Maku

8 Muna lumbu yayina, vakedi diaka ndong’ayingi, ke bena ye madia ko. Dianu vo obokele alongoki andi, ubavovese vo: 2 “Mfwididi ndonga e nkenda, kadi lumbu tatu banangini yame, ke bena ye ma kia dia ko. 3 Avo ibasindikidi ye nzala muna nzo zau, mfune befwa muna nzila, akaka muna yau kwanda batukidi.” 4 Kansi, alongoki andi bamvutwidi vo: “Ovava va makanga, akweyi tubakila e mbolo zafwana ziyukutisa ndonga yayi?” 5 Muna diadi, ubayuvuidi vo: “Mbolo kwa nuna zau?” Bamvutwidi vo: “Nsambwadi.” 6 Ovovese e ndonga bafonga vana ntoto. I bosi, obongele mbolo zau nsambwadi, ovutwidi matondo, obukunwini zo, ovene zo kw’alongoki, bakayidi zo kwa ndonga. 7 Bakedi mpe ye nzonzi zakete, osambwidi zo, ubavovese mpe vo bakaya zo. 8 Badidi yo yukuta, bakutikidi e nkesona zina zasuva, yitunga nsambwadi yanene yazala. 9 Tezo kia 4.000 ma akala. I bosi, ubasindikidi.

10 Vana vau okotele muna nzaza y’alongoki andi, bele kuna zunga kia Damanuta. 11 Kwakuna, Afarisi bayantikidi kumfidis’e mpaka, muna kuntonta, banlombele kabasong’e sinsu kituka kuna zulu. 12 Ovumukini muna ntima yo vova vo: “Ekuma mbandu yayi ivavilang’e sinsu? Kieleka inuvovese vo, ke vena sinsu ko kisongwa kwa mbandu yayi.” 13 Muna kuma kiaki, ubasisidi, okotele diaka muna nzaza, osaukidi kuna simu diankaka.

14 Kansi, bavilakene nata e mbolo, ke bakedi ye madia ko muna nzaza, nanga mbolo mosi kaka. 15 Otomene kubakanikina, oku vo: “Nulungalala; nuyikenga ye mfuna ya Afarisi ye ya Erodi.” 16 Bayantikidi tantana wau ke bena ye mbolo ko. 17 Wau kabakwidi wo, ubavovese vo: “Ekuma nutantanenanga wau ke nuna ye mbolo ko? Yamu wau ke nuzeye wo kaka ko yo lembi bakula e? Nga e ntima mieno miakangama kaka yo lembi bakula e? 18 ‘Nuna yo meso; yeno ke numoni, nuna mpe yo matu, yeno ke nuwe.’ Nga ke nusungamene ko 19 vava yabukunwina 5.000 ma akala e mbolo tanu, yitunga kwa ya nkesona nwakukita?” Bamvutwidi vo: “Kumi ye zole.” 20 “Vava yabukunwina 4.000 ma akala e mbolo nsambwadi, yitunga kwa yanene ya nkesona nwakutika?” Bamvutwidi vo: “Nsambwadi.” 21 Ubavovese vo: “Yamu wau ke nubakwidi ko e?”

22 Balueke kuna Betesaida. Bantwasidi mpofo mosi, bandodokele vo kamviakana. 23 Osimbidi e mpofo muna koko, unète kuna mbazi a vata. Una katauwidi mete muna meso mandi, untensekele moko, unyuvuidi vo: “Nki omwene?” 24 Osengwele meso, ovovele vo: “Wantu mbwene, bena nze nti, kansi bediatanga.” 25 Untensekele diaka e moko muna meso, otomene mona. O meso mandi mavutukidi una makala, otomene mona lekwa yawonso. 26 Unsindikidi kuna nzo, oku vo: “Kukoti vana kati kwa vata ko.”

27 Yesu y’alongoki andi bele muna mavata ma Kaisaria-Filipi, muna nzila oyantikidi yuvula alongoki andi, oku vo: “O wantu nani bekungikilanga?” 28 Bamvovese vo: “Yoane wa Mvubi, kansi ankaka vo, Eliya, vo i ankaka, mosi muna angunza.” 29 I bosi, ubayuvuidi vo: “Oyeno, nani nukungikilanga?” Petelo umvutwidi vo: “Ongeye u Kristu.” 30 Otomene kubakanikina vo ke bazayisi dio kwa muntu ko. 31 Oyantikidi kubalonga vo, o Mwan’a muntu kafwete mwesw’e mpasi zayingi yo bembolwa kw’akuluntu, kwa nganga zambuta y’asoneki, yo vondwa yo fuluka muna lumbu kietatu. 32 Otomene kubakiesesela wo. Kansi Petelo unète vana ndambu, oyantikidi kunsemba. 33 Dianu vo, ovilukidi, otadidi alongoki andi, osembele Petelo, oku vo: “Viluka oku nim’ame, e Satana! kadi kuna ye ngindu za Nzambi ko, za wantu kaka.”

34 Obokele e ndonga kumosi y’alongoki andi, ubavovese vo: “Konso ona ozolele kwiz’andandi, yambula kayivanina o nkalu yo nata nti andi ampasi* yo kwamanana kundanda. 35 Kadi konso ona ozolele vuluza moyo andi, vidisa kevidisa wo, kansi konso ona ovidisa moyo andi muna kuma kiame ye mu kuma kia nsangu zambote, vuluza kevuluza wo. 36 Ozevo, nkia mfunu dikala kwa muntu avo obakidi e nza yawonso yo vidisa moyo andi? 37 Nkia lekwa kalenda vana o muntu vana fulu kia moyo andi? 38 Kadi konso ona okumbwen’e nsoni ye mambu mame vana vena mbandu yayi ya minta-zumba,* yasumuka, o Mwan’a muntu okumwena mpe e nsoni vava kekwiza muna nkembo a Se diandi ye mbasi zandi zavelela.”