Matai
17 Vava kiavioka lumbu sambanu, Yesu obongele Petelo, Yakobo ye Yoane wa mbunzi andi, ubanete kuna mongo andá, vana va yau kaka. 2 Okitukidi vana bena; e ndose andi ikezimini nze ntangwa, e mvuatu miandi mivuidi kezima* nze ntemo. 3 I bosi, Mose yo Eliya bamonekene vana bena, bamokene yandi. 4 Petelo ovovese Yesu vo: “E Mfumu, diambote kwa yeto twakala vava. Avo ozolele, se yatunga saba tatu ovava, kimosi kiaku, kimosi kia Mose, e kimosi kia Eliya.” 5 Una kavovelenge, e tuti diantemo dibayitalele, i bosi e ndinga itukidi muna tuti, oku vo: “Ndioyu i Mwan’ame anzolwa, ona iyangalelanga. Nunwila.” 6 Vava bawidi wo, alongoki babukikidi e ndose zau, bamwene kikilu o wonga. 7 I bosi, Yesu wizidi, ubasimbidi, ovovele vo: “Nutelama. Ke numoni wonga ko.” 8 Vava basengwele o meso, ke bamwene muntu ko, kansi Yesu kaka. 9 Wau bekulumukanga kuna mongo, Yesu ubakanikini vo: “Ke nuzayisi e mona-meso kiaki kwa muntu ko yavana Mwan’a muntu kefuluka muna mafwa.”
10 Kansi, alongoki banyuvuidi vo: “Ozevo, ekuma asoneki bevovelanga vo Eliya kafwete teka kwiza?” 11 Ovutwidi vo: “Kieleka, Eliya oteka kwiza, ovutula e lekwa yawonso una yakala. 12 Kansi, inuvovese vo, Eliya wayiza kala, ke bansungamena ko, kansi bamvanga mawonso bazola. Diau adimosi mpe, o Mwan’a muntu omweswa e mpasi vana moko mau.” 13 I bosi, alongoki babakwidi vo Yoane wa Mvubi kabazayisi.
14 Wau balueke vana vena ndonga, muntu mosi umfinamene, yo kumfukamena, oku vo: 15 “E Mfumu, fwila mwan’ame e nkenda, kadi nkwa niangi, oyelele. Nkumbu miayingi kebwanga vana tiya ye muna maza. 16 Intwese kwa alongoki aku, kansi ke balendele kunwuka ko.” 17 Yesu ovutwidi vo: “E mbandu yakondwa lukwikilu yo bendomoka, yamu nkia kolo ikwamanana kala yeno? Yamu nkia kolo izizidila mavangu meno? Untwasa ova ngina.” 18 I bosi, Yesu otumbidi nkuya, uvaikidi muna yandi, o nleke osasukidi tuka muna ntangwa yayina. 19 I bosi, alongoki bezidi kwa Yesu vana fulu kia yau kaka, banyuvuidi vo: “Ekuma oyeto ke tulendele wo vaikisila ko?” 20 Ubavutwidi vo: “Mu kuma kia filukwikilu fieno. Kadi, kieleka inuvovese vo, avo lwina ye lukwikilu nze disu dia mutade,* nuvovesa mongo wau vo, ‘Yaluka ova yo kwenda kuna,’ uyaluka, ke vekala diambu dina ke nulenda vanga ko.” 21 ——
22 Una bakutakene vamosi muna Ngalili, Yesu ubavovese vo: “O Mwan’a muntu oyekolwa vana moko ma wantu, 23 bekumvonda, ye muna lumbu kietatu ofulwa.” Bakendalele kikilu.
24 Wau balueke muna Kafanau, avakulwisi a mpaku a tempelo* bezidi kwa Petelo, banyuvuidi vo: “Nga o nlongi eno ke futanga mpaku a tempelo ko e?” 25 Ovutwidi vo: “Ingeta.” Kansi, una kakotele muna nzo, Yesu otekele kumvovesa vo: “Adieyi oyindwidi e Simone? Kw’aki nani atinu a nza betambulanga e vaku yovo mpaku? Kwa wan’au yovo kwa nzenza?” 26 Una kavutwidi vo: “Kwa nzenza,” Yesu umvovese vo: “Kieleka, o wana bavevokele muna mpaku. 27 Kansi, muna lembi kubatesesa e sakuba, wenda kuna mbu, tuba o luvaku, bong’e mbizi antete otakula, vava oziula o nu’andi osolola mo palata* mosi. Bonga yo, futa e mpaku mu kuma kia mono yo ngeye.”