Matai
20 “Kadi e Kintinu kia zulu kina nze mfumu a nzo, ona ovaikidi mu mene-mene, wele vavi asadi benda sadila muna mpatu andi a vinyu. 2 Vava kawizanene ye asadi vo denali imosi kekubafuta muna lumbu, ubatumini muna mpatu andi a vinyu. 3 Ovaikidi diaka muna tezo kia ola yetatu,* omwene ankaka bakondelo e salu, batelamene vana zandu, 4 ubavovese vo, ‘Oyeno mpe, nwenda sala muna mpatu a vinyu, ikunufuta konso kina kinufwene.’ 5 Bele kuna mpatu. Ovaikidi diaka muna tezo kia ola yasambanu* ye ina yevua,* ovangidi diau dimosi. 6 I bosi, muna tezo kia ola ya 11,* ovaikidi, omwene ankaka batelamene, ubayuvuidi vo, ‘Ekuma nutelamene ovava mwini amvimba yeno ke nukadi ye salu?’ 7 Bavutwidi vo, ‘Kadi ke vena muntu ko utubakidi mu salu.’ Ubavovese vo, ‘Oyeno mpe nwenda sala muna mpatu a vinyu.’
8 “Muna nkokela, o mfumu a mpatu a vinyu ovovese selo kiandi vo, ‘Bokela asadi, wabafuta, tuka muna awana basukinini yamuna awana bavitidi.’ 9 Vezidi awana bayantikidi e salu muna ola ya 11, konso muntu otambwidi denali imosi. 10 Ana bavitidi vava bezidi, bayindwidi vo nzimbu zayingi befutwa, kansi yau mpe batambwidi denali imosi. 11 Una batambwidi yo, bayantikidi yidimina mfumu a nzo, 12 oku vo, ‘Awaya basukinini ola mosi kaka basadidi; kansi batambwidi mfutu wau mosi yo yeto tufuntukidi lumbu kiamvimba ye mwini!’ 13 Ovovese mosi muna yau, oku vo, ‘E nkw’ame, kivangidi diambi ko. Ke denali imosi ko tuwizanene? 14 Tambula o mfutu aku, wenda kwaku. Nzolele vana kwa ndiona osukinini mfutu wau mosi yo ngeye. 15 Ke diansongi ko kwa mono yavanga konso dina nzolele muna nzimbu zame? Yovo disu dia kimpala* una diau wau ibavangidi edi diambote?’ 16 Dianu vo, ana besukinina bevita, ana bevita besukinina.”
17 Una se betomboka kuna Yerusaleme, Yesu onete alongoki 12 vana fulu kia yau kaka, ubavovese vo: 18 “Se tutomboka kuna Yerusaleme, o Mwan’a muntu oyekolwa vana moko ma nganga zambuta ye asoneki. Bekunzengela tumbu kia lufwa 19 yo yekolwa vana moko ma esi zula* bansakanena yo kunzwabula yo kumvondela vana nti; ofulwa muna lumbu kietatu.”
20 I bosi, ngudi a wan’a Zebedayo unluakidi yo wan’andi wole, unkundidi,* kanlomba e diambu. 21 Yesu unyuvuidi vo: “Adieyi ozolele?” Umvutwidi vo: “Yambula vo wan’ame awaya yau awole, bavuanda muna Kintinu kiaku, mosi kuna koko kwaku kwalunene, wankaka kuna koko kwalumonso.” 22 Yesu ovutwidi vo: “Oyeno ke nuzeye dio ko dina nulombele. Nga nulenda nua e kopo dina inu’e?” Bamvutwidi vo: “Tulenda kweto.” 23 Ubavutwidi vo: “Kieleka, nulenda kweno nua e kopo diame, kansi edi dia vuanda ku koko kwame kwalunene ye kwalumonso, ke diame ko diakunuvana dio, kadi dia awana kaka bakubikilwa dio kwa Se diame.”
24 Yau kumi vava bawidi wo, bafungidi makasi mu kuma kia mpangi zole zazi. 25 Kansi, Yesu ubabokele, ubavovese vo: “Nuzeye wo vo atinu a zula bediatidilanga nkangu, akwa tunda mpe bena ye wisa muna yau. 26 Ke wau ko difwete kala vovo nwina; kansi konso ona ozolele kala nene vovo nwina, kafwete kala selo kieno, 27 konso ona ozolele kala se ntu vovo nwina, kafwete kala se ntaudi eno. 28 Diau dimosi yo Mwan’a muntu, kayiza sadilwa ko, kansi kasadila kaka yo vana moyo andi se lukûlu lwa wantu ayingi.”
29 Una se bevaika muna Yeriko, ndong’ayingi inlende. 30 Mpofo zole zifongele vana mbel’a nzila, vava bawidi wo vo Yesu oviokanga, bakazidi: “E Mfumu, e Mwan’a Davidi, utufwil’e nkenda!” 31 E ndonga ibatumbidi, ibavovese babutama; kansi basakisi okaza, oku vo: “E Mfumu, e Mwan’a Davidi, utufwil’e nkenda!” 32 Yesu oningamene, ubabokele yo kubayuvula: “Adieyi nuzolele yavanga kwa yeno?” 33 Bamvutwidi vo: “E Mfumu, yambula meso meto matemoka.” 34 Yesu ubafwididi e nkenda, oviakane meso mau, vana vau bamwene, banlende.