‘Vwamina Muna Mavangu Mambote’

¹ Muna mvu miansuka mia salu kiandi kia vema kia umbangi, o Paulu wa ntumwa wasalanga entwadi yo Timoteo ye Tito. Wasoneka mvovo mia lukasakeso kwa konso mosi mu yau. Wavova kwa Tito vo “awana bekwikila Nzambi” bafwete “vanga mavangu mambote.” (Tito 3:8) Wavova kwa Timoteo vo awana besianga e vuvu kiau kwa Nzambi bafwete “vwamina muna mavangu mambote.” (1 Tim. 6:17, 18) Ediadi i longi diamfunu kwa yeto awonso! Kansi adieyi dilenda kutukasakesa mu vanga mavangu mambote mu zingu kieto? Ye nkia mavangu tufwete vanga mu lumbu ikwiza?

² O lukasakeso lwa vanga mavangu mambote lutukanga muna lukwikilu lweto, zola kwa Yave ye vuvu ki’esivi kekutuvananga. (1 Tim. 6:19; Tito 2:11) Musungula mu kolo kiaki kia mvu, tusungamenanga o Yave watwika Mwan’andi ova ntoto, kimana katundidika o S’andi ye kubika e nzil’a moyo kwa wantu awonso bafwana. (Mat. 20:28; Yoa. 3:16) Ediadi ditoma songwa muna Luyindulu lwa Lufwa lwa Kristu kina kia 28 kia Malusu. Mun’owu wa vuvu kia moyo a mvu ya mvu tuna kiau, nga ke tukasakeswanga ko mu vanga mawonso tulenda kimana twa “vwamina muna mavangu mambote”? Elo! Nkia mavangu tufwete vanga owau?

³ Mavangu Mambote Tufwete Vanga Muna Malusu ye Kuna Ntwala: Kieleka vo, tulungana muna Luyindulu—eyayi i nsungi isundidi o mfunu muna konso mvu kuna kwa Mbangi za Yave omu nz’amvimba. (Luka 22:19) Kansi tuzolele kaulwila e kiese kia ntangwa yayi yo wantu ayingi avo dilendakana. Tala e nsangu za salu muna Anuário ya 2002, omona vo muna nsi zayingi omu nz’amvimba, o lutangu lwa awana balungana mu Luyindulu, lwasunda o lutangu lwa ateleki. Kieleka vo ngolo divavanga kwa awonso muna nkutakani mu kayanesa e mboka za Luyindulu muna zunga yawonso. Mu kuma kiaki, tufwete vaula ntangwa yayingi ina tulenda tuka owau ye kina kia 28 kia Malusu muna bokela wantu balungana muna Luyindulu ye kubasadisa balongoka mu kuma kia vuvu kia luvuluku.

⁴ Vava tulwaka mu ngonde ya Abidi, nanga tuyantika sadila e ola za fuku ye nsungi zambote. Aweyi tulenda toma sadila e nsungi zazi kimana twa “vwamina muna mavangu mambote”? Muna kwamanana lungana yo kiese muna salu kia samuna e nsangu zambote ye kala “akw’etima dia mavangu mambote.” (Tito 2:14; Mat. 24:14) Avo ke wafwana ko mu kala se mviti a nzila a nsadisi mu Malusu, nga olenda wo vanga muna Abidi yovo muna Mayu? Kele vo osadidi kala se mviti a nzila a nsadisi mu Malusu, nga olenda landakana osala?

⁵ Wantu akaka besadilanga muna makompani bamona vo balenda kwau sala ola mosi yovo lutila imosi mu silanga umbangi ekolo bekangalanga kuna kisalu yovo kingulanga o wantu besadilanga muna nzo za kinkita zizibukanga mu mene. Akaka besadilanga ntangwa ya diá kwa mwini muna silanga umbangi. Ovo i akaka bemonanga vo diafwana muna fila elongi dia Nkand’a Nzambi mu ntangwa yoyo ye nkundi a salu. Mpangi zayingi z’akento ana basompa bevaulanga ntangwa yafwana muna salu kia umbangi vava wan’au bekwendanga kuna sikola. Yak’e lumbu besikamanga mu menemene muna sala e salu yau ya nzo ye bekalanga ye ntangwa yayingi muna sala e salu kia umbangi ye kia longa mu masika.—Ef. 5:15, 16.

⁶ kanele vo, ke nuafwana ko mu kala se aviti a nzila a nsadisi, nanga nulenda vanga e nkubika za yeno kibeni muna sala una ufwene mu salu kia umbangi yo vanga mawonso nulenda ‘nuavanga mawete, nwavwamina muna mavangu mambote, nwakala akwa ngemba, nwakawulwila kuna mvevo’ [NW] eludi kwa wantu akaka.—1 Tim. 6:18.

⁷ Sungamena e Salu kia Mbote kia Kitula Wantu S’alongoki: Konso mvu o wantu a luzolo lwambote belungananga mu Luyindulu. Nga dilendakana kwa aka wantu muna nkutakani bavana lusadisu kwa awana belungananga bena vo ke alongoki ko? Nga bafwete vutukilwa kingulwa ye kani dia kubasadisa mu sia vo banungunuka muna mwanda? Dilenda kala vo wantu akaka belungana kuna Luyindulu bena yitu ya Ambangi. Akaka nanga balongokanga kuna nkulu, lukasakeso kaka bavwidi o mfunu muna vutuka longoka diaka ye lungananga muna tukutakanu ntangwa zawonso. Nkia mpila kiese dikutuvana omona vo bakitukidi se selo yasikila ya Yave kumosi yo yeto!

⁸ Muna wokesa e salu kia umbangi mu Malusu ye kuntwala, nanga tusolola akwa luzolo lwambote ana bafwete vutukilwa kingulwa. Vava kubasisila kiuvu. I bosi sia nsilu vo ovutuka muna kubavana e mvutu mu nkingula ilanda. Avo tuvangidi wo tukubika e nzila muna nkingula ilanda. Diamfunu vutukila kingula o muntu vana vau. Kele vo ke tulendele yantika elongi muna nkingula yantete ko, tulenda dio yantika muna nkingula ilanda avo mawonso malendakana.

⁹ Vava tukuyivananga mu salu kia umbangi muna nzila tufwete vavanga yantika mokena yo wantu. Ateleki ayingi betambulanga e nkumbu, fulu kia zingila ye lutangu lwa telefone lwa wantu besonganga luzolo lwambote ana bemokenanga yau ekolo besilanga umbangi muna nzila. Avo o muntu omokene yandi ke zingilanga mu zunga kiaku ko, ofwete zayisa o nsoneki a nkutakani kimana vo kamfila kuna nkutakani ya zunga kiandi. Kele vo o nsoneki ke fwana vanga wo ko, kafwete yo twika kuna filiale. Mu mpila yayi o luzolo lulenda yimwa.

¹⁰ Avo muntu lutangu lwa telefone kavene kansi kavene fulu kia zingila ko, e nkingulwa ilenda vangilwa muna telefone. Teka kubika ntangwa ozolele mokena yandi. Kala yo nkanda Raciocínios vana moko muna fimpa wo yo nzaki. Wantu akaka bevwanga e ndandu zambote muna longokanga yo wantu mu telefone, kumosi ye awana balembi wanukanga muna nzo. Mpangi mosi wakento walomba lutangu lwa telefone lwa nkento mosi wasonga luzolo lwambote kawanana yandi muna salu kia nzo ke nzo, mu kuma kiaki wa yantika fila elongi dia Nkand’a Nzambi yo wantu wole.

¹¹ Sala Kumosi y’Akuluntu Muna Sadisa Ateleki Ana Bayambula Samuna e Nsangu Zambote: Akuluntu bavwidi luzolo lwa sadisa wantu awaya. Wantu ayingi muna awaya, mu kani dia yau kibeni bevutukanga lungana muna tukutakanu twa nkutakani. Muna kala ye luvuvamu lwa kimwanda luyikwanga muna Nkunga 91 bafwete kala entwadi ye nkubika a Yave. Akaka benanga bakubama owau muna lungana mu salu kia umbangi. Avo ateleki akaka bayambula samuna e nsangu zambote balungane kuna Luyindulu mu ngonde yayi, nanga balenda kwau tonda elongi dia Nkand’a Nzambi dia yau kibeni. Akuluntu bafwete vanga nkubika kimana nteleki mosi kalongoka ye ona ovwidi mfunu a lusadisu. Kele vo balombele mu vana lusadisu lwa mpila yayi, o lusadisu lwaku lutondwa kikilu.—Roma 15:1, 2.

¹² Kwamanana “Vanga Mavangu Mambote”: Engi basala e salu kia kimviti a nzila a nsadisi mu ngonde imosi yovo zayingi basolola vo e salu kiau kia umbangi kia wokela mu ngonde zalanda. Oyau bawanana yo wantu bafwete vutukilwa kingulwa. Ediadi dikubakasakesa mu sia e ngolo zavaikanga mu salu kia umbangi nkumbu miayingi muna vutuka wanana yo wantu basonga luzolo lwambote. Akaka bayantika longoka yo wantu, ediadi dikubasadisa mu toma lungana mu salu kia umbangi.

¹³ Wantu akaka besololanga kiese kiayingi muna salanga kwayingi mu salu kia umbangi ye kia kitula wantu se alongoki, bekumikwanga mu fimpa e salu kifwete siwa vana fulu kiantete. Mu kuma kiaki, akaka bekululanga e ntangwa ya salu kia kompani mu kota mu salu kia kimviti a nzila a nsadisi. Akaka bekotanga mu salu kia kimviti a nzila a ngonde ke ngonde. Oyau bafwana osia e vuvu kiau kwa Nzambi ke mu lekwa ya nza ko. Basolola vo “okawulwila kuna mvevo ye kal’akwa ngemba” kutwasanga nsambu za Yave yo siamisa e vuvu kiau kia tambula “moyo wakieleka.” (1 Tim. 6:18, 19, NW ) Ozevo, avo tuyivene mvimba mu salu kia kimviti a nzila e nkutakani yawonso yitambulanga e ndandu. Aviti a nzila bavwidi fu kia yika experiência zau ye bokela akaka basalanga yau muna salu kia umbangi, ediadi diwokesanga e nkal’ambote ya kimwanda kia nkutakani.

¹⁴ Mbula yeto awonso twa ‘vwamina muna mavangu mambote’ mu kolo kiaki kia Luyindulu ye kuna ntwala muna wokesanga e salu kieto kia Kikristu. Mbula twasonga o luyangalalu lweto kwa Yave ye mawonso kevanganga muna kutuvana e vuvu kia zingila muna nz’ampa ya ndungidi yakwele mvu.—2 Pet. 3:13.