Nekemiya

4 Vava Sambalati+ kawá wo vo yaka twatungululanga, ofwemene, ofungidi kikilu makasi, oyantikidi veza Ayuda. 2 Ovovele vana ntadisi a mpangi zandi yo makesa ma Samariya, oku vo: “Nki bevanganga Ayuda awaya atovoki? Nga babenze vo lenda belenda kio? Nga yimenga bekela? Nga bemanisa kio tunga mu lumbu kimosi? Nga befutumuna matadi mayokwa muna mafuku e?”+

3 Tobiya+ wa Nyamone+ ona wakala vana ndambu andi, ovovele vo: “Kana nkutu mfwenge imente vana yaka kina betunganga, bangula kebangula yaka kiau kia matadi.”

4 Wá, e Nzambi eto, kadi tuvezelo,+ yambula luvezo lwau lwavutuka muna ntu miau,+ ubayekola kwa asanzi muna nsi a kinkole. 5 Kufuki bi wau ko, ngatu yambula sumu diau diavunzuka vana ndose aku,+ kadi bavezele atungi.

6 I bosi, tukwamanene tunga e yaka. E yaka kiawonso kivuidi yikakiana, kitungulwilu yavana kati muna lá kwandi, kadi o nkangu ukwamanene kuyivana emvimba muna salu.

7 Kansi, vava Sambalati yo Tobiya+ ye Ayaraba+ ye Aneyamone y’esi Asedode,+ bawidi wo vo e salu kia tungulula yaka ya Yerusaleme kinungunukini, e mpwasi mu londwa zina, bafungidi kikilu makasi. 8 Yau awonso bavuende e mfulu, kimana beza nuanisa Yerusaleme, basia mo e mvuanga. 9 Kansi, tusambidi kwa Nzambi eto, tusidi ayingidi kimana batutaninanga fuku yo mwini.

10 Ayuda bavovele vo: “E ngolo za asadi* zisukidi, e lekwa yafwasakana se yingi; e yaka katulenda kio tungulula ko.”

11 Atantu eto bavovanga vo: “Ke bezaya wo ko ngatu kutumona, yavana tukubalwakila yo kubavonda, twaningamesa e salu kiau.”

12 Ayuda ana bazingilanga lukufi yo yau, bayizanga kutuvovesa vo:* “Bekutunuanisa muna ndambu zawonso.”

13 I dianu yasila ayingidi muna ndambu za yanda kuna nim’a yaka muna mpwasi, yabasia mun’owu wa makanda mau ye nsosolo ye maswanga ye mfumba miau. 14 Vava yamona vo bamwene wonga, vana vau ntelamene, mpovese azitu+ ye alandi a nguvulu ye ankaka muna nkangu vo: “Ke nubamoni wonga ko.+ Nuyindula Yave, ona una vo wanene ye wansisi;+ lunuanina mpangi zeno yo wan’eno amakala ye amakento, akazi eno ye nzo zeno.”

15 E mbeni zeto vava bawá vo e kani diau tuzeye dio, o Nzambi aludi wafungisa e kani diau, yeto awonso tuvutukidi muna salu kieto kia tungulula e yaka. 16 Tuka lumbu kiakina, e ndambu a matoko mame basalanga,+ e ndambu yankaka basimbanga maswanga ye ngubu yo mfumba ye yinkutu ya vita. Mfumu+ zasadisanga* nzo awonso ya Yuda 17 ana batunganga e yaka. Anati a mazitu basadilanga koko kumosi, muna koko kwankaka basimbanga e nuaninua. 18 Konso muntu muna atungi, ovuete nsosolo muna luketo ekolo katunganga, nsiki a mpungi+ okedi vana ndambu ame.

19 Mpovese azitu ye alandi a nguvulu ye ankaka muna nkangu vo: “E salu kiayingi ye kianene, twamwangana tuna muna yaka, twavavuka muntu yo nkwandi. 20 Avo nuwidi e zú dia mpungi, nuiza kutakana yeto. Nzambi eto okutunuanina.”+

21 I mpila yayi twasadilanga e salu, ekolo ndambu ya wantu basimbanga madionga vava kuma kwakianga yavana kiavaikanga ntetembwa. 22 Muna ntangwa yayina yavovesa nkangu vo: “Yambula akala awonso ye asadisi au bakalanga muna Yerusaleme mu fuku, bakalanga se ayingidi eto mu fuku, kansi muna mwini basalanga.” 23 Muna kuma kiaki, omono, mpangi zame, selo yame+ ye ayingidi ana bandandanga, ke twasobanga mvuatu ko, konso muntu wakalanga ye nuaninua kiandi vana koko kwalunene.