Una Tulenda Yantikila e Moko Muna Sadila e Tratado

Tuka muna ngode a Yanuali ya mvu wa 2018, vana fukwa kia finkanda Zingu ye Salu Kieto kia Kikristu Nkand’a Malongi, vayantika siwa e ndekwa tulenda sadila muna salu kia umbangi. Tukasakeswanga vo twasianga e sungididi mu mokena yo wantu vana fulu kia kubakayila kaka e nkanda. Muna sadisa ateleki basobanga e moko yau, e video za nsunzula zaleboka zisonganga una tulenda yantikila e moko muna sadila kaka e Bibila. Nga ediadi disongele vo ketufwete kaya nkanda ko vava tukalanga mu salu kia nzo ke nzo? Ke wau ko. Kasikil’owu, o sadila e tratado dilenda kala se mpila yambote ya yantikila e moko. Tulenda sadila e ndekwa zilende vava tukayanga e tratado:

1. Vanga e kiuvu kina vana fukwa kia tratado.

2. Songa e mvutu za Bibila muna sadila e sono kina muna tratado. Avo muntu una ye ntangwa, olenda tanga e maka mambu mena muna tratado yo mokenena mo.

3. Vana e tratado kwa muntu, i bosi unkasakesa katanga yawonso vava kekala ye ntangwa.

4. Vitila wansisa, unsonga vana vasonama, “Kiuvu Olenda Badika,” i bosi, vanga e nkubika za badika e mvutu za Bibila muna nkingula ilanda.

Vava ovutuka kunkingula nubadika e mvutu, i bosi sisa diaka e kiuvu kiankaka nubadika muna nkingula ilanda. Olenda sola kiuvu kina muna nzil’eto ya Internete yovo kia nkanda una vana lukaya lwansuka lwa tratado. Vava okala ye lau, umvana e finkanda Nsangu Zambote Zitukidi kwa Nzambi! yovo nkanda wankaka una muna Salanganu Yeto ya Longela.