SIRONGWA 14

Zeresa nawa magano gomulyo

Vahebeli 8:1

EYI NO RUGANA: Vatera vantu ava ono kuronga va kwame nawa siuyungwa soge, ntani zeresa omu nkenye egano lyomulyo lina li zi nositambo soge ntani nosiparatjangwa.

OMU NO YI RUGANA:

Kara nositambo. Diva nsene asi siuyungwa soge sokugava tupu mauzera ndi sokuninkisa vantu va yi pure ndi sokutumangeda, si gava kuliza noyitambo oyo. Divilisa asi magano nagenye gomulyo ga ku vatere o sikise mo sitambo soge.

Lipura nyamoge asi: ‘Yisinke nayi ka digopera vantu ntani mapuro musinke nava ka lipura kosirongwa esi? Ntani apa nava ka gwana elimbururo epuro musinke hena nava ka lipura?’ Makura wapaika nye yitwa yoge kuliza nomapuro ogo yipo vantu va ka kwame nawa nokuyikwata egano ntani nokutambura mbudi zoge.
Nkondopeka siparatjangwa sosiuyungwa. Ngomu ono kugava siuyungwa soge, nkondopeka siparatjangwa pokuruguruka nonkango domosiparatjangwa ndi pokuruganesa malifanonkango.
Zeresa nawa nokurerupika magano gomulyo. Horowora tupu magano gomulyo aga gana kwatesa ko siparatjangwa ntani aga no vhura kuronga mosiruwo esi vana ku pe. Sesupika magano gomulyo, tumbura nawa nkenye egano lyomulyo ntani pwizumuka komeho zokurundurukira kekwawo ntani yi likida asi kuna kurundurukira kegano limwe.

Kuvhura o tumbure magano gomulyo metwaromo yipo vantu va kwame nawa siuyungwa soge ndi o ka ga tumbure hena kouhura wosiuyungwa yipo o vatere vantu va ka ga diworoke.