Magwedereroko

Mbudi kovareti woVakriste:

Ngomureti, ove ono hara kuvatera munoge a hare Jehova ntani nokuligava kwendi. Yisinke no rugana mokumuwapaikira ekuho? Siruwoke na wapera ntambo ezi zomulyo?

Jesus kwa pangerere vasikuli vendi asi: “Yipo nye nomu zira konomuhoko nadinye, mu ka di ninke di kare varongwa vange.” (Mat. 28:19) Mokuliza nononkango odo, mokuninka asi muntu a wapere ekuho kapi ya gwanena po tupu kukwata egano marongo gaKristusa nye ga hepa hena kukwama nawa-nawa sihonena saJesus. Vanona nawo kuvhura kurugana yininke eyi.

Tulira po vana woge sihonena sosiwa, ntani va ronga nompangera daJehova. (Deut. 6:6-9) Eyi kwa kwatera mo kuruganesa buke Hafera eparu narunye! mokuronga vana woge usili womoBibeli nokuvavatera va tede ko konompango doBibeli nokuparuka kuliza nado. Vatera vana woge va faturure epuliro lyawo mononkango davene. (1 Pet. 3:15) Ediwo nekorangedo eli ava gwana koge nemelirongo lyavene nomoukareli wepata, nomombungakriste ntani kovakaume wovawa, ngayi va vatera va ture po ezokomeho yipo va wapere kugwana ekuho. Va vatera va gazadare ko nkenye apa omu nava vhura kuhedera Jehova pepi.

Yisewe 20:11 kwa tanta asi: “Nomunona kulihorora moyirugana yendi, mwayo kuvhura kumona asi muhungami ndi muwa.” Yirugana musinke yimwe eyi nayi likida nsene asi munona ana wapere kukara murongwa gwaJesus Kristusa ntani nokugwana ekuho?

Munona ogu ana hara kugwana ekuho ga hepa kukara munona ogu a limburukwa vakondi vendi. (Yirug 5:29; Koros. 3:20) Jesus apa ga kere nonomvhura 12, Bibeli kwa tanta asi: ‘Age nga zuvhu ndi nga limburukwa vakondi vendi.’ (Ruk. 2:51) Kapi to vhuru kundindira munoge a sikilire mo. Nye munona ogu ana hara kugwana ekuho ga hepa kukwama sihonena saJesus ntani yi lihorore kwanavenye asi age kulimburukwa vakondi vendi.

Age hena ga hepa kukara ogu ga hara kulironga Bibeli. (Ruk. 2:46) Munoge ga hara kuza komapongo nokukagava malimbururo ndi? (Epis. 122:1) Age ga hara kuresa Bibeli nkenye ezuva nokurugana elirongo lyamwene ndi?—Mat. 4:4.

Munona ogu ana hara kugwana ekuho kukondja mokutura muhowo Uhompa. (Mat. 6:33) Age kudimburura situmbukira sendi mokutantera ko wopeke eyi ga pura. Age kulihameka mononkedi dokulisiga-siga dokuzuvhisa ntani kapi ali fu nomuga kulidivisa kovanasure vakwawo nokovamitili asi age Mbangi zaJehova. Age kusikisa mo maruha aga ava mu pe gemepongo Eparu lyetu noyirugana yokuzuvhisa.

Age hena kunyokera po ruhonda ntani novakaume wovadona. (Yis. 13:20; 1 Kol. 15:33) Eyi kuyimonenena konomusika nokonomuvi nokomalikwamo gokotivi nomaudano gonovidiyo aga ga hara ntani nomu a ruganesa Intaneta.

Vanona wovanzi kwa tambura erongo lyovakondi vawo nokutambura usili pwavene nokuwapera ekuho. Jehova ngano a mu tungike ngomu muna kuvatera vana veni va sike kontambo ezi melikwatakano lyawo naJehova.

Mbudi komuzuvhisi gokudira kugwana ekuho:

Aso situmbukira sosiwa mokuruganena kumwe nombungakriste ngomuzuvhisi gokudira kugwana ekuho. Ayo tava yi ku pandadekere kezokomeho eli wa tura po mokukarera Jehova. Wa ya diva Karunga mokulironga Nonkango dendi ntani wa likida epuro momatumbwidiro gendi.—Joh. 17:3; Heb. 11:6.

Kuvhura yi kare asi komeho zapa wa tamekere kulironga noNombangi daJehova, walye wa hamenene komaukarelikarunga gokulisiga-siga ndi kapi wa hamenene ko. Ndi nampo ngo rugana yininke yimwe eyi ya dira kuliza nonompango doBibeli. Nye ngesi wa likida epuro lyoge pokulitezurura, kutanta asi kulivera komapuko goge ganare. Ntani hena wa nyokera po mparukiso zanare zondona nokutokomena kurugana yoyiwa kosipara saKarunga.—Yirug. 3:19.

Nampo nove “hawa tunda unona woge, matjangwa gokupongoka wa ga diva.” Ayo ya ku gamena mokudira kulihameka mo monkareso zokunyata ntani nomononzo dononene. (2 Tim. 3:15) Wa lironga kunyokera po mazedo govakaume ntani nayimwe yokukuninkisa o rugane yininke yoyidona kosipara saJehova. Wa likida epuro pokukara ono kwaterere koukareli wousili ntani nokutantera ko wopeke eyi wa pura. Ntani va kudeura moyirugana yokuzuvhisa. Ngesi wa tura po etokoro lyanyamoge mokukarera Jehova ngomuzuvhisi gokudira kugwana ekuho.

Yi kare asi kwa ku ronga nompango daJehova kutundilira unona ndi kwa ya diva Jehova konyima, kuvhura ngesi o gazadare nontambo mbali mezokomeho lyoge lyopampepo, eligawo ntani ekuho. Ove kuligava kwaJehova pokumuhedera mekanderero ntani nokumutantera etokoro lyoge lyokumukarera gelike dogoro narunye. (Mat. 16:24) Mokulikida eligawo lyoge, ove kugwana ekuho pokukudivida momema. (Mat. 28:19, 20) Kupitira meligawo nekuho, ove kuyakara mukareli gokuwapera gwaJehova Karunga. Ee, mfumwa musi kouwa!

Ngomu wa lironga Bibeli, ove nampo wa ligwanekera nomaudigu gokulisiga-siga. Diworoka asi Jesus tupu va mene kumukuhwa, “kwa mu twere mpepo zaKarunga mosirongo somburundu a ka mu heteke Muzonaguli.” (Mat. 4:1) Konyima zekuho lyoge ngomurongwa gwaKristusa, kuvhura o ndindire maheteko. (Joh. 15:20) Ago ngaga wiza momarupe gokulisiga-siga. Kuvhura o ligwanekere nomakwamakwamo gokutunda kwava vemepata. (Mat. 10:36) Kuvhura va ku swaure vanasure vakweni ndi varugani vakweni ndi vakaume woge vanare. Nye nkenye apa diworoka nonkango daJesus domwaMarukusa 10:29, 30 asi: “Yosili nina kumutantera, kutupu muntu ogu a sigi embo lyendi ndi vana vazina ndi ozina noguhwe ndi mukadendi ndi vana vendi nomapya gendi mokonda zange noMbudi zoNgwa, a dire kumurugwida kuwoko rwefere moruveze oru rwantaantani, mambo novanavazina novana nomapya. Nampili tava mu hepeke simpe, nye mouzuni wokomeho nga gwana mwenyo gwanarunye.” Litura mo unene mokukara pepi naJehova ntani paruka kuliza nonompango dendi.

Nsene ono hara kugwana ekuho, divisa muwapaiki gombunga zovakuronambunga. Mapuro aga gana kukwama ko yigo ngava ruganesa vakuronambunga mokuzogera nove yipo va tokore nsene ono wapere ekuho. Kuvhura o tameke kukonakona mapuro aga pwanyovelike ngoruha rwelirongo lyoge lyankenye apa.

Mokuliwapaikira nonzogera edi, litulira po siruwo sokuresa nokukonakona Matjangwa aga va temwinina. Kuvhura o ture madidiliko ganyamoge mobuke ezi ndi posipepa sokulikerera. Pokuzogera novakuronambunga kuvhura o penune buke zoge nokutara pomadidiliko goge. Nsene kapi ono kukwata egano mapuro ogo, pura evatero kogu a lirongo nove Bibeli ndi vakuronambunga.

Apa no zogera novakuronambunga, kapisi hepero o gave malimbururo gomare ndi gomadigu. Ayo ya wapa kugava elimbururo lyoureru mononkango danyamoge. Komapuro gomanzi, ya wapa kutumbura etjangwa limwe ndi gavali aga gana kukwatesa ko elimbururo lyoge.

Nsene simpe kapi wa gwana ediwo lyokugwanena po lyomoBibeli, vakuronambunga ngava tura po ewapaiko yipo o gwane evatero ngo vhure kulimburura mononkango danyamoge omu wa kwata egano Matjangwa, makura o wapere ekuho sikando sokukwama ko.

[Epukururo kovakuronambunga: Mavyukiso kuhamena nzogera zekuho kugagwana pepenuno 208-212.]