Hedera Karunga pepi

“Ngo hafere nge”

AYO kukoresa sili pokumona muhali kuna kuhepa nokufa. Yimo ya kara ngorooro mokulizuvha ruguwo. Nye ayo kuhengagwida mokudiva asi Musiti gwetu, Jehova Karunga ga diva ruguwo rwetu. Ntani hena age kwa kara neharo lyokuruganesa nonkondo dendi mokutengwidira vafe keparu. Koneka ehuguvaro va likida mononkango daJoba, va tjanga mwaJoba 14:13-15.

Tarurura sihorokwa esi. Joba, mugara gepuro lyokulikarera kwa ligwanekerere nomaheteko gomanene, kukwatera mo ezumbaneso lyoyiweka yendi novana vendi ntani nouvera wokukoresa. Moruhodi rorunene, ta zigire kwaKarunga asi: “Ani vakwetu, ngano to horeke nge mosirongo sovafe [monontoko].” (Velise 13) Joba kwa mwene sirongo sovafe ngevango lyepwizumukiro komaruhepo. Mevango olyo, age ngano kapi nga ligwanekera nomaudigu nokukora.a

Ngoso Joba nga karerera montoko ndi? Joba ga yi divire asi kapi nga karerera mo. Ta twikire kukanderera asi: “Ngo pake po siruwo esi ngo diworoka nge.” Joba ga kere nehuguvaro asi kapi nga kara mo siruwo sosire montoko ntani asi Jehova kapi nga mu divara. Joba kwa fanekesere siruwo esi nga kara montoko ngosiruwo sokundindira. Siruwo sokuhura kupi? Age kwa tente asi: “Dogoro siruwo esi soudigu tasi pu.” (Velise 14) Siruwo oso kutanta asi evhumbuko koufe!

Morwasinke Joba ga karerere nehuguvaro asi epwizumuko lyendi ngali wiza? Morwa ga divire omu Musiti gwetu geharo a lizuvhu kuhamena vakareli vendi wovalimburukwi ava va fa. Joba kwa tente asi: “Ngo zigide nge, ame ngani ku limburure, makura ngo hafere nge ame siungwa soge.” (Velise 15) Joba ga yi divire asi age siungwa saKarunga. Mugavi geparu yige ga ungire Joba, ano nsene a fa nga ka mu tengwidire hena keparu.—Joba 10:8, 9; 31:15.

Nonkango daJoba kuturonga kuhamena eharo lyaJehova: Age kwa hara unene owo ava huguvara mwendi nokumupulisira a va honge va kare vantu wovawa kosipara sendi, ngwendi Joba. (Jesaya 64:8) Vakareli wovalimburukwi mulyo unene kwaJehova. Kovalimburukwi ava va fa age nga hara ndi nga ‘hafera,’ mokukavavhumbura. Mulirongi gumwe kwa tanta asi nkango zoRuhebeli ezi va ruganesere “kwa kara zimwe zononkango dononkondo mokulikida malizuvho gokuhara kuyirugana.” Jehova kapi tupu a diworoka vakareli vendi nye ga kara hena neharo lyokukavatengwidira keparu.

Mobuke zaJoba yimo Jehova ga horwere sitambo sendi sokukavhumbura vafe.b Age kuna hara ngo ka kare hena kumwe novahali woge ava ava fa. Egano olyo kugava ehengagwido mokulididimikira. Kuvhura o lironge yoyinzi kuhamena Karunga ogu geharo ntani nomu no mu pulisira a ku honge o kare muntu ogu ngo ka mona sitambo sendi kuna kusika mo.

[Nondanda dokonhi]