Yisinke azi uyunga ko Bibeli kuhamena nonkwara?
Eyi za uyunga ko Bibeli
Konyima zokusita mugara nomukadi wokuhova, Karunga tava kwareke. Age kwa totere po nonkwara di kare elikwatakano lyokukarerera pokatji komugara nomukadi.—Genesis 1:27, 28; 2:18.
Karunga kuna harere valikwali va kare noruhafo. (Yisewe 5:18) Age ga tura moBibeli mavyukiso kuhamena nonkwara ntani nonompango edi nadi vhura kuvatera valikwali yi va tompoke mononkwara.
Eyi ya hamene mosirongwa esi
Nompango musinke ga tura po Karunga kuhamena nonkwara?
Kutundilira ketameko, Karunga kwa here nonkwara di kare pokatji komugara gumwe nomukadi gumwe. (Genesis 2:24) Karunga kapi a kwatesa ko masupareko, kulikwara mugara nomugara ndi mukadi nomukadi ndi mugara nomukadi ava va tunga kumwe va hana kulikwara paveta. (1 Vakolinte 6:9; 1 Vatesaronika 4:3) Jesus kwa tanterere vasikuli vendi va limburukwe konompango daKarunga kuhamena nonkwara.—Marukusa 10:6-8.
Karunga kutara nonkwara asi alyo elikwatakano lyokukarerera. Apa mugara nomukadi ava likwara, awo kulitumbwidira kukara kumwe narunye. Karunga kundindira ko kwawo va sikise mo etumbwidiro olyo.—Marukusa 10:9.
Ngapi kuhamena eligaunuko ntani elizumbo?
Pamwe valikwali kuvhura va dire kukara kumwe, pasihonena nsene mulikwali gumwe a za a ka vatere ekoro lyendi noyininke yohararasi. Nye Bibeli kapi azi korangeda valikwali va li gaunuke morwa maudigu aga vana kuligwanekera nago mononkwara. Momaukaro ogo, Bibeli kukorangeda valikwali va ruganene kumwe yipo va kohonone po maudigu ogo.—1 Vakolinte 7:10.
Kuhondera yizo zelike konda ezi matjangwa ga pulisira elizumbo. (Mateusa 19:9) Nye nsene valikwali va tokora kuligaunuka ndi kulizumba pwa hana konda zehondero, kwato gumwe gwawo ana manguruka ku ka kwara hena.—Mateusa 5:32; 1 Vakolinte 7:11.
Mokuninka asi Karunga a tambure nonkwara ntudi da hepa kukara dopaveta ndi?
Karunga kundindira ko koVakriste va limburukwe noveta dosirongo kuhamena nonkwara. (Titusa 3:1) Nsene valikwali va tura nonkwara dawo paveta, awo ngava likida efumadeko koveta zosirongo ntani komavyukiso gaKarunga asi nonkwara da hepa kukarerera.a
Yitumbukira musinke va kara nayo vagara novakadi?
Yitumbukira yovalikwali navenye. Valikwali va hepa kulitekura neharo ntani nefumadeko. (Vaefeso 5:33) Mulikwali ga hepa kupakera mbili yihepwa yopomalizuvho yomulikwali gwendi monkedi zeharo ntani nokunyokera po kuhondera. (1 Vakolinte 7:3; Vahebeli 13:4) Nsene va kara novanona, navenye va hepa kulikwatesa kurera vanona.—Yisewe 6:20.
Bibeli kapi za uyunga omu valikwali nava li ga winina yirugana yemembo ntani noyirugana yopanyama. Va hepa kutokora vene yomulyo po kepata lyawo.
Situmbukira somugara. Bibeli kuuyunga asi “mugara yige mutwe gwamukadendi.” (Vaefeso 5:23) Ga hepa kupitisira epata lyendi ntani noku tura po matokoro aga naga retera mukadendi novana vendi mauwa.
Ga hepa kudivilisa asi vemepata lyendi vana kara neyi vana hepa mokukara vana kanguka parutu, panandunge ntani pampepo. (1 Timoteusa 5:8) Age kulikida asi ga hara mukadendi nsene a ruganena kumwe nendi ntani nokugazadara ko komagano gendi nokomalizuvho gendi nsene kwa ku tura po matokoro. (Yisewe 31:11, 28) Bibeli kuuyunga asi mugara ga hepa kusikisa mo situmbukira sendi monkedi zeharo.—Vakorosi 3:19.
Situmbukira somukadi. Bibeli kuuyunga asi “mukadi ga hepa kufumadeka unene mugara gwendi.” (Vaefeso 5:33) Karunga kumuhafesa apa mukadi a fumadeke mugara gwendi.
Situmbukira sendi kuna kara kuvatera mugara gwendi, kumuvatera a ture po matokoro ntani noku kwatesa ko upangeli wendi. (Genesis 2:18) Bibeli kukanganga mukadi ogu a sikisa mo situmbukira sendi mononkwara.—Yisewe 31:10.
Karunga kundindira valikwali va kare novanona ndi?
Hawe. Posiruwo sanare, Karunga kwa pangerere vakareli vendi vamwe va kare novanona. (Genesis 1:28; 9:1) Nye mpangera ozo kapi za kundama Vakriste naina. Jesus kapi ga pangerere vasikuli vendi va kare novanona. Nampili varongwa vendi nawo kapi va uyungire asi valikwali va hepa kukara novanona. Valikwali va hepa kutokora vene nsene tava kara novanona ndi hawe.
Ngapi omu Bibeli na zi vatera nonkwara dange?
MoBibeli kwa kara mo nompango donongwa edi nadi vatera valikwali va tameke nawa nonkwara dawo. Nompango domoBibeli kuvhura hena di vatere valikwali va nyokere po ndi va kohonone po maudigu.
Nompango domoBibeli kuvhura di vatere valikwali . . .
va li lilikide eharo lyosili.—1 Vakolinte 13:4-7; Vakorosi 3:14.
va kohonone po malisigo aga va kara nago.—1 Vakolinte 10:24.
va kare vapurakeni wovawa.—Jakopo 1:19.
va lilikide efumadeko.—Varoma 12:10.
va li gusire po.—1 Peturusa 4:8.
va kare noulimburukwi.—Marukusa 10:9.
va li didimikire.—Vaefeso 4:2, 3.
va ruganene kumwe.—Muudisi 4:9.
va nkondopeke elikwatakano lyawo.—Rusumo 8:7.
a Kuhamena eyi azi uyunga ko Bibeli kuhamena kukwara pampo, resa Ruhungu 15 Sikukutu 2006, epenuno 21, paragarafu 12, moRuhingilisa.