“Omu rungararere hingo zoVafalisayi”

Jesus kwa rondwere varongwa vendi asi: “Omu rungararere hingo zoVafalisayi, kuninka asi uyilipaki.” (Ruk. 12:1) Mokuliza naMateusa, Jesus kwa tembe “erongo” lyoVafalisayi.—Mat. 16:12.

Poyiruwo yimwe Bibeli kuruganesa “hingo,” ndi yihaheso pokufanekesa ezonauko. Marongo nonkareso zoVafalisayi kwa kundamene momudona vapurakeni vawo. Morwasinke erongo lyoVafalisayi lya karerere siponga?

1 Vafalisayi kwa limwene vene uhungami, ntani kwa sensere vantu wopeke.

Kulihungameka kwangoso kwa ku tumbura mosifanekeso simwe saJesus. Age kwa tente asi: ‘Mufalisayi ta sikama a likerere, makura ta kanderere yokuhamena kwamwene asi, “Karunga, tani ku pandura, yeeyi ame kapi na fana vantu peke – vamahaka novanayimpempa novahondedi, ndi ngwendi gogu mufutisi gomutero ogu. Ame kudilira nondya ruvali mosivike, ame hena kugava yiumurongo yeyi ani gwana nayinye.” Muteresi age kwa sikeme ure nakauke, nekeguru si kapi ga here kutara ko, nye ta litoona ponturo, ta tanta asi, “Karunga, fira nge nkenda, ame munanzo!”’—Ruk. 18:11-13.

Jesus kwa pandadekere nkareso zelinunupiko zomufutisi gomutero pokutanta asi: “Ame tani mu tantere asi, ogu gokuhulilira kwa zire kembo lyendi age ana hungama, kupita gwina gomuhowo. Yeeyi ogu a linenepeke mwene, kumununupika, ano ogu a linunupike mwene, kumunenepeka.” (Ruk. 18:14) Nampili ngomu vafutisi womutero va va divire asi vanayimpempa, Jesus ga vaterere mo vamwe ava va mu purakenene. Vamwe wovafutisi womutero owo kwa kere Mateusa naSakeusa ava va ya kere vasikuli vaJesus.

Ngapi nsene tu gazara asi ose twa pitakana vakwetetu morwa kukara noudivi noyitumbukira eyi ga tu pa Karunga ndi morwa mapuko nomaupirankondo govakwetetu? Twa hepa kunyokera po usimbu-simbu magazaro gangoso morwa Matjangwa kutanta asi: “Eharo kwa kwata nedidimiko nounambili; eharo kapi lya paka mfudu, eharo kapi ali likanganga, kapi ali litumbu, kapi ali reta yoyidona, kapi ali papara yeeyi lya hara lyene, kapi ali nyegenya, kapi lya paka nkoko, kapi ali hafere udona, nye alyo kuhafa kumwe nousili.”—1 Kol. 13:4-6.

Twa hepa kukara nonkareso ngwendi zomupositoli Paurusa. Konyima zokutumbura asi “Jesus Kristusa kwa wizira mouzuni asi a ya parure vananzo,” Paurusa kwa gwederere ko asi: “Ame, nyame munanzo gomunene po.”—1 Tim. 1:15.

Mapuro gokuteda ko:

Ame na yi diva asi ame munanzo ntani asi eparu lyange kwa korera monkenda zaJehova ndi? Ndi ame kutara nomvhura dononzi edi na kara noulimburukwi noyitumbukira mombunga zaKarunga ndi udivi ou na kara nawo asi na pitakana vakwetu?

2 Vafalisayi ngava limonekesa moyitarameho kwava wopeke asi awo vahungami. Ntani kwa here kufumana nokukara noyitumbwiso yokulikarera.

Nye Jesus kwa rondwere asi: “Awo kuyininkira asi yirugana yawo yi moneke kovantu. Tareni omu ava dwara maliva gomanene gokupungwira nontanto doVeta zaMosesa, nye nonyerera doyikoverero yawo yiwo sa unene womu. Nye awo kwa hara mavega gomawa po poyipito noyipundi yovanamakuto monosinagoge nomalikunda-kundo gopomarandero, hena asi vantu ava va tumbure po asi ‘Murongi.’” (Mat. 23:5-7) Nkareso zawo kwa lisigire nezi zaJesus. Nampili ngomu ga kere MunwaKarunga gokusikilira mo, age kwa linunupikire. Apa ga mu tumbwire mugara gumwe asi “ga wapa,” Jesus kwa tente asi: “Patupu ogu ga wapa, ntudi gumwe tupu, Karunga.” (Mar. 10:18) Sikando simwe, Jesus kwa kuhwire nompadi dovarongwa vendi, pokuvatulira po sihonena selinunupiko.—Joh. 13:1-15.

Mukriste gousili ga hepa kuruganena vakwawo. (Gar. 5:13) Unene po vaava vana hara kukara vapitisili wombungakriste. Ayo ya wapa kuhara kukara “mupitisili gombungakriste,” nye muntu ga hepa kuyirugana morwa eharo lyokuvatera wopeke. ‘Upitisili’ ou kapisi wokufumana ndi wokupangera. Ava ava pitisire va hepa ‘kulinunupika momutjima,’ ngwendi Jesus.—1 Tim. 3:1, 6; Mat. 11:29.

Mapuro gokuteda ko:

Ame kwa hara ava va kara noyitumbukira mombungakriste kupitakana wopeke nositambo asi va pe nge ko yitumbukira yimwe hena ndi? Ame kwa hara unene maruha gomosirugana saKarunga aga naga vhura kuninkisa vantu va mone nge asi ni muhungami ndi? Ame kwa hara kulizerura komeho zovakwetetu ndi?

3 Noveta nonompo daVafalisayi kwa digopekesere vantu mokusikisa mo noveta daJehova.

Veta zaMosesa kwa kere etateko lyoukareli woVaisraeli kwaJehova. Nampili ngoso, kapi va va pere mauzera gomanzi. Pasihonena, Veta kwa nyokesere kurugana mEsabata, nye kapi za fatwilire momunene asi yirugana musinke nava vhura kurugana neyi nava dira kurugana mezuva olyo. (Ex. 20:10) Vafalisayi yipo va tulire po noveta nonompo nomafatururo gavene. Jesus kwa nyokerere po noveta doVafalisayi, nye ga limburukwire Veta zaMosesa. (Mat. 5:17, 18; 23:23) Age ga divire eyi za kwatererere mo Veta. Ga divire eyi za karerere po Veta ntani mulyo gokulikida nkenda. Age ga kwete egano ukaro wovasikuli vendi nampili apa va rugene mapuko. Pasihonena, nampili ngomu ga korangedere vapositoli vendi vatatu va vangarare momasiku aga va mu kwete, awo kwa gwililire hena monompofu yikando yitatu. Nampili ngoso, age ga va tantererere nonkenda asi: “Mwenyo ago mureru, kupura usimbu. Nye rutu kapi rwa paka nonkondo.”—Mar. 14:34-42.

Mapuro gokuteda ko:

Ame kutulisa po noveta nokusininika wopeke va di limburukwe ndi? Ndi ame kwa harera wopeke va rugane eyi ani gazara asi yiyo youhunga? Ame kukwata egano maukaro gava wopeke ndi?

Gazadara ko malisigo gerongo lyaJesus neli lyoVafalisayi. Ono dimburura omu no vhura kuwapukurura ndi? Nsene yimo, yisinke no vhura kurugana?

[Efano pepenuno 28]

Vafalisayi ngava dwara tundjato koyipara yawo omu ngava tura matjangwa.—Mat. 23:2, 5

[Mafano pepenuno 29]

Vakuronambunga kuruganena vakwaawo nelinunupiko, kapisi ngwendi Vafalisayi wokulinenepeka

[Efano pepenuno 30]

Ngwendi Jesus, ove kukwata egano maukaro gava wopeke ndi?