Nombangi daJehova kunyoka ku di wenda ndi?
Nombangi daJehova kapi adi rwanesa kuhamena kugwana wenda. Alyo kuna kara etokoro lyankenye muntu eli ga hepa kutura po. Sinzi soNombangi daJehova kutokora kugwana wenda tintiko.
Ose kupapara uhaku wouwa ntani ose kupandura kweyi ava kondjo ava ava rugana kweyi youhaku mokusesupika elihano lyomauvera. Ose kupandura elituromo lyava ava rugana youhaku kweyi ava rugana unene, unene po posiruwo souvera womukagu.
Nombangi daJehova kuruganena kumwe novarugani veyi youhaku womomukunda gwawo. Pasihonena, kutundilira tupu apa Korona za tameka, Nombangi daJehova kwa gava mapukururo nomadiworokeso momaraka gokulisiga-siga kointaneta mokukorangeda vantu va limburukwe nokukwama masiliko aga vana tulisa po. Eyi kwa kwatere mo mulyo gokulikara ure ntani nokukwama nongendeseso dokuhamena sivaro sovantu wokukara kumwe, ku tura muntu a likarere gelike, kulikuhwa komawoko ntani nokudwara sinkumatere nayimwe ngoso eyi va tulisire po vemepangero.—Varoma 13:1, 2.
Monomvhura dononzi, yimbapiratjangwa yoNombangi daJehova ya nkondopeka nompango edi dina kukwama ko:
Etokoro kuhamena uhaku kuna kara etokoro lyankenye muntu.—Vagarata 6:5.
“[Simbapira esi] kapi asi gava magano asi nomutji musinke no horowora ntani kapi asi gava magano kuhamena uhaku. Sitambo saso kuna kara sokugava mauzera nye nkenye ogu ga hepa kutura po etokoro.”—Awake!, 8 Murongankuru 1987, moRuhingilisa.
“Kuhamena nsene asi kuvhura nove novana woge va mu wende; olyo kuna kara etokoro lyopamundinda.”—Awake!, 22 Siwogedi1965, moRuhingilisa.
Ose kupapara uhaku morwa twa fumadeka eparu.—Yirugana 17:28.
“Nombangi kuza kosipangero yipo va ka va vatere nomauvera aga vana kara nago. Awo kwa hara eparu ntani vana hara kurugana nkenye eyi nava vhura eyi ya liza nonompango domoBibeli yipo va paruke.”—Ruhungu, 1 Pembankuru 1975 moRuhingilisa.
“Nombangi daJehova kutambura uhaku. Awo kwa hara va kare noukanguki wouwa. Ngwendi mukriste gomosiruwo sanare Rukasa, vamwe woNombangi daJehova kurugana mouhaku. . . . Nombangi daJehova kupandura unene owo ava rugana kweyi youhaku. Ntani awo kupandura hena kevatero eli ava gwana apa ava vere.”—Ruhungu, 1 Murongankuru 2011, moRuhingilisa.