Vahompa vauvali

6 Vana wovaporofete tava tantere Elisa asi: “Evango eli twa kara kumwe nove enunu unene. 2 Tu pulisira tu ze komukuro gwaJorodana, tu ka tete yitji ntani tu ka wapeke evango eli ngatu tunga.” Elisa ta va tantere asi: “Zendeni.” 3 Gumwe govana wovaporofete ta pura Elisa asi: “Kuvhura o ze kumwe nose ndi?” Age ta limburura asi: “Nawa tupu.” 4 Makura ta zi kumwe nawo, ano apa va ka sikire komukuro gwaJorodana, tava tameke kuteta yitji. 5 Gumwe gwawo apa ga tetere sitji, mutwe gwekuva tagu gwire momema, makura ta zigire asi: “Nane woo! Hekurwange, ame kwa hundira ekuva eli.” 6 Muporofete gwaKarunga gousili ta mu pura asi: “Kupi guna gwire?” Makura age ta mu likida oku gwa gwililire mutwe gwekuva. Elisa ta tete mutayi, ta gu zugumine momema, makura mutwe gwekuva tagu tuntuka. 7 Elisa ta tanta asi: “Gu damuna.” Makura age ta gonona kuwoko kwendi a gu damune.

8 Hompa gwaSiliya kwa zire a ka rwise Vaisraeli. Age kwa pulire ko magano vakareli vendi ntani ta va tantere oku nava ka dikira notende dawo. 9 Makura muporofete gwaKarunga gousili ta tantere hompa gwaIsraeli asi: “Kapisi ngo pitire kevango eli, yeeyi Vasiliya yiko ngava tundilira va ku rwanese.” 10 Makura hompa goVaisraeli ta rondora vantu ava va kere kevango eli ga mu tanterere muporofete gwaKarunga gousili. Elisa kwa twikilire kumurondora ano hompa kapi nga zi kevango olyo.

11 Eyi kwa handukisire hompa gwaSiliya, makura ta zigida vakareli vendi, ta va pura asi: “Tantereni nge asi yilye ogu a ruganene kumwe nahompa goVaisraeli.” 12 Makura gumwe govakareli vendi ta mu limburura asi: “Kapisi nyose hompa. Muporofete gomoIsraeli Elisa yige a tantere hompa gwaIsraeli yininke eyi o uyunga monzugo zoge zokurara.” 13 Age ta va tantere asi: “Zendeni mu ka tare asi kupi ana kara yipo ni tume ko vagara va ka mu kwate.” Konyima tava mu tantere asi: “Mweli moDotani.” 14 Age ta tumu vakwayita wovanzi nononkambe ntani nomatemba goyita, makura tava zi kositata oso masiku va ka si kundurukide.

15 Mukareli gomuporofete gwaKarunga gousili apa ga pindukire ngurangura zonene a ze ponze, ta mono vakwayita vana kundurukida sitata nononkambe ntani nomatemba goyita. Makura mukareli ta tantere Elisa asi: “Nane woo, hekurwange! Yisinke natu rugana?” 16 Nye Elisa ta mu tantere asi: “Wa ha tjira! Yeeyi ava vana hama kwetu vanzi kupitakana ava vana hama kwawo.” 17 Makura Elisa ta kanderere asi: “Jehova, mahura meho gendi yipo a va mone.” Poopo ngoso, Jehova ta mahura meho gomukareli, makura ta va mono. Age kwa mwene mukunda ogo gonondundu guna zura nonkambe nomatemba goyita gomundiro gana kundurukida Elisa.

18 Vasiliya apa va hederere Elisa, Elisa ta kanderere kwaJehova asi: “Na kanderere va ninka va dire kumona.” Makura Karunga ta va ninki va dire kumona ngwendi moomu ga yi hundilire Elisa. 19 Makura Elisa ta va tantere asi: “Ezi kapisi yizo nzira ntani esi kapisi yiso sitata muna kupapara. Kwameni nge ni mu tware komugara ogu muna kupapara.” Nye age tava twara koSamaliya.

20 Apa va ka sikire moSamaliya, Elisa ta tanta asi: “Jehova, mahura meho gawo yipo va mone.” Makura Jehova ta mahura meho gawo, tava dimburura asi mokatji kositata saSamaliya vana kara. 21 Apa ga va mwene hompa goVaisraeli, ta pura Elisa asi: “Hompa, ni va dipage ndi?” 22 Nye Elisa ta tanta asi: “Wa ha va dipaga. Ove kudipaga norufuro ndi nouta wonkanza vantu ava wa ka kwata moyita ndi? Va pa mboroto va lye nomema va nwe, makura va tengure kwahompa gwawo.” 23 Makura tava pe nondya dononzi, tava li ntani tava nu. Konyima tava ninki va tengure kwahompa gwawo. Kutunda opo, vanamahaka womoSiliya, kapi va zire hena mosirongo soVaisraeli.

24 Konyima, Beni-hadadi hompa gwaSiliya ta pongaike vakwayita vendi, tava zi tava ka kundurukida sitata saSamaliya. 25 Makura mositata saSamaliya ta mu kara erumbu lyenene. Vasiliya tava si kundurukida dogoro mutwe gosindongi tava gu randa yisiliveli 80, ano nze zonunu* zonkutji kwa zi rende yisiliveli yitano. 26 Apa ga gendere hompa gwaIsraeli keguru lyekuma, mukadi gumwe ta zigire asi: “Hompa gwange, tu vatera!” 27 Makura hompa ta mu pura asi: “Nsene Jehova kapi ana kukuvatera, ame ngapi omu nani ku vatera? Omu ono kugazara asi ame kuvhura ni ku pe nondya, vhinyu ndi magadi ndi?” 28 Hompa ta mu pura asi: “Udigu musinke ono kara nawo?” Mukadi ogo ta limburura asi: “Mukadi ogu kwa tanterere nge asi tu guse munange tu mu lye, ano ezuva lyokukwama ko ntani ngatu lya munendi. 29 Makura yipo twa terekere munange tu mu lye, nye ezuva lyokukwama ko tani mu tantere nage a guse munendi tu mu lye, nye age kwa mu horekere.”

30 Apa ga zuvhire hompa eyi ga uyungire mukadi ogo, ta taura yikoverero yendi. Ngomu ga gendere keguru lyekuma, vantu tava dimburura asi age kuna dwara nonsako konhi zoyikoverero yendi. 31 Makura ta tanta asi: “Karunga ngano a tengeke nge nsene kapi nani teta mutwe gwaElisa munaSafata naina!”

32 Elisa kwa hingilire membo lyendi kumwe nomasimbi. Hompa ta tumu muntu a pite komeho zendi, nye komeho muntu ogo a ya sike, Elisa ta tantere masimbi asi: “Muna gomudipagi ana tumu muntu a ya tete ko mutwe gwange. Apa na ya sika, pateni kevero ntani dekeni ko. Hompa gwendi kuna kumukwama monyima.” 33 Apa ga uyungire nawo, mugara ogu va tumine ta ya siki. Konyima, hompa nage ta ya siki, ta tanta asi: “Morwasinke nani ndindilira Jehova a vatere nge mokumona asi Jehova yige ga retesa po udigu ou?”