Wa zwida nare sikarata soge sokudira kutambura honde ndi?

Sikarata esi soDPA (durable power of attorney) kwa si wapaikira Nombangi edi va kuhwa. Mokumona asi ‘kapi twa diva eyi nayi horoka mungura,’ ya kara hepero asi tu tokore komeho zosiruwo ntani nokuyitura patjangwa asi uhaku nonongendeseso musinke tuna hara nsene kuna kara mouvera wounene ndi mosiponga. (Jak. 4:14; Yirug. 15:28, 29) Mokukuvatera, va wapaika vidiyo zosiparatjangwa Transfusion-Alternative Health Care—Meeting Patient Needs and Rights. Tara vidiyo ntani gazadara ko nawa kweyi ono lirongo kumwe nevatero lyomapuro aga gana kara konhi.—Koneka: Morwa vidiyo ezi kwa likida mo mafano getauro, vakurona va hepa kutokora nsene kuvhura kuzitara kumwe novanonagona.

(1) Morwasinke vandokotora vamwe vana kugazadarera ko kuhamena eruganeso lyetamburo honde? (2) Gava yihonena yomatauro gatatu goudigu aga va rugana pwa hana etamburo honde. (3) Vandokotora novatauli vangapi mouzuni mudima va likida eligawo lyawo mokuhakura vaveli pwa hana etamburo honde? Morwasinke vana harere kuyirugana? (4) Yisinke ga likida makonakono goyipangero gantani kuhamena eruganeso honde? (5) Maudigu musinke gouhaku ali reta etamburo honde? (6) Etokoro musinke va tura po vandokotora novatauli wovanzi kuhamena yininke yokupinganesera po etamburo honde? (7) Yisinke ayi retesa po ezumbaneso honde morutu? Honde zokuhura kupi na vhura kuzumbanesa muntu komeho zokukara mosiponga? Yinke nava vhura kurugana mokuvatera muveli ana pili honde morutu? (8) Ngapi nava vhura kuzerura eyi ayi rwanesa nokime morutu romuveli? (9) Yiruganeso musinke vana kuruganesa mokusesupika ezumbaneso honde petauro? (10) Yininke yokupinganesa po honde kuvhura kuyiruganesa komunona ndi komukondi nsene eparu lyendi kuna kara mosiponga ndi? (11) Mokugava uhaku wouwa, egano musinke lyomulyo po va hepa kufumadeka vandokotora? (12) Morwasinke ya kerera nomulyo koVakriste mokutura po matokoro kuhamena uhaku wokupira honde komeho zosiruwo? Ngapi omu natu yirugana eyi?

Alyo kuna kara etokoro lyankenye gumwe kuliza nezwi lyendi lyomomutjima kweyi ga lironga moBibeli mokutambura mauhaku gamwe va likida movidiyo. Ove wa tura po nare etokoro lyokupama kuhamena asi uhaku nonongendeseso musinke ono hara kutambura nyamoge ntani novana woge ndi? Kononzogera ko dononzi kuhamena yuma eyi, tara moThe Watchtower zomazuva 15 zaPembagona 2004 ntani zomazuva 15 zaSikukutu 2000, mosiparatjangwa: “Mapuro gokutunda kovaresi.” Ntani tara hena mosimbapira saMurongagona 2007 soYirugana yetu yoUhompa siparatjangwa: “Ngapi omu ani tara yininke yoyinunu-nunu eyi ya kara mohonde ntani nouhaku wa hamene mo honde zange?” Owo wa horowora asi yiwo ngava ku karera po ntani nankenye gumwe gekoro lyoge ga hana asi Mbangi, wa hepa kuvadivisa nawa-nawa kuhamena matokoro goge.