Nove wa lizuvha rumwe ngwendi vantu ava tuna tumbura ketameko ndi? Wovanzi, kuresa Bibeli kumoneka kwawo ngwendi udigu. Nye ngapi nsene o diva asi Bibeli kuvhura zi ku vatere o kare noruhafo ntani yi ku gwanene po meparu? Ntani ngapi nsene o diva asi pwa kara nonkedi edi nadi ku vatera o hafere kuresa Bibeli? Ono hara kudiva omu Bibeli nazi ku vatera ndi?

Ngesi tara yihonena yava va gwanena mo uwa apa va tamekere kuresa Bibeli.

Ezekiel gonomvhura dokoyiha 20, kwa tanta asi: “Ame kwa kere ngwendi muntu ana kusinga etuwa ga hana kudiva oku ana tamba. Nye kuresa Bibeli kwa vatera nge ni kare nositambo meparu. Amo kwa kara mo magano gomawa aga naga ku vatera meparu.”

Frieda gonomvhura dokoyiha 20, kwa tanta asi: “Ame kwa here kutanguna. Nye kuresa Bibeli kwa vatera nge ni lironge kupangera nkareso zange. Ano ngesi ame kutulisa po vakaume noureru.”

Eunice gonomvhura dokoyiha 50, kwa tanta asi: “Bibeli kwa vatera nge ni rundurure nkareso zange zondona nokukara muntu gomuwa.”

Ngwendi vantu ava, wovanzi kwa lironga asi kuresa Bibeli kuvhura zi ku vatere o gwane ruhafo meparu. (Jesaya 48:17, 18) Unene po, azo ngazi ku vatera o (1) ture po matokoro gomawa, (2) tulise po vakaume wovawa, (3) lididimikire maudigu, ntani (4) lironge usili kuhamena Karunga. Mavyukiso gomoBibeli kwa tunda kwaKarunga, mokugakwama ngo gwanena mo uwa. Karunga kapi a gava mavyukiso gepuko.

Yomulyo po koge, tameka kuresa Bibeli. Magano musinke naga ku vatera o tameke kuresa Bibeli nokuzihafera?

Magano musinke naga ku vatera o hafere kuresa Bibeli ntani o gwanene mo uwa? Konakona nonkedi ntano edi da vatera vantu wovanzi.

Papara evango lyokuwapera. Hetekera ko kugwana evango lyokulimwenenena. Nyokera po madonganeso yipo o demenene kweyi ono kuresa. Site sosiwa kuvhura kukuvatera o gwanene mo uwa mereso lyoge lyoBibeli.

Kara nomutaro gouhunga. Morwa Bibeli kwa tunda kwaGuhyetu gemeguru, ove ngo gwanena mo uwa nsene o kara ngwendi munona ana hara kulirongera ko kovakurona vendi. Nsene o kara nomutaro gepuko komagano gomoBibeli, heteka kugunyokera po yipo Karunga a vhure kukuronga.—Episarome 25:4.

Kanderera komeho o rese Bibeli. MoBibeli kwa kara mo magano gaKarunga, yipo nye twa hepera evatero lyendi tu zi kwate egano. Karunga ga tumbwidira kugava ‘mpepo zokupongoka kwava vana kuzimuhundira.’ (Rukasa 11:13) Mpepo zokupongoka kuvhura zi ku vatere o kwate egano magazaro gaKarunga. Ntani ngazi mahura nondunge doge o kwate egano ‘magazaro gaKarunga gokonhiinhi.’—1 Vakolinte 2:10.

Resa o yi kwate egano. Kapisi o resere morwa ono hara kumana. Gazadara ko kweyi ono kuresa. Lipura asi: ‘Yikara musinke nina dimburura momuntu ogu nina kuresa moBibeli? Ngapi nani yi ruganesa meparu lyange?’

Litulira po yitambo. Mokuhafera ereso lyoge lyoBibeli, litulira po yitambo eyi nayi ku vatera meparu. Yitambo ngwendi asi: ‘Nina hara kulironga yoyinzi kuhamena Karunga.’ ‘Ame nina hara kukara muntu ndi nturagumbo ndi mugolikadi gomuwa.’ Makura horowora maruha gomoBibeli aga naga ku vatera o sikise mo yitambo oyo.a

Nonkedi edi ntano nadi ku vatera o tameke kuresa Bibeli. Nye yisinke nayi ninkisa ereso lyoge lyoBibeli o li hafere? Sirongwa sokukwama ko nasi ka zogera magano gamwe.

Apa o resa Bibeli, kuzihafera ndi? Ndi kapi o zi hafere? Eyi kwa korera monkedi omu o zi resa. Konakona eyi no rugana yipo o hafere ereso lyoge lyoBibeli.

Horowora etoroko lyereru ntani lyokuhuguvara. Nsene o resa etoroko lyoudigu ndi eli lya ruganesa nonkango danare edi wa dira kudiva, ove kapi ngo hafera kuresa Bibeli. Yipo nye, ruganesa Bibeli ezi za ruganesa nonkango doureru kukwata egano. Ntani ezi va toroka nawa.a

Ruganesa yikwakonentu. Bibeli kapi tupu za kara morupe robuke nye hena kuvhura kuzigwana koIntaneta. Nobibeli dimwe kuvhura kudiresera koIntaneta ndi kudikwatekera kokompiuta ndi kotablets ndi moserefona zoge. Nobibeli dimwe kwa kara nomaruha aga naga ku vatera o tare usimbu novelise domoNobibeli dapeke ndi o hetakanese matoroko gamwe. Nsene kwa hara unene kupurakena, Bibeli va zi kwateka morupe rokupurakena momaraka gamwe. Vantu wovanzi kwa hara kupurakena nsene kuna kusinga ndi kuna kukuhwa ndi kuna kurugana yirugana yongandi. Horowora nkedi ezi nazi wapera ukaro woge.

Ruganesa yiruganeso yelirongo lyoBibeli. Yiruganeso oyo ngayi ku vatera o gwanene mo uwa mereso lyoBibeli. Pwa kara nokarata domadina gomavango va tumbura moBibeli, edi nadi ku vatera apa no resa o mone oku ga karerere mavango ogo. Yirongwa ngwendi eyi ya kara mosifo esi ndi eyi ya kara koIntaneta jw.org, ngayi ku vatera o dimburure mulyo goBibeli.

Ruganesa nonkedi dokulisiga. Nsene asi kukudigopera kuresa Bibeli kuliza nomu da likwama nobuke, kuvhura o tameke nobuke ezi o hafere unene. Nsene ono hara kudiva vantu ava va tumbura moBibeli, hetekera ko kuresa kuvahamena. Nonkedi dimwe kudigwana mokakende “Papara moBibeli o dive vantu ava va tumbura mo.” Ndi kuvhura o rese Bibeli tunda sirongwa zende sikwawo ndi omu ya likwama yihorokwa. Heteka kuruganesa zimwe zononkedi odo.

Bibeli kapisi buke tupu. Amo kwa kara mo mavyukiso gokutunda koMusiti gwetu. (2 Timoteusa 3:16) Mbudi zamo kuvhura kutukundama unene. Bibeli kutanta asi: “Nonkango daKarunga kwa kara nomwenyo nononkondo.” (Vahebeli 4:12) Azo kwa kara nononkondo dokuwapukurura eparu lyetu mononkedi mbali, azo kutupa mavyukiso ntani kutuvatera tu dive Karunga nomatumbwidiro gendi.—1 Timoteusa 4:8; Jakopo 4:8.

Kuwapukurura eparu lyoge. Bibeli kuvhura kukuvatera komaudigu goge. Azo kugava mavyukiso kuhamena eyi yina kukwama ko.

• Elikwatakano nava wopeke. —Vaefeso 4:31, 32; 5:22, 25, 28, 33.

• Ukanguki woparutu nou wopamalizuvho. —Episarome 37:8; Yisewe 17:22.

• Nkareso.—1 Vakolinte 6:9, 10.

• Yikweparu.—Yisewe 10:4; 28:19; Vaefeso 4:28.a

Valikwali wovadinkantu womoAsia kwa likida rupandu komavyukiso gomoBibeli. Ngwendi valikwali wovanzi, awo kwa kondja mokuwapukurura yikara yawo ntani nokukara nemanguruko lyokuuyunga kumwe. Awo kwa tulire pasirugana eyi ngava resa moBibeli. Yitundwamo? Mugara Vicent, kwa tanta asi: “Eyi ngani resa moBibeli kwa vatera nge ni kohonone po maudigu mononkwara detu monkedi zongwa. Kusikisa mo eyi atu resa moBibeli kwa tu retera ruhafo meparu.” Mukadendi Annalou, kwa gweda ko asi: “Kuresa yihonena yomoBibeli kwa tu vatera. Ame ngesi nina hafa mononkwara ntani tuna kara noyitambo meparu.”

Kudiva Karunga. Vicent kwa tanta hena asi: “Morwa kuresa Bibeli, ame ngesi nina kara nelikwatakano lyenene naJehova kupitakana pwanare.” Age kwa tumbura tupu ruha romulyo omu Bibeli nazi vhura kukuvatera o dive Karunga. Mokurugana ngoso, ove ngo gwanena mo uwa ntani ngo diva Karunga ngakaume koge. Ntani ngo diva asi age ga horora mauzera kuhamena meho zongwa, apa ngo ka hafera “mwenyo gwanarunye.” (1 Timoteusa 6:19) Bibeli zelike za tumbwidira meho zangoso.

Nsene o litulira po siruwo sokuresa Bibeli, ngo gwana mauwa pokuwapukurura eparu lyoge nokudiva Karunga. Ngomu ono kuresa Bibeli, ngo lipura mapuro gomanzi. Nsene yimo, diworoka sihonena serenga lyomoEtiyopiya eli lya parukire nomvhura 2 000 da ka pita. Alyo kwa kere nomapuro kuhamena Bibeli. Apa va li pulire asi lina kwata egano eyi lya resere, kwa limbwilire asi: “Omu nani yi zuvha ngapi pwa hana ogu na vyukisa nge?”b Alyo kwa tambwire evatero lyaFilipusa, murongwa gwaJesus, ogu ga divire kufaturura nawa Matjangwa. (Yirugana 8:30, 31, 34) Mokulifana, nsene ono hara kudiva ko yoyinzi kuhamena Bibeli, tura mo ehundiro koIntaneta www.pr2711.com ndi tjangera koaderesi ezi zina kara mosifo esi. Kuvhura ngo gwane Nombangi daJehova edi da kara pepi ndi o ze koSinyanga soUhompa somomukunda gweni. Tameka kuresa Bibeli ngesi nokuzipulisira zi ku pitisire meparu.