Vantu ava va hara Jehova, kwa kara neharo lyokumuhamberera nomutjima nagunye. Ndafita ga yi kwete egano asi apa atu hamberere edina lyaKarunga Jehova, ayo ya lifana tupu ngwendi Jehova mwene tuna kuhamberera. Edina lyaJehova kwa hamena mo nkareso zendi, yikara yendi yoyiwa ntani yirugana yendi yoyinene. Ndafita kwa here kupongora edina lyoguhwe ntani nokulihamberera. Age kwa here kuyirugana oyo nomutjima nagunye. Mokulifana, Varevhi nawo kwa hamberere Jehova. Awo va yi tambwire asi kapi ngava vhura kuhamberera edina Jehova moomu ya fira. (Neh. 9:5) Pwa hana esinganyeko, Jehova kwa hefe apa va mu hamberere nomutjima nagunye. w24.02 9 ¶6

Jehova kapi ngaku tara asi yina kusumpire kweyi wa dira kusikisa mo sitambo esi wa li tulira po. (2 Kol. 8:12) Lirongera ko koyiruwo apa ayi horoka yininke eyi ayi ku kondere mokudira kusikisamo sitambo soge. Diworoka eyi wa sikisa mo. Bibeli kuuyunga asi “Karunga muhungami, kapi nga divara yirugana yeni.” (Heb. 6:10) Yipo nye, nove kapisi o divare yininke eyi wa sikisa mo. Gazadara ko yininke eyi wa sikisa mo nare. Ayo kuvhura yi kare asi ove kwa tulisa po nare ukaume naJehova noku tantera ko wopeke kumuhamena ndi kugwana ekuho. Ngwendi moomu tupu ya ku tompoka ntani nomu wa sikisire mo yitambo yoge yopampepo eyi wa li tulilire po nare, ove kuvhura o twikire kusikisa mo sitambo soge esi wa li tulira po ngesi. Nevatero lyaJehova, ove kuvhura kusikisa mo sitambo soge. Hetekera ko nkenye apa kumona omu Jehova ana kukuvatera ntani oyo ngayi kuvatera yipo o hafe ngomu ono kuhetekera ko kusikisa mo sitambo soge. (2 Kol. 4:7) Nsene o twikira, ove ngo gwana matungiko gomanzi.​—Gar. 6:9. w23.05 31 ¶16-18

Jehova kupapara nonkedi yipo a yi likide asi age ga hara vantu vendi ntani kuvahafera. Matjangwa kwa likida yihorokwa yivali omu Jehova ga tanterere Jesus asi ga mu hara ntani ga mu za komutjima. (Mat. 3:17; 17:5) Ono hara Jehova a ku tantere asi ga ku hafera ndi? Jehova kapi a uyunga nose kutundilira meguru, nye age kuuyunga nose kupitira moBibeli. Apa atu resa nonkango deharo edi Jesus ga tanterere varongwa vendi, ayo kwa fana ngwendi Jehova ana kututantera nonkango odo. Jesus nga honene nawa nawa yikara yoGuhwe. Apa atu resa kuhemena omu Jesus ga haferere varongwa vendi wokudira kusikilira mo, ayo kwa fana ngwendi Jehova kuna kututantera nonkango odo. (Joh. 15:9, 15) Nsene kuna kupita momaudigu, ayo kapi a yi tanta asi Jehova kapi ana kutuhafera. Nye ayo kutupa mpito yipo tu yi likide asi twa hara Karunga ntani asi twa mu huguvara.​—Jak. 1:12. w24.03 28 ¶10-11