Mudinkantu kuna kutarera vantu vana kuhwilira moSinyanga soUhompa

MAPURO AGA AVA PURA VADINKANTU

Morwasinke atu zire komapongo?

Nombangi daJehova kukara nomapongo ruvali mosivike, komavango gawo goukareli ava tumbura asi Yinyanga yoUhompa. Yisinke ava rugana ko ntani mauwa musinke no ka gwanena ko?

Yisinke ava rugana ko koSinyanga soUhompa?

Sinyanga soUhompa kuna kara evango oku atu lirongere, ose kulironga kuhamena Bibeli. Mapongo aga kuvhura ga kuvatere:

o dive usili kuhamena Karunga
o kwate egano yihorokwa eyi yina kuhoroka ngesi.
o kara muntu gomuwa.
o gwane vakaume wovawa.

Wa yi diva ndi? Kevango oku Nombangi daJehova adi pongere kutumbura ko asi Sinyanga soUhompa, morwa Uhompa waKarunga yiwo ava zogere ko unene.—Mateusa 6:9, 10; 24:14; Rukasa 4:43.

Morwasinke no zira ko?

Mauzera ngaga kuvatera. Nompango domoBibeli edi ava zogere komapongo goNombangi daJehova ngadi kuvatera o kare ‘nounongo.’ (Yisewe 4:5) Eyi kutanta asi Bibeli kuvhura zi kuvatere o ture po matokoro gomawa meparu. Ntani kuvhura zi kuvatere o gwane malimbururo komapuro gomulyo ngwendi gaga:

Yiparatjangwa eyi yina kukwama ko kuna kara yoyiparatjangwa yimwe eyi ava zogere komapongo gomosikondovike:

Morwasinke natu pulisilira nompango doBibeli di tu vyukise?
Kupi no gwana evatero moyiruwo youdigu?
Eyi una ku tu ruganena Uhompa waKarunga ngesi.

“Mukwetu gumwe gokosure kwa wizire kepongo lyetu. Age kwa hingilire nepata lyetu ntani ose kwa ruganesere nombapira detu kumwe nage. Konyima zepongo, age kwa tanterere nge asi yina mu tetukisa malimbururo aga vana gava vanavazinyetu. Ntani age kwa gwederere ko asi kongereka zawo kapi va kara noyiruganeso yokulironga ngwendi yetu.”—Brenda

Wa yi diva ndi? Kapi ava pura ko mfuto ndi sumina.

Vakaume ngava kukorangeda. Bibeli za tumbura konda zimwe zeyi Vakriste ava pongere kumwe, awo kuponga kumwe yipo va ‘likorangede-korangede.’ (Vahebeli 10:24, 25) Ayo kukorangeda kukara mokatji kovantu ava va hara Karunga ntani ava ava pakere mbili vakwawo unene po mouzuni ou woudona.

“Ame kulizuvha ruguwo neroroko, nye vantu wokoSinyanga nkenye apa kuninkisa nge ni lizuvhe hansa ko. Konyima zepongo, ame kulizuvha sili ruhafo nokundindira ezuva lyomungura.”—Elisa

Wa yi diva ndi? Pa kara nombungakriste dokupitakana po 120 000 doNombangi daJehova mouzuni mudima edi adi pongo komavango gokupitakana po 60 000. Nkenye mvhura kudika Yinyanga yoUhompa yokusika hambara po 1 500 ngomu sivaro sovantu sina kuligwederera.a

Eyi va uyunga ko vadinkantu vakweni

“Apa na kere kosure, mukwetu gumwe gokosure nga wiza name komapongo, age kwa mu tetukisire sivaro sovantu womapupi gokulisiga-siga ava ngava lirongo Bibeli. Muhona gwange nage ka wizire komapongo, age ka yi ya mu tetukisire monkedi omu atu ruganesa Bibeli unene. Ayo kwa ninkisire nge ni kare norupandu, apa na mwene omu ga likidire rupandu!”—Jessica.

Mapongo kuvatera nge ni dire kukara unene noyinka yeparu yankenye ezuva. Ako kuturonga omu natu hafera eparu, nomu natu kara vantu wovawa ntani nayimwe hena. Ame kukara nina nkondopara nkenye apa ani tundu koSinyanga soUhompa.”—Timothy.

Mugara gumwe na zigidire kepongo kwa uyungire konyima zepongo asi: ‘Ame kuna wiza kepongo lyeni yipo ni ya kulikide asi ngereka zeni yimpempa. Nye nani eyi na pura yiyo yepuko!’ Ntani age kwa haferere monkedi omu Nombangi daJehova adi li tekura. Age kwa tente hena asi ‘Nampili ngomu na dira kumudiva, one kuna tekura nge ngwendi asi nare twa lidiveni!’”—Jacob.

“Poyiruwo yimwe ngani lizuvhu asi, tupu na li pwa epongo, tani zi ko kembo. Nye apa nani kara mepongo magazaro gangoso ta ga haga. Konyima zepongo, ame kusimwitira novantu, kapi hena ani diworoka asi morwasinke nina lizuvhire ngosina ketameko. Pa hana mapongo, ngano kapi na kara novakaume wovawa ngwendi vava na kara nawo ngesi.”—Madison.

a Mokugwana Sinyanga sopopepi momukunda gweni, tara ruha “Mapongo goNombangi daJehova” makura diva po “Gwana epongo lyopopepi.”