Diva omu no vhura kulimburura

MAPURO gamwe kwa fana ngwendi emugogwa lina kupupa momema. Emugogwa kuvhura kumoneka enunu nye konhi zalyo emunene. Epuro kuvhura li moneke ngwendi ureru, nye nampo kwa kara nositambo sosinene.

Nampili ogu ana kupura epuro kuna hara elimbururo, kudiva koge omu no vhura kulimburura kuvhura mu kwatere kukwata egano asi yokusika kupi no vhura kuuyunga ntani nomu no vhura kuyiuyunga. (Joh. 16:12) Moyihorokwa yimwe, ngomu ga yi likidire Jesus kovapositoli vendi, muntu kuvhura a pure nombudi edi da dira kumutumbukira ndi edi nadi dira kumuvatera.—Yirug. 1:6, 7.

Matjangwa kutupukurura asi: “Nonkango deni adi kare nkenye apa donongwa donontovara domungwa, asi mu dive kulimburura nkenye ogu ana kumupura.” (Koros. 4:6) Yipo nye, komeho tu limburure, twa hepa kugazadara ko eyi natu ka uyunga nomu natu ka yi uyunga.

Kwata egano mutaro gogu ana pura epuro

Vasadukayi kwa hetekere kukwata Jesus mombuuyungiso pokumupura kuhamena evhumbuko lyomukadi ogu va kwere vagara yikando yongandi. Nye, Jesus ga yi divire asi awo kapi va pulire mevhumbuko. Melimbururo lyendi, age kwa va limbwilire monkedi zokuhorora mutaro gwawo gepuko kuliza neyi lya kwaterere mo epuro lyawo. Pokuzogera nawo nonondunge nokuruganesa nawa sihorokwa somoMatjangwa, Jesus kwa tumbwire sininke esi va dilire kugazadara ko, umbangi wokuzera asi Karunga nga ka vhumbura vafe. Elimbururo lyendi lya tetukisire varwanesi vendi makura tava tjira kumupura hena.—Ruk. 20:27-40.

Mokudiva omu no vhura kulimburura, nove wa hepa kukwata egano mutaro noyinka yowo vana kukupura. Pasihonena, mukweni gomonkondwarongero ndi murugani mukweni kuvhura a ku pure eyi o dilire kudana Krismesa. Morwasinke ana ku pulira? Age sili kuna hara kudiva konda, ndi age kugazara nsene asi nove va ku pulisira mokulihafesa nyamoge? Mokuyidiva, kuvhura omu pure konda zeyi ana pulire olyo epuro. Makura mu limburura mokuliza nelimbururo lyendi. Kuvhura hena kuruganesa ezi mpito mokumulikida omu kukwama mavyukiso gomoBibeli ayi tu popere komapwizumuko aga aga nyegenyesa nokuretera vantu udigu.

Tu tante asi vana ku zigida mokukauyunga kuhamena Nombangi daJehova komeho zombunga zovarongwa. Konyima zokuuyunga, kuvhura va ku pure mapuro. Nsene mapuro kuna kumoneka asi kuna ga pura nositambo sosiwa, nayi wapa mokugava malimbururo goureru gokuvyukilira. Nsene mapuro kuna kulikida elitondororo kuhamena Nombangi, komeho zokugava elimbururo, kuvhura o tumbure eyi vantu va karera nomutaro gwangoso ntani eyi Nombangi daJehova adi pulisilire nompango doBibeli di va pitisire. Ya wapa mokutara mapuro gangoso ngoyilikido yosinka sawo, kapisi ngomaheteko, nampili ngomu nava vhura kugapura monkedi zangoso. Elimbururo lyoge ngali ku pa mpito mokutamununa mutaro govapurakeni woge nokugava mapukururo gouhunga nokufaturura Matjangwa aga aga kwatesa ko epuro lyetu.

Ngapi omu no vhura kulimburura muhona goge ogu ana dili kuhara kukupulisira mokukakara posigongi? Pomuhowo, gazadara ko kuhamena mutaro gwendi. Kuvhura elizambero lyoge lyokurugana novili dokugwederera ko posiruwo nasopeke yi vatere ndi? Nsene o mu fatwilira asi mapukururo aga atu gwana koyigongi kutuvatera mokukara varugani wokuhungika nokuhuguvara, kuvhura yi rete po erunduruko ndi? Nsene o likida asi ove kugazadara komalizuvho gendi, nampo kuvhura ngayi mu ninkise a gazadare ko kweyi yomulyo po meparu lyoge. Nye ngapi nsene a ku pura o rugane yininke yokudira kuhungama? Pokunyoka nelimbururo lyokuzera negano lyomoMatjangwa ngali likida mukaro goge. Nye kuvhura yi rete uwa wounene nsene o hova kuteda nendi nokumutantera asi muntu ogu ana hara kukumbagera ndi kumuvakera yuma kuvhura hena nga mu kumbagere ndi nga vake yuma yendi.

Ndi nampo ove o murongwa ogu wa dira kuhara kulihameka moyininke yoposure eyi ya dira kuliza noMatjangwa. Diworoka asi murongi nampo kapi ga kara nomutaro ngwendi goge, ntani aso situmbukira sendi sokutulisa po episuro monkondwarongero. Maudigu aga no ligwanekera nago kuna kara asi (1) kulikida efumadeko komalizuvho gendi, (2) kufaturura epuliro lyoge monkedi zefumadeko, ntani (3) mokukwaterera kweyi wa diva asi ngayi hafesa Jehova. Mokureta yitundwamo yoyiwa, yinzi ya hepa po kupitakana tupu kugava elimbururo lyokuvyukilira kuhamena eyi wa pura. (Yis. 15:28) Nsene o munona, otate ndi onane woge ngava ku vatera mokuliwapaikira eyi no ka uyunga.

Poyiruwo yimwe, kuvhura o hepe kupatanesa marundiro aga ana ku rundire gumwe gemepangero. Muporosi ndi foromani ndi mupanguli kuvhura a ku pure o limburure mapuro kuhamena kulimburukwa koveta zongandi ndi upilimbinga woge ngoMukriste ndi nkareso zoge zokudira kulihameka mo moyilika yosirongo. Ngapi omu no hepa kulimburura? Bibeli kupukurura asi: “Omu yi rugane nombili nefumadeko.” (1 Pet. 3:15, 16) Lipura hena nyamoge eyi vana karere nosinka koyuma eyi, makura likida efumadeko kosinka sawo melimbururo lyoge. Makura yinke nayi kwama ko? Mupositoli Paurusa kwa uyungire kuhamena veta zoVaroma, nove kuvhura o tumbure kuhamena veta zosirongo ezi azi rugana mosihorokwa soge. (Yirug. 22:25-29) Nampo kugava mauzera kuhamena Vakriste wokuhova ntani Nombangi daJehova mouzuni mudima kuvhura yi rundurure mutaro gomuntu ogo. Ndi kuvhura o tumbure ko omu kudimburura upangeli waKarunga ayi korangeda vantu va limburukwe konoveta dovantu. (Rom. 13:1-14) Konyima zokutumbura yininke oyo, nampo kuvhura o tumbure nokonda doge domoMatjangwa.

Mutaro gogu ana pura epuro koMatjangwa

Pokutokora omu no limburura, kuvhura hena o gazadare komutaro gogu ana pura epuro koMatjangwa gokupongoka. Yiyo ga rugene Jesus apa ga limbwilire epuro lyoVasadukayi kuhamena evhumbuko. Pokunongonona asi awo kwa tambwire ko tupu matjangwa gaMosesa, Jesus kwa uyungire nawo kuliza nonobuke daMosesa pokutanta asi: “Yokuhamena evhumbuko lyovafe, Mosesa ga yi horora.” (Ruk. 20:37) Nove kuvhura yi ku wapere pokutemwinina momaruha goBibeli aga va tambura ntani nokudiva vapurakeni woge.

Ngapi nye nsene asi vapurakeni woge kapi ava tara Bibeli asi mulyo? Didilika omu ga uyungire mupositoli Paurusa posigongi soAreyopagi, ngomu va yi tjanga moYirugana 17:22-31. Age kwa ligaverere nawo mausili gomoMatjangwa ga hana kutemwinina kuvyukilira kutundilira moBibeli. Nsene hepero, nove kuvhura kurugana yokulifana. Moyirongo yimwe kuvhura o hove kuzogera nomuntu yikando yoyinzi komeho zokutemwinina matjangwa gomoBibeli. Nsene to ruganesa Bibeli, nayi ka wapa pomuhowo mokugava konda zeyi ya karera nomulyo kuziruganesa mevango lyokuvyukilira tupu kutanta asi ado Nonkango daKarunga. Nampili ngoso, sitambo soge sa hepa kukara sokugavera umbangi kuhamena sitambo saKarunga, ntani ngomu sina kupita siruwo, mu korangeda a litarere ko mwene kuhamena eyi azi uyunga Bibeli. Bibeli kutumangeda unene kupitakana nkenye eyi natu vhura kuuyunga nyamwetu.—Heb. 4:12.

“Nonkango deni adi kare nkenye apa donongwa”

Ee, omu tupu ya wapa kovakareli vaJehova, Karunga gombili, mokuninka nonkango dawo di “kare nkenye apa donongwa donontovara domungwa”! (Koros. 4:6; Ex. 34:6) Eyi kutanta asi twa hepa kuuyunga nombili, nampili yi moneke ngwendi kapi yina fire kuyirugana. Mbuuyungiso zetu za hepa kukara zongwa, kapisi zonyanya ndi zondona.

Vantu wovanzi kuna kara momakondjeso gomanene, ntani nkenye ezuva awo kugwanekera nomaswauro. Nsene tu zuvhisira vantu vangoso, kuvhura va tu uyungire nonyanya. Ngapi omu natu limburura? Bibeli kuuyunga asi: “Elimbururo lyombili, kumweneka ehandu.” Elimbururo lyangoso kuvhura hena kugoromona ogu ana kara nomutaro gokurwanesa. (Yis. 15:1; 25:15) Kovantu ava ava ligwanekere nomaswauro nkenye ezuva, nsene tu va uyungisa nezwi nonkareso zongwa kuvhura yi va ninkise va purakene kombudi zetu zongwa.

Kapisi hepero tu litatane novantu ava ava dili kulikida efumadeko kousili. Nye sitambo setu kuna kara mokuteda moMatjangwa kumwe novantu ava nava tu pulisira mokurugana ngoso. Mwankenye ukaro, ose kudiworoka asi twa hepa kulimburura nonkareso zongwa zombili ntani nomukumo asi matumbwidiro gaKarunga kuna kara usili.—1 Tes. 1:5.

Matokoro ntani nezwi lyendi lyokomutjima

Nsene murongwa goBibeli ndi mupuli mukweni a ku pura asi yisinke na vhura kurugana moukaro wongandi, ngapi omu no vhura kulimburura? Kuvhura o dive eyi ngano no rugana pwanyamoge. Nye nkenye ogu ga hepa kusimba mudigo gwamwene meparu lyendi. (Gar. 6:5) Mupositoli Paurusa kwa fatwilire asi age kwa korangedere vantu ava nga zuvhisire mokulimburukwa morwa epuro lyawo. (Rom. 16:26.) Oso kuna kara sihonena sosiwa kwetu mokukwama. Muntu ogu a tulisa po matokoro mokuhafesa murongi gwendi ndi vantu, kuna kukarera vantu, kapi ana kulikida ulimburukwi wokutundilira mepuro. (Gar. 1:10) Yipo nye, elimbururo lyoureru lyokuvyukilira kapi tali mu vatere momunene.

Ngapi nye omu no vhura kulimburura monkedi zokuliza nomavyukiso gomoBibeli? Kuvhura o mu likide nompango doBibeli dokuwapera noyihonena eyi ya kara moBibeli. Pamwe, kuvhura o mu likide omu na rugana epaparo yipo a gwane odo nompango noyihonena pwamwene. Kuvhura o zogere nompango odo ntani mulyo goyihonena oyo, nye wa hana kumutokwera po eyi na hepa kurugana. Mu pura nsene kuvhura a nongonone yuma eyi nayi vhura kumuvatera a ture po etokoro lyewa. Mu korangeda a konakone nompango noyihonena eyi, yipo a dimburure asi etokoro musinke nali hafesa Jehova. Pokurugana ngoso ove kuna kumuvatera ‘mokudiva kuhangura uwa koudona.’—Heb. 5:14.

Kulimburura komapongo gomombungakriste

Mapongo gomombungakriste kutupa mpito mokutongonona epuro lyetu. Nkedi zimwe omu atu yi rugana kuna kara pokulimburura komapongo gomombungakriste. Ngapi omu natu limburura? Neharo lyokuhamberera ndi kutangauka Jehova. Oyo yiyo ga rugene Muepisarome Ndafita apa ga kere ‘mokatji kovantu.’ (Epis. 26:12) Nose twa hepa kugava malimbururo monkedi omu naga vhura kukorangeda vapuli vakwetetu, ga va koreke “mokulihara-hara nomokurugana yirugana yoyiwa,” ngomu ga korangedere mupositoli Paurusa. (Heb. 10:23-25) Kuliwapaikira komeho zosiruwo kutuvatera yi tu tompoke.

Nsene to gava elimbururo, lya hepa kukara lyoureru lyokuzera ntani lyesupi. Wa ha gava malimbururo nagenye gomoparagarafu; gava limwe tupu. Nsene o gava egano limwe tupu, ayo ngayi pa wopeke mpito mokugava malimbururo gokugwederera ko. Ayo ya kara nomulyo unene mokutumbura matjangwa aga va tura mo mosirongwa. Pokuyirugana ngoso, kondjera mokudemenena kononkango domovelise edi dina kukwatesa ko egano eli vana kuzogera. Lironga kugava malimbururo mononkango danyamoge mevango lyokuresa monoparagarafu. Ya ha ku dompesa nsene elimbururo lyoge kapi lina pwaga nawa ngomu ono yi harere. Oyo kuhorokera nkenye ogu a gava malimbururo.

Ayo yina zere asi kudiva omu twa hepa kulimburura kwa kwatera mo yoyinzi kupitakana tupu kudiva elimbururo. Ayo kwa hepa nondunge. Ee, omu tupu ayi hafesa pokugava elimbururo lyokutundilira komutjima ntani eli nali guma nomutjima dava wopeke!—Yis. 15:23.