Buke zaRukasa

11 Apa Jesus ga mene kukanderera, gumwe govarongwa vendi ta tanta asi: “Hompa, tu ronga omu ava kanderere ngwendi moomu ga ronga Johanesa varongwa vendi.”

2 Ta va tantere asi: “Nsene tomu kanderere, uyungeni asi: ‘Tate, edina lyoge ava li pongore.* Uhompa woge u wize. 3 Tu pa nkenye ezuva, nondya* edi tuna hepa mezuva olyo. 4 Ntani tu dongwenena po nonzo detu, morwa nose kudongwenena po ava ava tu zonene; ntani tu vatera ga dire kutufunda maheteko.’”

5 Makura ta va tantere asi: “Tu tante asi wa kara namukweni makura to mu zire pokatji komasiku, o ka mu hundire asi: ‘Mukwetu, pe nge ko* nomuhwi ntatu domboroto, 6 morwa mukwetu ogu ana tundu ure kuna ya dingura nge makura kapi nina kara neyi yoku mu pa.’ 7 Nye age monzugo, ta mu limburura asi: ‘Wa ha donganesa nge. Evero nare vana li pata ntani vana vange vana rara. Kapi tani vhuru kupinduka ni ya ku pe eyi ono hepa.’ 8 Tani mu tantere asi kapi na pindukira a mu pe eyi ana hepa morwa yeeyi asi age mukwawo, nye morwa yeeyi ana kutwikira kumuhundira. 9 Yipo nye nina kumutanterera asi omu hundire ngava mu pe, omu papare ngomu gwane, omu ngongore makura ngava mu zegwilire. 10 Yeeyi nkenye ogu a hundire kumupa, ogu a papara kugwana, ano ogu a ngongora kumuzegwilira. 11 Pweli guhya mokatji keni na pa munendi ezoka nye age kuna mu hundire mfi ndi? 12 Ndi a mu pe nge nye age kuna mu hundire euta? 13 Yipo nye, nsene asi one vadona mwa diva kupa vana veni yininke yoyiwa, ngapi nye omu Guhyeni gemeguru na dira kupa mpepo zokupongoka ava ava zi mu hundire?”

14 Kutunda opo, ta tjida momugara mpepo zondona ezi za mu ninkisire a dire kuuyunga, makura mugara ogo ta tameke kuuyunga ano mbunga kwa tetukire. 15 Nye vamwe ta va uyunga asi: “Age kutjida mo nompepo donondona nononkondo daBelisebubu* mupangeli gonompepo donondona.” 16 Nye vamwe tava mu heteke pokumupura a va ruganene sitetu medina lyaKarunga. 17 Apa ga divire eyi vana kugazara, ta va tantere asi: “Nkenye uhompa ou wa kara novantu ava ava lirwanesa kuhanauka po, ano embo omu mwa kara vantu ava lirwanesa, kuharagana po. 18 Mokulifana, nsene asi Satana kulirwanesa mwene, ngapi nye omu ngau karerera uhompa wendi? Yeeyi one kuuyunga asi ame kutjida nompepo donondona nononkondo daBelisebubu. 19 Nsene asi ame nompepo donondona kuditjida mo nononkondo daBelisebubu, awo varongwa veni nononkondo dalye ava di tjidisa mo? Eyi yiyo ngava mu dimbwilira asi mepuko mwa kara. 20 Nye nsene asi nononkondo daKarunga* ani tjida mo nompepo donondona, diveni asi Uhompa waKarunga una wiza nye one noku yi dimburura si. 21 Apa mugara gononkondo ogu ga kara noyirwiso a kungu mbara zendi, yiweka yendi kukara mepopero. 22 Nye nsene pa wiza gumwe ogu ga mu pita mononkondo a mu rwanese noku mu funda, ta gusa yirwiso nayinye eyi ga huguvara, a yi ligavere novantu vendi. 23 Ogu ga dira kuhamena kwange, kurwanesa nge, ntani ogu a dili kupongaika vantu kumwe name, kuvahanagura po.

24 “Apa mpepo zondona azi tundu momuntu, azo kurenda-renda momburundu, zi papare evega oku nazi ka kara, nye apa nazi dira kugwana evega olyo, tazi tanta asi: ‘Tani tengura membo lyange omu na tundire.’ 25 Ano eyi nazi wiza ngoso, kuyagwana embo vana li zeresa noku li wapeka. 26 Makura tazi zi nye zi ka rete ko nompepo nonkwawo ntambali donondona unene kuzipitakana, makura tadi hwilire, di tunge mo. Ukaro wokuhulilira womuntu ogo kuyadonapa unene kupitakana womuhowo.”

27 Ngomu ga uyungire nonkango edi, mukadi gumwe mombunga ta zigire asi: “Mukadi ogu ga ku hampurukire nokukuzamweka, kwa kara noruhafo!” 28 Nye age ta tanta asi: “Hawe, vantu woruhafo, vaava ava zuvhu nonkango daKarunga nokudisikisa mo!”

29 Apa vantu wovanzi va ya pongere, ta tameke kuvaronga asi: “Vantu ava vadona, awo kwa hara kumona yidiviso nye kwato sidiviso esi ngava va pa, ntudi sidiviso sokuhamena Jona. 30 Ngwendi moomu tupu Jona ga kere sidiviso koVaninivhe, MunwaMuntu nage yimo nga kara sidiviso kovantu ava. 31 Hompa gomukadi gokoMbindakano ngava ka mu vhumbura mezuva lyompanguro kumwe novantu ava makura nga va pe usima, yeeyi age kwa tundire koure a ya purakene kounongo waSaromo. Nye tareni! Ogu ga pitakana Saromo gogu apa. 32 Mezuva lyompanguro, Vaninivhe ngava ka va vhumbura kumwe novantu ava makura ngava va pe usima, yeeyi awo kwa litezwilire apa ga va zuvhisilire Jona. Nye tareni! Ogu ga pitakana Jona gogu apa. 33 Muntu apa a hwameke ramba, kapi a zi horeke ndi a zi ture konhi zosipako,* nye age kuzitura mouzweko woramba yipo va zi mone ava vana kuhwilira mo. 34 Meho ramba zorutu roge. Nsene meho goge ga demenena kosininke simwe,* rutu roge narunye taru tema* nye nsene ga demenena koyininke yoyinzi,* rutu roge taru kara momundema. 35 Takameseni asi uzera ou wa kara mweni kapisi u kare mundema. 36 Yipo nye, nsene rutu roge narunye kuna kara mouzera ntani mwato mundema nampili nakauke, aro ngaru tema ngwendi moomu azi gava ramba uzera.”

37 Apa ga mene kuuyunga nonkango odo, Mufalisayi gumwe ta mu zigida va ka lye nendi. Age makura ta zi kembo lyendi ta ka hingira kositafura. 38 Nye Mufalisayi ogo kwa tetukire morwa yeeyi ga dilire kulikuhwa komawoko gendi kuliza nompo komeho zokulya. 39 Nye Hompa ta mu tantere asi: “One Vafalisayi kukuhwa nkinda nosiyaha kontunda nye monomutjima deni kwa zura mo madowo noudona. 40 Magova one! Kapi mwa diva asi Karunga ogu ga sita yomonda yige hena ga rugana yopontunda? 41 Nsene to mu gava yigava yonkenda,* gaveni kutundilira komutjima makura nayinye ngayi mu zerera. 42 Ani nane one Vafalisayi, one kugava yiumurongo yehidi yokutovesesa noyikwahidi yapeke, nye kapi omu pakere mbili uhungami neharo lyaKarunga! One kwa mu pangera mu gave yiumurongo, nye simpe mwa hepa kupakera mbili eyi ya nenepa po moVeta. 43 Ani nane one Vafalisayi, yeeyi one kwa hara yipundi yokomeho* monosinagoge ntani kwa hara kumumorora nefumadeko pomarandesero! 44 Ani nane, one kwa fana nontoko* edi adi dili kumoneka apa ava gendi vantu va hana kuyidivira!”

45 Mulirongi gumwe gomatjangwa ta limburura asi: “Murongi, nsene to uyunga ngoso, nose to tu swaura.” 46 Makura age ta va tantere asi: “Ani nane one valirongi womatjangwa, yeeyi one kupa vantu nomudigo nye one nyamweni kapi omu gumu ko nampili nyara!

47 “Ani nane one, ozinyakurweni kwa dipagere vaporofete nye one yiyo muna kuwapukurura nontoko* dawo! 48 One mwa diva nawa-nawa eyi va rugene ozinyakurweni nye one kuyikwatesa ko, morwa awo kwa dipagere vaporofete nye one kuwapukurura nontoko dawo. 49 Eyi yiyo ga uyungire Karunga moukonentu wendi asi: ‘Ngani va tumina vaporofete novapositoli nye awo ngava dipaga mo vamwe nokuhepeka mo vamwe, 50 awo ngava va gwana usima wohonde zovaporofete navenye ava va dipaga kutunda ketameko lyouzuni, 51 kutunda kohonde zaAbeli dogoro zaSakaliya ogu va dipagere pokatji kontembeli nosizambero.’ Yosili nina kumutantera asi vantu ava ngava va pangwira unzoni ou.

52 “Nane one valirongi womatjangwa, yeeyi one kwa gusa vantu nsapi zediwo. Ano one nyamweni kapi mwa za mo ntani one kusilika ava va hara kuza mo!”

53 Apa ga tundire po, valirongi womatjangwa noVafalisayi tava mu kundurukida oku tava mu puragere mapuro gomanzi, 54 yipo va mu gwanene po usima.