Yisinke “uhura”?

“. . . ntani nye ngaku kwama uhura.”—MATEUSA 24:14.

NTAANTANI kuna kuuyunga unene kuhamena uhura wouzuni. Nobuke nonomuvi noyifo kulikida mafano gokulisiga-siga gamwe gokuzoresa ano gamwe goyimpagwa yoyinene noyihorokwa yokutjilisa. Amo kwa hamena mo hena mafano goyita yoyinene omu vana kuruganesa nomboma douhungu nomafano gomauvera gomukagu nonomukarompepo donondona.

Maukarelikarunga nago kwa kara nomagano gokulisiga, ago kuronga asi “uhura” ngau hagekesa po eparu apa pevhu. Mokukumburura ko kwaMateusa 24:14, mulirongi gumwe kwa tjenge nonkango edi dokutukukisa asi: “Velise ezi kuna kara zimwe zomulyo unene moNonkango nadinye daKarunga . . . Vantu womosiruwo setu ngava ligwanekera nezonauko lyenene, ano tuvasesu tupu atu hetekera ko kudimburura usili ou.”

Vantu vangoso awo kuncenuna usili ou womulyo asi: Jehova Karunga kwa sita evhu ndi uzuni ‘u korerere dogoro narunye’ ano “kapi ga u sita u kare ngorooro, siporongwa, nye kwa tura mo vantu va kare mo.” (Jesaya 45:18) Apa Jesus ga uyungire kuhamena “uhura,” kapi ga tembe asi evhu ndi uzuni ngava u zonagura po ndi asi vantu navenye ngava va zonagura po. Age kwa tembe asi vantu wovadona ava ava nyokere mowina kuparuka kuliza nomavyukiso gomawa gaJehova yiwo ngava zonagura po.

Tarurureni sifanekeso esi. Tu tante nye asi mwa kara nembo lyewa makura tomu pulisire vantu va tunge mo va hana kufuta. Vamwe wovantu owo, kutunga kumwe mombili ntani nokutakamesa nawa embo lyeni. Ano wopeke kuretesa po maudigu, kurwanangana nokutekura momudona vakwawo ava va tunga mo. Awo tava zonagura embo lyeni ano nampili mu hetekere ko kuvahagekesa eyi vana kurugana, awo nokuyipurakena si.

Yisinke no vhura kurugana o kohonene po udigu owo? Nomu zonagura embo lyeni ndi? Hawe. One nampo nomu tjida mo vantu wovadona nokuwapukurura eyi va zonagura.

Jehova nage nga rugana yokulifana. Age kwa gendesere muepisarome a tjange asi: “Vadinikarunga ngava va mana po, ano ava va huguvara HOMPA ngava tunga sirongo mompora. Karuwogona tupu ko, mudinikarunga ta dongonoka po; ngo mu papara, nye kapi ngo mu gwana. Valinunupiki yiwo ngava hingira sirongo, awo ngava hafera mpora zonene.”—Episarome 37:9-11.

Mupositoli Peturusa nage ga uyungire yokulifana. Megendeso lyompepo zokupongoka age kwa tjenge asi: “Nare-nare Karunga kwa uyungire, makura eguru nevhu tayi kara po. Evhu kwa li sitire li tunde komema, mema hena ga li kundurukide. Yigo tupu hena googo mema, ruhanzo romema, ga zonagwire uzuni wanare.” (2 Peturusa 3:5, 6) Mupositoli apa kwa tembe kuhamena Ekuruhanzo lyomomazuva gaNowa. Vadinikarunga va va zonagwire po, nye evhu kapi va li zonagwire po. Ekuruhanzo kwa ‘geve sihonena sokukorangedesa vadinikarunga ava ngava ka kara ko komeho oko.’—2 Peturusa 2:6.

Peturusa kwa tjenge hena asi: ‘Eguru eli lyantaantani nevhu eli lyantaantani nayo kwa yi ndindilisa ngayi pye komundiro.’ Nsene tu hagera poopo kuvhura tu kare negano lyepuko. Nye velise kwa twikira kutanta asi: “Ano vadinikarunga navenye ngava va pangura va va hanagure po.” Ezonaguro olyo kapisi lyouzuni ndi lyevhu, nye lyovadinikarunga. Yisinke ngayi kwama ko? Peturusa kwa tjenge asi: “Ose kuna kundindira, moomu ga yi tumbwidira Karunga, eguru lyepe [Uhompa waKarunga woUmesiyasa] nevhu lyepe [nkarapamwe zovantu wovahungami], omu ngamu kara uhungami.”—2 Peturusa 3:7, 13.

Mauporofete gomoBibeli kwa likida hena asi “uhura” pepi una kara. Resa Mateusa 24:3-14 ntani 2 Timoteusa 3:1-5 o tare yidiviso eyi yina kulikida asi uhura pepi.a

Ayo yina kutetukisa asi pwa kara mapiyagano gomanzi kuhamena Mateusa 24:14, etjangwa eli na vhura kukwata egano nampili munona ndi? Pwa kara nokonda deyi pwa karera mapiyagano. Satana ga zonagura nondunge dovantu va dire kudiva mausili gomulyo aga ga kara moNonkango daKarunga. (2 Vakolinte 4:4) Ntani hena Karunga kwa horekera sitambo sendi valinenepeki ano yiyo ga si horwera valinunupiki. Kombinga zeyi, Jesus kwa tente asi: “Nyove nina kupanda, Tate, HOMPA geguru nevhu, yeeyi wa horeka yininke eyi vakonentu novanandunge, yiyo wa yi horwera vantuuntu tupu.” (Mateusa 11:25) Azo mfumwa zokukara gumwe govalinunupiki ava va kwata egano eyi au tanta Uhompa waKarunga ntani ava vana kundindira komauwa aga ngau ka retera navenye ava ava u kwatesa ko.

[Nondanda dokonhi]

[Efano lyepepenuno 9]

Uhompa ngau ka retera “uhura” vadinikarunga navenye vepevhu