Wantete wa Tusansu
21 Satana* otelamene Isaele yo vukumuna Davidi katanga Isaele.+ 2 Muna kuma kiaki, Davidi ovovese Yoabe+ ye mbuta za nkangu vo: “Nuenda tanga Isaele, tuka kuna Bere-seba yakuna Dani;+ i bosi nuiza kunzayisa lutangu lwau.” 3 Yoabe ovovele vo: “Yambula Yave kawokesa o nkangu andi nkumbu 100! E mfumu ame wa ntinu, yau awonso ke ntaudi za mfumu ame ko e? E mfumu ame ekuma ozolele vangila diambu diadi? Ekuma ozolele natisina Isaele sumu?”
4 Kansi o mvovo wa ntinu usundidi o mvovo wa Yoabe. O Yoabe ovaikidi, wele muna Isaele yawonso, i bosi ovutukidi muna Yerusaleme.+ 5 Yoabe ovene kwa Davidi lutangu lwa nkangu una katangidi. Muna Isaele yawonso mwakala 1.100.000 bakala ye nsosolo, muna Yuda mwakala 470.000 ana bakala ye nsosolo.+ 6 Kansi, kanda dia Levi ye kanda dia Benyamini ke diatangwa ko,+ kadi mvovo a ntinu ke wayangidika Yoabe ko.+
7 Ediadi dikendelekele kikilu Nzambi aludi, muna kuma kiaki, otumbidi Isaele. 8 Davidi ovovele kwa Nzambi aludi vo: “Nsumukini+ kikilu muna diambu diadi mpangidi. Owau, dodokolo loloka e sumu dia selo kiaku,+ kadi dia uzowa kikilu mpangidi.”+ 9 Yave ovovese Ngadi+ wa moni a Davidi, oku vo: 10 “Wenda vovesa Davidi vo: ‘I wau wuwu kavovele o Yave: “Mambu matatu isongele. Sola dimosi dina mfwete kuvanga.”’” 11 Ngadi wizidi kwa Davidi, umvovese vo: “I wau wuwu kavovele o Yave, ‘Sola dina ozolele, 12 mvu tatu mia mvengele,+ yovo ngonde tatu ofwasakeswa kwa atantu aku muna nsosolo,+ yovo lumbu tatu ya nsosolo a Yave—vuku kikala mu nsi,+ e mbasi a Yave otwasa lufwasu+ muna mvivu miawonso mia Isaele.’ Owau toma yindula, unzayisa e mvutu ndenda vana kwa Ndiona untumini.” 13 Davidi ovovese Ngadi vo: “Ediadi diampasi kwa mono. Dodokolo, yambula yabwila vana koko kwa Yave, kadi e nkenda zandi zingi;+ kansi kungiambula ko yabwa vana moko ma wantu.”+
14 Yave otwikidi vuku+ muna Isaele, ozevo muna nkangu a Isaele mufwidi 70.000.+ 15 Vana ntandu, Nzambi aludi otumini mbasi kuna Yerusaleme kafwatakesa yo; kansi una se kevanga wo, Yave otadidi, omwene ntantu muna lufwasu lwalu,+ ovovese mbasi ona wavondanga nkangu vo: “Sila vovo!+ Kulula koko kwaku.” O mbasi a Yave otelamene vana ndambu a bundilu dia Orenane+ wa Nyebuse.+
16 Davidi vava kasengwele meso, omwene mbasi a Yave otelamene vana kati kwa ntoto ye zulu, una yo nsosolo+ avoloka vana koko ulambwilu muna Yerusaleme. Davidi ye akuluntu bakifukidi e ngoto,+ vana vau babwidi mambukama vana ntoto.+ 17 Davidi ovovele kwa Nzambi aludi vo: “Nga ke mono ko yavovele vo nkangu watangw’e? Mono nsumukini, mono mpangidi diambu diambi;+ vo i mameme mama—adieyi mavangidi? E Yave wa Nzambi ame, yambula koko kwaku kwakala omu mono yo mu nzo a se diame; kansi kutwasi vuku kiaki kwa nkangu aku ko.”+
18 O mbasi a Yave otumini Ngadi+ kavovesa Davidi vo katomboka kuna bundilu dia Orenane wa Nyebuse,+ katungila Yave e ziku. 19 Davidi otombokele mun’owu wa diambu dia Ngadi dina kavovele muna nkumbu a Yave. 20 I bosi, Orenane ovilukidi, omwene mbasi, o wan’andi yau yá bakala yandi basweme. Orenane witi kabundanga. 21 Vava Davidi kalweke kwa yandi, Orenane otadidi, omwene Davidi, vana vau okatukidi vana bundilu, ovumbamene vana vena Davidi. 22 Davidi ovovese Orenane vo: “Untekela* bundilu diaku yatungila Yave e ziku. Untekela dio muna ntalu andi kimana e vuku kiafokoka muna nkangu.”+ 23 Orenane ovovese Davidi vo: “Bonga dio kwaku, yambula mfumu ame wa ntinu kavanga edi kamwene vo diambote.* Ikuvana e ngombe za tukau twangioka ye mabaya ma bundilu+ se nkuni ye witi* se lukau lwa mbwaza. Ivene yawonso.”
24 Davidi wa Ntinu ovovese Orenane vo: “Ke wau ko, sumba isumba dio muna ntalu andi, kadi kizolele baka lekwa kiaku ko yatambika kio kwa Yave, ngatu tambika tukau twangioka tuna ndembele futila e nzimbu.”+ 25 Muna kuma kiaki, Davidi ovene kwa Orenane 600 za sekele* za wolo mu kuma kia fulu. 26 Davidi otungidi vo e ziku+ dia Yave, otambikidi tukau twangioka ye yimenga ya ungudi yo bokela Yave ona umvene e mvutu tuka kuna zulu muna twika tiya+ vana ziku dia lukau lwa ngioka. 27 Yave ovovese mbasi+ kavutula nsosolo andi muna kutu. 28 Davidi vava kamwene vo Yave umvene mvutu vana bundilu dia Orenane wa Nyebuse, okwamanene kelela yimenga vana fulu kiakina. 29 E saba kia Yave kina Mose kavanga muna makanga ye ziku dia tukau twangioka, e ntangwa yayina diakala vana bata kuna Ngibone.+ 30 Kansi, Davidi kayendanga kûna ko muna yuvula Nzambi, kadi wonga kamonanga mu kuma kia nsosolo wa mbasi a Yave.