Vahompa vauvali

5 Namani kwa kere mukurona govakwayita vahompa gwaSiliya ogu ga divikwire ntani hompa kwa mu fumadekere, morwa Jehova kwa mu ruganesere a funde nonkore doVasiliya. Nampili ngomu ga kere noyingondwe,* age kwa kere mukwayita gononkondo. 2 Ezuva limwe apa Vasiliya va ka rwisire Vaisraeli, awo kwa ka kwete mukadona ogu ga ya kere mukareli gwamukadaNamani. 3 Mukadona ogo ta tantere mukadaNamani asi: “Nsene hekurwange na za komuporofete gomoSamaliya, age nga ka veruka kouvera wendi woyingondwe.” 4 Makura age* ta zi a ka tantere hompa eyi ga mu tanterere mukadona goMuisraeli.

5 Hompa gwaSiliya ta tanta asi: “Zende! Ame nani ku pa mbilive o ka zi gave kwahompa gwaIsraeli.” Makura ta zi ta pitura yisiliveli yonokilograma 342* noyintau yongorodo 6 000 ntani noyikoverero murongo. 6 Age ta twara mbilive kwahompa gwaIsraeli. Mombilive ozo kwa tjenge mo asi: “Ame kuna tumu mbilive ezi kumwe nomukareli gwange Namani, yipo o ya mu verure kouvera wendi woyingondwe.” 7 Apa ga resere hompa gwaIsraeli mbilive ozo, ta taura yikoverero yendi, ta tanta asi: “Ngoso ame kwa kara nononkondo dokudipaga muntu ndi ni mu parure ngwendi Karunga ndi? Age kuna tumine nge mugara ogu ni ya mu verure koyingondwe yendi. Ayo kuyimonenena asi mugara ogu kuna kuhadagura nge.”

8 Apa ga yi zuvhire Elisa muporofete gwaKarunga gousili asi hompa gwaIsraeli ana taura yikoverero yendi, ta tumu mbudi kwahompa asi: “Morwasinke ono tawire yikoverero yoge? Mu ninka a wize kwange, yipo a yi dive asi moIsraeli mwa kara muporofete.” 9 Makura Namani ta zi kwaElisa kumwe nononkambe dendi ntani nomatemba gendi goyita, ta ka sikama pevero lyembo lyaElisa. 10 Nye Elisa ta tumu muntu a ka mu tantere asi: “Zende o ka likuhwe yikando ntambali momukuro gwaJorodana, makura sipapa soge na si veruka ntani ove no kuhuka.” 11 Namani ta handuka unene ntani ta tokora kutengura, ta tanta asi: “Ame kwa gazara asi age na wiza a ya sikame apa, a ya likwambere kwaKarunga gwendi Jehova nokugendagwisa ewoko lyendi kontunda zoyingondwe yange yipo ni veruke. 12 Abana naParapara nomukuro domoDamasikusi, nani kapi da pitakana nomukuro nadinye domoIsraeli ndi? Ngoso kapi nani kuhuka nsene ni ka likuhwira monomukuro odo ndi?” Makura ta piruka ta ka za, age ana handuka unene.

13 Makura vakareli vendi tava mu zire tava mu pura asi: “Hompa,* ngano muporofete kuna kupura o rugane yininke youdigu, amesi ngano ono yi rugana? Nye age kuna kutantere tupu o ka likuhwe yipo o kuhuke.” 14 Makura Namani ta zi, ta ka divira momukuro gwaJorodana yikando ntambali ngwendi moomu ga mu tanterere muporofete gwaKarunga gousili. Ano sipapa sendi ta si veruka, ta si fana ngwendi somunona ntani ta kuhuka.

15 Konyima, ta tengura hena komuporofete gwaKarunga gousili kumwe novantu vendi navenye, ta ka sikama komeho zendi, ta tanta asi: “Ngesi nina yi diva asi moIsraeli yimo mwelike ga kara Karunga mouzuni mudima. Na kanderere gusa ou uhwi* nina kukupa ame mukareli goge.” 16 Nye Elisa ta tanta asi: “Tani gana kwaJehova Karunga goMunamwenyo ogu ani karere* asi ame kapi tani u tambura.” Age ta mu sininike a u tambure, nye Elisa ta nyoka. 17 Makura Namani ta tanta asi: “Nsene ono nyoka, na kanderere pe nge ko evhu lyomosirongo esi, eli nadi vhura kusimba nonsino mbali. Ame mukareli goge kapi ngani gava hena nzambo zeswakerero ndi nkenye ezi nzambo koyikarunga yapeke ntudi kwaJehova. 18 Nye Jehova nga gusire nge po ame mukareli goge apa ngani rugana yininke eyi. Apa a zi hompa gwange konzugo* zaLimoni a ka mu nyongamene, age kukorera kokuwoko kwange. Apa a linyongamene komeho zaLimoni, name kulinyongamena. Yipo nye, apa ngani ka linyongamena komeho zaLimoni, ngano Jehova nga gusire nge po ame mukareli goge.” 19 Makura Elisa ta mu tantere asi: “Zende mombili.” Ano Namani ta katuka a ze. Apa ga gendere sinano songandi, 20 Gehasi mukareli gwaElisa muporofete gwaKarunga gousili, ta litantere mwene asi: ‘Hekurwange ana sigilire Namani goMusiliya a ze ga hana kutambura yininke eyi ana mu retere. Tani gana kwaJehova Karunga goMunamwenyo asi ame tani mu sikura yipo a ka pe nge ko yimwe.’ 21 Makura Gehasi ta sikura Namani, ano apa ga mwene Namani asi kweli ogu ana kumusikura, ta humburuka mo metemba lyendi a gwanekere nendi, ta mu pura asi: “Nayinye yiwaawa tupu ndi?” 22 Gehasi ta limburura asi: “Nhi, nayinye yiwaawa. Hekurwange kuna tumu nge ni ya ku tantere asi: ‘Vana wovaporofete vavali womomukunda gonondundu goVaefurayimi kuna wiza kwange, na kanderere va pa ko sisiliveli sonokilograma 34,2* noyikoverero yivali.’” 23 Makura Namani ta mu tantere asi: “Gusa po yisiliveli yivali yonokilograma 68,4.”* Age kwa mu sininikire, makura ta tura yisiliveli yivali monondjato mbali kumwe noyikoverero yivali, ta yi gava kovakareli vendi vavali va yi simbe.

24 Apa ga ka sikire Gehasi koOfeli,* ta gusa nondjato kovakareli owo, ta ka di tura monzugo, makura ta tantere vakareli va ze. Ano apa va tundire po, 25 ta zi ta ka sikama pepi na hekurwendi. Elisa ta mu pura asi: “Kupi ono kutunda Gehasi?” Nye age ta tanta asi: “Kwato oku nina zi ame mukareli goge.” 26 Makura Elisa ta mu tantere asi: “Ove kuna kugazara asi ame kapi nina yi diva asi ove kuna sikura gwina mugara ntani age kuna humburuka metemba lyendi a gwanekere nove ndi? Esi kapisi siruwo sokutambura siliveli ndi yikoverero ndi yitji youzwe ndi yitji yomandjembere ndi nonzwi ndi nongombe ndi vakareli wovagara ndi wovakadi. 27 Ngesi yingondwe yaNamani ta yi dirukire koge noruvharo roge dogoro narunye.” Ano apa ga tundire po Gehasi, ta yi mu gwana yingondwe, ta vauka ngwendi yiterengenze.