UNA OLENDA YAMBULWILA E FU KIA MENGA AKAKA

2 | Kulandi Kunda Ko

Bibila kivovanga vo:

“Ke nuvutula muntu mbi muna mbi ko. . . . Avo dilendakana, kuna dieno sambu, nukadila kuna luvuvamu yo wantu awonso. . . . ke nulandi kunda ko . . . ; kadi diasonama vo: ‘“Diame dia landa e kunda; mono isenda,” u kavovele o Yave.’”—ROMA 12:17-19.

E sono kiaki aweyi kisongele?

Kisongele vo tulenda funga makasi avo muntu utuvangidi e mbi, kansi o Nzambi kazolele ko vo twavutula e mbi kwa muntu utuvangidi yo. Nzambi ozolele vo twasonga luzindalalu, kadi oyandi wasia nsilu vo ke kolo ko osingika mambu mawonso mambi.—Nkunga 37:7, 10.

Aweyi e sono kiaki kilenda kusadisila?

Vava o wantu a lembi lunga belandanga e kunda, ediadi diwokesanga e fu kia mengaziana. Muna kuma kiaki, avo muntu uvangidi e mbi, kulandi kunda ko. Sia e ngolo za vova yo vangila mambu kuna luvuvamu. Ezak’e ntangwa diambote mu vilakana dina divangamene. (Ngana 19:11) Kuna diak’e sambu, dilenda kala diambote mu zayisa diambu divangamene. Muna bonga e nona, avo diambu dikululanga o nsiku ovangilu, olenda dio zayisa kwa mapolisia yovo kw’awana bevitanga o ntu.

O mengaziana mfwilu miayingi kutwasanga

Adieyi ovanga avo omwene vo ke vena ye mpila ya luvuvamu ko yasingikila e diambu? Yovo adieyi ovanga avo ovangidi kala mawonso olenda muna singikila e diambu diodio kuna luvuvamu? Kulandi kunda ko. Kadi, olenda sakisa e mambu. Kansi avo ovengele e fu kia landa e kunda, disadisa mu venga e fu kia mengaziana. Bunda e vuvu muna mpila ina o Nzambi kesingikilanga o mambu. “Umbunda e vuvu, yandi ovanga mambu muna wete diaku”—Nkunga 37:3-5.

Lusansu lwa—ADRIÁN

Wayambula e Fu kia Landa e Kunda

Muna kileke, Adrián nkwa makasi kakala ye wakala ye fu kia menga akaka yo vutula e mbi kwa konso muntu wavanganga e mbi. Wavova vo: “Yalongoka sadila nkele yo kota mu nkindu za buka. Nkumbu miayingi yayondalalanga yo menga yo lwaka muna tezo kia moyo yovo lufwa.”

Adrián wayantika longoka e Bibila vava kakala ye mvu 16. Wavova vo: “Ekolo yanungunukanga muna longi diame dia Bibila, yabakula vo mfwete soba e mpila zingu kiame.” Diavavanga vo kayambula e fu kia menga akaka yo mavangu mansoki. E diambu diatoma kunsadisa i dina kalongoka muna Roma 12:17-19 vo, ke tufwete landa kunda ko. Wavova vo: “Yatambulwila muna ntim’ame vo Yave osinga fokola mambu mawonso ma kondwa unsongi, ovanga wo muna mpil’andi ye muna ntangwa andi. I bosi, malembe-malembe yayantika soba e mpila zingu kiame.”

Lumbu kimosi muna fuku, Adrián wanuaniswa kwa buka kia aleke ana banuananga yau. O mfidi a buka wavovesa Adrián vo: “Uyitanina!” Adrián wavova vo: “Muna kolo kiakina yazola vutula.” Kansi vana fulu kia landa e kunda, Adrián wavanga e sambu kia nkufi kwa Yave yo katuka vavana.

Adrián wakudikila vo: “Muna lumbu kialanda, yawanana yo mfidi a buka kiakina yandi mosi kaka. Vava yamona yafunga makasi, yazola kunlanda e kunda, kansi yasamba diaka kwa Yave kimana kansadisa yavengomona e ngindu zazina zambi. Yabanza vo oyandi mpe makasi kefunga, kansi yasivika vava kayiza yo kumpovesa vo: ‘Undoloka mu kuma kia dina divangamenenge o zono muna fuku. Muna vova e ludi, omono mpe nzolele kala nze ngeye. Nzolele longoka e Bibila.’ Yatoma yangalala wau vo yalenda simbinina makasi mame yo lembi vanga diambu diambi. Tuka wauna, twayantika longoka e Bibila kumosi.”