Maku
7 Afarisi y’asoneki akaka batukidi kuna Yerusaleme, balungalakene vana kena. 2 Bamwene ankaka muna alongoki andi bedilanga muna moko mafunzuka, i sia vo, malembi sukulwa.* 3 (Kadi Afarisi ye Ayuda awonso, avo ke basukwidi moko mau ko yamuna kongonia, ke bedia ko, lusansu lwa akulu belundanga. 4 Vava betukanga kuna zandu, ke bedianga ko, avo ke bayisukwidi ko. Vena ye tusansu twayingi batambula yo lunda, nze mvub’a makopo, mvungu ye yinzu yansongo muna maza.) 5 Dianu vo, Afarisi awaya y’asoneki banyuvuidi vo: “Ekuma alongoki aku ke bezitisilanga lusansu lwa akulu ko, kadi bedianga muna moko mafunzuka?” 6 Ubavovese vo: “Yesaya watoma sakula mu kuma kieno, yeno akwa kivunina, una diasonama vo, ‘Wantu awaya muna nua kaka bekunzitisilanga, kansi e ntima miau miavavuka oku ngina. 7 Mu nkatu bekunsambilanga, kadi malongi mau mu nkanikinu mia wantu metukanga.’ 8 Nubembwele nkanikinu mia Nzambi yo lunda nkanikinu mia wantu.”
9 Ubavovese diaka vo: “Kuna ndekwa zawonso nubembwele nkanikinu mia Nzambi kimana nwatatidila lusansu lweno. 10 Mose wavova vo, ‘Zitisa se diaku yo ngudi aku,’ ‘Ndiona olevola* se diandi yovo ngudi andi, yambula kavondwa.’ 11 Kansi, oyeno nuvovele vo, ‘Avo muntu vovese se diandi yovo ngudi andi vo: “Eki ngina kiau kiadi kusadisa i kobana (i sia vo, lukau ivana kwa Nzambi),”’ 12 ke nukunyambula diaka ko kasadisa se yovo ngudi andi. 13 Dianu vo, nuvezele diambu dia Nzambi mu kuma kia lusansu nwasikidisa yeno kibeni. Mambu mayingi nuvanganga mena nze i mama.” 14 Muna diadi, obokele ndonga yafinama, ubavovese vo: “Nungwá yeno awonso, nwabakula e nsasa. 15 Ke vena ma ko kituka kuna mbazi, ovo kikotele muna muntu, kilenda kumfunzula; kansi mana metukanga muna muntu, i mau mekumfunzulanga.” 16 ——
17 Una kasisidi e ndonga yo kota muna nzo, alongoki andi bayantikidi kunyuvula mu kuma kia kingana. 18 Ubavovese vo: “Oyeno mpe ke nubakwidi ko e? Nga ke nuzeye wo ko vo ma kitukidi kuna mbazi, avo kikotele muna muntu ke kilendi kumfunzula ko, 19 kadi ke kikotele mu ntima ko, mu vumu kaka, yo vaika kuna fut’e?” Wau kavovele ediadi, osongele vo madia mawonso mavelela. 20 Ovovele diaka vo: “Mana mevaikanga muna muntu, i mau mekumfunzulanga. 21 Kadi muna kati, i sia vo, muna ntim’a muntu, i mutukanga makani mambi, zumba,* wivi, vonda, 22 mavangu ma zumba, loko, mavangu ma umpumbulu, luvunu, mavangu mansoni,* kimpala, lutiangu, lulendo ye uzowa. 23 O mambu mama mawonso mambi muna kati metukanga yo funzula muntu.”
24 Okatukidi kwakuna, wele muna zunga kia Turo ye Sidone. Okotele muna nzo, kazolele ko muntu kazaya wo, kansi kalendele swekama ko. 25 O nkento una ye dumbelele kina yo mwand’a usafu vava kawidi e nsangu zandi, wizidi fukama vana malu mandi. 26 O nkento Mungerekia kakala, mwisi Nsuro-finiki; undodokele kavaikisa nkuya muna mwan’andi a nkento. 27 Kansi, Yesu umvutwidi vo: “Yambula wana bayukuta ntete, kadi ke diansongi ko mu bonga madia ma wana yo tuba mo kwa wan’a mbwa.” 28 Kansi, umvutwidi vo: “Ingeta e mfumu, o wan’a mbwa kunansi a meza i bedilanga nkesona zisotolanga yingiana-ngiana.” 29 Umvovese vo: “Mu kuma kia dina ovovele, wenda kwaku; o nkuya uvaikidi muna mwan’aku ankento.” 30 Wele kuna nzo andi, owene dumbelele waleka vana mfulu, o nkuya umvaikidi.
31 O Yesu una kakatukidi muna zunga kia Turo, oviokele muna Sidone, muna Mbu a Ngalili yakuna zunga kia Dekapole.* 32 Bantwasidi muntu wafwa matu ye nkukumi, bandodokele kantenseka koko kwandi. 33 Unkatwidi vana vena ndonga, wele yandi vana fulu kia yau kaka. I bosi, osidi e nlembo muna matu mandi, otawidi mete, oviakane lubini lwandi. 34 Osengwele meso kuna zulu yo vumuka, umvovese vo: “Efata,” i sia vo, “Kakuka.” 35 O matu mandi makakukidi, eki kiankanganga o lubini lwandi kikutulukidi, oyantikidi vova kiambote. 36 Ubakanikini vo ke bazayisi dio kwa muntu ko, kansi wau kakwamanene kubakanikina, basakisi nkutu samuna dio kwa wantu. 37 Basivikidi kikilu yo vova vo: “Mawonso kavangidi mambote kikilu. Afwa matu nkutu wisa, e mababa vovesa.”