Karera Jehova nelituromo lyenene
“Yi kare, yekuto . . . yiyo nomu gazara po.”—FIL. 4:8.
1, 2. Yisinke ya ninkisa wovanzi mouzuni ou va kare nomutaro gwepuko kuhamena eparu, ntani kutwaredesa komapuro musinke?
OSE kuna kuparuka mouzuni omu vantu vana kuligwanekera nomaudigu gomanzi. Vantu ava va dira kukara nelikwatakano lyenene naJehova, kwawo udigu unene kulididimikira “yiruwo yoyidigu.” (2 Tim. 3:1-5) Vantu vangoso kwato eyi ayi va vatere komaudigu gawo ntani kapi ayi va tompoka mokugalididimikira. Nelituromo lyokunyokera po kukara nosinka sosinene kuhamena eparu, wovanzi nkenye apa kupapara ruhafo rokutundilira koyilifaneso yomouzuni.
2 Mokulididimikira yinka yeparu, vantu kutura mahafo goparutu mevango lyokuhova. Nsene kapi tuna kutakamesa, ureru tu rugane yokulifana. Ngapi natu vhura kuyinyokera po oyo? Ngoso kutanta asi twa hepa kunyokera po mahafo goparutu nagenye ndi? Ngapi natu kara nehetakano pokatji komahafo goparutu noyitumbukira? Ngapi nompango doPatjangwa nadi tu vatera, tu kare nomutaro gomuwa keparu yipo tu dire kukara nosinka sosinene sokupitakanena?
Kulitura mo unene mouzuni ou wa hara mahafo goparutu
3, 4. Ngapi Matjangwa naga tu vatera tu mone mulyo gokulitura mo unene?
3 Uzuni ou kwa hara unene “mahafo goparutu.” (2 Tim. 3:4) Awo kukorangeda asi tu lihafese nyamwetu, ano ayo kuvhura kudonganesa po elikwatakano lyetu naJehova. (Yis. 21:17) Morwa oyo, monombilive edi ga tjangerere mupositoli Paurusa Timoteusa naTitusa ga tulire mo hena mapukururo gokuhamena elituromo lyenene. Nsene tu tura epukururo olyo pasirugana ngayi tu vatera yipo uzuni u dire kutupukisa kuhamena mutaro gweparu.—Resa 1 Timoteusa 2:1, 2; Titusa 2:2-8.
4 Momauye gokuhova, Saromo kwa tjenge kuhamena omu ya wapa mokulitulira po siruwo sokugazadara ko koyininke yomulyo meparu kupitakana kudemenena nkenye apa komahafo. (Muud. 3:4; 7:2-4) Yosili, morwa usupi weparu, twa hepa ‘kukondja’ yipo tu ka gwane eparuro. (Ruk. 13:24) Dogoro poopo, twa hepa kugazara ko unene koyininke ‘yekuto’ ndi yomulyo po. (Fil. 4:8, 9) Eyi kutanta asi twa hepa kulitura mo unene mwanayinye eyi ya hamena mo mokukara Mukriste.
5. Ruha rumwe musinke rwemeparu natu vhura kulitura mo unene?
5 Pasihonena, pokuhonena Jehova naJesus, Vakriste kulitura mo unene mositumbikira sawo pokurugana unene. (Joh. 5:17) Ngoyitundwamo, morwa kurugana kwawo unene nokuvahuguvara, Vakriste wousili kuvapandadeka vantu. Unene po vanturagumbo va hepa kurugana unene mokurera mapata gawo. Morwa, nsene kapi vana kupakera mbili yihepwa yomapata gawo ayo ya lifana ngwendi Jehova ‘vana kupatana.’—1 Tim. 5:8.
Tu litureni mo oku tatu hafere ukareli wetu
6. Ngapi tuna yi diva asi twa hepa kulitura mo unene moukareli wetu kwaJehova?
6 KwaJehova ayo mulyo unene mokumukarera monkedi ezi za hungama. Pasihonena, kuliza noVeta zaMosesa, Vaisraeli va ligwanekerere nomaudigu gomanene apa va tundire ko koukareli waJehova. (Jos. 23:12, 13) Mouye wokuhova S.N, vasikuli vaKristusa va hepere kukondja unene mokuninka ukareli wousili u kare una zere komarongo nokoyirugana yoyidona. (2 Joh. 7-11; Ehor. 2:14-16) Naina, Vakriste wousili kuna kutwikira kulitura mo unene moukareli wawo.—1 Tim. 6:20.
7. Ngapi nga liwapaikilire Paurusa sirugana sendi sokuzuvhisa?
7 Yirugana yetu yokuzuvhisa kuna kara ntundiliro zoruhafo. Mokuninka asi tu gwane ruhafo moyirugana yokuzuvhisa, twa hepa kugazadara ko unene nokuliwapaikira komeho zosiruwo. Paurusa kwa fatwilire omu nga gazadara ko vantu ava nga rongo. Age kwa tjenge asi: “Navenye kuliza nawo moyikara yawo nayinye, ni kongwere po nampili vamwe tupu. Nayinye eyi ame kuyiruganena morwaMbudi zoNgwa, ngani gwane ko name komatungiko gamo.” (1 Kol. 9:22, 23) Paurusa ga gwene mo ruhafo mokuvatera vantu va kure pampepo, ntani ga gazadarere ko omu ga vhulire kugava yihepwa eyi va hepere vapurakeni vendi. Yipo nye, ga vhulire kuvakorangeda nokuvatumangeda va karere Jehova.
8. (a) Nkareso musinke natu kara nazo kovantu ava atu rongo moyirugana yokuzuvhisa? (b) Ngapi kurugana elirongo lyoBibeli ayi gwederere koruhafo romoyirugana yokuzuvhisa?
8 Ngapi sirugana sokuzuvhisa sa kere nomulyo kwaPaurusa? Age kwa tokomenene mokukara “mupika” gwaJehova nowo ngava purakene kombudi zousili. (Rom. 12:11; 1 Kol. 9:19) Apa atu rongo vantu Nonkango daKarunga yi kare asi mElirongo lyoBibeli ndi komapongo ndi poUkareli wEpata, ose kukara nosinka kowo tuna kuronga ndi? Nampo ose kulizuvha asi kurugana elirongo lyoBibeli nkenye apa kuna kara situmbukira sosidigu kwetu. Yosili, ayo ya hepa asi tu guse ko kosiruwo setu esi atu ruganesa mokukondjera yininke yanyamwetu yipo tu si ruganese mokuvatera wopeke. Eyi kwa liza nononkango daJesus asi “kugava kwa kara nerago, kwa pitakana kutambura.” (Yirug. 20:35) Kuronga wopeke nzira zokutwara keparu ngayi tu retera ruhafo oru natu dira kuvhura kugwana kwankenye yirugana.
9, 10. (a) Kulitura mo unene kutanta asi kapi tatu vhuru kukara nosiruwo sokupwizumuka nesi sokuhafa kumwe novantu ndi? Faturura. (b) Yisinke ngayi vatera mukuronambunga a kare mukorangedi ntani ureru kumuhedera?
9 Kulitura mo unene kapi yina kutanta asi kapi tatu kara nosiruwo sokupwizumuka nesi sokuhafa kumwe novantu. Jesus ga tulire po sihonena sosiwa sokulitulira po siruwo kapisi sokuronga tupu nye hena sokupwizumuka nokutunga po elikwatakano lyewa nava wopeke. (Ruk. 5:27-29; Joh. 12:1, 2) Kulitura mo unene kapi hena ayi tanta asi twa hepa kumoneka nkenye apa ngwendi kuna handuka. Jesus ngano kapi ga kere muntu gomuwa, vantu ngano kapi va vhulire kumuhedera. Nampili vanona kwa va rerupilire mokumuhedera. (Mar. 10:13-16) Ngapi natu honena nkareso zaJesus zehetakano?
10 Kuhamena mukuronambunga gumwe, munazinyetugara gumwe kwa tente asi: “Age kundindira ko yoyinzi kwamwene nye kapisi kovakwawo.” Nove yimo wa kara ngoso ndi? Ayo ya wapa mokukara nomandindiro gokuhetakana kwava wopeke. Pasihonena, vanona kuyitambura nawa nsene vakurona va va tulira po yitambo yoyiwa yokuhetakana nokuvavatera va ka sike koyitambo oyo. Mokulifana, vakuronambunga kuvhura va korangede nkenye gumwe mombungakriste a kure pampepo nokuvapa magano gongandi asi ngapi omu nava yi rugana. Mokugwederera ko, nsene mukuronambunga a kara nomutaro gokuhetakana kwamwene, age nga kara mukorangedi gomuwa ntani ureru kumuhedera. (Rom. 12:3) Munazinyetukadi gumwe kwa tente asi: “Ame kapi na hara mukuronambunga ogu a tara nkenye yininke ngwendi muteu. Nye nsene a kara gokulitura mo unene nkenye apa, udigu hena kumuhedera.” Ano munazinyetukadi gumwe hena kwa tanta asi age kulizuvha asi vakuronambunga vamwe “kuvhura kutjilisa unene morwa awo kwa kara nonkareso zokulitura mo unene.” Vakuronambunga kapisi va donganese po ruhafo oru va kara naro vapuli navenye koukareli wawo kwaJehova, Karunga goruhafo.
Tambura yitumbukira mombungakriste
11. Yisinke ayi tanta ‘kuhara kukara mupitisili’ mombungakriste?
11 Apa Paurusa ga korangedere vagara mombungakriste va kondjere kuwapera yitumbukira yoyinene, sitambo sendi kapi sa kere sokukorangeda muntu a kondjere etompoko lyamwene. Nye, age kwa tjenge asi: “Muntu nsene a hara kukara mupitisili gombungakriste, kuna tokomene sirugana sombeyo.” (1 Tim. 3:1, 4) ‘Mokuhara kukara mupitisili’ kwa hepa asi vagara woVakriste va tunge po eharo lyenene mokurugana unene va tunge po yikara yopampepo yipo va ruganene vanavazinyawo. Nsene munazinyetugara ga gwana ekuho mvhura zimwe ntani kuna kusikisa mo yihepwa yoPatjangwa mokukara mukwafimbunga ngwendi moomu va yi tjanga 1 Timoteusa 3:8-13, age kuvhura va mu horowore. Koneka velise 8 ezi za vyukilira kutanta asi: “Vakwafi womombungakriste nawo ava kare [nelituromo, NW].”
12, 13. Singonona nonkedi omu vanavazinyetugara wovadinkantu nava vhura kukara vapitisili.
12 Ove kuna kara munazinyetugara gomudinkantu wa litura mo unene ntani wa gwana ekuho ndi? Pwa kara nonkedi dononzi omu no kara mupitisili. Zimwe kuna kara pokuwapukurura elihamekomo lyoge moyirugana yokuzuvhisa. Ove muntu ogu o hafere kurugana kumwe novanavazinyetu womapupi nagenye moyirugana yokuzuvhisa ndi? Ove kuna kuhetekera ko kugwana gumwe ogu no lironga nage Bibeli ndi? Nsene o rugana elirongo lyoBibeli kuliza nomagano aga ava gava komapongo goSikriste, ove ngo wapukurura ndongeseso zoge zokuronga. Ntani hena, ove ngo lironga kulikida nkenda muntu ogu ana kulironga nonzira daJehova. Ngomu murongwa goge nga nongonona hepero zokutura po marunduruko, ove ngo lironga kumuvatera nelididimikiro a ture pasirugana nompango doBibeli.
13 Vanavazinyetugara wovadinkantu kuvhura mu ligave nyamweni pokuvatera vakurupe mombungakriste mwankenye nkedi nsene kuvhura. Kuvhura mu liture mo hena mokuzeresa Sinyanga soUhompa. Apa omu ligava mu vatere mwankenye nkedi, nkareso zeni zokuvatera kulikida asi mwa litura mo unene moyirugana yeni yokuzuvhisa. Ngwendi Timoteusa, one ngomu lironga kupakera nawa mbili yihepwa yomombungakriste.—Resa Vafilipi 2:19-22.
14. Ngapi nava va ‘tara tanko pomuhowo’ vanavazinyetugara wovadinkantu asi kuna kusikisa mo sirugana mombungakriste?
14 Vakuronambunga, kareni nosinka sokuvatera vanavazinyetugara wovadinkantu ava vana tokomene ‘kutjwayuka madowo gosiudinkantu’ va kondjere “uhungami nepuro neharo nombili,” ntani noyikara hena yimwe yoyiwa. (2 Tim. 2:22) Pokupa vadinkantu yirugana mombungakriste, kuvhura va va ‘tare tanko pomuhowo’ nsene asi vana wapere mokusikisa mo sirugana oso yipo ‘kukura kwawo va ku mone vantu navenye.’—1 Tim. 3:10; 4:15.
Litura mo unene mepata nomombungakriste
15. Kuliza 1 Timoteusa 5:1, 2, mutaro musinke natu kara nago kwava wopeke?
15 Kulitura mo unene kwa kwatera mo kulikida efumadeko kovanavazinyetu wovagara nava wovakadi. Mepukururo lyendi kwaTimoteusa, Paurusa ga uyungire hepero zokulikida efumadeko kwava wopeke. (Resa 1 Timoteusa 5:1, 2.) Eyi kwa kara nomulyo, unene po apa atu ruganene kumwe novagara ndi novakadi. Sihonena saJoba sokufumadeka vakadi, unene po komulikwali gwendi, aso mulyo mokusitemwinina. Age kwa litulire mo unene mokudira kutara mukadi gwapeke a mu hore. (Joba 31:1) Kulitura mo unene movanavazinyetu wovagara ndi wovakadi ngayi tu vatere tu dire kuliharesa kwawo ndi tu rugane yininke eyi nayi dira kuvahafesa. Kufumadeka vapeke kwa kara nomulyo, unene po nsene kuna kulivandekera nositambo sononkwara. Mukriste ogu ga litura mo unene kapi nga danauka nomalizuvho gomuntu gwapeke.—Yis. 12:22.
16. Tumbura malisigo gomutaro gomouzuni kuhamena situmbukira santuragumbo ndi saguhya nomu Bibeli azi singonona situmbukira sendi.
16 Twa hepa hena kulitura mo mokusikisa mo yitumbukira yetu yemepata eyi ga tu pa Karunga. Uzuni waSatana kusensa situmbukira sokukara nturagumbo ndi guhya. Ano tivi nonomuvi nonodividi kuninkisa vanturagumbo novaguhya va moneke ngwendi kapi va fira efumadeko. Nye, Matjangwa kwa pa mugara situmbukira somulyo unene, pokumutura a kare “mupangeli gomukadi.”—Efe. 5:23; 1 Kol. 11:3.
17. Faturura omu elihamekomo lyetu moukareli wepata ali likida asi tuna litura mo unene moyitumbukira yetu.
17 Nturagumbo kuvhura kugava yihepwa yopanyama kepata lyendi. Nye nsene kapi a gava yihepwa yopampepo, age ngoso kuna kulikida asi kwato nondunge nounongo. (Deut. 6:6, 7) Mwa-1 Timoteusa 3:4 kutanta asi nsene ove mupangeli gepata ntani kuna kukondjera kugwana yitumbukira yimwe mombungakrise, wa hepa kukara mugara ogu ‘ga diva kugendesa nawa embo lyendi, ogu a tekura vana vendi monkedi zongwa [zelituromo, NW].’ Kombinga zeyi, lipura asi: ‘Ame kulitulira po nkenye apa siruwo soUkareli wEpata membo lyange ndi?’ Vakadi vamwe woVakriste kulikwambera vagara vawo va guse epitisiro moyininke yopampepo. Nkenye nturagumbo ga hepa kugazadara ko omu a tara situmbukira oso. Mugolikadi goMukriste ga hepa kukwatesa ko ewapaiko lyoUkareli wEpata ntani nokuruganena kumwe nayendi yipo yi va tompoke.
18. Ngapi vanona nava lironga kulitura mo unene?
18 Vanona nawo kwa va korangeda mokudemenena koyininke yomulyo po meparu. (Muud. 12:1) Kapi pwa kara epuko kwawo mokulironga kurugana unene, pokurugana yirugana yemembo eyi ayi lizi nonomvhura nevhuliko lyawo. (Mal.Gajer. 3:27) Apa hompa Ndafita ga kere simpe mudinkantu, age ga lirongere mokukara musita gomuwa. Age hena ga lirongere mokukara mbimbi nomutjangi gonomusika, udivi ou wa ya mu twaredesere a ka ruganene hompa goVaisraeli. (1 Sam. 16:11, 12, 18-21) Yosili, Ndafita ngomudinkantu nga danauka, nye hena ga ya kere noudivi womulyo ou ga ya ruganesere mokuyahamberesesa ko Jehova. Udivi wendi ngomusita wa mu vaterere a pitisire muhoko gwaIsraeli nelididimikiro. Vadinkantu, udivi musinke womulyo ou muna kulironga, ou ngau mu vatera mokukarera Musiti gweni ntani nokumuwapaikira koyitumbukira yokomeho?
Kara nehetakano
19, 20. Nkareso musinke zehetakano ono tokomene kutunga po kwanyamoge nokoukareli woge?
19 Natuvenye kuvhura kukondjera mokukara nehetakano, nye kapisi tu liture mo unene kupitakanena. Kapi tuna hara kukara ‘vahungami unene.’ (Muud. 7:16, NW) Kukara nonkareso zokuhetakana kuvhura kuretesa po ukaro wouwa, yi kare asi membo ndi koyirugana ndi omu atu ruganene kumwe noVakriste vakwetetu. Ava va kara mepata va hepa kutakamesa mokudira kulikuyauka unene morwa kuvhura kudonganesa po mbili ezi za fira kukara membo. Natuvenye womombungakriste kuvhura tu lironge kuzora kumwe nokuhafa kumwe, ano nonzogera detu nomonkedi ezi atu rongo ya hepa kukara yokutunga yoyiwa.—2 Kol. 13:10; Efe. 4:29.
20 Ose kuna kuparuka mouzuni ou au dili kulitura mo mokukwama noveta daJehova. Mokulisiga, vantu vaJehova kutara ulimburukwi wawo kwaKarunga gwawo asi mulyo unene. Ee, ruhafo musi mokukara ruha rwelipakerero lyovantu ava ava karere Jehova “monkedi zongwa” zelituromo! Ngano tu tokomene kutunga po mutaro gomuwa kuhamena eparu nokoukareli wetu.
Ngapi omu no vhura kulimburura?
• Morwasinke twa hepera kunyokera po mutaro gwepuko gomouzuni kuhamena eparu?
• Ngapi natu litura mo unene oku tatu hafere hena yirugana yetu yokuzuvhisa?
• Ngapi nkareso zetu zokutambura yitumbukira azi likida asi tuna litura mo unene ndi hawe?
• Faturura eyi kufumadeka vanavazinyetu nava vemepata ya karera sininke selituromo.
[Mafano gepepenuno 16]
Nturagumbo ga hepa kugava yihepwa yopanyama neyi yopampepo kepata lyendi