Mudinkantu gomugara kuna kulizuvha ngwendi kuna kumuheteka ngomu ana kutarera vantu vana kulivandekera, vamati vavali kuna kutara koselefoni, ntani mukadona kuna kupita po

MAPURO AGA AVA PURA VADINKANTU

Ngapi omu nani nyokera po maheteko?

Mupositoli Paurusa kwa tjenge asi: “Apa ani hara kurugana yoyiwa, udona nawo kukara pwange.” (Varoma 7:21) Wa lizuvha rumwe ngoso ndi? Nsene yimo, sirongwa esi nasi kuvatera o nyokere po maheteko gokurugana yininke yoyidona.

Eyi wa hepa kudiva

Apa wopeke ava kukondjesa ayo kuvhura kukuninkisa o rugane yinke yoyidona. Bibeli kwa tanta asi “kulikwata ukwawo novantu wovadona, kuzonagura nkareso zongwa.” (1 Vakolinte 15:33) Makondjeso gokutunda kovakaume ntani ko intaneta kuvhura kukuninkisa o kare nomadowo aga naga kuninkisa o rugane yininke yoyidona ntani o kwame ’eyi vana kurugana vantu wovanzi.’—Exodus 23:2.

“Ekondjeso lyokukuhara ntani no kukuhafera kuvhura yikutwaredese mokurugana nkenye eyi vana kurugana wopeke, yipo tupu va kuhare.”—Jeremy

Gazadara ko: Morwasinke nayi karera udigu kunyokera po maheteko nsene o pakera unene mbili eyi ava ku gazarere wopeke?—Yisewe 29:25.

Sitwa: Wa hapulisira maheteko go kutunda kovakweni ga kuninkise o teze po nompango daJehova.

Eyi no vhura kurugana

Diva eyi wa pura. Nsene kapi wa diva eyi wa pura, ove kuvhura kukara ngwendi sipopisa esi ava danaukisa wopeke. Hansa kukwama marondoro gomoBibeli: “Konakoneni nayinye, makura mu kwaterere kweyi yoyiwa po.” (1 Vatesaronika 5:21) Nsene o kwata egano eyi wa pura, ayo ngayi kurerupira mokuparuka kuliza neyi wa pura ntani nokunyokera po makondjeso.

Gazadara ko: Morwasinke wa yipulira asi nompango daKarunga kwa karera po morwa uwa wamoge?

“Ame na yidimburura asi apa ani kwaterere kweyi na pura nokunyokera po makondjeso,wopeke kufumadeka nge”—Kimberly

Sihonena somoBibeli: Ndaniyera. Apa nampo ga kere simpe mudinkantu, Ndaniyera “kwa tokwere asi” age nga limburukwa noveta daKarunga.—Ndaniyera 1:8.

Mudinkantu gomugara vana manga nonongodi, kuna kumu danaukisa ngwendi sipopisa — Nsene kapi wa diva eyi wa pura, ove kuvhura ngo kare ngwendi sipopisa esi ava danesa wopeke

Diva maupirankondo goge. Bibeli kuuyunga kuhamena “madowo gosiudinkantu”—asi ago kuna kara malizuvho gononkondo moudinkankantu. (2 Timoteusa 2:22) Eyi kapi tupu yakwatera mo malizuvho gokuligwanekera panyama nye hena kuhara asi wopeke va ku hafere ntani kulizuha asi kuvhura o ture po matokoro ga nyamoge.

Gazadara ko: Bibeli kutanta asi “nkenye ogu kumuzeda edowo lyamwene, eli ali mu koko tali mu kumbagere.” (Jakopo 1:14) Edowo musinke ali ku heteke unene?

“Diva asi makondjeso musinke aga ku digopere kunyokera po. Rugana ko mapaparo omu no vhura kunyokera po makondjeso ogo, nokutjanga yitwa eyi no ruganesa. Nsene o yirugana, apa ngo ligwanekera no makondjeso ogo, ngo diva omu no ganyokera po.”—Sylvia

Sihonena somoBibeli: Ndafita. Poyiruwo yimwe age kwa ligeve ko makondjeso go kutunda kwava wopeke ntani komadowo gamwene. Ndafita ga lirongerere ko komapuko gendi nokuhetekera ko kuwapukurura. Age kwa kanderere kwaJehova asi: “Ungira nge mutjima gokukohoka, ove o pe nge mpepo zompe zokuhungama.”—Episarome 51:10.

Lipangera. Bibeli kutanta asi: “Mwa ha pusilira udona u mu funde nye fundiseni udona kouwa.” (Varoma 12:21) Eyi kutanta asi kuvhura o dire kugwira mo makondjeso. Kuvhura o horowore kurugana yoyiwa.

Gazadara ko: Ngapi omu no likida elipangero nsene kuna kukukondjesa o rugane yininke yoyidona?

“Ame kugazara ko omu nanilizuvha nsene ni gwira meheteko lyongadi. Nani lizuvha ko hansa ndi? Kuvhura, nye po karuwogona tupu. Ame ngani lizuvha nawa mwaza siruwo ndi? Awe, Ame ngani lizuvha momudona. Ayo mulyo ndi? Awe!”—Sophia

Sihonena somoBibeli: Paurusa. Nampili ngomu ga yitambwire asi ga kere nomalizuvho gomadona, Paurusa ga lipangerere. Age kwa tjenge asi: “Nye ame kupangera rutu rwange ngwendi moomu ava pangere mupika.”—1 Vakolinte 9:27.

Sitwa: Nyamoge no tokora asi ngapi nonyokera po makondjeso.

Diworoka asi, maheteko kapi aga karerere. Melissa gonomvhura 20 kwa tanta asi: “Maheteko aga gamonekere ngwendi manene apa nakere kosure ngesi kwato mulyo. Apa ani gazadara ko ayo kuvatera ni dive asi maheteko aga nina kuligwanekera nago ngesi ngaga pita ntani eparu lyange ngali wapa morwa na ganyokera po.”

Eyi ava uyunga ko vakweni

“Kutura po etokoro ntani kukara nouradi wokukwaterera ketokoro olyo kuvatera nge ni nyokere po maheteko. Pasihonena, nsene na tokora asi kapi nina kurugana yuma yongandi, ame kukwaterera ketokoro olyo ntani kapi tani gazudurura ko hena ndi ni pulisire wopeke va rundurure etokoro lyage.”—Olivia

“Vadinkantu kuligwanekera nomakondjeso gokuza koyipito ntani nokurugana yininke nayinye eyi ayi pitire ko ngwendi kunwa marovhu nokuruganesa yikwepangwe ntani nokuligwanekera panyama. Ayo kuvatera nge apa ani uyunga novakondi vange kuhamena makondjeso aga nina kuligwanekera nago. Kukara neyi yokurugana posiruwo esi ani dili kurugana yuma kuvatera nge ni nyokere po kurugana yoyidona.”—Jared.

“Ekondjeso lyoudigu po kuna kara kurugana sininke esi sina kara asi aso kapisi epuko kwava wopeke nye aso kuvhura kukara epuko kwange ngwendi kuhorowora yilihafeso. Wa hepa kudiva eyi wa pura mokunyokera po makondjeso gangoso ntani ayo kugusa siruwo noudivi.”—Mayan

“Diva maupirankondo goge. Wa hepa kudiva asi maruha musinke gokointaneta aga naga likida yininke yoruhonda eyi nayi ku heteka ntani wa hepa kudiva eyi no rugana ko apa nayi horoka. Wa hepa kukara nositambo yipo o dire kugwira momaheteko.”—Julian.