Wantete wa Tusansu
23 Davidi vava kanunini yo finama ku mfoko a zingu kiandi,* otumbikidi mwan’andi Solomo se ntinu muna Isaele.+ 2 Olungalakese akuluntu awonso a Isaele,+ anganga ye Anelevi.+ 3 Anelevi batangwa, tuka ana bakala ye mvu 30 yovo vioka;+ o lutangu lwa yau awonso, ntu muna ntu, 38.000. 4 Muna lutangu lwalu, 24.000 bakala se akengi a salu kia nzo a Yave, 6.000 ma mbanda-mbanda ye afundisi,+ 5 vakala ye 4.000 ma ayingidi a mavitu+ ye 4.000 bakembelelanga Yave+ ye masikilu mana Davidi kavovela vo: “Mpangidi mo muna kembelela Nzambi.”
6 I bosi, Davidi ubavambwidi muna buka-buka,+ muna Anelevi: Ngeresone, Koate yo Merare.+ 7 Muna Anengeresone: Ladani yo Simei. 8 O wan’a Ladani: Yekiele, Zetame yo Yoele,+ atatu. 9 O wan’a Simei: Selomote, Kaziele yo Karani, atatu. E miami i ntu mia nzo za mase ma Ladani. 10 O wan’a Simei: Yakati, Zina, Yusi yo Bereya. Yau nyá, wan’a Simei. 11 Yakati i ntu, o Ziza wanzole. Wau vo Yusi yo Bereya ke bakala ye wan’a makala ayingi ko, batangwa se nzo mosi a mase ana bakala ye kiyekwa kimosi.
12 O wan’a Koate: Amerame, Yisa,+ Keberone yo Uziele,+ nyá. 13 O wan’a Amerame: Arone+ yo Mose.+ Kansi Arone wavambulwa mvimba kimana kavaula+ e Fulu Kisundidi o Vauka, yandi yo wan’andi batambikanga yimenga vana vena Yave yo kunsadila yo sambula nkangu muna nkumbu andi yakwele mvu.+ 14 Vo i Mose wa muntu a Nzambi aludi, wan’andi batangwa muna kanda dia Anelevi. 15 O wan’a Mose: Ngeresome+ yo Elieze. + 16 Muna wan’a Ngeresome, Sebuele+ i ntu. 17 Muna wan’a Elieze, Rekabeya+ i ntu; Elieze kakala ye wan’amakala ankaka ko, kansi Rekabeya wakala ye wan’amakala ayingi. 18 Muna wan’a Yisa,+ Selomite+ i ntu. 19 O wan’a Keberone: Yereya i ntu, Amareya wanzole, Yakaziele wantatu, Yekamame+ wa nyá. 20 Muna wan’a Uziele,+ Mika i ntu, wanzole Yisiya.
21 O wan’a Merare: Makele yo Musi.+ Wan’a Makele: Elaza yo Kisi. 22 Elaza wafwa lembi wuta wan’amakala, wan’amakento kaka kawuta. Muna kuma kiaki, o wan’a Kisi bena vo i yitu yau,* bababonga se akazi au. 23 O wan’a Musi: Makele, Ede yo Yeremote, atatu.
24 Awaya i wan’a Levi muna nzo za mase mau, muna ntu mia nzo za mase. Batangwa yo sonekwa muna ndandani a nkumbu zau, yau basalanga e salu ya nzo a Yave tuka muna kimbuta kia mvu 20 yovo vioka. 25 Kadi Davidi wavova vo: “Yave wa Nzambi Isaele ovene vundu kwa nkangu andi,+ okala muna Yerusaleme yakwele mvu.+ 26 Anelevi mpe ke benata diaka saba ko ngatu salanganu yandi ya salu.”+ 27 Mun’owu wa luludiku lwansuka lwa Davidi, Anelevi batangwa, tuka mun’awana bakala ye mvu 20 yovo vioka. 28 Yau bakala ye kiyekwa kia sadisa wan’a Arone+ muna salu kia nzo a Yave, muna lunga-lunga yanzala,+ masuku madila, velelesa salanganu yawonso yavauka ye konso salu kiasalwanga muna nzo a Nzambi aludi. 29 Yau mpe basadisanga muna kubika mbolo za lubakanisu,*+ mfumfu yambote mu kuma kia lukau lwa mbwaza, mbolo zababama zakondwa mfuna,+ mbolo zakangwa vana mênga,+ mbumba wasangwa mazi, nzongo ye tezelo yawonso. 30 Batelamanga konso mene+ yo masika muna kembelela Yave yo kumvutula matondo.+ 31 Basadisanga muna tambika tukau twangioka kwa Yave muna Lumbu ya Vundu,+ muna nzangama za ngonde,+ muna nsungi za nkinzi,+ landila lutangu lwavuwanga o mfunu, i wau bavanganga ntangwa ke ntangwa vana vena Yave. 32 Balunga-lunganga mpe saba kia wananina, fulu kiavauka yo sadisa mpangi zau, wan’a Arone muna salu kia nzo a Yave.