Wolye vana kudivisa mbudi zongwa?
“. . . . ngava zi divisa mwa za uzuni mudima.”—MATEUSA 24:14.
MBUDI zongwa kuna kuzidivisa Nombangi daJehova uzuni mudima. Awo kuyirugana eyi mononkedi dokulisiga-siga. Nkedi zimwe kuna kara . . .
Kupitira mononkango. Ngwendi Jesus novarongwa vendi, Nombangi daJehova kutwarera vantu mbudi zongwa. (Rukasa 8:1; 10:1) Awo kapi tupu ava ndindire asi vantu va va wizire. Kuzuvhisira vantu kuhamena Uhompa waKarunga kuna kara sirugana esi dina kulihameka Nombangi nadinye dokupitakana pomamiliyona ntambali. Awo kuzuvhisira tunda embo zende embo nomoyitarata nokonoterefona ntani nomononkedi dapeke. Mvhura zina piti, Nombangi kwa rugene novili dokupitakana pebiliyona limwe noharufa moyirugana yokuzuvhisa.
Awo kapi tupu ava rongo vantu kuhamena Uhompa waKarunga nye hena kuhamena ‘nayinye eyi ga rekerere [Jesus].’ (Mateusa 28:20) Awo nkenye apa kurugana malirongo goBibeli pwa hana mfuto gokupitakana mamiliyona ntantatu.
Nombangi daJehova kuna kuzuvhisira uzuni mudima moyirongo yokusika 236. Awo kuzuvhisira moyirongo nomoyitata, yi kare asi yirongo yonomusitu nomomburundu ndi monondundu. Awo kapi ava va futu, kuruganesa yimaliwa nosiruwo savene, morwa kwa hara Karunga novantu. Awo kudivisa hena mbudi zongwa zoUhompa . . .
Kupitira moyimbapiratjangwa. Sifo esi, siparatjangwa saso kuna kara asi Ruhungu kudivisa Uhompa waJehova, ngesi kuna kara momaraka 185 ntani nkenye etjangururo lyaso kuna kulinduruka konyara mamiliyona gokupitakana 42. Sifo Awake! esi naso a si divisa Uhompa, kuna kara momaraka gokusika 83 ntani nkenye etjangururo lyaso kuna kulinduruka konyara mamiliyona gokusika 40.
Nobuke noyifo noyitratate noCD/MP3 nonodividi edi adi faturura marongo goBibeli kuna kara momaraka konyara 540. Nombangi kwa rugana nokugavera yininke oyo yokupitakana pomabiliyona 20 monomvhura murongo da ka pita, ano nkenye muntu kuvhura a gwane ko yininke oyo.
Nombangi daJehova kwa nduruka ndi kwa toroka Bibeli momaraka gokulisiga-siga. Bibeli New World Translation of the Holy Scriptures, kwa zi toroka nokuzinduruka nokuzigavera Nombangi, ano ngesi kuvhura kugwana ruha rwazo ndi nazinye momaraka 96. Matjangururo gokupitakana pomamiliyona 166 kwa ga hanesa. Nombangi daJehova kudivisa hena mbudi zongwa zoUhompa . . .
Kupitira momapongo goSikriste. Mapongo aga ava ruganene poYinyanga yoUhompa ago kapisi goukareli tupu, kwa ga wapaikira mokuronga. Yiuyungwa eyi ava gava ko kutundilira moyirongwa yomoBibeli ntani Bibeli kuzilironga kumwe nosifo soRuhungu ntani noyimbapiratjangwa yapeke. Komapongo, Nombangi kulironga hena omu nava vhura kukara vazuvhisi wokuwapera wombudi zongwa.
Nombangi daJehova kulironga yininke yokulifana monombungakriste dokupitakana 107 000 uzuni mudima, ano eyi kugwederera kouumwe wawo. Mapongo ogo kwa mangurukira nkenye muntu. Kwato yimaliwa ava pura mo. Nayinye oyo ngano ngayi kara mawoko-woko nsene Nombangi va dira kusikisa mo eyi ava zuvhisa. Yipo nye, awo kuhetekera ko kudivisa mbudi zongwa . . .
Kupitira mosihonena sawo. Awo kuhetekera ko kulikida nkareso zongwa zoSikriste, pokurugana paapa va hulira va tekure vakwaawo ngamoomu vana harere nawo vakwaawo va va tekure. (Mateusa 7:12) Nampili ngomu va dira kusikilira mo ano poyiruwo yimwe kutura mapuko, awo kwa hara kutekura vantu navenye monkedi zeharo kapisi pokuvazuvhisira tupu mbudi zongwa nye hena pokuvavatera mononkedi dokulisiga-siga nsene kuvhura.
Nombangi daJehova kapi dina kuhetekera ko mokutezwilisa vantu womouzuni kupitira mezuvhiso lyawo. Nye, apa nga ninka Jehova asi sirugana sina pu, uhura makura tau wiza ngwendi moomu ga yi pumbire Jesus. Yisinke ngayi tanta oyo kevhu ntani nokovantu ava va tunga po?
[Efano lyepepenuno 7]
Mbudi zongwa kuna kuzidivisa uzuni mudima Nombangi daJehova