Omu no kanderera—Ekanderero lyaGuhyetu gemeguru yilyo lyomulyo po ndi?
Eyi za uyunga ko Bibeli
Ekanderero lyaGuhyetu gemeguru kutuvatera tu dive omu natu kanderera ntani neyi natu tumbura momakanderero getu. Jesus kwa limbwilire eyi va mu pulire varongwa vendi asi: “Hompa, tu ronga omu ava kanderere.” (Rukasa 11:1) Nye ekanderero lyaGuhyetu gemeguru kapisi yilyo lyelike ekanderero a tambura Karunga.a Jesus kwa geve tupu sihonena kuhamena ekanderero eli a zuvhu Karunga.
Eyi ya hamene mosirongwa esi
Yisinke ali uyunga ekanderero lyaGuhyetu gemeguru?
Ekanderero lyaGuhyetu gemeguru eli va tjanga mwaMateusa 6:9-13, kwa litjanga mononkedi dokulisiga-siga monoBibeli. Pasihonena.
Bibeli-Etoroko lyouzuni woupe: “Guhyetu gemeguru, edina lyoge ava li pongore. Uhompa woge u wize. Mpango zoge zi sike mo pevhu ngwendi meguru. Tu pa naina nondya detu danaina ntani tu dongwenena po nonzo detu, moomu atu dongwenene po ava ava tu zonene. Tu vatera ga dire kutufunda maheteko ntani tu popera koMudona.”
Etoroko lyoKing James: “Nsene tomu kanderere, omu kanderere ngesi asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru. Tu pa naina nondya detu dankenye ezuva. O tu dongwenene po nonzo detu, moomu atu dongwenene po nose wononzo detu. Walye o tu twara momaheteko, nye o tu popere koudona.”b
Yisinke ali tanta ekanderero lyaGuhyetu gemeguru?
Marongo gaJesus kwa kwatakanesa matjangwa nagenye, yipo nye kuvhura tu ruganese matjangwa gapeke ga tu vatere tu kwate egano eyi ali tanta ekanderero lyaGuhyetu gemeguru.
“Guhyetu gemeguru”
Ayo ya hungama kutumbura Karunga asi “Guhyetu” morwa yige ga tu sita ntani yige ga tupa eparu.—Jesaya 64:8.
“Edina lyoge ava li pongore”
Edina lyaKarunga Jehova, va hepa kulifumadeka nokulitara asi lyapongoka. Vantu kulihameka mo mokupongora edina lyaKarunga apa ava uyunga kuhamena yikara yendi nokudivisa sitambo sendi.—Episarome 83:18; Jesaya 6:3.
“Uhompa woge u wize”
Uhompa waKarunga kuna kara epangero lyemeguru, ano Jesus yige hompa gouhompa owo. Jesus kwa tu ronga tu kanderere yipo uhompa owo u wize noku ya pangera evhu nalinye.—Ndaniyera 2:44; Ehororo 11:15.
“Mpango zoge zi sike mo pevhu ngwendi meguru”
Ngamoomu tupu meguru mwa kara asi mwato udona nonomfa, sitambo saKarunga pevhu naso kuna kara asi vantu va paruke narunye pevhu mombili.—Episarome 37:11, 29.
“Tu pa naina nondya detu danaina”
Momazuva gaJesus, mboroto kwa kere nondya domulyo unene. Twa hepa kudiworoka asi, twa hepa kuhuguvara moMusiti gwetu a tupe yininke eyi tuna hepa mokuparuka.—Yirugana 17:24, 25.
“Tu dongwenena po nonzo detu, moomu atu dongwenene po ava ava tu zonene”
Vantu navenye kuzona ntani va hepa kuva dongwenena po. Nye nsene twa hara Karunga a tu dongwenene po, twa hepa nose kudongwenena po ava ava tu zonene.—Mateusa 6:14, 15.
“Tu vatera ga dire kutufunda maheteko ntani tu popera koMudona”
Jehova Karunga kapi atu zeda tu rugane yoyidona. (Jakopo 1:13) Nye ose kutuzeda ‘mudona,’ Satana muzonaguli—ogu hena ava tumbura asi “Muheteki.” (1 Johanesa 5:19; Mateusa 4:1-4) Tu hundireni Jehova yipo a tu vatere ga dire ku tu funda nkenye maheteko aga natu ligwanekera nago, maheteko aga naga tu ninkisa tu dire kulimburukwa Karunga.
Kukanderera ekanderero lyaGuhyetu gemeguru yizo nkedi zelike zokukanderera ndi?
Jesus kwa geve ekanderero lyaGuhyetu gemeguru ngosihonena. Kapisi tu li ruguruke. Komeho Jesus a ronge ekanderero lyaGuhyetu gemeguru, Jesus kwa rondwere asi: “Nsene tomu kanderere, kapisi mu rugurure nonkango dokulifana.” (Mateusa 6:7) Apa ga rongere ekanderero lyaGuhyetu gemeguru posikando sokulisiga, age kwa ruganesere muzaro gononkango gokulisiga.—Rukasa 11:2-4.
Nkedi zongwa zokukanderera kuna kara, kukanderera kutundilira komutjima.—Episarome 62:8.
Ngapi omu natu kanderera?
Ekanderero lyaGuhyetu gemeguru kugava sihonena omu natu kanderera yipo Karunga a tu zuvhe. Tara omu ya liza nonovelise dimwe domoBibeli kuhamena kukanderera.
Kanderera tupu kwaKarunga
Etjangwa: “Gaveni yinka yeni nayinye kwaKarunga mekanderero, kanderereni kwendi nomutjima nagunye oku tomu likwambere nokupandura.”—Vafilipi 4:6.
Kutanta asi: Twa hepa kukanderera kwaKarunga kapisi kwaJesus, kwaMaria ndi koVapongoki. Nonkango dokutamekesa asi “Guhyetu gemeguru,” ekanderero eli lyaGuhyetu gemeguru kuturonga tu kanderere tupu kwaJehova Karunga.
Tumbura momakanderero goge yininke eyi ya liza nompango zaKarunga
Etjangwa: “Age nga tu zuvha nsene tu mu hundira yuma kuliza nompango zendi.”—1 Johanesa 5:14.
Kutanta asi: Ose kuvhura tu tumbure momakanderero getu nkenye eyi ya liza nompango zaKarunga. Jesus kwa tu likidire mulyo gompango zaKarunga apa ga zi tumbwire mekanderero lyaGuhyetu gemeguru, age kwa tente asi “mpango zoge zi sike mo.” Kuvhura tu lironge sitambo saKarunga kevhu nokovantu nsene tu lironga Bibeli.
Kanderera kuhamena yinka eyi ono kara nayo
Etjangwa: “Twika HOMPA udigu woge, age nga ku kwafa.”—Episarome 55:22.
Kutanta asi: Karunga kutupakera mbili. Ngamoomu tupu Jesus ga tumbwire yihepwa yokulisiga-siga mekanderero lyaGuhyetu gemeguru, nose kuvhura tu tumbure yihepwa yetu, tu hundire Karunga a tu vatere tu ture po matokoro gomawa, atu vatere tu lididimikire maudigu ntani tu mu hundire atu gusire po nonzo detu.c
a Pasihonena, Jesus novarongwa vendi kwa kanderere makanderero gokulisiga-siga, nye awo kapi va temwinine nonkango demekanderero lyosihonena.—Rukasa 23:34; Vafilipi 1:9.
b MoBibeli zoKing James Version kwa hagesa asi: “Yeeyi uhompa nononkondo nouyerere nayinye yoge, narunye nanarunye. Amen.” Nonkango edi dokuhamberera Karunga kudigwana hena monoBibeli dimwe edi da divikwa. Nye, buke The Jerome Biblical Commentary kwa tanta asi: “Nonkango edi dokuhamberera Karunga kapi da moneka momatjango ganare.”
c Owo ava zono kuvhura va lizuvhe unzoni ntani kuvhura va dire kuhara kukanderera. Nye Jehova kuna kuva tantera asi: “Wizeni tu ya wapaikeni nonkango.” (Jesaya 1:18) Age kapi nga nyoka nkenye ogu ana hara ku mu gusira po.