Wanzole wa Paulu Kuna kwa Timoteo

3 Kansi zaya wo vo, muna lumbu yambaninu+ mukwiza nsungi zampasi ye vonza. 2 Kadi wantu bekala akwa kuyizola, minzol’a nzimbu, akwa lusanu, akwa lulendo, akwa lutiangu, akolamini a mase ye ngudi, ntokozi,* minkondwa kwikizi, 3 minkondwa nzol’a ungudi, minkondwa ngwizani, akumbi, minkondwa volo, akwa nganzi, mindembi zola mawete, 4 ayekodi, akwa mpaka, bazola kuyitundidika, azodi a nkembo ke mu Nzambi ko, 5 bekala nze yau bevuminanga Nzambi, kansi bebembola o nkum’a vumi wau;+ wantu awaya ubavengomoka. 6 Muna wantu awaya i mutukanga akala bevumvulanga muna nzo zangani kuna ndekwa yo bunduna akento atovoka ana bazele ye masumu yo filakeswa kwa zolela ya mpila mu mpila, 7 belongokanga ntangwa zawonso, kansi yau ke bavue zayi wasikila wa ludi.

8 Wauna Yane yo Yambere batelamena Mose, wantu awaya mpe betelamenanga e ludi. E nyindu miau miayiva kikilu, ke bafwana ko mun’owu wa lukwikilu. 9 Dianu vo, ke benungunuka diaka ko, kadi uzowa wau utomene moneka kw’awonso, wauna wakala kwa Yane yo Yambere.+ 10 Kansi, ongeye watoma landa malongi mame, mpila zingu kiame,+ kani diame, lukwikilu lwame, ntim’ame a vunda, nzol’ame ye luzindalalu lwame, 11 lubangamu ye mpasi nze zina yamona kuna Antiokia,+ Ikonio+ ye Luseta.+ Yazizidila lubangamu lwalu, o Mfumu wampuluza muna mpasi zazi zawonso.+ 12 Dianu vo, awonso ana bazolele vumina Nzambi muna zingu kiau, muna Kristu Yesu, bangikwa mpe bebangikwa.+ 13 Vo i wantu ambi ye akwa luvunu, besakisa vanga o bi, bevukumuna ankaka yo vukumunua mpe.+

14 Vo i ngeye, kala kaka muna mambu walongwa yo kwikidiswa,+ wau ozeye awana balonga mo, 15 tuka muna kinsedia+ ozeye sono yavelela,+ ina ilenda kuvana ngangu yamuna luvuluzu muna lukwikilu muna Kristu Yesu.+ 16 Sono yawonso yavumunuinua kwa Nzambi,+ yamfunu muna longa,+ muna tumba, muna singika mambu, muna ludika kuna unsongi,+ 17 kimana muntu a Nzambi kakala watoma fwana yo toma kubamena muna mavangu mawonso mambote.