Huguvara sitata esi ngasi karerera

1. Yisinke ga pumbire Jesus kuhamena Jerusarema?

KOMEHO Jesus a ka fe, age kwa tanterere varongwa vendi uporofete ou wa sikire mo apa Jerusarema nontembeli zamo va zi zonagwire. Age kwa va rondwere asi Jerusarema ngava zi “kundurukida vakwayita.” (Ruk. 21:20) Jesus kwa tanterere varongwa vendi asi apa ngava mona vakwayita owo, ngava tunde mo moJudeya usimbu-simbu. Nonkango daJesus kwa sikire mo ntani Varoma kwaya kundurukidire Jerusarema.​—Ruk. 21:21, 22.

2. Epukururo musinke mupositoli Paurusa ga pere Vakriste womoJudeya naJerusarema?

² Nomvhura dongandi komeho vakwayita woVaroma va kundurukide Jerusarema, mupositoli Paurusa kwa tjangerere Vakriste womoJudeya nava womoJerusarema mbilive ezi za kere nombudi zomulyo. Azo ngesi kuzitumbura asi buke zoVahebeli. Paurusa kwa rondwere Vakriste mombilive ozo va li wapaikire yiruwo yoyidigu eyi ya kere komeho. Yisinke ya horokere? Jerusarema kwa kere pepi nokuzi zonagura po. Vakriste owo, awo ngano va parukire pokusiga mambo nonongesefa dawo. Paurusa kwa tjenge kuhamena sitata saJerusarema asi: “Ose kapi twa kara nositata sokukarerera.” Yipo ga gwederere ko asi: “Nye ose kuna kukondjera esi ngasi wiza.”​—Heb. 13:14.

3. Yisinke “sitata esi sakara netateko lyakora” ntani morwasinke natu si huguvarera?

³ Apa Vakriste va tokwere kutunda mo moJerusarema, nampo sinzi sovantu kwava zorere nokuvatara asi magova, nye etokoro olyo kwava parwire. Neina vantu kuuyunga asi ose magova morwa kapi atu huguvara moyimaliwa ntani kapi twa huguvara asi vantu kuvhura va guse po maudigu gomouzuni ou. Morwasinke atu tulire po etokoro olyo? Twa yi diva asi yininke yomouzuni ou yopokaruwogona tupu. Ose kwa huguvara moUhompa waKarunga morwa twa yi diva asi awo kwa kara ‘nositata esi sa kara netateko eli lyakora.’a (Heb. 11:10; Mat. 6:33) Nkenye siparatjangwagona somosirongwa esi tasi ka zogera:(1) omu Paurusa ga vaterere Vakriste va huguvare moUhompa waKarunga, (2) omu Paurusa ga va vaterere va tjwayuke ezonauko lyaJerusarema (3) omu epukururo lyendi nali tu vatera neina.

HUGUVARA JEHOVA MORWA KAPI NGA KU ZUMBA

4. Morwasinke sitata saJerusarema sa karerere nomulyo koVakriste?

⁴ Jerusarema kwa kere sitata somulyo koVakriste. Mbungakriste zokuhova kwa zi tulisire po mositata oso momvhura 33 ntani vanavazinyetu womombungagendesi nawo kwa kere mositata oso. Ntani hena sinzi soVakriste kwa kere nomambo mositata oso noyininke yimwe yoyinzi. Nye Jesus kwa rondwere varongwa vendi asi va hepere kutunda mo moJerusarema nomoJudeya.​—Mat. 24:16.

5. Ngapi Paurusa ga vaterere Vakriste va li wapaikire eyi ya kere komeho?

⁵ Paurusa kwa harere Vakriste va liwapaikire kutjwayuka mo moJerusarema, makura yipo gava vaterere va kwate egano omu Jehova ga tere sitata oso. Paurusa kwava diworokesere hena asi Jehova kapi ga haferere vapristeli ava ngava rugana pontembeli ntani nononzambo edi ngava gava. (Heb. 8:13) Sinzi sovantu ava va tungire mositata oso kapi va tambwire Mesiyasa. Vantu kapi hena ngava zi koJerusarema va ka karere Jehova ntani Jerusarema nontembeli kwa ya zi zonagwire.​—Ruk. 13:34, 35.

6. Morwasinke epukururo lyomoVahebeli 13:5, 6 lya karere nomulyo koVakriste?

⁶ Apa Paurusa ga tjangerere Vahebeli, Jerusarema kwa kere sitata soungawo. Mutjangi goVaroma gomosiruwo sina kwa uyungire asi: “Jerusarema kwa kere sitata sokudivikwa unene koupumezuva waJudeya.” Vajuda ava vatungire moyirongo yoyinzi ngava zi nkenye mvhura koJerusarema yipo va ka kare poyipito ntani awo kwa ruganesere yimaliwa yoyinzi mositata oso. Vakriste vamwe nampo nawo ngava gwanene mo yimaliwa yoyinzi. Ano eyi yiyo nampo yaninkisire Paurusa ava tantere asi: “Walye omu dowokere yimaliwa, nye yi mu gwanene po eyi muna kara nayo.” Makura yipo ga temwinine nonkango daJehova edi da kara moBibeli asi: “Kapi ngani mu siga ndi asi ni mu zumbe.” (Resa Vahebeli 13:5, 6; Deut. 31:6; Epis. 118:6) Vakriste owo va hepere kudiworoka nonkango odo morwa konyima zapa va gwene mbilive ezi, awo va hepere kusiga mambo gawo nonongesefa dawo ntani noyininke eyi va wekere. Awo va hepere kukatamekera ko eparu lyapeke.

7. Morwasinke natu huguvarera unene mwaJehova ngesi?

⁷ Eyi natu lirongera ko: Yisinke ngayi horoka? Udigu wounene ngau tameka ntani vantu wovadona ngava va zonagura po. (Mat. 24:21) Nose twa hepa kuliwapaikira nokuvangarara ngwendi Vakriste womosiruwo sanare. (Ruk. 21:34-36) Poudigu wounene ose kuvhura ngatu sige yiweka yetu nokukara nehuguvaro asi Jehova kapi nga zumba vantu vendi. Nampili posiruwo esi komeho udigu wounene ngau tameke ose kuvhura tu yi likide asi twa huguvara Jehova. Lipura asi: “Yirugana yange ntani noyitambo yange kulikida asi na huguvara moyiweka ndi mwaKarunga ndi? (1 Tim. 6:17) Eyi ya horokerere Vakriste womosiruwo sanare kuvhura kutuvatera yipo ngatu twikire kulimburukwa poudigu wounene, nye udigu wounene ngau digopa unene kupitakana maudigu aga atu ligwanekere nago. Ngapi omu natu diva eyi ngatu rugana apa udigu wounene ngau tameka?

LIMBURUKWENI AVA AVA PITISIRE

8. Mavyukiso musinke Jesus ga tanterere varongwa vendi?

⁸ Konyima tupu zonomvhura dongandi apa Vahebeli va gwene mbilive zokutunda kwaPaurusa, awo kwa mwene vakwayita woVaroma vana kundurukida sitata saJerusarema. Aso kwa kere siruwo esi va hepere kutjwayuka moJerusarema ezi va ya zonagwire. (Mat. 24:3; Ruk. 21:20, 24) Kupi oku va tjwayukilire? Jesus kwa uyungire asi: “Ava va kara moJudeya, ngava tjwayukire konondundu.” (Ruk. 21:21) Amo kwa kere mo nondundu dononzi. Konondundu musinke va hepere kutjwayukira?

9. Morwasinke nampo Vakriste va li pulire asi nondundu musinke nava tjwayukira? (Tara hena karata ndi map.)

⁹ Konekeni nondundu dimwe edi va hepere kutjwayukira Vakriste. Nondundu daSamaliya, nondundu daGalireya, ndundu zaHemoni, nondundu daLibanoni ntani konondundu edi da kere kesinya kwina lyomukuro gwaJorodana. (Tara karata ndi map.) Yitata yimwe eyi ya kere monondundu odo kwa monekere ngwendi mwa kere epopero lyenene. Pasihonena, sitata saGamla kwa karerere kondundu zonde ntani udigu unene kukasika ko. Vajuda vamwe kwa tere sitata oso asi evango lyewa kutjwayukira ko. Nye Varoma kwa zonagwire po sitata oso ntani nokudipaga vantu wovanzi ava va kere mo.b

10-11. (a) Ngapi omu Jehova ga geve mavyukiso kovakareli vendi? (Vahebeli 13:7, 17) (b) Uwa musinke va gwanene mo Vakriste apa va limburukwire ava ava pitisire? (Tara hena efano.)

¹⁰ Ayo kumoneka asi Jehova kwa ruganesere ava ngava pitisire mombungakriste yipo va pitisire vantu vendi. Mutjangi gehistoli Eusebius kwa tjenge asi: “Jehova kwa gendesere ava ngava pitisire yipo va tantere womombungakriste zaJerusarema va tjwayukire kositata somoPereya esi ava tumbura asi Pela.” Aso kwa kere pepi naJerusarema ntani ureru kutjwayukira mo. Sinzi sovantu ava va tungire moPela kapi va kere Vajuda ntani kapi ngava li rwanesa noVaroma.​—Tara karata ndi map.

¹¹ Vakriste ava va tjwayukilire konondundu kwa kweme epukururo lyaPaurusa eli asi: “Omu limburukwe ava ava mu pitisire” mombungakriste. (Resa Vahebeli 13:7, 17.) Ava va limburukwire evyukiso olyo kwa parukire. Jehova kapi gava zumbire morwa awo “kwa ndindilire sitata esi sa kara netateko eli lyakora” kutanta asi Uhompa waKarunga.​—Heb. 11:10.

12-13. Ngapi omu Jehova ga pitisilire vantu vendi moyiruwo yoyidigu?

¹² Eyi natu lirongera ko: Jehova kuruganesa ava ava pitisire va gave mayukiso kovantu vendi. MoBibeli kwa kara mo yihonena eyi ayi likida omu Jehova ga ruganesere vagara wovalimburukwi yipo va pitisire vantu vendi moyiruwo yoyidigu. (Deut. 31:23; Epis. 77:20) Neina ose kuna kumona omu Jehova ana kuruganesa vagara wovalimburukwi va pitisire vantu vendi.

¹³ Pasihonena apa uvera woKorona wa tamekere, vanavazinyetu ava ava pitisire kwa geve mavyukiso konombungakriste. Vakuronambunga kwa gwene mavyukiso omu nava vatera womombungakriste va twikire kukarera Jehova. Konyima zomakwedi gomasesu, ose kwa kere nosigongi somazuva gatatu momaraka gokupitakana po-500, esi sa pitilire kotivi, kointernet ntani koradiyo. Ose kwa kere mouumwe morwa Jehova kwa twikilire kuturonga. Yikare asi maudigu musinke ngatu ligwanekera nago komeho tuna si huguvara nawa-nawa asi Jehova nga twikira kuruganesa ava ava pitisire yipo va tu pe mavyukiso gomawa. Kugusa ko kuhuguvara mwaJehova ntani nokulimburukwa nompango dendi, yikara musinke nayi tu vatera tu liwapaikire udigu wounene?

LILIKIDENI EHARO LYOSIUMBYA NOKULITAMBURA TAMBURA

14. Kuliza noVahebeli 13:1-3, yikara musinke va hepere kulilikida Vakriste komeho va zi zonagure po Jerusarema?

¹⁴ Posiruwo soudigu wounene ose ngatu hepa kulilikida eharo kupitakana omu tuna kuyirugana ngesi. Posiruwo oso ngatu honena Vakriste ava va tungire moJerusarema nomoJudeya. Awo kwa li here. (Heb. 10:32-34) Nye monomvhura edi da twaredesere kezonauko lyaJerusarema, Vakriste va hepere kulilikida unene ‘eharo lyosiumbya’ ntani ‘nokutambura vagenda.’c (Resa Vahebeli 13:1-3.) Ngomu tuna kuhedera pepi nouhura wouzuni ou, nose twa hepa kuhara unene vakwetu.

15. Morwasinke Vakriste va heperere kulilikida eharo lyosiumbya ntani nokulitambura tambura apa va tjwayukire?

¹⁵ Konyima zapa vakwayita woVaroma va kundurukidire Jerusarema ntani nokutengura, Vakriste yipo va tjwayukire noyininke yoyisesu. (Mat. 24:17, 18) Ngomu Vakriste va tjwayukilire konondundu nokukatunga ko, awo va hepere kuvatera Vakriste vakwawo. Vakriste owo va hepere kulikida vakwawo eharo lyenene ntani nokuvatambura. Pasihonena, pokuvapa ko nondja noyidwara ntani evango oku nava kara.​—Tit. 3:14.

16. Ngapi natu yi likida asi twa hara vanavazinyetu? (Tara hena efano.)

¹⁶ Eyi natu lirongera ko: Eharo kututumangeda tu vatere vanavazinyetu. Sinzi sovanavazinyetu kwa vatera vanavazinyetu ava va tjwayukira koyirongo yapeke morwa yita ntani yimpagwa pokuvakorangeda nokuvapa yininke eyi vana hepa. Munazinyetu gomukadi gomoUkraine ogu ga tjwayuka membo lyendi morwa yita kwa tanta asi: “Jehova kwa ruganesa vanavazinyetu yipo va tu vatere nokutupitisira. Awo kwa tu tambwire nokutuvatera apa twa kere moUkraine, moHungary ntani kuna kutuvatera simpe moGermany.” Jehova kuturuganesa yipo tu tambure vanavazinyetu nokuvapa yihepwa yawo.​—Yis. 19:17; 2 Kol. 1:3, 4.

17. Morwasinke yina karere nomulyo ngesi tu tunge po eharo lyosiumbya ntani nokutambura vakwetu?

¹⁷ Komeho ose ngatu ka vatera unene vanavazinyetu kupitakana omu tuna kuyirugana ngesi. (Hab. 3:16-18) Jehova kuna kutudeura ngesi yipo tu tunge po eharo lyosiumbya ntani nokutambura vakwetu morwa yikara eyi ngayi ka tu vatera komeho.

YISINKE NGAYI KA HOROKA KOMEHO?

18. Yisinke natu lirongera ko koVakriste ava vatjwayukire sitata saJerusarema?

¹⁸ Vakriste ava va tjwayukilire konondundu kwa parukire apa Jerusarema va zi zonagwire. Jehova gava pakerere mbili nampili ngomu va sigire yininke yawo nayinye. Yisinke natu lirongera ko? Nampili ngomu twa dira kudiva nayinye eyi ngayi horoka komeho, Jesus kwa tu rondwere tu vangarare. (Ruk. 12:40) Kuvhura tu kwame mapukururo gaPaurusa aga ga kere mombilive ezi ga tjangerere Vahebeli. Jehova kwa tu tumbwidira asi kapi ngatu siga ndi asi a tu zumbe. (Heb. 13:5, 6) Tu twikireni kuhuguvara Uhompa waKarunga, sitata esi ngasi karerera yipo ngatu ka hafere mauwa aga ngasi ka reta.​—Mat. 25:34.