Upungwiro woyininke yanare

“Ame kuna kulironga kuhara sirugana souzuvhisi wokukarerera”

Momvhura 1886, Bible House modoropa Allegheny moPennsylvania kwa tumine nobuke Millennial Dawn Ruha I koChicago moIllinois. Charles Taze Russell kwa kere negano lyokutura nobuke odo donompe moyitora yonobuke. Ngesefa zonene moAmerika zokuhanesa nobuke domaukarelikarunga kwa hundilire nobuke Millennial Dawn. Nye konyima zoyivike yivali, nobuke nadinye kwa ka di tengwidire koBible House.

Muudisi gokufumana kwa handukire apa ga mwene nobuke Millennial Dawn kumwe nonobuke dendi mositora. Ga tanterere mwenya sitora asi nsene kapi nga tengwida nobuke Millennial Dawn, age novaudisi vakwawo ngava gusa mo nobuke dawo nokuditwara konongesefa dapeke. Mesininiko lyawo, mwenya sitora yipo ga tengwidire nobuke odo. Ntani hena, matjingiso gonobuke Millennial Dawn kwa ga tulire monosaitunga. Nye varwanesi va ya hagekesere po matjingiso. Ngapi omu nobuke odo donompe nadi ka sika kwava ava papara usili?

Vazuvhisi wokukarerera kwa di hanesere. Momvhura 1881, Zion’s Watch Tower kwa zigidire vazuvhisi 1 000 ava va vhulire kuhanesa yimbapiratjangwa yoBibeli siruwo nasinye. Nampili ngomu vazuvhisi wokukarerera va kere wovasesu, awo kwa hanesere mbuto zousili nakunye. Momvhura 1897, vazuvhisi wokukarerera kwa hanesere konyara nobuke odo emiliyona. Sinzi sawo ngava paruka tupu noyimaliwa yoyisesu eyi ngava gwana koyigava yokoyimbapiratjanga eyi ngava hanesa.

Wolye va kere vazuvhisi wokukarerera wouradi? Vamwe kwa tamekere awo simpe vadinkantu, ano vapeke awo vakurona. Sinzi sawo kwa kere vadike ndi valikwali ava va dilire vanona, ano nomapata gomanzi aga ga kere novanona nago kwa lihamekere mo. Vazuvhisi wokukarerera ngava rugana novili dononzi, ano vazuvhisi wokuvatera ngava rugana vili zimwe ndi mbali nkenye ezuva. Kapisi nkenye gumwe kwa kere noukanguki ndi noukaro wouwa mokurugana sirugana oso. Nye posigongi somo-1906 kwa va tanterere asi kapi va hepere kukara “valirongi ndi kukara noudivi ndi va uyunge eraka lyovaengeli.”

Konyara nkenye sirongo vantu kwa sikisire mo sirugana oso sokutetukisa. Munazinyetugara gumwe kwa tente asi monomvhura ntambali age kwa hanesere nobuke dokusika po-15 000. Ntani ga tente hena asi: “Kapi na hamenenene mo mosirugana oso sokukara murandesi gonobuke, nye ngani udisa kuhamena Jehova nousili wendi.” Nkenye oku ngava zi vazuvhisi owo, mbuto zousili kwa kulire ano nombunga dovalirongi woBibeli kwa tamekere kuligwederera.

Vampitisili womaukarelikarunga ngava va zoro nokuvambura asi varandesi wonobuke. Mo-1892 Watch Tower kwa tente asi: “Wovasesu tupu va yi dimbwilire asi awo vakarelipo vaHompa, ntani asi Hompa kuna kuhafera elinunupiko nelizambero lyawo.” Yosili, eparu lyovazuvhisi wokukarerera kapi lya kere lyoureru. Nonkaku dononkoli nonombasikora yiyo ya kere ugendero wawo. Apa va dilire kukara noyimaliwa, vantu ngava va pe nondya ngoyigava yokonobuke. Konyima zokuzuvhisa, nampili ngomu ngava roroka, vazuvhisi owo ngava tengura noruhafo konotenta dawo nokononzugo edi ngava hehere. Konyima va ya gwene matuwa gokarafana aga ga poperere siruwo noyimaliwa.a

Kutamekera posigongi soyirongo esi sa karerere moChicago soValirongi woBibeli mo-1893, pelikwamo kwa tulire po ruha rovazuvhisi wokulikarera. Ruha oro kwa hamenene mo yilimonena nonondongeseso dokuzuvhisa ntani nomapukururo gomawa. Munazinyetu Russell kwa korangedere vazuvhisi womupampi asi komeho zokuza mokuzuvhisa va hepa kulihaka ntani konyima zonovili dongandi va hepa kunwa masini ano nsene mutenya guna kara ko va hepa kunwa ko yoyitenda.

Vazuvhisi wokulikarera ava ngava papara vakwawo wokurugana kumwe nawo ngava limanga sikehe sosinauhenga. Vazuvhisi wovape ngava rugana unene nava va kulire pampepo. Edeuro lyangoso kwa kere nomulyo morwa gumwe govazuvhisi owo wovape kwa kere nowoma mokuhanesa nobuke makura ga uyungire asi: “Kapi ono hara buke ezi ndi?” Erago, ogu ga zuvhisilire ga gusire buke nokuyakara munazinyetukadi.

Munazinyetugara gumwe kwa lipulire asi: ‘Ni kare ngorooro mosirugana sange nokugwana nzambi zonodola daAmerika 1 000 momvhura ndi ni kare muzuvhisi gokukarerera?’ Age kwa mu tanterere asi Hompa nga hafa nsene a ruganesa siruwo sendi kwaHompa ntani nga gwanena mo matungiko gomanzi. Mary Hinds kwa tere sirugana souzuvhisi wokukarerera “ngompito zongwa zokuruganena vantu wovanzi yininke yoyiwa.” Ano Alberta Crosby gonomuga kwa tanta asi: “Ame kuna kulironga kuhara sirugana souzuvhisi wokukarerera.”

Naina, vana wovazuvhisi owo wopampepo nava wopanyama simpe kuna kwaterere kousili ou va pinga kovakurona vawo. Nsene simpe kapi mwa kara nomuzuvhi gokukarerera mepata lyeni, kuvhura o tameke kurugana uzuvhisi owo ndi? Nove ngo lironga kuhara sirugana souzuvhisi wokukarerera.

[Nonkango dokonhi]

[Nonkango pepenuno 32]

Awo kapi va hepere kukara “valirongi ndi kukara noudivi ndi va uyunge eraka lyovaengeli”

[Efano pepenuno 31]

Muzuvhisi gokukarerera A. W. Osei moGhana, koyiha yo-1930

[Mafano pepenuno 32]

Keguru: Edith Keen naGertrude Morris moIngiranda, koyiha yomvhura 1918; konhi: Stanley Cossaboom naHenry Nonkes moAmerika, nomapakote ga hana yuma aga ga kere nonobuke edi ngava hanesa