Nga Olungisanga Emvimba e Salu Kiaku kia Umbangi?
1 Muna nkanda Mavangu, tuzayiswanga vo alongoki a Yesu balungisanga e salu kiau kia samuna e nsangu zambote muna “silanga umbangi” kwa wantu. (Mav. 2:40; 8:25; 28:23) Ediadi diakalanga ekani dia Paulu wa ntumwa. (Mav. 20:24) Nga ke diau ko ekani diaku nze nteleki a nsangu zambote? Aweyi olenda dio lungisila?
2 Kubika Mana Ovova: O kubama mfunu kwina muna sila umbangi mu mpila yambote. Ediadi mfunu kibeni dikalanga ke musungula vava tukayanesanga e yinkanda-nkanda, wau vo itwasanga malongi maswaswana. Muna kutusadisa una ufwene, mukotesw’e diambu diampa muna Salu Kieto kia Kintinu kia ngonde yayi—muna lukaya lwantete vena ye nsunzula za moko yamfunu zilenda sadilwa muna kayanesa e yinkanda-nkanda ya Sentinela ye Despertai! Konso Salu Kieto kia Kintinu kiyik’o mambu mamfunu mana meyangidikanga ndonga ya wantu. Aweyi olenda tomesena e nsunzula zazi?
3 Sola e nsunzula zina zilenda twasa e nluta miambote muna zunga kiaku. Tanga elongi, sia e nsisu kia mambu mamfunu malenda wokes’o luzolo lwa muntu mu wá. Vava e sono ya Nkand’a Nzambi ina iyikilu muna yinkanda-nkanda yayi olenda tanga yo mwisi nzo. Kasakesa mwisi nzo muna tanga e yinkanda-nkanda yayi, kele vo mfunu unzayisa vo olenda kwandi vana o lukau mu kuma kia salu kia Mbangi za Yave kisalwanga omu nz’amvimba. Owau, teza mana ovova.
4 Vavang’o Sadila o Nkand’a Nzambi: Muna nkubama yambote olenda sadila o Nkand’a Nzambi muna moko kiaku. Kasikil’owu, ateleki azikuka muna fulu yayingi bebakanga e nluta muna sadila o Nkand’a Nzambi muna konso nzo bekingulanga muna kaisanga mwisi nzo yo vova:
◼ “Wantu tuyuvulanga kana vo bekwikilanga muna diambu diadi. . . ” Tanga Etuku 1:1, i bosi yuvula: “Nga okwikilanga muna mvovo wau?” Kele vo o muntu otambulwidi, i bosi vova vo: “Mono mpe ikwikilanga dio. Ng’okwikilanga vo o Nzambi yandi wavanga e lekwa yawonso ye mpe otwasanga e mpasi?” Vava o muntu kevana e mvutu, tanga Kimpovi 7:29. Ziula o nkanda Zayi muna lukaya lwa 71 ye tanga e tini kia 2. Kasakesa o muntu katanga o nkanda wau. Kele vo o mwisi nzo ke kwikilanga mvovo mia Etuku 1:1 ko, umvovesa katang’o nkanda Criação.
5 Vutukil’o Kingula Awonso Basongele Luzolo lwa Wá: Kulenda lungisa emvimba ko e salu kiaku kia umbangi kele vo kuvutukidi kingula ko ana basongele o luzolo. Kele vo omokene yo muntu ye unsisidi yinkanda-nkanda yovo konso nkanda wakaka, soneka e nkumbu andi ye fulu kezingilanga. Sia e sungididi kia wokes’o luzolo lwa muntu muna vutuka kunkingula mu nzaki zawonso. I sia vo longoka yandi o Nkand’a Nzambi.
6 Akristu a tandu kiantete bazayanga oma kabakanikina o Yesu vo “basila mvimba o umbangi.” (Mav. 10:42) Owau i nkanikinu mpe uvanwanga kwa yeto, kadi mu mpila yayi kaka tulenda kitulwila o wantu se alongoki. (Mat. 28:19, 20) Mbula twasi’e ngolo muna lungisa emvimba e salu kieto kia umbangi.—2 Tim. 4:5.