Yilye nkore zaKristusa?
Mulirongi Friedrich Nietzsche, kwa tumbura buke zendi zimwe asi Nkore zaKristusa.
Vahompa novapangeli womosiruwo sanare ngava tumbura varwanesi vawo asi nonkore daKristusa.
Muruti goMundovesi Martin Luther kwa tumbwire vapapa woVakatolika asi nonkore daKristusa.
NTANTO “nkore zaKristusa” kwa zi ruganesa koyininke yoyinzi. Nye yilye nawa-nawa nkore zaKristusa? Ntanto ezi simpe kuna kuziruganesa nanaina ndi? Yimo, Bibeli kwa faturura ntundiliro zonkore zaKristusa, omu va ruganesa ntanto ezi yikando yitano.
EMONEKO LYONKORE ZAKRISTUSA
Mupositoli Johanesa yige gelike mutjangi goBibeli ga ruganesa ntanto “Nkore zaKristusa.” Ngapi Johanesa ga faturura nkore zaKristusa? Koneka nonkango edi ga ruganesere mombilive zendi zokuhova: “Vana vange, uhura pepi una kara! Amesi mwa zuvha asi Nkore zaKristusa ngazi wiza? Ano ntaantani nonkore daKristusa nonzi nye dina horoka. Apa yipo nye natu tundira tu dive asi uhura pepi una kara. Awo kapi va hama kwetu nawa-nawa, yiyo ya va gusisa mo mwetu . . . Ndi munayimpempa yilye, amesi googu a patana asi Jesus kapisi yige Kristusa? Age Nkore zaKristusa ezi azi patana Guhya noMuna navenye.”—1 Johanesa 2:18, 19, 22.
Mupositoli Johanesa ga kwete egano asi nkore zaKristusa kuna kara navenye ava ava hanesa mowina yimpempa kuhamena Jesus Kristusa nomarongo gendi
Yisinke natu lirongera ko kononkango odo? Johanesa kwa tente asi “nonkore daKristusa nonzi,” eyi kulikida asi nkore zaKristusa kapisi muntu gumwe tupu nye kwa tamba vantu wovanzi. Vantu ndi nombunga edi da hamena monkore zaKristusa kuhanesa yimpempa nokupatanesa asi Jesus kapisi Kristusa ndi Mesiyasa, ntani awo kupiyaganeka omu Karunga naJesus Kristusa va litundakana. Nonkore daKristusa kulitumbura asi yiwo Kristusa ndi vakarelipo vendi, nye kwa ‘ligusa mo mwetu,’ nokunyokera po marongo gosili gomoBibeli. Apa Johanesa ga tjenge mbilive zendi, mbunga ezi yipo za kere, nampo ‘kouhura’ womazuva govapositoli.
Yisinke hena ga tjenge Johanesa kuhamena nkore zaKristusa? Pokuuyunga kuhamena vaporofete woyimpempa, age kwa rondwere asi: “Nkenye ogu a tongonona asi Jesus Kristusa kwa ya kara muntu, ogo goMpepo zaKarunga. Nye nkenye ogu a dili kutongonona yokuhamena Jesus, kapi ga kara noMpepo zaKarunga. Zangoso Mpepo zoNkore zaKristusa, ezi mwa zuvha asi ngazi wiza, nye azo mozili nare mouzuni.” (1 Johanesa 4:2, 3) Mombilive zendi zauvali, Johanesa kwa rugurukire sitwa esi asi: “Vapukisi wovanzi va wiza mouzuni: awo vaava ava dili kutongonona asi Jesus Kristusa gokuwiza parutu. Gwangoso mupukisi nonkore zaKristusa.” (2 Johanesa 7) Johanesa ga kwete egano asi nkore zaKristusa kuna kara navenye ava ava hanesa mowina yimpempa kuhamena Jesus Kristusa nomarongo gendi.
“VAPOROFETE WOYIMPEMPA” ‘NOMUNTU GOMUDONA’
Jesus kwa rondwere asi vaporofete woyimpempa ngava wiza ‘monomudwaro dononzwi, nye monda mambungu’
Komeho Johanesa a tjange kuhamena vapukisi vangoso, Jesus Kristusa nare ga rondwere vasikuli vendi asi: “Omu tjire vaporofete woyimpempa, ava ava mu wizire monomudwaro dononzwi, ano nye monda zawo mambungu aga aga kwata, taga papagura.” (Mateusa 7:15) Mupositoli Paurusa nage ga rondwere hena Vakriste womoTesaronika asi: “Nokutarerera si muntu a mu pukise nonkedi zongandi. Yeeyi ezuva olyo kapi ngali wiza, awo udinikarunga wa hana kulihanena mouzuni mudima ndi Muntu gomudona ga hana kuhoroka, ogu ga hamena ezonauko lyanarunye.”—2 Vatesaronika 2:3.
Yipo nye, mosiruwo sovapositoli, vaporofete woyimpempa novarwanesi usili nare va tamekere kupukisa nokuhetekera ko kuzonagura po mbungakriste. Navenye ava ava hanesa yimpempa kuhamena Jesus Kristusa nomarongo gendi kuna kara “nkore zaKristusa.” Paurusa kwa fatwilire omu Jehova a va tara pokutanta asi awo kwa ‘hamena kezonauko lyanarunye.’
TAKAMESA YIRUGANA YONONKORE DAKRISTUSA
Ngapi kuhamena naina? Vantu nonombunga edi da hamena kononkore daKristusa simpe kurwanesa Kristusa nomarongo gendi. Awo kuhanesa yimpempa mowina nositambo sokuhoreka usili kuhamena Jehova Karunga, naMunwendi Jesus Kristusa. Twa kara nokonda zongwa zokulikunga koyimpempa yangoso. Tu tareni yihonena yivali.
Monomvhura dononzi, nongereka kwa hanesa erongo lyoMutatu-gumwe, nokutanta asi Guhya noMuna kuna kara muntu gumwe tupu. Yipo nye, nkore zaKristusa kupiyaganeka nokuhoreka usili kuhamena Jehova Karunga naJesus Kristusa. Bibeli kukorangeda vantu wonomutjima donongwa va honene Jesus Kristusa nokuhedera pepi naKarunga, nye erongo lyoMutatu-gumwe kuvakondera mokuyirugana eyi.—1 Vakolinte 11:1; Jakopo 4:8.
Nongereka kukorangeda hena vantu va ruganese Nobibeli edi da dira kukara nedina lyaKarunga, Jehova. Awo kuyirugana oyo nampili ngomu edina Jehova lya moneka yikando yokupitakana po-7 000 meraka lyokuhova omu va tjenge Bibeli. Ngoyitundwamo, vantu kapi va diva edina lyaKarunga gosili.
Nye pokudiva edina lyaKarunga, Jehova, ayo kwa vatera vantu wonomutjima donongwa va hedere pepi nendi. Eyi yiyo ga limonenene Richard, ogu ga zogerere novalikwali woNombangi daJehova. Richard kwa fatwilire asi: “Awo kwa likidire nge moBibeli asi edina lyaKarunga gosili yilyo Jehova. Ayo kwa tetukisire nge pokudiva asi Karunga ga kara nedina lyamwene, sininke esi na dira kuzuvha rumwe. Kudiva edina lyaKarunga ya vatera nge ni tunge po elikwatakano lyewa kumwe nendi.” Kutunda opo, age kwa tulire po marunduruko meparu lyendi pokuparuka kuliza nonompango doBibeli nokuhafesa Jehova.
Nkore zaKristusa kwa pukisa mamiliyona govantu monomvhura dononzi. Nye kulironga Nonkango daKarunga, Bibeli, kutuvatera tu dimburure nkore zaKristusa nokumanguruka koyimpempa nomarongo gonkore zaKristusa.—Johanesa 17:17.