwa” mokusingonona omu va likara naKarunga.

Martha: Kuna kara sitwa somulyo.

Yisinke va uyungire ko varongwa vaJesus wokuhova?

Victoria: Komeho ni ze, nina hara kuzogera none yininke yimwe, nsene muna kara nosiruwo.

Martha: Hawe, kwato udigu.

Victoria: Nsene asi Jesus Karunga, ngano varongwa vendi kapi va yi uyungire ndi?

Martha: Oso kuna kara sitwa somulyo.

Victoria: Kwato oku va yi tjanga moBibeli asi varongwa vendi ngava rongo asi age Karunga. Konekeni eyi ga tjenge gumwe govarongwa vaJesus mupositoli Paurusa. MoVafiilipi 2:9, age kwa tumbwire eyi Karunga ga rugene konyima zonomfa nevhumbuko lyaJesus asi: “Karunga yiyo ga mu zerura unene, age yiyo ga mu ruka edina lya pitakana madina nagenye.” Mokuliza novelise ezi, yisinke ga rugene Karunga kwaJesus?

Martha: Asi Karunga kwa zerwire Jesus.

Victoria: Yimo. Nsene asi Jesus kwa hetakanene naKarunga komeho a fe ano konyima Karunga a mu zerure, kuvhura Jesus a pitakane Karunga ndi?

Martha: Hawe. Nokuvhura si.

Victoria: Yimo. Kuliza nomaumbangi nagenye aga tuna konakona, kuvhura mu tante asi Bibeli kuronga asi Jesus Karunga ndi?

Martha: Hawe. Bibeli kuronga asi age MunwaKarunga.

Victoria: Mouhunga. Martha ose Nombangi daJehova kwa fumadeka unene Jesus. Ose twa yi pura asi nomfa dendi ngaMesiyasa getumbwidiro kwa gava mpito kovantu navenye wovalimburukwi va ka gwane mwenyo gwanarunye.

Martha: Name nayi pura oyo.

Victoria: Nye kuvhura o lipure asi: ‘Ngapi natu vhura kulikida rupandu kwaJesus kweyi ga ya tu fililire?’a

Martha: Name na lipura epuro olyo.

Victoria: Na hara ngani ka tengwire ko ngatu ya zogere eyi za uyunga ko Bibeli kuhamena oyo. Ngani ka wize sivike sokukwama ko ndi?

Martha: Hawe, kwato udigu.

Victoria: Mpandu, ngatu ya limona.

[Nondanda dokonhi]