Omu mbungakriste ava zi gendesa nokuziwapaika

MOMBILIVE zendi zokuhova koVakolinte, mupositoli Paurusa kwa tumbwire usili wokuhamena Karunga. Age kwa tjenge asi: “Yeeyi Karunga kapi ga hara epiagano, mbili ga hara.” Kombinga zomapongo, age kwa tente asi: “Nayinye omu yi rugane monkedi zongwa zokuliza.”—1 Kol. 14:33, 40.

² Ketamekero lyombilive ozo, mupositoli Paurusa kwa geve mapukururo kuhamena nomutangu edi da kere mombungakriste zaKolinte. Age kwa korangedere vapuli vakwawo womoKolinte asi va ‘lize mutjima gumwe mwanayinye eyi ava uyunga’ ntani va ‘lipakerere kumwe monondunge nomomagazaro.’ (1 Kol. 1:10, 11) Yipo hena ga geve mapukururo kuhamena yininke eyi ayi kundama uumwe womombungakriste. Pokuruganesa sihonena somaruha gorutu, age kwa likidire mulyo gokukara mouumwe nokuruganena kumwe. Age kwa korangedere navenye womombungakriste, va litekure-tekure monkedi zeharo. (1 Kol. 12:12-26) Eruganeno kumwe lyava womombungakriste kulikida asi pwa kara ngendeseso.

³ Ngapi mbungakriste ngava zi gendesa? Yilye nga zi gendesa? Ngapi ava horowora ava ava pitisire? Wolye ngava zi pitisira? Pokupulisira Bibeli zi tu vyukise, ose ngatu gwana malimbururo komapuro ogo.—1 Kol. 4:6.

NGENDESESO ZAKARUNGA

⁴ Mbungakriste kwa zi tulisire po poPentekoste momvhura 33. Yisinke natu lirongera ko kombungakriste zomosiruwo sovapositoli? Azo kwa zi tulisire po Karunga ntani kwa zi gendesere monkedi zongwa zokuliza. Sihorokwa esi sa horokere moJerusarema konyara nomvhura 2 000 da ka pita, ayo kulikida asi mbunga zovagwavekwa kwa zi tulisire po Karunga. (Yirug. 2:1-47) Azo kwa kara etungo ndi muhoko gwendi. (1 Kol. 3:9; Efe. 2:19) Nkedi ezi ngava gendesa mbungakriste nokuziwapaika mosiruwo sovapositoli yizo simpe vana kukwama momazuva getu.

⁵ Mbungakriste zokuhova kwa tamekere novarongwa 120. Awo yiwo wokuhova va powomwene mpepo zokupongoka mokusikisa mo uporofete waJowera 2:28, 29. (Yirug. 2:16-18) Nye mezuva lyoolyo, vantu 3 000 kwa gwene ekuho ntani kwa ya lipakerere nombunga ozo zovagwavekwa. Awo kwa tambwire nonkango kuhamena Kristusa makura “tava ligava mo merongo lyovapositoli.” Konyima zoyo, Jehova nga “gwederere ko nkenye ezuva vayoworoki kombunga zawo.”—Yirug. 2:41, 42, 47.

⁶ Apa mbungakriste zomoJerusarema za ligwedererere, kwa ninkisire mupristeli gomunene a sivane asi erongo lyovarongwa lina lihanene Jerusarema nazinye. Varongwa wovape womoJerusarema kukwatera mo vapristeli wovanzi nawo kwa ya kere ruha rombungakriste.—Yirug. 5:27, 28; 6:7.

⁷ Jesus kwa tente asi: “Ngomu kare nombangi dange moJerusarema nomoJudeya nazinye nomoSamaliya, dogoro nokooku wa ka twa uzuni.” (Yirug. 1:8) Apa ga tamekere mahepeko moJerusarema konyima zonomfa daSitefanusa, varongwa kwa lihanene moJudeya nomoSamaliya. Nkenye oku va lihanene, awo kwa twikilire kuzuvhisa mbudi zongwa ntani nokutulisa po varongwa wovanzi, vamwe kwa kere Vasamaliya. (Yirug. 8:1-13) Nye konyima, mbudi zongwa kwa ya zi zuvhisilire ava va dilire kurugana yovamba, vantu va hana asi Vajuda. (Yirug. 10:1-48) Sirugana esi sokuzuvhisa kwa tulisire po varongwa wovanzi ntani nonombungakriste donompe ponze zaJerusarema.—Yirug. 11:19-21; 14:21-23.

⁸ Ngendeseso musinke va tulisire po mokudivilisa asi nkenye mbungakriste zompe va zi gendese nokuziwapaika monkedi zaKarunga? Kupitira mepitisiro lyompepo zaKarunga, ewapaiko kwa li tulisire po yipo vapitisili va pakere mbili siunda. Monombungakriste edi ga ka dingwire Paurusa naBaranabasa morugendo rwawo rokuhova routumwa, awo kwa horowere vakuronambunga. (Yirug. 14:23) Mutjangi goBibeli Rukasa kwa uyungire kuhamena Paurusa apa ga kere novakuronambunga womoEfeso. Paurusa kwa va tanterere asi: “Litakameseni nye, one mu takamese mbungakriste, omu za mu tura mpepo zokupongoka asi mu kare vatareli, mu kare vasita wombungakriste zaKarunga, ezi ga ligwanena konomfa daMunwendi thi.” (Yirug. 20:17, 28) Awo kwa waperere kukara vakuronambunga morwa va sikisire mo yihepwa yomoMatjangwa. (1 Tim. 3:1-7) Mukwawo zaPaurusa Titusa kwa mu tanterere a horowore vakuronambunga womonombungakriste domoKereta.—Tit. 1:5.

⁹ Ngomu va tulisire po nombungakriste dononzi, vapositoli novakuronambunga moJerusarema kwa twikilire kurugana ngovapitisili wonombungakriste nadinye domosiruwo sawo. Awo kwa kere mbungagendesi.

¹⁰ Apa mupositoli Paurusa ga tjangerere mbungakriste zomoEfeso, age kwa fatwilire asi pokurugana kuliza nompepo zaKarunga, mbungakriste ngazi kara mouumwe nokulimburukwa komupitisili gwazo Jesus Kristusa. Mupositoli kwa korangedere Vakriste vena va linunupike ntani va kondjere ‘uumwe ou za va pa mpepo’ va kare nombili nanavenye womombungakriste. (Efe. 4:1-6) Age kwa temwinine Episarome 68:18 ntani kwa litambeserere kewapaiko lyaJehova kuhamena vagara ava va tjira Karunga, ngava pakere mbili mbungakriste ngwendi vapositoli novaporofete novavangeliste novasita ntani novarongi. Vagara vangoso, awo mauhwi gokutunda kwaJehova, ava ava korangeda mbungakriste zi kare netjiroKarunga yipo Karunga a zi hafere.—Efe. 4:7-16.

NOMBUNGAKRISTE DANAINA KUKWAMA SIHONENA SOVAPOSITOLI

¹¹ Ngendeseso zokulifana kuna kuzikwama monombungakriste nadinye doNombangi daJehova naina. Nombungakriste nadinye edi, kwa kara mepakero mbili lyoMbungagendesi uzuni mudima. (Sak. 8:23) Jesus Kristusa yige a ninkisa eyi yi horoke. Mokusikisa mo etumbwidiro lyendi, age nga kara novarongwa vendi wovagwavekwa “dogoro nokouhura wouzuni.” Vantu ava va ya ligwederera kombungakriste kwa tambwire mbudi zongwa zaKarunga nokuligava kwendi nomutjima nagunye, ntani nokugwana ekuho ngovarongwa vaJesus. (Mat. 28:19, 20; Mar. 1:14; Yirug. 2:41) Awo kuyadiva “musita gomuwa,” Jesus Kristusa, ngoMupitisili gosiunda, omu za hamena mbunga zovagwavekwa ntani “nononzwi dapeke.” (Joh. 10:14-15, 16; Efe. 1:22, 23) ‘Siunda oso’ kwa kara mouumwe pokulimburukwa upangeli waKristusa kupitira megendeso ‘lyomukareli gokulimburukwa gonondunge,’ ogu ga horowora. Tu twikireni kuhuguvara ngendeseso ozo.—Mat. 24:45.

SIRUGANA SONOMBUNGA DOPAVETA

¹² Mokuninka asi va gave nondya dopampepo posiruwo sado ntani nokuudisa mbudi zongwa zoUhompa komeho uhura u wize, mbunga zaJehova kwa tulisa po nombunga dopaveta dongandi. Nombunga odo kwa di tjangesa paveta kuliza nonoveta doyirongo yokulisiga-siga ntani ado kuruganena kumwe mokugendesa sirugana sokuzuvhisa mbudi zongwa uzuni mudima.

OMU AVA DI GENDESA NOBETELI

¹³ Nkenye apa ava tulisa po Beteli, Mbungagendesi kuhorowora vakuronambunga vatatu ndi wovanzi va kare Komitiye zoBeteli. Vanavazinyetu owo kupakera mbili yirugana yomosirongo oso ndi yomoyirongo oyo ya kara megendeso lyoBeteli ozo. Gumwe gomoKomitiye zoBeteli kurugana ngomuwapaiki goKomitiye ozo.

¹⁴ Nombungakriste da kara megendeso lyankenye Beteli kwa di hangura momaruha. Maruha ogo kwa korera kosivaro sonombungakriste ntani nomaraka aga ava uyunga monombungakriste odo da kara megendeso lyoBeteli ozo. Mwankenye ruha kuhorowera mo mutareli gonombunga a pakere mbili nombungakriste damo. Beteli kugava mavyukiso komutareli gonombungakriste omu na sikisa mo yitumbukira.

¹⁵ Nombungakriste kwa tambura ngendeseso zombunga zaJehova, omu ava gwanene navenye mauwa. Ado kulimburukwa kovakuronambunga ava ava gendesa sirugana soNobeteli nesi somonomukunda ntani monombungakrise. Ado kwa huguvara momukareli gokulimburukwa gonondunge a di pe nondya dopampepo posiruwo sado. Mukareli gokulimburukwa, kulimburukwa upangeli waKristusa nokukwaterera konompango doBibeli ntani nokukwama epitisiro lyompepo zokupongoka. Ngomu natuvenye tuna kuruganena kumwe, ose kulimonena yitundwamo yokulifana ngwendi eyi va limonene Vakriste wokuhova: “Nombungakriste kwa di korekere mepuro, tadi kuru nkenye ezuva.”—Yirug. 16:5.