Nampili ngomu atu karere Jehova noulimburukwi, nose kuligwanekera nomaudigu ngwendi aga ava ligwanekere nago vantu navenye. Ntani kuvhura tu ligwanekere nomarwaneso ntani nomahepeko gokutunda kwava va nyenga vantu vaKarunga. Nampili ngomu Jehova a dili kutupopera komaudigu ogo, nye age kwa tumbwidira asi nga tu vatera. (Jes. 41:10) Nevatero lyendi, ose kuvhura kutwikira kuhafa nokutura po matokoro gomawa ntani nokutwikira kumulimburukwa nampili momaudigu gomanene. Jehova kwa tumbwidira asi nga tu pa eyi azi tumbura Bibeli asi “mbili zaKarunga.” (Fil. 4:6, 7) Mbili ezi kwa tamba pokukara tuna litura ntani azo kuwiza po tupu morwa twa kara nelikwatakano lyenene naJehova. Mbili ezi kapi ava ‘vhuru kuzikwata egano vantu’ morwa azo ngwa unene kupitakana omu natu yi gazarera. Pasihonena, wa kanderera kwaJehova, ano konyima ya ku tetukisire morwa wa lizuvhire asi ono litura ndi? Yosili ove kwa lizuvhire “mbili zaKarunga” morwa yige ga zi kupere. w24.01 20 ¶2; 21 ¶4

Vantu ava va hara Jehova, kwa kara neharo lyokumuhamberera nomutjima nagunye. Ndafita ga yi kwete egano asi apa atu hamberere edina lyaKarunga Jehova, ayo ya lifana tupu ngwendi Jehova mwene tuna kuhamberera. Edina lyaJehova kwa hamena mo nkareso zendi, yikara yendi yoyiwa ntani yirugana yendi yoyinene. Ndafita kwa here kupongora edina lyoguhwe ntani nokulihamberera. Age kwa here kuyirugana oyo nomutjima nagunye. Mokulifana, Varevhi nawo kwa hamberere Jehova. Awo va yi tambwire asi kapi ngava vhura kuhamberera edina Jehova moomu ya fira. (Neh. 9:5) Pwa hana esinganyeko, Jehova kwa hefe apa va mu hamberere nomutjima nagunye. w24.02 9 ¶6

Jehova kapi ngaku tara asi yina kusumpire kweyi wa dira kusikisa mo sitambo esi wa li tulira po. (2 Kol. 8:12) Lirongera ko koyiruwo apa ayi horoka yininke eyi ayi ku kondere mokudira kusikisamo sitambo soge. Diworoka eyi wa sikisa mo. Bibeli kuuyunga asi “Karunga muhungami, kapi nga divara yirugana yeni.” (Heb. 6:10) Yipo nye, nove kapisi o divare yininke eyi wa sikisa mo. Gazadara ko yininke eyi wa sikisa mo nare. Ayo kuvhura yi kare asi ove kwa tulisa po nare ukaume naJehova noku tantera ko wopeke kumuhamena ndi kugwana ekuho. Ngwendi moomu tupu ya ku tompoka ntani nomu wa sikisire mo yitambo yoge yopampepo eyi wa li tulilire po nare, ove kuvhura o twikire kusikisa mo sitambo soge esi wa li tulira po ngesi. Nevatero lyaJehova, ove kuvhura kusikisa mo sitambo soge. Hetekera ko nkenye apa kumona omu Jehova ana kukuvatera ntani oyo ngayi kuvatera yipo o hafe ngomu ono kuhetekera ko kusikisa mo sitambo soge. (2 Kol. 4:7) Nsene o twikira, ove ngo gwana matungiko gomanzi.​—Gar. 6:9. w23.05 31 ¶16-18