Nsiku

1 Mama i mambu mana Mose kavovesa Isaele yawonso muna zunga kia Yodani muna makanga, muna makanga mana matalana ye Sufa, vana kati kwa Parani, Tofele, Labani, Kaserote ye Dizabi. 2 (Avo muntu otukidi kuna Korebe kenda kuna Kadese-banea+ muna nzila ikwendanga kuna Mongo a Seyire, lumbu 11 kevanga.) 3 Muna mvu wa 40,+ muna ngonde ya 11, muna lumbu kiantete kia ngonde, Mose ovovese Aneyisaele* mawonso mana Yave kankanikina vo kabazayisa. 4 Ediadi diavangama vava kasunda Sikone+ wa ntinu a Aneyamore, ona wazingilanga muna Kesebone ye vava kasunda Onge+ wa ntinu a Basani kuna Ederei,+ ona wazingilanga muna Asitarote. 5 Muna zunga kia Yodani muna nsi ya Moabe, Mose oyantikidi sasila o Nsiku wau,+ oku vo:

6 “Yave wa Nzambi eto watuzayisa kuna Korebe vo: ‘Kolo kiayingi se nuina mu zunga+ kiaki kia miongo. 7 Nukubama, nuenda kuna zunga kia miongo kia Aneyamore+ ye kwa mfinangani zau zawonso muna Araba,+ muna zunga kia miongo, muna Sefela, muna Nengebe, muna nlambu a mbu,+ e nsi ya Anekenani, muna Lebanone,*+ yakuna nzadi anene, e nzadi a Uferate.+ 8 Tala, nsidi e nsi yayi ova ntadisi eno. Nukota, nuavua e nsi ina Yave kadila e ndofi kwa mase meno, Abarayama, Isaki+ yo Yakobo+ vo ovana yo kwa yau ye kwa mbongo au ikubalandila.’+

9 “Muna ntangwa yayina, omono yanuzayisa vo: ‘Kilenda kunufila mono mosi ko.+ 10 O Yave wa Nzambi eno unuwokese, o unu kiaki nuwokele nga ntetembwa za zulu.+ 11 Yambula Yave wa Nzambi a akulu eno kanuwokesa+ nkumbu funda vioka lutangu nuina o unu, yambula kanusambula wauna kanusila o nsilu.+ 12 Aweyi ndenda natina e zitu dia mambu meno yo zizidila e ntantani zeno+ mono mosi? 13 Nusola awana bena ye ngangu, balungalala ye bazikuka muna makanda meno, ikubatumbika se ntu vovo nuina.’+ 14 Oyeno nuamputula vo: ‘Dina utuvovese vo twavanga diambote.’ 15 Muna kuma kiaki, yabaka e ntu mia makanda meno, awana bena ye ngangu ye bazikuka yo kubatumbika se mfumu za mafunda, mfumu za nkama, mfumu za makumatanu, mfumu za kumi ye akengi muna makanda meno.+

16 “Muna ntangwa yayina yakanikina afundisi eno vo: ‘Avo wantu babakanene diambu vana vena o nkangu yo kwiza kwa yeno, nufwete fundisila e diambu muna unsongi,+ kiakala vana vena Aneyisaele wole yovo vana vena Nyisaele yo nzenza ozingilanga ova kati kweno.+ 17 Ke nusie mpambula ko muna mfundu.+ Mpila mosi nufwete wila o nkwa tunda yo muntu wakondwa e tunda.+ Ke numoni wonga wa muntu ko,+ kadi vava nufundisa, Nzambi nusunzula;+ avo e diambu diampasi kikilu kwa yeno, nufwete dio sunzula kwa mono, omono iwá dio.’+ 18 Muna ntangwa yayina, yanukanikina mawonso nufwete vanga.

19 “I bosi, twakatuka kuna Korebe, twaviokela muna makanga+ mawonso mampwena ye mansisi mana nuamona muna nzil’a zunga kia miongo kia Aneyamore,+ wauna o Yave wa Nzambi eto katukanikina. Kuna kwalanda, twalwaka kuna Kadese-banea.+ 20 I bosi, yanuvovesa vo: ‘Nulweke omu zunga kia miongo kia Aneyamore, kina o Yave wa Nzambi eto kekutuvana. 21 Tala, Yave wa Nzambi aku uven’e nsi. Tomboka, vua e nsi, wauna o Yave wa Nzambi a akulu aku kavovesa.+ Kumoni wonga ko ngatu vumiswa.’

22 “Kansi, yeno awonso nuamfinama yo vova vo: ‘Yambula twatuma wantu kuna ntwal’eto batulangila e nsi yo kututwasila e nsangu za nzila ina tufwete kwendela ye mpila mbanza tuwana.’+ 23 Yamona vo e ngindu zeno zambote, muna kuma kiaki yasola wantu 12 vovo nuina, mosi muna konso kanda.+ 24 Oyau bayenda, batomboka kuna zunga kia miongo,+ balwaka kuna Ndimb’a Esekole yo langa wo. 25 Babonga e yankaka muna bundu ya nsi yo kututwasila yo, batutwasila mpe nsangu, oku vo: ‘E nsi ina Yave wa Nzambi eto kekutuvana yambote.’+ 26 Kansi, oyeno ke nuazola tomboka ko, nuakolamena o nkanikinu a Yave wa Nzambi eno.+ 27 Nuayidimanga muna nzo zeno za ngoto, oku vo: ‘O Yave menga kekutumenganga i kuma katuvaikisila muna nsi ya Engipito katuyekola vana moko ma Aneyamore kimana batufukisa. 28 Nkia mpila fulu tukwendanga? E mpangi zeto batuyoyese*+ ntima, oku vo: “O nkangu una ko utusundidi o nene yo ntela, e mbanza zau zanene ye zazungwa e yaka yakuna zulu,*+ tumwene ko o wan’a Aneyanaki.”’+

29 “Muna kuma kiaki yanuvovesa vo: ‘Ke nuvumiswa ko ngatu mona wonga mu kuma kiau.+ 30 Yave wa Nzambi eno okunuvita o ntu yo nuana mu kuma kieno,+ wauna kavanga kuna Engipito vana meso meno.+ 31 Muna makanga, wamona una Yave wa Nzambi aku kanatina, wauna o muntu kenatinanga o mwan’andi, konso kuna nuayendanga yavana nulweke ova fulu kiaki.’ 32 Kana una vo i wau, ke nuakwikila muna Yave wa Nzambi eno ko,+ 33 ona wanuvitanga o ntu muna nzila kimana kasolola e fulu kina nusikidisa e ndo. Muna fuku, wamonekanga muna tiya, muna mwini, wamonekanga muna tuti muna kunusonga e nzila ina nufwete kangalela.+

34 “Muna kolo kiakina kiawonso Yave wawá mana nuavovanga, wakendalala yo dia e ndofi vo:+ 35 ‘Ke mosi ko muna mbandu yayi yambi omona e nsi yambote ina yadila e ndofi vo ivana yo kwa mase meno,+ 36 nanga vo Kalebe kaka wa mwan’a Yefune. Oyandi omona yo, ivana kwa yandi ye kwa wan’andi e nsi ina kadiete, kadi olende Yave yo ntima wawonso.*+ 37 (Yave wamfungila nkutu makasi mu kuma kieno, wavova vo: “Ongeye mpe kukota mo ko.+ 38 O Yosua wa mwan’a Nuni, wa selo kiaku,*+ yandi okota muna nsi.+ Unkumika,*+ kadi yandi ofila Isaele mu vua e nsi.”) 39 Vana ntandu, e yingiana-ngiana yeno ina nuvovele vo bekituka se sanzu+ yo wan’eno ana ke bazeye mbi ye mbote ko o unu, yau bekota mo, ikubavana e nsi se vua.+ 40 Vo i yeno, nuviluka, nuenda kuna makanga muna nzil’a Mbu Ambwaki.’+

41 “Muna kuma kiaki, oyeno nuampovesa vo: ‘Yave tusumukini. Owau, tutomboka yo nuana, wauna Yave wa Nzambi eto katukanikina!’ Muna diadi, konso muntu mu yeno wavuata e nuaninua yandi ya vita, edi nuabanza vo diambu diakete mu tomboka kuna mongo.+ 42 Kansi Yave wampovesa vo, ‘Ubavovesa vo: “Ke nutomboki ko yo nuana, kadi kikala yeno ko.+ Avo nuele ko, sundwa nusundwa kwa mbeni zeno.”’ 43 Muna kuma kiaki yavovana yeno, kansi ke nuawá ko. Nuakolamena nkutu nkanikinu a Yave, kuna lulendo lwawonso nuateza tomboka kuna mongo. 44 Aneyamore ana bazingilanga kuna mongo bavaika nga mbuinginina* mu wanana yeno yo kunukulanesa, banuyinganese muna Seyire yakuna Korema. 45 I bosi, nuavutuka yo yantika o dila vana ntadisi a Yave, kansi Yave kanuwá ko ngatu kunusia e sungididi. 46 Ekiaki i kuma nuzingilanga mu Kadese ekolo kiaki kiawonso.