Ehageso lyewa

NAMPO ko rugene epaparo ntani nokuwapaika mauzera gosiuyungwa soge. Ntani hena nampo ko liwapaikilire etwaromo lyewa. Nampili ngoso, posili sininke simwe sina hepa po, kuna kara ehageso lyewa. Wa ha sesupika mulyo gwalyo. Eyi o uyunga pehageso kuyidiworoka unene. Nsene ehageso li dira mulyo, nampili sirongwa esi ko tumbura muhowo kuvhura kuzumbanesa mulyo gwaso.

Tara eyi yina kukwama ko: Kehagero lyeparu lyendi, Josuwa kwa geve siuyungwa sokudira kudivara usimbu komasimbi gomuhoko gwaIsraeli. Konyima zokutumbagura omu Jehova ga va pakerere mbili kutundilira mosiruwo soAbirahamu, Josuwa kapi tupu ga rugurukire mauzera momusupi. Nye, nomalizuvho gononkondo age kwa tumangedere vantu asi: “Ano omu tjire nye Hompa, tomu mu ruganene mouhungami nomousili.” Resa ehageso lyosiuyungwa saJosuwa, ngomu va li tjanga mwaJosuwa 24:14,15.

Siuyungwa simwe somulyo kwa si geve mupositoli Peterusa kombunga ezi za kere moJerusarema pezuva lyoPentekoste 33 S.N., kusigwana moYirugana 2:14-36. Pomuhowo age kwa fatwilire asi awo kwa mwene esikiliromo lyouporofete waJowera kuhamena epowomweno lyompepo zaKarunga. Konyima, ga likidire omu eyi ya lizire nomauporofete goUmesiyasa va tjanga moMapisarome aga ga pumba kuhamena evhumbuko lyaJesus Kristusa ntani nomu nga ka hingira korulyo rwaKarunga. Makura, mehageso lyendi, Peturusa kwa zeresere eyi ya tembe nkenye ogu gomovapurakeni vendi. Age kwa uyungire asi: “Ano muhoko gwaIsraeli mudima gu dive sili asi, Jesus ogu mwa pamparere kosilivindakano, yige googu ga paka Karunga, a kare Hompa age Kristusa!” Ava va kere po tava pura asi: “Ngapi omu natu rugana, vakwetu?” Peturusa ta limburura asi: “Litezurureni namuvenye, mu likuhwire medina lyaJesus Kristusa.” (Yirug. 2:37, 38) Ezuva olyo vantu wokusika po-3 000 kwa va tumangedere eyi va zuvhire, makura tava tambura usili kuhamena Jesus Kristusa.

Yitwa eyi no tura momagano. Eyi no tumbura mehageso lyoge ya hepa kuliza nosiparatjangwa sosiuyungwa soge. Ayo ya hepa kuliza nomagano gomulyo aga ono tungu po monkedi zokuwapera. Kuvhura o tumbure nonkango dimwe domosiparatjangwa soge, ndi kuvhura o si tumbure kuvyukilira.

Sitambo soge sokuuyunga kuna kara sokukorangeda wopeke mokurugana ko yuma komapukururo aga ono kugava. Sitambo simwe somulyo sehageso kuna kara mokuvalikida eyi nava rugana. Apa ono horowora siparatjangwa ntani nomagano goge gomulyo, ono tarurura nawa eyi mapukururo goge gana kerere nomulyo kovapurakeni woge ntani nositambo soge pokugava siuyungwa soge ndi? Nsene yimo ngoso, ono diva eyi ono va harere va rugane. Ngesi wa hepa kufaturura eyi nava rugana ntani nampo nomu nava yi rugana.

Mokugwederera ko kokulikida vapurakeni woge eyi nava rugana, ehageso lyoge lya hepa kuvatumangeda. Lya hepa kukara nonokonda donongwa deyi nava yi ruganena ntani nampo nomauwa aga nava gwanena mo. Nsene ntanto zokuhulilira kuna zi wapaike nawa, ngayi nkondopeka mulyo gosiuyungwa soge nasinye.

Diworoka asi siuyungwa kuna kuhaga. Eyi ono kuuyunga ya hepa kuyilikida. Uyunga kuliwora. Wa ha uyunga kugenderera makura hararasi o hageke. Nye wa ha goromona ezwi lyoge. Uyunga nononkondo nye kapisi o ziguruke unene. Nonkango doge dokuhulilira da hepa kulikida asi kuna kuhagesa. Wa hepa kudiuyunga nelituromo ntani nomukumo. Apa no liwapaikira omu no ka gava siuyungwa, liyomberesa ehageso lyoge.

Ure wokusika kupi lya hepa kukara ehageso? Kapi pwa kara siruwo esi no vhura kutokwera ehageso. Nye ehageso kapisi li kare lyere. Ure wehageso lyosiuyungwa kwa korera omu nali kundama vapurakeni. Ya wapa kuruganesa ehageso lyokutumangeda lyokuvyukilira ntani lyoureru. Ehageso lyere eli lina kara nosifanekeso sosisupi nalyo hena kuvhura kuwapera nsene kuna li wapaike nawa. Hetakanesa ehageso lyesupi lyobuke nazinye zaMuudisi, va tjanga mwaMuudisi 12:13,14, kumwe nehageso lyEudiso lyopoNdundu lyesupi, eli va tjanga mwaMateusa 7:24-27.

Moyirugana yokuzuvhisa. Unene po ose kuruganesa ehageso moyirugana yokuzuvhisa. Kuvhura ngo sikise mo yoyinzi nsene ngo liwapaikira nawa ntani nokulikida elituromo mo movantu. Mapukururo gana kara pomapenuno gana howo kuvhura kugaruganesa nawa nampili nsene kuna kuzogera nomuntu.

Nzogera kuvhura zi kare zonsupi. Muntu kuvhura a kare mombinzu-mbinzu. Edinguro lyoge nalinye kuvhura li guse minute gumwe tupu. Nsene nayi wapera, kuvhura o uyunge ngwendi ngesi: “Nina yi diva asi mombinzu-mbinzu muna kara. Nye nina hara kumusigira ko ekorangedo limwe. Bibeli kwa likida asi Musiti gwetu ga kara nositambo sosiwa, mokukaninka evhu eli li ka kare evango omu vantu nava vhura kuhafera eparu narunye. Ose kuvhura tu ka kare moParadisa zina, nye twa hepa kulironga eyi ana hepa ko Karunga kwetu.” Ndi kuvhura o mu tantere tupu asi ngo ka tengwire ko posiruwo sokuwapera.

Nsene mwenya embo a teta nzogera morwa kuna kulikida nkareso zondona, simpe kuvhura kukutompoka. Diworoka mapukururo ga kara mwaMateusa 10:12, 13 ntani Varoma 12:17, 18. Elimbururo lyoge lyombili kuvhura li rundurure mutaro gwendi koNombangi daJehova. Olyo ngali kara etompoko lyenene.

Ndi nampo kuna kara nonzogera zongwa namwenya embo. Ya wapa kurugurura egano lyomulyo eli ono mu harere a diworoke. Mu hamene ekorangedo yipo a rugane ko yuma.

Nsene no mona ko mpito mokuyazogera nendi siruwo sokukwama ko, mu sigira epuro lyongandi yipo nga kare nendindiro. Mu pura epuro, nampo eli va zogera mobuke zoReasoning From the Scriptures ndi simbapiratjangwa esi va wapaikira mokuruganesa malirongo goBibeli. Tura megano sitambo soge, esi ga tu pere Jesus eyi va tjanga mwaMateusa 28:19, 20.

Ove kuna kuhagesa elirongo lyoBibeli ndi? Kurugurura siparatjangwa ngayi vatera murongwa mokudiworoka eyi muna zogere. Kuruganesa mapuro gerugururomo ngayi vatera murongwa a diworoke magano gomulyo, unene po nsene erugururomo kuna kulirugana kuliwora. Kupura murongwa kuhamena omu na gwanena mo uwa mweyi muna lirongo ndi omu na yi ligavera nava wopeke ngayi mu vatera a gazare omu na ruganesa eyi ana lirongo.—Yis. 4:7.

Diworoka asi ehageso lyoge kukundama etompoko lyonzogera zoge nazinye.